الاثنين، 28 يناير 2008

تاج مجلس الشعب

بسم الله والصلاة والسلام علي رسول الله
تاج مجلس الشعب ,التاج ده وصلي مرتين مره من حبيب قلبي البشمهندس مصري ومره من ايمي وكوكا ,وانا بعتذر جدا عن تأخير التاج بس لان اليعقوبي كان مطحون في الامتحانات وبما انه خلص فالنت فصل عنده وهو نفسه انشغل في شوية حجات فقولت لو استنته مش هنجاوب الا لما نطلع علي المعاش فاانا هجاوب حالا وهو بعد يومين تلاته هو وظروفه بقي ربنا يديله طوله العمر0والله المستعان
دخلت مجلس الشعب من اوسع ابوابه ايه هو رمزك الانتخابى المفضل ؟
رمز السيف
كنت تفضل الدخول مستقل او تتبع حزب معين ؟؟؟؟
الاخوان المسلمين
هو انا دايما بقول ان الاصلاح ينطلق من مجموعه وليس فرد وان كل ماتوحدت الافكار والجهود لانجاز عمل معين ومحدد كان افضل وحتي في سنن التغير في الارض نجد ان التغيير يقوم به مجموعات لهم قائد وانه في هذا العصر يصعب جدا ان يحدث التغيير فرد واحد نظرا للفتن والصراعات وغيره فعندما توجد مجموعه صعب جدا ان تخترق اوتحدد
اذا دخلت مستقل هل توافق على التوقيع للحزب الوطنى بعد نجاحك كمستقل ؟
نعم ايه حزب مين 0ينهار ابيض ده انا اموت ومعملهاش ده مش لو دخلت مستقل ده لو دخلت محتل برده مش هقرب منه ربنا يعافينا يارب
اول حاجه هتعملها لنفسك ولاسرتك ؟
ان شاء الله مش هاعملهم اي حاجه اكتر من اللي هاعمله للناس زيهم زي اي حد اما نفسي ان شاء الله مش هاحاول استفيد تماما من منصبي قدر المستطاع طبعا انا هنا باتكلم عن الاستفادات المشروعه اما الغير مشروعه نسئل الله العفو والعافيه0وعايز اقول حاجه ياجماعه ان المناصب تغير والكراسي تغير فنسئل الله العون ونتوكل عليه حتي يعصمنا من هذه الفتنه
ايه المشروع اللى ناوى تعمله لاهل دايرتك ؟
ان شاء الله هنهتم بالمشروعات الصغيره لانها تقضي علي نسبه كبيره من البطاله وتفيد الاقتصاد وعندكم دوله زي الصين اقتصادها قائم علي المشروعات الصغيره وطبعا المشروعات التي تخدم الناس بشكل مباشر هنحاول نحسنها زي المستشفيات والصرف وغيره
قعدت فى المجلس جنب نائب مميز . من هو النائب ؟
اكيد اي حد من اخوانا بس انا بحب الاستاذ علي لبن والشيخ سيد عسكروكان نفسي يدخل الشيخ حازم صلاح بس نعمل ايه بقي في شعبية امال عثمان الطاغيه اللي جالها حوالي 10000 الاف صوت في ليله واحده ربنا يوفقها
قدمت سؤال للحكومه ايه هو السؤال ؟
هي بصراحه مش عايزه سؤال واحد هما ممكن يكونوا 20 ,50 ,100
علشان بس الواحد يقدر يفهم احنا رايحين فين يعني عن خطط الاصلاح وتشغيل الشباب وتحسين الاقتصاد واهم سؤال ايه هي الخطه اللي ماشيين بيها في سبيل النهضه والخطه دي قائمه علي اي اساس
وممكن في الاخر اقول لما تقابلوه ربنا وتتسئلوا عن مافعلتم في البلد هتقولوا ايه
طلب احاطه موضوعه ايه ؟ وبتقدمه لمين ؟
هو نفس اجابة الصباغ عن احتكار الحديد
عم احمد عز اللي خرب البلد في الاقتصاد والسياسه يعني هو احتكر الحديد والشركات الجنبيه تقريبا خلاص احتكرت الاسمنت ناهيك عن الادويه مفيش واحد متبرع ابن حلال يحتكر البلد ويخلصنا
استجواب لاتنين من الوزراء موضوعه ايه ؟ وبتستجوب مين ؟
ياااااه وزيرين بس
طب انا عايز اسئل وزير الداخليه عن الشرطه هما مع مين هما معانا ولا علينا هومين الحرامي ومين البوليس والله صدقا بس حتي علشان اعرف اخلي ولادي لو خلفت يعني يلعبوا بوليس وحرامي كويس ميتلخبطوش
ووزير الصحه هو ايه اللي حصل هو الناس بتاخد علاج ولابتريحوهم بدري وليه المستشفيات تحولت الي ثكنات عسكريه وليه الدكاتره اتنزع من قلوبهم الرحمه طبعا مش كلوهم يادكتور حر ويادكتورخالد وليه بقت الفلوس اغلي من الانسان,ووزير الاعلام والتربيه والتعليم ووزير الاسكان والنقل
وطبعا عمهم الكبير وزير الماليه اللي طلع صوت زي الستات لما رئيس الجهاز المركزي للمحاسبات قال التقرير السنوي وكان صريح حبتين فالراجل مستحملش الكلام ده فقلب الدنيا
والله كل مسئول في البلد من الكبير للصغير عايز استجواب
انت مع الخصخصه ؟
طبعا مش مع الخصخصه كده بشكل مطلق ,هو انت اصلا عندك اقتصاد علشان تقولي خصخصه ,طب وهتحمي اقتصادك ازاي ,هو اصلا من اسباب الخراب الخصخصه لان انت معندكش درع يحميك من عواقبها يعني مثلا شوف طن الاسمنت بقي بكام طب ليه علشان الخصخصه فالشركات الاجنبيه دخلت السوق والان تحتكر 62%من الاسمنت وشوف الحديد طبعا نتج عنهم ارتفاعات رهيبه في سعر المباني والشقق والادويه وغيره ,فالمفروض تحدد ويبقي هناك قوانين ملزمه ونلغي الاحتكار تماما ونعمل صناعات وطنيه حتي نحدث توازن وبلاش الهطل والصرف علي البلاهه والتخلف من الصرف علي الحفلات والبطولات والمهازل دي وفي ناس بتموت من البرد
يابلادنا ياعجيبه فيكي حاجه محيراني:::نزرع القمح في سنين يطلع القرع في ثواني
هل انت مع قطع العلاقه مع اسرائيل ؟
اسرائيل !هو في حاجه اسمها اسرائيل ,طبعا مفيش علاقه مع الكيان الصهيوني المغتصب حتي يرحل عن ديار الاسلام والمسلمين ,هو لايجوز شرعا اصلا ان تقيم علاقه مع كيان معادي يقتل المسلمين بل وبعض العلماء قال انها خيانه لله وللرسول ,وارجعوا الي اصول المعاهدات في الاسلام ونعرف اذا كان يجوز ام لا .والموضوع ده ممكن يطول مننا اوي بس هناك اصول لعقد المعاهدات والتحالفات في الاسلام مستنبطه من القران والسنه ممكن الرجوع اليها
هل تؤيد مرور الامريكان فى القناه ؟
اذا كانت سفن تجاريه .فما المانع
اما اذا كانت سفن حربيه لقتل المسلمين افضل ان نغرقها في القناه
هل انت مشترك فى مؤامره كسر فرنسا هانم بالاشتراك مع ام دبوه ؟
لاياعم ربنا مايجعلنا من قطاعين الارزاق
-----------------------------------------
وجزاكم الله كل خير ياجماعه لاننسي اهل غزه من الدعاء يقول الحسن البصري وكأنني بالاسلام يوم القيامه بين معز ومذل حتي يأتي الي عمر ويقول يارب كنت غريبا حتي اسلم هذا0فأي الرجلين انت ان لم نعز الاسلام فلانخذل الاسلام
فستذكرون مااقول لكم وافوض امري الي الله ان الله بصير بالعباد

هناك 29 تعليقًا:

Unknown يقول...

انا اول تعليق يعني تشوفني بشغلانه يا سعادة النايب
و انا هادخل المجلس و هانبقي زمل و اكمل غلاسه عليكوا تحت قبة البرلمان

سلامي لليعقوبي و ربنا معاه

تحياتي

عصفور المدينة يقول...

جميل يا بني ربنا يبارك فيك

ان الاصلاح ينطلق من مجموعه وليس فرد وان كل ماتوحدت الافكار والجهود لانجاز عمل معين ومحدد كان

افضل

وحتي في سنن التغير في الارض نجد ان التغيير يقوم به مجموعات لهم قائد وانه في هذا العصر يصعب جدا ان يحدث التغيير فرد واحد

===========
طب ما تيجي نضايفك عندنا هنا جنب حبايبك
:)

Dr.khaled يقول...

نعم....
فيه حاجة يعني؟؟

جايب اسمي في التدوينة ليه...

بس الله يكرمك...لما تمسك
بس قول لهم..خالد هيتجوز قريب ان شاء الله..
وعايزكوا بس تزودوا المهية شوية...
يعني بدل ما هيا 250 يخلوها حتى 300
اهو بالخمسين جنيه الفرق دول اجيب شمبوهات وكريمات لشعري اللي مليان قشرة...

نقوم بقى نصلي الفجر :)

عاشــــــ النقاب ـقــــة"نونو" يقول...

تعرف انا لا انتخب مش علشان ما عنديش بطاقة لاني ماعرفش اللي هنتخبه اصلا
بس اذا رشحت نفسك هنتخبك
بارك الله فيك

Unknown يقول...

استاذه ايمي
اهلا بحضرتك
شغلانه ايه بقي نائبه مجلس شعب وعايزه شغلانه المفروض انتي اللي بتشغلي الناس
وبعدين غلاسه ليه مش هتبقي في المعارضه والا هتبقي معاهم ربنا يستر
وجزاكم الله خير

Unknown يقول...

استاذي الحبيب
دائما منورني والله
طبعا طنطا فيها ناس تقال اوي
ربنا يبارك فيك وفيهم
بس انا فين وهما فين يااستاذنا
ربنا يستخدمنا جميعا لنصره هذا الدين
وجزاكم الله كل خير

Unknown يقول...

دكتور خالد
حبيب قلبي
جايب اسمك يافندم علشان اشرف بيك البوست
وبعدين اصبر شويه دلوقتي 250 جنيه يومين وهتفتح عياده وتاخدهم في الساعه
وبعدين انصحك استعمل شمبو الجعفري ب75 قرش وبيشيل الشعر خالص ومش هتلاقي شعر ولاقشره وكله بثوابه
وجزاكم الله خير

Unknown يقول...

اختنا عاشقة النقاب
والله من رؤيتي اننا نعمل بطاقات انتخابيه علشان نقدر نتفاعل داخل المجتمع اكتر ونحاول نقدم جميع الاعذار لله عزوجل في الاصلاح بغض النظر عن الاشخاص
ووالله اتشرفنا جدا بتعليق حضرتك
وتشريفك للمدونه
وجزاكم الله خير

مهندس مصري بيحب مصر يقول...

و أخيراً و بعد ده كله جاوبت لوحدك
طيب ما كان اليعقوبي يقعد معاك في بيتكم قعدة حلوة و تجاوبوه مع بعض

ماشي شيل التاج اللي بعده عندي لو حبيت

و مدونة عاصفة النار اتعملت و اتنست و شكلها كده حتدبل و تموت من عدم الإهتمام

بنت الصالحين يقول...

والله اجابات حلوه
بقولك ايه انتخب نفسك
شكلك كده نائب حلو والله وهتعدلنا المايل في البلد


ربنا يكرمك ويوفقك انت واليعقوبي

بنت الصالحين يقول...
أزال المؤلف هذا التعليق.
صانعة الحرية يقول...

السلام عليكم
اولا ياريت تطمنا على اخونا اليعقوبى
مش بنشوفه من زمان
=-============
ثانيا
عجبنى اوى سؤال الحزب الوطنى
رغم ان كتير والله يفعلون ذلك وحسبنا الله ونعم الوكيل
=-===========
اما عن عمى الحاج على لبن وحبيبى فى الله وشيخى سيد عسكر
فكلنا نحبهم وكم يعلم الله ذلك
وخاصة الشيخ سيد عسكر
لما بحضرله لقاء ببقى سعيده جدا
وبيخلينى اتفائل بعلمه وخفة ظله
اشعر اانى فى حضره عالم جليل يعى دينه جيدا لازم اكتب وراه كل اللى بيقوله
لدرجه انى بحس ان الاخ اللى على المنصه شاكك فيه ههههههه لولا انى ببقى قاعده مع عليه القوم
واشعر انهم من انشط الاعضاء فى المجلس
ربنا يثبتعم يارب ويجعل كل ما يلاقوا فى ميزان حسناتهم
===========
وابقى اترشح عندنا علشان نعرف نعطيك صوتنا

غير معرف يقول...

السلام عليكم ورحمة الله وبركاتة
ما شاء الله الاجابات رائعة بصراحة ولو كل واحد من اعضاء مجلس الشيعب عمل كدا يبقى يا هنا وسعد البلد بية اقصد اهل البلد بية يعنى الشعب الغلابة بس للاسف محدش من الحزب الوطنى هيسيبك فى حالك ولا زوار نص الليل هيتهموك بتهمة خطييييرة وهى انك والعياذوا بالله انك ربنا يكرمنا ويكرمك انك
شريف وبتعرف ربنا ومش حرامى ومش بتاكل فلوسنا
وعلى العموم اترشح وانا هنتخبك لانى بحب وبنتخب كل اخوانا يعنى الاخوان بصراحة لان دول اللى الواح منا يقدر يثق فيهم بجد
غفرالله لنا ولكم وثبت اخواننا فى غزة والدول المسلمة فى كل مكان وخاصة مصر
من
توتا المسلمة

Coca يقول...

ياسلام الجعفري يدخل المجلس يعني ان شاء الله كدا اشوفك مكان احمد عز بس النسخه الاحسن اكيد
اتمني يجي اليوم يا احمد ويرعي كل انسان صادق امين مصالح الشعب

اوعي بس تدخل المجلس من هنا ونجيلك المكتب يقولوا مشغول
تحياتي

احمد الجيزاوى يقول...

خلاص امين كدة
بما انى انا كمان جوبت التاج دة فكدة ممكن انا وانتم نعمل كتله التسار الاسلامى فى المجلس
بس تفتكر من الان لحتى منبلغ السن القانونى لدخول مجلس الشعب 35 سنه
هيكون موجود فتحى سرور برضه بصراحه نفسى علشان عو اعمل معاكم دوته نخنق بيه على الراجل
يكون لنا اجر وثواب فى سكته القلبيه له
هههههههههههههههههههههه
رائع الردود وربنا معكم
احمد الجيزاوى

جمعاوى يقول...

ولا يا جعفرى

لإنت خطفت الواد عز ولا إيه ؟

ابن حـجـر الـعـسـقـلانـى يقول...

بعد ما قرأت إجاباتك .. أنا نويت أعينك رئيس وزراء .. و اعتبر دة وعد منى .. و وعد الحر دين عليه .. بس إن شاء الله لما أبقى رئيس جمهورية

Coca يقول...

انتو فين يا جماعه يارب تكونوا بخير

ابو صهيب ( الجمعاوي الاصيل)سابقاً يقول...

الجعفري باشا

اهالً اهلاً اهلاً

وحشني جداً ياريس انت والبني ادم اتاني ده

وبعدين ياعمنا ما كنش عيش وفتهوفطير

ياعم الحج

مفيش اي حاجة كده

طب البني ادم عز اتصل بينا وقال ان انتوا جاين قريب

ولا هو كلام

وبصراحة تاج جامد

وانا لو هقعد جب عضو مميز اقعد جب صبحي صالح او محمد البلتاجي

Unknown يقول...

مهندسنا الكبير
ربنا يبارك فيك والله اليعقوبي مطحون اصلا في حجات كتير ادعيله
وان شاء الله اجاوب علي التاج التاني البوست القادم
وجزاكم الله كل خير

Unknown يقول...

اختنا عاشقه الفردوس
جزاكم الله خير
بس انا غلبان لانائب حلو ولا حاجه
هو ربنا اللي بيعين والله ربنا يكون في عون اخونا وكل من يصلح بحق واجتهاد
وجزاكم الله كل خير

Unknown يقول...

اختنا ام القسام
هو اخونا اليعقوبي مشغول جدا الفتره دي فعلا وكمان النت فاصل عنده تماما وهو مش فاضي حته يبص عليه
ولاتنسوه من صالح دعائكم
----
هو حضرتك الحزن الوطني بيعطي لضعاف النفوس واصحاب المصالح اغراءات كثيره لكي ينضموا اليه وهي تعتبر خيانه لان الناس رشحتوه علي انه مستقل ثم هو غير وبدل من ذلك فيعتبر نوع من انواع الكذب والتدليس
----
وطبعا الناس دي ربنا يبارك فيهم ويعينهم وفعلا الشيخ سيد عسكر والاستاذ علي لبن وكل اخوانا رجال بحق لايخافون في الله لومة لائم سدد الله خطاهم
وجزاكم الله كل خير

Unknown يقول...

اختنا توتا المسلمة
والله حضرتك شرفتينا ونورتي المدونه
والله كلام حضرتك سليم بس هو في الحياه طريقين ليس لهم طريق ثالث اما الحق او الباطل فلابد من اختيار طريق الحق ولو كان صعبا لان طريق الباطل نهايته صعبه جدا فيهون بقي زوار الفجر واعضاء الحزن الوطني والدنيا كلها
وجزاكم الله كل خير

Unknown يقول...

استاذه كوكا
اهلا بحضرتك
والله امين يارب ربنا يتقبل منك ان يأتي اليوم الذي يوضع فيه كل انسان في مكانه الصحيح حتي تنصلح احوال البلاد
وبعدين مش حضرتك سبقتينا ودخلتي المجلس يعني تبقوا انتوا بقي صحاب المكتب واحنا اللي ضيوف عندكم وعلي العموم منقدرش نقصر مع الساده المدونين
وجزاكم الله كل خير

Unknown يقول...

عمي وعم عيالي
احمد الجيزاوي
عامل ايه وحشني جدا والله
ياعمي 35 مين ده لو بقي عندنا 65 برضه ممكن تلاقيه
وبعدين الناس دي مبيجلهاش سكته قلبيه ولا حاجه دول صحتهم زي الفل وميه ميه
نورتني ياغالي وجيلك
وجزاكم الله كل خير

Unknown يقول...

عم جمعاوي
ازيك يانجم
اه خطفت عز وهخطفك انت كمان فخد بالك من نفسك ومتمشيش في شوارع ضلمه لان الجعفري بيطلع في الضلمه
وجزاكم الله خير ياعمنا الكبير

Unknown يقول...

استاذي بن حجر
والله نورتني وجزاكم الله كل خير
بس رئيس وزراء مره واحده
طب اشتغل الاول
بس ان شاء الله تبقي رئيس جمهوريه وانا هارشحك بس انوي انت
وجزاكم الله خير

Unknown يقول...

استاذه كوكا
جزاكم الله كل خير علي السؤال يااستاذه
هو فعلا كنا مشغولين شويه وبرضه النت كان صعب جدا اليومين دول فمكنتش بدخل كتير اما عز فمشغول جدا برضه وهيقعد فتره مش موجود فاستحملوني بقي شويه لحد اما يرجع
بس الحمد لله احنا كويسين والمانع خير ان شاء الله
وربنا يبارك في حضرتك
وجزاكم الله كل خير

Unknown يقول...

عمي وعم عياي
حبيب قلبي الكبير
عم ميخا
هقولك ايه بس والله انا مشغول شويه
بس بقي عز ده فنجري بق هو اصلا عارف يدخل بيته لما بيقولك هيجي انا عن نفسي ياعم والله مستعد بس هو فعلا مطحون بس ان شاء الله هخلي يفضي مفيش حاجه اهم من ميخا وجمعاوي
وجزاكم الله كل خير ولاتنسانا من صالح دعائك

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا