الاثنين، 28 يناير، 2008

تاج مجلس الشعب

بسم الله والصلاة والسلام علي رسول الله
تاج مجلس الشعب ,التاج ده وصلي مرتين مره من حبيب قلبي البشمهندس مصري ومره من ايمي وكوكا ,وانا بعتذر جدا عن تأخير التاج بس لان اليعقوبي كان مطحون في الامتحانات وبما انه خلص فالنت فصل عنده وهو نفسه انشغل في شوية حجات فقولت لو استنته مش هنجاوب الا لما نطلع علي المعاش فاانا هجاوب حالا وهو بعد يومين تلاته هو وظروفه بقي ربنا يديله طوله العمر0والله المستعان
دخلت مجلس الشعب من اوسع ابوابه ايه هو رمزك الانتخابى المفضل ؟
رمز السيف
كنت تفضل الدخول مستقل او تتبع حزب معين ؟؟؟؟
الاخوان المسلمين
هو انا دايما بقول ان الاصلاح ينطلق من مجموعه وليس فرد وان كل ماتوحدت الافكار والجهود لانجاز عمل معين ومحدد كان افضل وحتي في سنن التغير في الارض نجد ان التغيير يقوم به مجموعات لهم قائد وانه في هذا العصر يصعب جدا ان يحدث التغيير فرد واحد نظرا للفتن والصراعات وغيره فعندما توجد مجموعه صعب جدا ان تخترق اوتحدد
اذا دخلت مستقل هل توافق على التوقيع للحزب الوطنى بعد نجاحك كمستقل ؟
نعم ايه حزب مين 0ينهار ابيض ده انا اموت ومعملهاش ده مش لو دخلت مستقل ده لو دخلت محتل برده مش هقرب منه ربنا يعافينا يارب
اول حاجه هتعملها لنفسك ولاسرتك ؟
ان شاء الله مش هاعملهم اي حاجه اكتر من اللي هاعمله للناس زيهم زي اي حد اما نفسي ان شاء الله مش هاحاول استفيد تماما من منصبي قدر المستطاع طبعا انا هنا باتكلم عن الاستفادات المشروعه اما الغير مشروعه نسئل الله العفو والعافيه0وعايز اقول حاجه ياجماعه ان المناصب تغير والكراسي تغير فنسئل الله العون ونتوكل عليه حتي يعصمنا من هذه الفتنه
ايه المشروع اللى ناوى تعمله لاهل دايرتك ؟
ان شاء الله هنهتم بالمشروعات الصغيره لانها تقضي علي نسبه كبيره من البطاله وتفيد الاقتصاد وعندكم دوله زي الصين اقتصادها قائم علي المشروعات الصغيره وطبعا المشروعات التي تخدم الناس بشكل مباشر هنحاول نحسنها زي المستشفيات والصرف وغيره
قعدت فى المجلس جنب نائب مميز . من هو النائب ؟
اكيد اي حد من اخوانا بس انا بحب الاستاذ علي لبن والشيخ سيد عسكروكان نفسي يدخل الشيخ حازم صلاح بس نعمل ايه بقي في شعبية امال عثمان الطاغيه اللي جالها حوالي 10000 الاف صوت في ليله واحده ربنا يوفقها
قدمت سؤال للحكومه ايه هو السؤال ؟
هي بصراحه مش عايزه سؤال واحد هما ممكن يكونوا 20 ,50 ,100
علشان بس الواحد يقدر يفهم احنا رايحين فين يعني عن خطط الاصلاح وتشغيل الشباب وتحسين الاقتصاد واهم سؤال ايه هي الخطه اللي ماشيين بيها في سبيل النهضه والخطه دي قائمه علي اي اساس
وممكن في الاخر اقول لما تقابلوه ربنا وتتسئلوا عن مافعلتم في البلد هتقولوا ايه
طلب احاطه موضوعه ايه ؟ وبتقدمه لمين ؟
هو نفس اجابة الصباغ عن احتكار الحديد
عم احمد عز اللي خرب البلد في الاقتصاد والسياسه يعني هو احتكر الحديد والشركات الجنبيه تقريبا خلاص احتكرت الاسمنت ناهيك عن الادويه مفيش واحد متبرع ابن حلال يحتكر البلد ويخلصنا
استجواب لاتنين من الوزراء موضوعه ايه ؟ وبتستجوب مين ؟
ياااااه وزيرين بس
طب انا عايز اسئل وزير الداخليه عن الشرطه هما مع مين هما معانا ولا علينا هومين الحرامي ومين البوليس والله صدقا بس حتي علشان اعرف اخلي ولادي لو خلفت يعني يلعبوا بوليس وحرامي كويس ميتلخبطوش
ووزير الصحه هو ايه اللي حصل هو الناس بتاخد علاج ولابتريحوهم بدري وليه المستشفيات تحولت الي ثكنات عسكريه وليه الدكاتره اتنزع من قلوبهم الرحمه طبعا مش كلوهم يادكتور حر ويادكتورخالد وليه بقت الفلوس اغلي من الانسان,ووزير الاعلام والتربيه والتعليم ووزير الاسكان والنقل
وطبعا عمهم الكبير وزير الماليه اللي طلع صوت زي الستات لما رئيس الجهاز المركزي للمحاسبات قال التقرير السنوي وكان صريح حبتين فالراجل مستحملش الكلام ده فقلب الدنيا
والله كل مسئول في البلد من الكبير للصغير عايز استجواب
انت مع الخصخصه ؟
طبعا مش مع الخصخصه كده بشكل مطلق ,هو انت اصلا عندك اقتصاد علشان تقولي خصخصه ,طب وهتحمي اقتصادك ازاي ,هو اصلا من اسباب الخراب الخصخصه لان انت معندكش درع يحميك من عواقبها يعني مثلا شوف طن الاسمنت بقي بكام طب ليه علشان الخصخصه فالشركات الاجنبيه دخلت السوق والان تحتكر 62%من الاسمنت وشوف الحديد طبعا نتج عنهم ارتفاعات رهيبه في سعر المباني والشقق والادويه وغيره ,فالمفروض تحدد ويبقي هناك قوانين ملزمه ونلغي الاحتكار تماما ونعمل صناعات وطنيه حتي نحدث توازن وبلاش الهطل والصرف علي البلاهه والتخلف من الصرف علي الحفلات والبطولات والمهازل دي وفي ناس بتموت من البرد
يابلادنا ياعجيبه فيكي حاجه محيراني:::نزرع القمح في سنين يطلع القرع في ثواني
هل انت مع قطع العلاقه مع اسرائيل ؟
اسرائيل !هو في حاجه اسمها اسرائيل ,طبعا مفيش علاقه مع الكيان الصهيوني المغتصب حتي يرحل عن ديار الاسلام والمسلمين ,هو لايجوز شرعا اصلا ان تقيم علاقه مع كيان معادي يقتل المسلمين بل وبعض العلماء قال انها خيانه لله وللرسول ,وارجعوا الي اصول المعاهدات في الاسلام ونعرف اذا كان يجوز ام لا .والموضوع ده ممكن يطول مننا اوي بس هناك اصول لعقد المعاهدات والتحالفات في الاسلام مستنبطه من القران والسنه ممكن الرجوع اليها
هل تؤيد مرور الامريكان فى القناه ؟
اذا كانت سفن تجاريه .فما المانع
اما اذا كانت سفن حربيه لقتل المسلمين افضل ان نغرقها في القناه
هل انت مشترك فى مؤامره كسر فرنسا هانم بالاشتراك مع ام دبوه ؟
لاياعم ربنا مايجعلنا من قطاعين الارزاق
-----------------------------------------
وجزاكم الله كل خير ياجماعه لاننسي اهل غزه من الدعاء يقول الحسن البصري وكأنني بالاسلام يوم القيامه بين معز ومذل حتي يأتي الي عمر ويقول يارب كنت غريبا حتي اسلم هذا0فأي الرجلين انت ان لم نعز الاسلام فلانخذل الاسلام
فستذكرون مااقول لكم وافوض امري الي الله ان الله بصير بالعباد

الاثنين، 21 يناير، 2008

نظرة امل من غزة الالم




بسم الله والصلاة والسلام علي رسول الله
يااخواني في الله علي الرغم مما نري من الاحداث المريره التي تحدث في غزه الحبيبه وعلي الرغم من القتل والموت والخراب ,علي الرغم من بكاء الاطفال ودموع النساء وصمود الرجال علي الرغم من الجوع والقله في العيش علي الرغم من الظلام وقله العون والمدد علي كل مايحدث يااخواني اجد نفسي متفائل .وصدقوني لم اجن مما يحدث ولكن اصبروا حتي تعرفوا0
علمنا النبي صلوات ربي وسلامه عليه انه لاقنوط ولايأس من رحمه الله انظروا الي قوله تعالي (ولاتيأسوا من روح الله انه لاييأس من روح الله الا القوم الكافرون) طيب جميل جدا يعني منزعلش لا طبعا الحزن امر طبيعي جدا ولكن لانيأس من رحمه الله ونصره0
هكذا والله علمنا التاريخ ,علمنا ان المحن ورائها منح وان الضعف يليه قوه وان دائما احلك لحظات الليل هي التي تسبق الفجر وان النصر دائما يخرج من رحم الهزيمه والمعاناه0 صدقوني ليس كلام انشاء ولكنه واقع بل انه سنه من سنن النصر والتمكين نعم هناك مراحل للتمكين لعل احدها مرحله التمحيص ومرحله الزلزال
بل دعني ااخذكم في رحله قصيره ومختصره من حياه النبي صلي الله عليه وسلم لابرهن لكم علي تلك النقطه
اولم يذهب النبي الي الطائف فيرمي ويضرب بالحجاره وكان في هذه المرحله يعرض نفسه فداه ابي وامي علي القبائل فترده وتصده ثم كانت نهايتها الطائف تلك الرحله المليئه بالمعاناه والالام ولكنه عندما رجع ودخل مكه في حمي احد المشركين اولم يدعوا 6 فقط من شباب الانصار فكانت البذره الصغيره لقيام الدوله الاسلاميه والتمكين للدين0
اولم يحاصر النبي واصحابه 3سنوات بلا طعام ولاشراب حتي اكلوا ورق الشجر ثم بعدها ماتت زوجته وعمه ثم كانت الهجره الي دار الايمان0
اولم يحاصر النبي واصحابه مره اخري في المدينه في غزوة الاحزاب وتجمع عشرة الاف مقاتل حول المدينه ثم غدر اليهود وكانوا كل مايريدون تدمير دوله النبي وهدم الدين0ثم هزم الله الاحزاب وكانت اخر غزوه يقوم بها المشركون وبعدها اخذ النبي واصحابه زمام المبادره0
ثم مات النبي وحدثت رده رهيبه ولم تبق الا ثلاث مناطق فقط في الجزيره العربيه لم ترتد وكانت من اشد الفتن وتصدي الرجل الحديدي ابوبكر رضي الله عنه وبعد عام ونصف العام فقط يااخواني خرجت الجيوش لغزو فارس والروم0
وتوالت الاعوام تحمل في طياتها الكثير من الاحداث ولكن نقف عند الصليبين 4 امارات ضخمه في ديار الاسلام وضياع لبيت المقدس وانتكاسات شديده ثم يخرج صلاح الدين ليقود الامم ويحرر البلاد ويفتح بيت المقدس ويسقط معظم الامارات الصليبيه ثم ياتي قطز ويهزم سفاحي التاريخ ومصاصي الدماء التتار بلاء البشر وليس مثلهم احد0
اولم تسقط بني اميه لتأخذ الرايه بني العباس 0اولم يحمي الدين الاكراد اولم يسلم التتار انفسهم ويفتحوا البلاد اولم تغرب شمس الاسلام في وسط اوربا بضياع الاندلس حتي يمن الله علي المسلمين بشروق للاسلام في شرقها بفتح القسطنطينيه0
وهكذا هناك احداث كثيره لم نوردها ولكن كأمثله واستبشارات0
يااخواني كل مااريد ان اقوله ان المسلمين لن يموتوا وسيبقون مهما تجمع عليهم الاعداء سواء من الداخل اوالخارج كان هناك كفار وكان هناك يهود وكان هناك منافقون وبقي الاسلام وبقي المسلمون0
وسيبقي المسلمون في فلسطين وستبقي حماس والا من يحقق حديث النبي (لاتقوم الساعه حتي تقاتلون اليهود حتي ينطق الحجر والشجر يامسلم ورائي يهودي فاقتله) سيبقي المسلمون وسينتهي اليهود ويطردون ازلاء سيبقي المسلمون يااخواني من اجل اقامه شرع الله وتعليم الناس الخير والعدل من يعلم الناس القران والخير اذا ذهب المسلمون ومن يعبد الله وينصره اذا هلك المسلمون يااخواني ان هلاك المسلمون معناه نهايه الدنيا وماعليها0
وتبقي حماس صامده ويبقي اهل غزة صامدون وتبقي فلسطين انظروا الي حديث النبي (لاتزال طائفه من امتي ظاهرين علي الحق لايضرهم من خالفهم حتي تقوم الساعه قالوا اين يارسول الله قال ببيت المقدس واكنافها)نعم باقون يااخواني لايضركم من خالفكم وانتم علي الحق بأذن الله تعالي والله مولاكم هو وليكم وكفي بالله وكيلا0
وفي النهايه يااحبابي وصيه ان ندعوا لهم نعم الدعاء ثم الدعاء ثم الدعاء وان نوعي الناس وان نتبرع لهم ولوتستطيع عمل مابوسعك افعل والصيام والطاعات في تلك الايام العصيبه وماضعت فلسطين وحدث ماحدث الا بذنوبنا ومعصيتنا لله عزوجل
وابشروا يااخواني انما يسعي اليهود لكتابه نهايتهم ويسرعون فيها وان بدي عكس ذلك 0وماخرج فرعون يطاردموسي الا وكان وراءه الموت يطارده والموت اسرع من فرعون والله اقوي واسرع من اليهود0
اللهم لاتشمت الاعداء والمنافقين والعملاء باحبابك امة نبيك محمد يارب العالمين
فستذكرون مااقول لكم وافوض امري الي الله ان الله بصير بالعباد



___________________________________________________________________________________________ تحديث
ان شاء الله في مؤتمر حاشد لفك الحصار عن غزة في دارالحكمة في نقابة الاطباء يوم الخميس الساعة السابعة لازم نيجي يااخوانا باذن الله العالم كله قام ومصر نايمة في العسل لازم يكون المؤتمر ده حاجة كبيرة جدا نعتذر بها الي الي الله ولو بالقليل استعينوا بالله وتعالوا احنارايحين باذن الله وفي الغالب ان شاء الله في جمع تبرعات لشراء الاحتياجات لاخواننا في غزة فكله ان شاء الله يشخلل جيبه والتبربعات دي هاتوديها نقابة الاطباء بعد فتح معبر رفح
الله اكبر ولله الحمد

السبت، 19 يناير، 2008

لقد قتلوا فيهم الانتماء




بسم الله والصلاة والسلام علي رسول الله


بدات الاستاذه ميرمايد بأثاره موضوع هجرة الشباب الي اسرائيل ثم تلتها الاستاذه ايمي بطرح موضوع الانتماء للوطن ,وهوفعلا امر خطير ومهم جدا لاننا اصبحنا نتحدث عن امر بديهي جدا بشكل خطير ومثير فهل حب الاب والام والعائله والوطن يستحق الكتابه والشرح والتحليل انه امر فطري فطر الله الناس عليه .يعني لو واحد لاليه اب ولاام ولااي حاجه وطلع اتسئل هل تحب وطنك؟ فمن البديهي ان يجيب نعم بلا تردد0
طيب ماذا حدث ليه الناس دلوقتي مش طايقه البلد ولاطايقه تسمع سيرتها ليه الناس عايزه اي فرصه تسافر وحتي لو كانت ربع فرصه وفيها خطر علي حياتهم يقولك احاول واهو كده كده ميت0
طب نيجي ننظر حولنا ونحلل هو ايه هي ابسط حقوق الشاب انه يلاقي وظيفه محترمه او وظيفه يستطيع ان يعيش منها علشان بعد فتره يقدر يتجوز ويبني اسره ويصرف عليها وده ابسط حقوقه الانسانيه .تخيلوا انتوا بقي حجم الكارثه اللي فكر فيها هو انتم ياجماعه عارفين ارخص شقه في اقل منطقه في القاهره بكام!طيب عنده شقه عارفين العفش والعزال بكام طيب تعرفوا ثمن طربيزه السفره بكام طيب هيفرشوا الشقه علي حتتين حصيره ومرتبة سرير طيب تعرفوا مرتبة السرير بكام؟!هو انتوا فاكريني بهزر فعلا ياجماعه طيب بقي الموضوع عدي واتجوز ولاقدر الله خلف عيل دي لوحدها مشكله لان العيل عايزدكتور وبامبرز واكل وشرب0
يااااااااه ده انا باتكلم عن الشاب العادي طيب ياجماعه انتوا متخيلين بلد زي اسيوط اللي هي ارقي بلد في الصعيد 50%من اهلها عايشين تحت خط الفقر يعني دخلهم اليومي 5 جنيه وحوالي 75 %من اهلها دخلهم 10 جنيه طبعا في اليوم طيب تخيل باقي الصعيد
طيب ياجماعه انتوا متخيلين حجم عمالة الاطفال اللي في البلد تخيلوا طفل بريء عايز يتعلم ويلعب زي باقي الناس تلاقيه ميكانيكي ولاتباع ولاسواق توك توك طيب ده يطلع عامل ازاي 0
طيب ياجماعه حد راح يعمل رخصه عربيه في المرور وشاف حجم الرشاوي اللي بتدفع او حد راح يعمل اي موضوع في اي مصلحه وشاف حجم الرشاوي يعني دلوقتي الشاب مابين نارين لايجيب وسطه تشغله لايبقي حرامي ومرتشي لايسافر وهووحظه لايقعد يشحت في البلد
يعني تخيلوا شاب متعلم محترم ممعهوش وسطه شاف زمايله اتخرجوه واتعينوه بالوسطه وهو قاعد عمال ينحت في الصخر طول عمره طيب ده يعمل ايه 0طيب تخيلوا موظف محترم شريف بياخد 400 او 500 قول 1000 جنيه في الشهر وطبعا صعب جدا وعنده عيال عايز يربيهم وشايف غيره من المرتشين والحراميه معاهم الوف مؤلفه طيب يعمل ايه0طبعا ناهيك عن مناهج التعليم المتخلفه العقيمه التي تزرع في الطالب الغباء الفطري المركز يعني اصلا افشل نظام تعليم في العالم قائم اصلا علي النظام المنزلي يعني العيل يروح المدرسه شهرين ويقعد شهرين ويمتحن ناهيك عن مناهج بشعه قائمه علي الحفظ فقط اما طبعا المدارس تخيلوا التكدس الطلابي والدسك قاعد فيه 3 عيال ومدغدغ والمدرسه ايله للسقوط والفصول اللي اشبه بالثكنات العسكريه 0اما المدرسين فحدث ولاحرج ياتاخد درس اوتاخد درس ده لوعايز تنجح ولو هتسقط برده هتاخد درس والمعامله ولا الصول عطيه الامن رحم ربي وعاصم0
يعني شوية انظمه فاشله من نظام سياسي علي نظام تعليمي علي نظام اقتصادي علي نظام اجتماعي يستشري فيها الفساد من الراس الي اخمص الاصابع اجتمعوا علي كائن يسمي الانسان لاحول له ولاقوه الا بالله فقضوا علي اي انتماء اوفكر اوابدع واصبح يعيش من اجل البقاء والمحافظه علي السلاله المصريه0
بوست سوداوي ومؤلم مش كده بس ياجماعه صدقوني هي دي الحقيقه اللي كلكم بتلمسوها بالواقع وحاسيين بيها علشان كده هو ده السبب ان الشاب لايشعر بانتماء وهو لايستطيع ان يحصل علي ابسط حقوقه وليس الشاب وحده فهناك حقوق للانسان ياجماعه حق الدواء العلاج يعني مش متاح الان حق الطعام وحق الثياب حق الحياه الكريمه يااخواني بلااعتقال ومصادرة اموال وتعذيب0
علشان كده يجماعه الرجوع الي الله المولي الحق يقول الله تعالي (ولو ان اهل القري آمنوا واتقوالفتحنا عليهم بركات من السماء والارض ولكن كذبوا فأخذناهم بما كانوا يكسبون) يااخواني في الله لايصيب الله قوما الا بما يستحقوا علي كل الكلام ده صدقوني الناس برده في من ونعمه من الله واحنا عايشين بس ببركة ربنا والله ياجماعه والولاء لله والرسول والوطن امربديهي ليس فيه عذر وان الحراميه والمرتشين وغيرهم ليسوا هم الوطن الوطن اهلك واخوانك وارضك ونفسك واللي بيجري وري الفلوس بس بدون اي اعتبار بيجري وري سراب ,ياجماعه عايزين نلجأ الي الله وحده فليس باكشف للضر الاهو سبحانه وتعالي ونعلم اولادنا الدين دين الله فهو خير عاصم
بلادي وان هانت علي عزيزة:::واهلها وان ذلوا علي كرم
واسف جدا للاطاله
فستذكرون مااقول لكم وافوض امري الي الله ان الله بصير بالعباد

الثلاثاء، 15 يناير، 2008

ماذا اقول ؟


بسم الله والصلاة والسلام علي رسول الله
لااعرف في الحقيقه ماذا اقول وصدقوني معرفتش احط عنوان قولت الصور خير عنوان ولم احب ان اكثر منها ودعوا الحديث يأخذنا ,في الحقيقه بافتح الايميل لقيت رساله من استاذي عمرمحمود بيقول فيها ان نجل محمود الزهار وزير الخارجيه السابق التابع لحركه حماس قد قتل قولت لاحول ولاقوة الا بالله وقمت رايح فاتح موقع الجزيرة قولت اشوف ايه اللي حصل لاقيت الحكايه كبيره اوي لاقيت 18 قتيل نحسبهم من الشهداء و45 جريح في قطاع غزة 0
طب الواحد يقول ايه مش عارف والله بس هو دماء المسلمين سهله اوي كده ليه هو ليه المسلمين مبيزعلوش اوي لما مسلم يقتل وبيزعلوا اوي لما فريق كره ينهزم ,يوم هزيمة الاهلي من النجم الساحلي عربية الاسعاف دخلت الاستاد وناس كتير اغمي عليها,طب ويوم احتلال العراق ويوم ضرب لبنان والان في مجزرة غزة ليه الناس لايغمي عليها,ياجماعه دم المسلم عند الله اعظم من حرمه الكعبه ياجماعه دم المسلم عند الله اعظم من زوال الدنيا قال رسول الله صلي الله عليه وسلم (لزوال الدنيا اهون عند الله من دم امريء مسلم )يااااااااااااااااااااااه المسلمين حالهم بقي كده ده النبي خرج جيش كامل لغزوة مؤته علشان الغساسنه قتلوا مسلم نعم مسلم واحد خرج علشانه جيش كامل والامر يستحق0
طيب تفتكروا ليه العزه ضاعت مننا ليه الكرامه ضاعت تفتكروا ليه ؟
الجواب واضح واتقال كتير قبل كده قالهاعمر من قبل نحن قوم اعزنا الله بالاسلام فأن ابتغينا العزة في غيره اذلنا الله ونعم والله قد رايناها 0
نرجع تاني للاحداث محمود الزهار ذلك الرجل الصابر كالجبل كباقي جبال حماس نعم والله ولانزكيه علي الله ذلك الرجل يااخواني ليس ابنه حسام هو اول من استشهد من ابناءه بل سبقه اخيه من 4 سنوات ومحمود الزهار نفسه تعرض لعدة محاولات اغتيال وهاهو يضع ابناءه واحد تلو الاخر في قبورهم ومااصعب ذلك الا علي من يسره الله عليه 0
وهاهي حماس تقدم ابنائها لله عزوجل وتقدم قادتها قبلهم حتي يعلم هؤلاء الحمقي البلهاء انهم لايلعبون بعقول الشباب ليتخذوهم دروع يحتموا بها انظروا الي حماس قدمت ياسين والرنتيسي وعياش وقبلهم الكثير وبعدهم ستقدم الاكثر يقدمون قادتهم وابناء قادتهم والان الاخوان من يحاكم يحاكم الشباب ام يحاكم القاده ولكنكم لاترون الاماتحبون ان تروا والله المستعان علي ماتصفون0
تقف حماس الان صامده ضد عدوان ظالم غاشم ضد مؤامرات ومؤتمرات قاسيه ظالمه تقف وتصمد وتلام علي ذلك تلام لانها تعيش غزة في خوف وجوع لانها لاتعلم مصلحة الوطن وياسبحان الله وهل حماس هذه كيان خارجي دخيل ام هم اهل الديار اليس فيها ازواجهم وابنائهم اويلامون علي حربهم في اخذ حقهم المغتصب في تحرير الارض الضائعه 0
الان المستشفيات في غزة تصرخ لاتجد الدواء والاطفال لايجدون الطعام الان غزة تعيش في ظلام الان غزة تحاصر لتذبح وليس لهم الا الله ودعاء المسلمين العاجزين الضعفاء 0
قال رسول الله (لاتزال طائفة من امتي ظاهرين علي الحق لايضرهم من خذلهم حتي ياتي امر الله فقالوا واين هم يارسول الله قال ببيت المقدس واكنافها )رواه احمد0
انا اسف يااخواني ان كان في كلامي حده بس صدقوني الواحد تعبان جدا من اللي بيشوفه وبيصعب عليه حال امته الضعيفه الضائعه بين امم الشرق والغرب كان فيه ابيات شعر بحبها جدا
ياامتي ان قسوت اليوم معذرة:::فأن كفي في النيرن تلتهبوا
فكم يحزبقلبي ان اري امما:::طارت الي المجد والعربان قد رسبوا
ونحن كنا بهذا الكون الوية:::ونحن كنا لمجد الشمس ننتسبوا
مهما دجي الليل فالتاريخ انبأني :::ان النهار بأحشاء الدجي يثبوا
وفتيه في رياض الحق مرتعهم :::لله ماصنعوا لله ماوهبوا
جاءوا علي قدر والله يحرسهم:::وشرعة الله نعم الغاي والنسبوا
هذه يااخواني تذكره كنت اذكركم بفلسطين الحبيبه وان كنت اعلم انكم تذكرونها وتعملون من اجل تحريرها خير مني ولكن كان يجب الاننسي والانصمت علي مايحدث ,ولاتنسوا اخوانكم من الدعاء فأنه سلاح لايعرفه الا المؤمن
كنت اذكر نفسي واياكم وجزاكم الله كل خير0
فستذكرون مااقول لكم وافوض امري الي الله ان الله بصير بالعباد0

الأربعاء، 9 يناير، 2008

انت لو مكانه كنت شربت؟؟؟؟؟؟

السلام عليكم
بسم الله والصلاة والسلام علي رسول الله عليه من الله افضل الصلاة والسلام
عايز احكي علي حكاية وفيها سؤال في الاخر كل واحد لازم يجاوبه بس لو اي حد مجاوبش مش عارف ممكن اعمل انتم متعرفوش عز لما بيزعل اجاركم الله
كان ياما كان
كان فيه بلد بعيدة وكان البلد دي فيها نهر النهر ده اتلوث فاصبح كل واحد يشرب من النهر ده يتجنن ومش يتجنن بس بل انه بيعتقد انه عاقل وغيره هم من المجانين
فالبلد كلها شربت واتجننت حتي زوجة ملك البلد دي شربت واتجننت بس الدنيا موقفتش عند كده بل ان كل هؤلاء المجانين دول ذهبوا بربطة المعلم( بضم الميم)عشان يخلصوا علي المجانين اللي ماشربوش وبس
مفضلش غير الملك ووزيره فقال الوزير للملك :الناس كلها شربت يامولاي ومفضلش غير انا وانت بس وهما جايين علينا دلوقتي وبيدبروا عشان يقتلونا هنعمل ايه
الملك في حيرة:دبرني ياوزير
الوزير:انا اسف يامولاي انا مضطر امشي دلوقتي عشان عطشان اوي ومحتاج اشرب بسرعة
الملك في صياح سيبني ياوزير ورايح فين
الوزير في مشهد ماساوي يذهب الي ماء النهر ويشرب منه
فضل الملك يفكر قال اعمل ايه دول جايين عليا دلوقتي عشان يخلصوا عليا اعمل ايه
فاخذ قراره وقال
ان بقيت علي الي قتلوني وان شربت من ماء النهر صرت مجنونا
فحسم امره وقال :بل ان لم اشرب من ماء النهر ساصبح مجنونا
وشرب الملك من ماء النهر واصبح بعدها اهل البلد كلهم من العقلاء
القصة دي مرة كنت قراتها قبل كده مش فاكر فين بس عاجبتني فقلت اشاركم التفكير لعلنا خرج باراء جيدة من استاذتنا زوار المدونة
طيب
السؤال
هل احنا محتاجين في حياتنا في بعض الاوقات اننا نشرب من مياه النهر ام كان من الاولي للملك وبالتالي لنا الثبات علي المبدا ؟؟؟؟؟
ولو شربنا نشرب كتير ولا قليل مفعوله يزول مع الوقت؟؟؟؟؟
وكل عام وانتم بخير وبصحة وعافية
اجعلوه عاما لله عز وجل لا تجعلوا لانفسكم ولا لشياطينكم فيه نصيبا
والسلام
اليعقوبي

الجمعة، 4 يناير، 2008

العلمانيين (عاصفه النار)3

بسم الله والصلاة والسلام علي رسول الله
ورجعنا تاني لعاصفه النار ولازم نكمل المشوار ايه رايكم ينفع اسم اغنيه ,لابس فعلا لازم نكمل المشوار لان هذه رساله قصدت ان اوصلها بطريقه ما بدون حرج او توريه او بطريقه غير مباشره بل بمنتهي الوضوح وبشكل مباشر حتي يتم وضوح الرساله وفي النهايه استطيع ان اقول طبعا في نهايه البوستات اللهم بلغت اللهم فاشهد وياريت الناس تقرا بشيء من التركيز ويناقشوا اي نقطه غير واضحه وينقدوني كما يحبون بدون اي حرج ولاتنسوني من نصايحكم العزيزه علي قلبي والله المستعان0
العلمانية والعقيدة
يجب ان تعلموا يااخواني ان العلمانيه الليبراليه لاتنكر الجانب العقدي في الاسلام انطلاقا من مبدا عندها ,وهي كفاله الحريه الدينيه لكل انسان وهذا مبدا اقرته المواثيق الدوليه ومعترف به عندهم وهذا من الناحيه النظريه علي الاقل0
ولكن الاسلام في داره وبيته لايكتفي ابدا بأن تكون عقيدته شيء مسموح به ,وليس محظورا كالمخدرات مثلا (انه يريد ان تكون عقيدته روح الحياه وجوهر الوجود وان تكون اساس التكوين النفسي والفكري لافراد الامه اي تكون محور التربيه والثقافه والفن والاعلام والتشريع والتقاليد)0
والعقيده هي اساس الحياة يااخواني والله وهل خلق الله السموات والارض الا من اجلها وهل قام الصراع بين الخير والشر والظلام والنور بين الاسلام وغيره الا من اجل عقيده التوحيد اللهم احينا عليها وامتنا في سبيل نشرها ,لذا فأن الفرد المسلم يستقبل حياته بالتوحيد ويودعها ايضا بالتوحيد ومابين الاستقبال والوداع يعيش ملتزما بها وداعيا اليها0
وان التوحيد الذي هو جوهر الاسلام ليس مجرد كلمه تقال او شهادة تعلن :انه اتجاه فكري ونفسي وخلقي وعملي يفرض علي المسلم (الا يتخذ غير الله ربا ولايتخذ غير الله وليا ولايبتغي غير الله حكما)0
كل ده جميل جدا واكيد العلمانيين المسلمين بيؤمنوا بيه لان ده اساس المسلم ومسلم من غير عقيده ميبقاش مسلم يبقي ايه المشكله اقول لكم ايه المشكله بقي0

ان العلمانيه وان قبلت عقيده الاسلام نظريا ترفض ماتستلزمه هذه العقيده من ابنائها ومعتنقيها ,وذلك واضح في اكثر من امرمنها 0

1/رفضها اتخاذ العقيده اساس للانتماء والولاء ,فهي لاتقيم للرابطه الدينيه وزنا ,بل تقدم عليها رابطه الدم والعنصر ,ورابطه التراب والطين واي رابطه اخري

وهذا مناقضا تماما للاسلام وتعاليمه والذي يقيم الاخوه علي اساس الايمان (انما المؤمنون اخوة) فجعل الله الاخوة في الدين اقوي واعنق من اخوة الدم واي شيء اخر ويجعل ولاء المؤمن لله ورسوله ولجماعه المؤمنين في قوله تعالي (انما وليكم الله ورسوله والذين آمنوا الذين يقيمون الصلاة ويؤتون الزكاة وهم راكعون 0ومن يتول الله ورسوله والذين آمنوا فأن حزب الله هم الغالبون)0

ويلغي كل رابطه مهما يكن قرابتها وقوتها اذا تعارضت مع رابطه الايمان حتي رابطه البنوة والاخوة والابوة فقال تعالي (ياايها الذين آمنوا لاتتخذوا ابائكم واخوانكم اولياء ان استحبوا الكفر علي الايمان ومن يتولهم منكم فأولئك هم الظالمون)

(لاتجد قوما يؤمنون بالله واليوم الاخر يوادون من حاد الله ورسوله ولو كانوا اباءهم ا وابناءهم ا واخوانهم ا وعشيرتهم اولئك كتب في قلوبهم الايمان وايدهم بروح منه)

ومن هنا ياجماعه نشأت عقيده الولاء والبراء احد اهم اساسيات العقيده الاسلاميه ولاشك انه حدث بها خلل شديد جدا نتيجه لاختلاط المفاهيم وسوء الفهم والجهل الشديد واخيرا اتباع الهوي اتباع الهوي ,ولابد ان نفرق بين المعامله الحسنه وحقوق الجار ومالنا اتجاه غير المسلمين وماعلينا بل امرنا الاسلام ان نحسن اليهم وقال الله تعالي (لاينهاكم الله عن الذين لم يقاتلوكم في الدين ولم يخرجوكم من دياركم ان تبروهم وتقسطوا اليهم ان الله يحب المقسطين)بل والاسلام افرد قواعد كامله وابواب مخصصه في التشريع لحقوق الاخر ليحفظ بها حقوقهم من اي اعتداء باسم الدين ومن هنا نفرق بين الموالاه والمناصره والاخوه علي حساب العقيده والحقوق والواجبات ولابد ان نفرق بين كل هذا0

وقد جسد ابا الانبياء ابراهيم عليه وعلي نبينا الصلاة والسلام تلك العقيدة عقيدة الولاء والبراء في قوله تعالي (قد كانت لكم اسوة حسنه في ابراهيم والذين معه اذ قالوا لقومهم اٍنا برآء منكم ومما تعبدون من دون الله كفرنا بكم وبدا بيننا وبينكم العداوة والبغضاء ابدا حتي تؤمنوا بالله وحده)

وجسدها النبي ايضا صلي الله عليه وسلم والذين آمنوا معه يوم بدر اذ وقفوا ضد ابائهم وابنائهم في سبيل الله وتجردوا من كل ولاء الا لله الواحد القهار0

الامر الثاني :ان العلمانيه تريد من العقيدة ان تظل حبيسه الضمير , ولاتؤثر في معترك الحياة ولاتؤثر في اهدافها ومناهجها وان سمح لها بالظهور فليكن تحت جدران المساجد علي ان يكونه المسجد نفسه تحت سلطانها ,وبهذا نري المسلم الذي يعيش تحت سلطان العلمانيه يعيش في تناقض فعقيدته تشرق وواقعه يغرب وعقيدته تحرم والعلمانيه تبيح ,عقيدته تلزم والعلمانيه نعارض وهكذا 0

ولاشك او لبس او يأويل ان من مقتضايات الايمان ان تسلم بحكم الله تسليما مطلقا اذ يقول الله (وماكان لمؤمن ولامؤمنه اذا قضي الله ورسوله امرا ان يكون لهم الخيرة من امرهم ومن يعص الله ورسوله فقد ضل ضلالا مبينا)

(انما كان قول المؤمنين اذا دعوا الي الله ورسوله ليحكم بينهم ان يقولوا سمعنا واطعنا واولئك هم المفلحون)

ان العلمانيه كما ذكرنا قسمان قسم ملحد لايؤمن بالدين من اساسه كما في العلمانيه الماركسيه ,وقسم مؤمن بوجود الله تعالي وبالاديان او بدين معين منها ,قد يكون العلماني نصرانيا او يهوديا اوغيره ولايجد حرجا في ان يكون نصرانيا وعلمانيا او يهوديا وعلمانيا0

انما الحرج البالغ بالنسبه للمسلم حين يتخذ العلمانيه منهجا لحياته واسلامه يأبي عليه ذلك نعم ياايها العلمانيين ان اسلامكم يأبي عليكم ذلك ,لان العلمانيه تأخذ من القران والسنه الجانب الاعتقادي والتعبدي وترفض غير ذلك .اي مايتعلق بالجانب العملي للحياه كشؤون المعاملات بين الفقراء والاغنياء بين الحكام والمحكومين بين المسلمين وغير المسلمين اي ترفض الجانب الاقتصادي والاجتماعي والسياسي والثقافي في الاسلام 0

يجب ان تعلموا ان الاسلام ليس مجرد رساله لاهوتيه تهتم بالجانب الاعتقادي والشعائري فحسب اي مايتعلق بالاعتقاد في الله والاخره وشؤون الغيب والتعبد لاليس كذلك فحسب بل هو دين ودوله هو عقيده ومنهاج حياه للفرد وللاسره وللمجتمع وللامه 0

هي في الاساس عقيده تنبثق منها شريعه او منهج شامل للحياه قائم عليه امه ذات دعوه عالميه0

واذكروا قول الله تعالي (وان احكم بينهم بما انزل الله ولاتتبع اهوائهم واحذرهم ان يفتنوك عن بعض ماانزل اليك فاٍن تولوا فاعلم انما يريد الله ان يصيبهم ببعض ذنوبهم وان كثيرا من الناس لفاسقون0افحكم الجاهلية يبغون ومن احسن من الله حكما لقوم يوقنون)

وجزاكم الله خير

وللاخوه اللي بيمتحنوا ربنا يوفقهم وييسر لهم امرهم في الدنيا والاخره

فستذكرون مااقول لكم وافوض امري الي الله ان الله بصير بالعباد

الأربعاء، 2 يناير، 2008

المكتوب علي الجبين لازم تشوفه العين

بسم الله والصلاة والسلام علي رسول الله
اسكتوا مش انا طلعت في مجموعة (هيه)واترايني طول السنة بذاكر مجموعة (واو)مشكلة
ماذا تفعل لو كنت مكاني ؟؟؟؟؟؟؟؟
ايه شعورك لودخلت امتحان لقيت كلام غير اللي انت قعدت توجع قلبك فيه طول التيرم واليومين اللي فاتوا بالاخص
ايه شعورك وانت قاعد زي التايسون في الامتحان حوالي اكتر من نص الامتحان حاجات اول مرة تسمع عنها
ايه شعورك لما تعرف ان نظام المواد التخلف اللي في رابعة اتغير السنة دي لالالا انا عايز شعورك لما تعرف الموضوع ده بعد ماتكون دخلت اللجنة وسلمت الورقة يعني بعد الامتحان
طب ايه شعورك لما تحس ان الامتحان اللي امتحنته كان عامل زي برنامج الكاميرا الخفية
وواحد بيقولك عايز تحل حل مش عايز يبقي لازم برضه تحل
طب ايه شعورك وانت رايح امتحان اغلبه رياضة وانت في الميكروباص اكتشفت انك نسيت الالة الحاسبة
ولما رحت جبت الالة من البيت واتشعبطت في ميكروباص اول متاحطيت رجلك فيه عطل فسبته ومشيت اول ماسيبته اشتغل ومشي ونسيت اقول لكم ان الميكروباص الاولاني بتاع الالة الحاسبة الكوتش بتاعه اتخرم
ايه شعورك وانت حاسس كانك لابس في حيطة رخام
في الاخر اكيد طبعا شعور لذيذ ورائع بس اكيد شعورك هيبقي اكيد زي شعور واحد اسمه اليعقوبي
وفي الاخر ادعولي كتير ان الدكاترة يتعموا عن المادة الجديدة اللي اكتشفتها في ورقة الاجابة
والسلام
اليعقوبي

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا