البداية وليس النهاية

اولا جزا الله كل الخير من تابعني في غزعبلاتي

فانا لم اكتبها الا لتذكر لحظات جميلة في حياتي لحظات كنت اجاهد نفسي فيها بحق ولكن يبدو ان نسيت فكنت اذكر نفسي بما مضي حتي تهدا نفسي وحتي يعرفني من يدخل مدونتي

ويعرف شخصيتي وحياتي فليس لدي ماخفيه علي احد

وقفنا المرة اللي فاتت فين ايوه عند المعسكر!!!!!!!!!!!!!!!!!!!ا

كانت اول مرة اسافر مع اخواني في مصيف وكنت وقتها دي 0اف(الاخوان اللي هيدخلوا هنا هما بس اللي هيعرفوا الدي0اف)

تعرفوا رحنا فين تخيلوا كده ؟؟؟؟؟؟؟؟

مارينااااااااا

ايوه وكانت اجمل سفرية في حياتي

انا كشخص كان لدي عادات سيئة في كل مصيف اروحه زي اي شاب عادي

فالمرة دي كانت مختلفة

نزلنا ورحنا الشاليه

وكان يومنا منظم جدا وده من الامور التي تعلمتها في هذا المعسكر

يعني من الساعة كذا الي كذا مثلا فطار ومن الساعة كذا الي كذا اذكار المساء او الصباح والصلاة الساعة كذا

فكانت الدنيا منظمة جدا

وكانت بس المشكلة في البحر عايزكم تتخيلوا مارينا واللي فيها

فكنا بننزل البسين هناك بعد عن الناس فكنا كتير ووينهزر والناس بتخاف تهوب نحيتنا

وكان في وقت لمحاضرة وكان في وقت للقران وللعب

يعني كانت رحلة مختلفة بالنسبة لواحد زي انا

مااعتقدش اني بصيت لواحدة في الرحلة دي والصلاة والقيام كانت من اول مرات حياتي اللي اصلي فيها قيام في غير رمضان

ورجعنا ووصلني اني حولت وبقيت بالفعل طالب في تجارة القاهرة

ونويت والنية لله اني مش هاكلم اي بنت في الجامعة دي خالص وكنت بقيت بارتباط قوي باخواني في الحي وشوفت بعض اخوان الجامعة ولكن لم احدثهم

ويدخل رمضان وكانت وقتها انتخابات مجلس الشعب

فاول عشر ايام دول كانوا من اجمل ايام حياتي رحت وقتها مسجد ال رواس والدكتور خالد ابو شادي وكان جو غريب علي اوي وفي المنطقة بنكلم الناس عن الانتخابات بس حصلت حاجة وقفت بعدها وقعدت في البيت بقيت رمضان

حصل لوالدتي حدثة واتجبست 4شهور فقعدت معاها الفترة دي وماروحتش في حته قعدت في البيت والحماس اللي خدني في الاول بدا يهبط انا من نوع البشر اللي شارع عندها زي البحر للسمك فقعدت اربع او ثلاثة مش متذكر اوي

وتيجي اجازة نص السنة وجدتي ام والدي تتوفي

ياااااااااااه ستي اللي كانت معرفش ايه وصحتها عاملة ازي وكانت تتهزلها الدنيا وكانت من الستات الاقوية رحمها الله

وكانت في اخر ايامها كنت اقرب شخص لها ولله الحمد

فقبل ماتدخل المستشفي الساعة واحدة ولا حاجة كنا في عربية عمي وبتنظر حواليها وبصرها زايغ وبتبص لي وكانها تودعني رحمها الله

فافتكرت الاية

فاذا برق البصر*وخسف القمر *وجمع الشمس والقمر *يقول الانسان يومئذ اين المفر*كلا لاوزر *الي ربك يومئذ المستقر

شوفتها بعيني

ورحنالها تاني يوم وجدناها دخلت في غيبوبة وخلاص ساعات وتقترب النهاية وماتت رحمها الله ودفناها

كان في مشكلة بين عمي ووالدي وكانوا شبه مقاطعين بعض وكانت ستي تشتكيلي من الحكاية دي وكانت تدعي ان ربنا ياخذها ويجمعهم مع بعض تاني

واستجاب الله لها،رحمها الله

وبعد ماوالدتي فكت الجبس نزلت الكلية الترم التاني وكنت بدات اجلس في اسرة مع اخواني في الحي فقلت لمسئولي انا عايز اشتغل مااخواني الجامعة اعمل ايه

قال لي روح للاخ اللي عندك في المدرج وقول له عايز اشتغل معاكم

ااااه نسيت نجاح الاخوان في الانتخابات والدنيا اللي اتقلبت بالفوز المفاجئ ده

ورحت لاخويا ده وقابلته فقلت له انا اخوك في الله فلان الفلاني وعايز اشتغل معاكم

فابتسم ابتسامة سمجة وقالي والله طب هات نمرتك وخدت منه نمرته

وطبعا كان فاكرني مخبر مزقوق عليه

وبدات فعلا اشتغل مع اخواني في الجامعة وبدا التغير الحقيقي في حياتي

وكنت متحمس جدا وكان في نفس الوقت بدا معي احد اخواني الذي اصبح فيما بعد من اقرب الناس لي

محمد صاحب مدونة كش ملك http://kishmalik.blogspot.com

ولمن لايعرف علاقتي بمحمد فانا ولله الحمد عمه وان اعطاه الله عمرا وتزوج وانجب ساصبح ايضا عم عياله يعني هبقي عمه وعم عياله

وموقف بعدها عرفت يعني ايه اخوة بجد

الاخ اللي قلت لكم عليه في الاول اللي رحت قلت له انا عايز اشتغل معاكم

كنا في مسيرة كبيرة وكانت الدنيا متوترة قبلها شوية وتحقيقات واستدعائات امن دولة وكلام من اللي بالكم فيه

فكانت مسيرة يوم الغضب الجامعي

وكنا واقفين علي باب وكنا حوالي 20او 25اخ وكان شغلنا ان الباب ده الامن ميقفلهوش

فشوية خدنا بالنا من الظابط بيتكلم في اللاسلكي وبيكلم حد انهم يبعتوا له قوات امن مركزي عشان يبعدونا من علي الباب

فوجدت اخي هذا بيقولي اخلع الجاكت فخلعته ولبسه هو ووقف اول واحد فينا بحيث لو جائوا يشيل الضرب من علي اخوانه رغم انه جسديا نحيف بس لا ازكيه علي واحسب انه يوزن كثير عند الله وبعدها رايت منه مالم اراه من احد في الاخوة والخوف والتضحية من اجل دعوته ومن اجل اخوانه

وفي الفترة دي كنت متوقع اني هيجلي استدعاء وكده فكنت متوتر اوي من الحكاية دي

وتعدي الايام وتفوت السنة ولله الحمد ومحدش من اخوانا البعدا بتوع امن الدعوة يعرف اسمي وهذا من فضل ربي

وحصلت لي محاكمات عسكرية في البيت ؟؟؟؟؟؟

طب ايه اللي حصل فيها نكمل المرة الجاية

والسلام
اخوكم اليعقوبي

فيلم حياتي 3

قبل مااكتب الموضوع المرة دي انا عايز اقول حاجة لخوانا واخواتنا

انا كاتب الموضوع ده مش من باب الترف الفكري والوقتي

انا واحد من الناس المؤمنين بتوصيل العبر عن طريق القصص والحكايات والمواقف فاتمني اننا نحاول نستفيد من المواقف في حياتنا لان في حياة كل منا فيلم برضه

وانا اسف جدا لان الكلام مش منظم اوي لانه بالنسبة لي ذكريات وفلاشات بفتكرها في دماغي فاللي بفتكره بحكيه

واسيبكم مع القصة

وصل بيا الحال المرة اللي فاتت اني بدات تظهر ليا عيوب لجماعة التبليغ وبدات اني اخذ موقف متحفذ شوية معاهم

بس كان في شئ جميل جدا جدا جدا في حياتي في الوقت ده

الكتور راغب السرجاني

يااااااه الراجل ده يااخوانا فعلا من اصحاب الفضل عليا كانت ايام جميلة جدا

احد اصدقائي كنت بروح معاه للدكتور راغب كل يوم الفجر (مش كل يوم يعني)وكان اكرمه الله عنده فطنة شديدة اوي وتظهر لك عندما تتحدث معاه وتعلمت منه اشياء كثيرة جدا وكانت فعلاايام من اجمل ايام حياتي

اه نسيت موقف مهم في بداية التزامي حصلي من والدتي

امي ربنا يديها الصحة والعافية عندها حاجة كده ايه هي

بتحلم بحاجات والحاجات دي بتتحقق فالمهم في مرة نزلت اصلي الفجر وكنت بقعد بعد الفجر شوية مع صحابي

فطلعت بعد الفجر بشوية كتير فلقيتها قاعدة لي وبدات تزعق فيا فقلت لها في ايه

قالت هتروح في داهية

قلت ليه

قالت انا حلمت انهم خدوك وقبضوا عليك ونزلت ادور عليك دلوقت في الشارع ملقتكش

امي حلمت بعد الادان بشوية ان في بوليس جه خدني ونزلت تدور عليا في الشارع بعد الفجر

وقالت لي بعدها صلي في البيت والكلام اللي مبيجبش همه ده

طبعا الحلم ده كان من الشيطان واعرفوا حاجة يااخوانا طول ماالشيطان بيجدك تتقرب الي الله لن يتركك في حالك بس الحمد لله تجاوزت الحكاية دي

تدخل اخر السنة التانية اللي كنت بعيدها وابتدي اتغير بالفعل وقرر اني لازم ابعد عن الجو ده

وغلبت نفسي في حاجات كتير ولله الحمد منها مثلا السجائر بطلتهاوالالفاظ الخارجة حديت منها كتير وقررت اني اروح اسافر لوالدي لمكان عمله وابعد عن الجو ده

وفي الوقت اللي بقرر فيه اني ابعد واسافر عشان اقعد بعيد عن الجو ده

تاتيك الفتن سعيا بين يديك

المعاصي اللي انت عجزت عنها تايتك سعيا تتحول بقدرة قادر في الشلة الموقرة لحلال مشاكل وحاجة كانت تغم

ولله الحمد انجح السنة دي وجائت لي فترة مشيت مع اخوانا السلفيين بس مش كتير فاخ منهم عمل معايا موقف فقفلت من جهته وهذا خطاء مني ومنه لاني عممت تصرف فرد علي جماعة وخطاء منه انه لم يراعي اني لازلت في بداية الطريق فياخذ باله من اي كلام لي معه فسبته برضه

الجعفري

وده بقي اقرب اصحابي وصديقي وان شاء المولي عز وجل زميلي القادم في المدونة

الجعفري ده اعرفه بقالنا حوالي 15او16 جاري في نفس العمارة

وكان له شئ يميزه وهو صغير ايه هو انه مكنش فيه شتيمة بيعجز لسانه عنها قاموس شتائم يمشي علي رجلين ولغاية اعدادي كان كده واهله ناس محترمين جدا لدرجة ان والدته كانت بتعيط منه عشان تتخيلوا

والده كان بيقول لوالدته متخديش الواد ده معانا في حته وكان يبلغ من العمر 4او5 سنين ليفضحنا وسط الناس حاجة صعبة جدا وكنت انا اقرب صحابه بس مكنتش زيه والحمد لله انا كنت مؤدب وانا صغير

ندخل في المهم ايه علاقة الجعفري بالكلام ده كله؟؟؟؟؟

علاقته ان ده كان واحد من الناس اللي ربنا جعلهم سبب لالتزامي

مرة واحدة في ثانوي بدات الحظ انه بدا يصلي وبدا لسانه يهدي من اللي بيقوله

وبدا تظهر عليه بوادر الالتزام مع احتفاظه بلسان به بعض الزفارة ولكن ليست كالاول

فبدات افكر ايه اللي خلاه كده ؟؟؟؟؟؟؟؟؟

وزادت علاقتي بيه في ثانوي وجامعة جدا اااا

وجدته رغم انه في جامعة خاصة مبيسعاش الي انه يكلم بنات والصراحة هو مكنش مهتم بالكلام ده وكان بيقولي ان الصحوبية والكلام ده غلط وكنت بحاول اقنع فيه انها عادي

وكان بياخدني وقتها لفين حد يعرف ؟؟؟؟؟؟؟؟؟؟؟؟؟؟؟؟

يوم رياضي للاخوان في المنطقة ومن هنا بدات معرفتي بالاخوان وكان مجرد يوم وبدات اتعرف علي الاخوان في المنطقة ولم يكن لهم تاثير عليا في المرحلة دي الا اني اتعلمت الصلام في اليوم الرياضي ده طب ازاي؟؟؟

كنت اروح هناك كان لازم اصلي قوانين اللعب معاهم كده ومقلش ادبي في اللعب واللي يشتم او يغلط يطلع بره شوية

فكنت مقطع في الصلاة او مثلا في نفس اليوم اللي فيه اللعب اكون مصلطش ولا صلاة فاروح هناك اصلي المغرب والعشاء اصل هما كلهم بيصلوا فقلت انا بنافق نفسي ولا ايه فكان الكلام ده بيئنب ضميري جدا

وتدخل تاني سنة وتزيد علاقتي بيهم شوية دون ان اشارك معهم في شئ ولكن كان تاثير الجعفري عليا كبيرلان بقي في الوقت ده جزء منهم وانا معرفش انا لقيت صحبي بقي كويس اخلاقيا فاستغربت ده اللي انا اعرفه وبدا يكلمني عنهم علي استحياء

وفي الوقت ده في اجازة السنة التانية كنت قطعت بالفعل مع البنات في الجامعة مقاطعة الي غير رجعة اما الولاد فدول صحابي الي الان ولله الحمد

وفي الوقت ده في الاجازة حولت جامعة القاهرة عشان ابعد عن ارض المعاصي بالنسبة لي هي عين شمس وبقيت طالب في تجارة القاهرة

وبعدها ياتي احد الاخوان في نهاية الاجازة ويقولي ان في رحلة ثلاث ايام الي احد المصايف الراقية جدا في بلدنا وان في واحد صاحبنا عنده شاليه هناك وانت هتروح معانا

وبدا الجعفري يقنعني بالحكاية دي

وكان اغرب مرة في حياتي اروح فيها مصيف ورجعت بعد المصيف ده شخص تاني تماما

ياتري ايه اللي حصل في المصيف ده اسف في المعسكر ده؟؟؟؟؟؟

نكمل المرة الجاية

اخوكم

اليعقوبي

فيلم حياتي 2

وقفنا البوست اللي فات عند نقطة اننا حصلي موقف وبسببه سيبت البنات

قبل كده عايز احكي حاجة

كان بيحصل معايا اوقات مثلا اسمع خطبة جمعة فتاثر اوي واتجهم كده ولما حد يكلمني مردش متاثر بقي وكانت الحالة الايمانية دي بتنتهي معايا بعد 3او4ايام بكتيرها وبالاخص لما بدخل الجامعة والمفروض عين شمس دي تدخلها برجلك الشمال وتستعيذ بالله من الخبث والخبائث (جامعة غريبة)المهم

فكنت امام زملائي وزميلاتي ان انا شخص متذبذب يعني شوية بكلمهم في الدين وشوية بتكلم في نكت وشوية بهزر هزار ميصحش ،،فاكر امرين

1في مرة كنا بنلعب لعبة صراحة مع الشلة بذكورها واناثها فواحدة جه الدور عليها وكانت بتسالني فبتقولي ايه

انت ليه مذبذب كده يعني انت شوية كده وشوية كده

فرديت وقتها والكلام ده من اربع سنين وفاكر الموقف والمكان:قلتها انا في الاخر هبقي ملتزم او هكون اللي انا عايزه هو بس صراع مع نفسي

2امي كانت برده مسكاني نفخ يعني شوية اصلي وشوية لا فبتقول لي نفس الكلام وكنت في نفسي برد نفس الرد

انت رحت فين ياعم النجم ارجع تاني احنا كنا فين عند الموقف اه

اسيبكم مع الموقف

الوقت حوالي الساعة تسعة بالليل ورجع من الكلية وركبت المترو

المترو شبه فاضي يعني انا وكام واحد بس واقفين

بنتين وولدين يدخلوا المترو ويبتدوا يهزروا ويضحكوا بصوت عالي (البنتين لبسين محترم والولدين شكلهم برضه محترمين)

انا واقف بعيد عنهم شوية صغيرين وبجانبي واحد فاكر شكله شعره محمر شوية وعامل دوجلاس فلما سمعهم بيهزروا قال كلمه يعني انا فاكرها لغاية دلوقتي

(وبنضحك علي نفسنا وبنقول انهم زي اخواتنا)

الكلمة علقت ولزقت

قعدت افكر

هل البنات زميلاتي في الجامعة دول زي اخواتي فعلا زي مابدعي؟؟؟؟؟؟؟؟

انا اختي مرضاش انها تقعد مع ولد

اختي مرضاش ان ولد يهزر معاها

اختي مرضاش ان ولد يوصلهاللبيت

واخذت القرار

ورحت تاني يوم فبيكلموني برض بتناحة شوية فقلت لواحد من صحابي قول لهم اني بطلت اكلم بنات كده وش علي طول ولله الحمد وفعلا قلهم كده وبعدها بفترة

رجعت للاسف اكلمهم تاني بعد فترة كبيرة بسبب ان صحابي اللي في الجامعة فعلا ميعنوش علي الطاعة فصمدت لفترة ثم رجعت لما انا فيه

وتطور الامر والسنة تخلص واكتشف اني عدت السنة وسقطت وديه الصدمة اللي فوقتني

وكنت شايل الترم الاول مادة واحدة فكنت شبه فاضي

فحصلت حوارات قصة من قصتين الحب اتفشكلوا بسبب ان الولد امه واخواته ملتزمين جدا منتقبات والبنت اللي كان بيحبها فري وهزار هنا وهنا فهو كان بيكلمها وبيقفل معاها فنفضت فمين كان رسول المحبة والسلام اللي كل واحد بيحكي معاه .................

فاكتشفت حاجة مهمة جدا فعلا يااخوانا في ناس دخلة الجامعة عشان تحب بس وتتحب وفيها ايه البنت تكلم بدل الواد عشرة وفيها ايه لما تهزر مش هو برضه زي اخوها

المهم

بعدت عن جو الجامعة في الترم الاول كتير وبدات اتعرف علي ناس ملتزمة وكانوا من التبليغ والدعوة

فكان فيهم اخ علي طول يكلمني ويسال علي وياخدني ونكلم الناس وحلقات فالدنيا كانت مولعة وحركة للدين وعرفت يعني ايه يبقي ليك قضية

ومن الاسئلة التي كانت بتلح في راسي ايه يخلي واحد زي الاخ سابق الذكر يكلم الشباب كده مش هو شب زيهم وفي جامعة بل انه كمان ماشاء الله معاه عربية بدل مايروح يستمتع بيها وبفلوسه بيوجع دماغه مع ناس ممكن لما بتشوفه بتهرب منه ويجري عليهم عشان يكلمهم

فقلت دي اكيد قضية في دماغه وهو مؤمن بها

وفي الفترة دي بدات التزم بجد فعلا بدات اخفف من ذهاب الجامعة وكده

وتحصل انتكاسة في الترم التاني كنت شايل 3مواد وارجع الجامعة تاني حيث الجو الفاسد والحوارات وده يحكيلك ودي تحكيلك

الي ان جائت رسالة من الله 0000رؤيا تانية

بس المرة دي مش انا اللي شفتها واحدة من البنات دول في مرة كنت بكلمها في التليفون بسال عليها

فلقيتها منهارة وبتعيط جامد وحزينة

فتخضيت لان كان والدها تعبان فقلت اتي امر الله

فلقيتها بتقولي انها شافت حلم مخيف جدا وكنت انا فيه

مش هسرد الحلم لانه طويل

بس هي طلبت مني ان اشوف حد يفسره

فكان بيجي خطيب مسجد بيخطب في المسجد اللي جنبنا وكان شاب محترم جدا فحكيتله علي الحلم فقالي ان في الحلم ده اني هبقي كويس وهي البنت دي هتفضل فترة وبعد كده هتلتزم وقال لي ان من الواضح لنها مش ملتزمة وكده وقول لها انها لازم تلتزم

يعني تلخيص الحلم ان في امواج هائجة في كل مكان وانا طلعت جبل واحتميت بيه والبنت دي علقت في الامواج فانقذتها انا وواحد تاني في الحلم ده من الموج وطلعنا كلنا فوق الجبل

فبعد كده كلمتها عن تفسير الرؤيا دي وقلتلها انك لازم تلتزمي لان حياتك دي مترضيش ربنا وفعلا اتاثرت وقلتلها اقبلك بكره في الجامعة ان شاء الله

تاني يوم رحت الجامعة لقيتها بتلعب بنج بونج مع ناس صحابنا والدنيا لول علي الاخر

نرجع تاني لطريق الالتزام

بدات تظهر ليا عيوب لجماعة التبليغ والدعوة وبدا الحظ كلام لهم لم اتفق معهم بس للحق كلهم مش كده في منهم ناس كويسة جدا

وان شاء الله المرة الجاية اكمل كلامي واكمل الحكاية

والسلام

اخوكم اليعقوبي

فيلم حياتي

بما ان هذه المدونة ملك لصاحبها فصاحبها هيكتب خاص بيه شوية بس الناس هتستفيد منه كتير

بحكي القصة دي عشان اغير الجوبتاع المدونة شوية لاني حاسس ان في ناس اتخنقت فهحكي قصتي من اول ثانوي لحد ماتعرفت علي اخواني وبقيت واحد منهم

واسيبكم مع القصة اللي تحمل لي ذكريات كثيرة جدا وعلي فكرة الكلام اللي حصلي ده يحمل رسائل كثيرة جدا لي وكاني كنت اساق سوقا الي هذا الطريق المهم اسيبكم مع القصة

سلام

القصة ترجع من اربع سنين لما كنت في الثانوية العامة وكنت في فترة ثانوي عايشها بالطول والعرض فترة ربنا مايكتبها علي حد المهم

جبت في تانية ثانوي88,5في المية وكملت علمي وفاكر وقتها كان نفسي اطلع صحفي عشان احارب وافضح الفساد فالحاجة والدتي ربنا يكرمها قالت بزعيق وقتها احنا بنصرف عليك ده كله عشان تتطلع صحفي انت هتدخل هندسة وباين كده انها نسيت تقول ان شاء الله

فاستهبلت في تالتة عناد مع امي وخلاص رغم اني كنت كويس دراسيا بس ربك لما يريد

وجبت في تالتة كله علي بعضه83،5في الميه نسيت حاجة ابويا طول سنة تالتة بيقول لي لما كان شايفني مستهبل يابني خش ذاكر نص درجة هتفرق معاك فانا الصراحة كنت باخد كلامه ده علي جانب التفويت المهم النبؤة بتاعة ابويا اتحققت

انا كنت جايب بالدرجات 242،5 تجارة القاهرة اللي في نطاقي الجغرافي واخدة كام ياتري حد فاكر انا اقولكم واخدة 343اي والله وعين شمس كانت واخدة 242المهم اتحدفت في عين شمس اللي بيني وبينها مسافة لايستهان بها في المقابل تجارة القاهرة بيني وبينها حوالي 10او15دقيقة بالكتير

بس في حاجة غريبة تحصل معايا انا وجدتي الله يرحمها وامي

حكاية الرؤي بيجيلنا وقت نشوف رؤي واضحة جدا يعني مثلا

قبل مايجي نتيجة التنسيق حلمت اني داخل عين شمس ومش بس كده لاوفي الحلم كان الكلية مكسرة وقالوا لنا تعالوا بعد اسبوع وفي نفس الرؤيا دخلت الكلية وانا راكب عربية مع بنت من الكلية

وفعلا بعدها التنسيق جالي تجارة عين شمس والكلية كانوا بيجددوها والدراسة ابتدت بعد اسبوع فعلا بس حكاية البنت دي تاويلها مكنش كده النساء في الرؤي في الغالب تبقي دنيا وليس دين وفعلا هما سنتين بتوع عين شمس كانوا دنيا

ندخل في المهم

دخلت الكلية واتعرفت علي شلة كنا تلاتة ولاد وتلاتة بنات وابتديت من ساعتها الضحك علي نفسي واقنعت نفسي ان البنات دول زي اخواتي ،والفيلم اللي بيحكيه كل واحد تكلمه علي حكاية البنات دي

بقولك ياعم دي زي اختي، دي لو عريانة انا غطيها، انا مش ممكن ابصلها ابدا ،انت عبيط

المهم

بس كان في شئ بيجذبني اني ابعد عن الاختلاط والفساد اللي حواليا يعني في مرة كنت قاعد في المدرج وقطاع في المدرج انا قاعد مع اصحابي اقول نكت وبشر اتلمت حوالينا وعمالة تضحك ،واجاركم الله اخوكم لما كانت بتفتح معايا في حكاية النكت دي كانت مبتقفلش وكانت النكت دي شغلتي

فالدكتور دخل وكانت المحاضرة بالليل فسرحت اوي وبصييت للسما(من شباك المدرج) فافتكرت ستي الله يرحمها وافتكرت الموت مرة واحدة فاكتئبت وبعد المحاضرة ماشين احنا والبنات عشان نوصلهم فانا ماشي ساكت ومبوذ فواحدة فيهم بتسئلني انت مالك في حاجة فقلت لا فالحت اقولها في ايه

فقلتها كلمة غريبة وهي ردت عليا برد اغرب

انت تخيلي لو احنا موتنا دلوقت وقابلنا ربنا هيعمل معانا ايه

فردت بتلقائية غريبة وقالت لي وفيها ايه احنا مبنعملش حاجة غلط (يعني معندهاش اي مشكلة انها تقابل ربنا في اي لحظة)يقين جامد ربنا يثبتنا رغم انها كانت مع ولاد وبتهزر معاهم رغم اللبس اللي مش اسلامي(ربنا يهديني ويهديها)0

الكلمة نزلت عليا زي القلم وفوقتني طب ده سيدنا ابوبكر الصديق مقالش كده

ولا النبي عليه الصلاة والسلام قال كده

ولا اي حد صالح قال كده

فالمهم قعدت اكلمهم في الدين شوية لاني مكنتش جاهل ولله الحمد كان عندي مخزون كويس واتفقنا علي حاجة اننا نيجي تاني يوم صايمين وبس

تعدي الايام ويحصل قصة حب بين الولدين صحابي مع بنتين والبنت الثالثة كانت مكتوب كتابها فانا رغم دماغي المولعة مكنتش مؤمن بحاجة اسمها حب في الجامعة بين ولد وبنت انا كنت اعرف حاجة ان اللي يحب واحدة يروح لابوها ويطلبها لاميحبش من الاساس وطبعا المرء علي دين خليله فقعدوا يزنوا عليا اني لازم احبي لي واحدة ويحاولوا يقنعوني بالكلام ده فالمهم قلت مزعلهمش قلت حب لك واحدة ياواد وتخلي عن مبادئك شوية فنشنت

علي واحدة بس من الواضح ان تاثير الدين كان لازال فيا فقلت قبل ماروح اكلمها استخير ربنا الاول عشان نمشي في السليم

فعملت صلاة الاستخارة وشوفت خير الله ماجعله خير اني في فرحي مع البنت دي والاغاني شغالة والكل مهيص

فقمت من النوم منشكح انشكاحة منشكحهاش حد وقلت باضت لك في القفص ياابو عز الموضوع شكله هيمشي تمام ،انت مش عملت استخارة وجت موافقة خلاص بقي عيش

بس المهم ايه اللي حصل؟؟؟؟؟؟؟؟؟؟

بعدها علي طول بيوم ولا حاجة قبل ماروح اكلم البنت دي بتفرج علي الدش فلقيت الشيخ سيد حمدي مصادفة انا اسف لقيته قدرا بيقول في برنامج تفسير الاحلام بتاعه ده لة انك شوفت في الرؤيا معازف وكلام من ده يبقي الموضوع ده باطل علي طول

فانا اخذت الكلام من هنا وسمعت الكلام من هنا

وفي الوقت ده يحصلي حاجة غريبة

سيبت البنات زميلاتي البنات اللي في الجامعة بسبب موقف حصل معايا المرة الجاية احكيلكم عليه ان شاء المولي عز وجل

والسلام

اخوكم اليعقوبي

انت من اي الاتجاهات

في مرة دار حوار بيني وبين احد اخواني حول موضوع التمثيل بالنسبة للنساء وكده فقلت له انا معترض علي الحكاية دي جدا ومش مؤمن بيها فقالي ايه ده انت شكلك كده من اليمين المتشدد

فقلت له :ايه اليمين المتشدد ده

فقالي :الاخوان اساسا ثلاث تيارات يمين متشدد ويسار منحل والوسط

(علي فكرة هو كان بيهزر معايا يعني الكلام كان كله ضحك)

بس انا عايز اقف لحظات هل فعلا الاخوان ثلاث تيارات هل الكلام ده صح ولا غلط

هل هناك يمين متشدد في الاخوان فكره اصولي سلفي (مثلما سمعت من بعض اخواننا اللي في احد التعليقات في احدي المدونات بيقول بلاش التفكير السلفي ده)

له مسلمات لا يتنازل عنها فقط هو تنظيميا تابع للاخوان

وافكار اصولية متاثرة بالتيار السلفي وشيوخه في مصر

ام ان هناك بالفعل تيار من اليسار المنحل في الاخوان اللي تاثر بالتيارات العلمانية (زي مايقال عن بعض اخوانا )له اجتهادته الخاصة به والتي لاتبني علي اساس شرعي

فقط اصبح تيار نضالي ثوري يهاجم النظام فقط للمهاجمة وان فعل شئ جيد يشكك في نواياه

ام ان هناك تيار وسط بينهم هما الاثنين ياخذ من هذا ومن هذا

انا مستني الردود والتعليقات اللي هاتضيف او تفيد في مثل هذا الموضوع وعايزن نعرف فعلا احنا رايحين الي اين بالتقسيمات دي ،وانت يالي هاتعلق من اي تيار فيهم

وهل التسميات دي بالفعل ليها وجود ام هي مجرد هزار من واحد صاحبي؟؟؟؟؟؟؟؟

والحق مع من هذه التيارات ان كان بالفعل ليها وجود؟
.............................................................

تحديث

مش مهم اللي يعلق يبقي من الاخوان انت ايه نظرتك من خلال رؤيتك او معاملتك

للاخوان علي النت او في الواقع العملي

والسلام

اخوكم اليعقوبي

حوار صريح

انا:ازيك يانفسي

نفسي:كويسة احسن منك

انا:انت ليه بتعملي فيا كده

نفسي:انت عبيط انا عملت فيك حاجة دا انا وانت واحد

انا :كل ده ومش عارفة انت عملت ايه

نفسي:عملت ايه فكرني كده

انا:البلاوي والذنوب والمعاصي اللي انت كل شوية بتعمليها ايه مش واخدة بالك انك كده هاتوديني في داهية

نفسي:انا هوديك في داهية دا انا عايزة ابسطك مش عايزة انكد عليك

انا:تبسطي مين بس انت كده بتظلميني

نفسي(في نرفزة):بظلمك ايه ماتهدي شوية انت نازل سلخ فيا كدا ليه

انا(في تاثر):خايف اننا منعرفش نرجع من اللي انت بتعمليه ده

انت اي حاجة بتيجي علي مزاجك بتعمليها

انت متبعة لشهواتك وملزاتك

انت بتعيني الشيطان عليا بدل ماتقفي معايا ضده

انت بقت همتك في الشر اكبر من همتك في الخير

انت مبتقيش تتطوعيني الا في الغلط بس

انا زهقت منك ومن قرفك00

نفسي(مقاطعة):متهدي ياعم النجم انت خدتني في دوكة كده ليه والمفروض ان انا اسكت ومرضش عليك

تتكلم وقد برقت عينها

انا بحاول اخليك تتستمتع بالدنيا وحلاوتها

انا بحاول اخليك ترضي عن نفسك بدل اللي انت عايش فيه

انا بحاول اشيلك من عناء التكلف في الدنيا عشان منظرك يبقي كويس ادام الناس

انا بحاول اريحك هاتاخد ايه من مقاومة شهواتك وملزاتك واحاسيسك وشعورك مش همة دول اللي بيبسطوك

صدقني ياحبيبي انا خايفة عليك من الهم بتاع الدنيا انا نفسي انك تنبسط دنيا واخرة

انا:اي استمتاع وانت بتبعديني عن ربنا

اي استمتاع وانت بتخليني بحتقر نفسي بسبب نقضي عهود كتير مع ربنا

اي استمتاع وانت بتاخريني في علاقتي مع ربنا

اي استمتاع ثم اي استمتاع ثم اي استمتاع وانت بتشديني لعذاب ربنا وغضيه

اي استمتاع وانت جعلتي الله اهون الناظرين الي

اي استمتاع ده الي هوديني للنار

نفسي:لالالا العملية مش كده انت لازم تنبسط ومتحرمش نفسك من حاجة وبرضه اعبد ربنا انا قصدي00

انا(مقاطعا):قصدك ايه اعبد ربنا زي ماانا عايز مش زي ما اراد هو و سبحانه وتعالي

علي العموم انا لازم اربيكي وامنعك من اللي انت بتعمليه ده كويس عشان تعرفي تحترمي نفسك وتعرفي ايه الصح من الغلط

نفسي (تربي مين ياغلبان):انت بتهرج

انا هو انت وانت هو انا

انا رغباتك الدفينه اللي بتحاول انك تقاومها

انا ذكرياتك القديمة بكل مافيها من سئ وجميل

انا0000

انا( مقاطعا في تحدي):هنشوف هاعرف اربيكي ولا

انا بتحاداكي

نفسي:وانا قبلت التحدي (وهي تضحك)مش هاتعرف تعمل حاجة

انا :الايام بيننا،سلام يا انا

نفسي :سلام يا انا

سؤال لينا كلنا هل احنا بالفعل تحدينا وقبلنا التحدي ولا00000000000000؟

والسلام

اخوكم اليعقوبي

خواطر في دماغي

انا مش عارف افتح للموضوع ازاي

بس هابتديه بحكاية لاني من الاشخاص اللي بيتعلموا باسلوب الحكايات اكتر من الوعظ (بل اني تعرفت علي الاخوان بالحكايات)

كانت ليا جدة (رحمها الله)وتعلمت منها الكثير والكثير من الامور التي تركت مرجع حافظ علي فطرتي في لاحظات الانفلات

فاكركانت جدتي دي ليها جملة كانت تعلمها لامي تعلموها
اصل من قطعني
اعطي من حرمني
اعفو عن من ظلمني

انا فاكر لما كانت تقعد في بيت جدي وتقرا القران رغم نظرها الضعيف قد ايه كان بيتعبها

فاكر الطيبة والحنان علي كل من حولها

فاكرها لما كانت تقوم تصلي

فاكر في مرة في عيد ميلادي وكانت اختها اللي هي خالة والدتي توفيت قبله بفترة قصيرة فمرضيتش تنكد علي في عيد ميلادي وخلتني اعمله في بيت جدي

فاكر انها قبل ماتتوفي بفترة قصيرة جدا راحت لاخوها عشان سنوية مراته وتجامله ،وفاكر وقتها اد ايه امي وخلاني وخالتي اتخنقوا معاها عشان تقعد لانها تعبانة صحيا

وفاكر يوم ما راحت لاخوها وكان في الدور السابع ومفيش اسانسير وطلعت وقتها السلم ده علي ايدها ورجلها من التعب وكانت تقعد تستريح علي السلم ومش قادرة تاخد نفسها

وفاكر انها قبل وفاتها باسبوع كانت بتقدم علي الحج ومقبلتش فخالي بيكلمها في التليفون وبيقلوها خلاص ياامي ربنا مش رايدلك ،وقعدت تزعق معاه عشان يقدملها في مكان تاني (مع رفضه عشان صحتها )فوقعت وهي بتكلمه في التليفون وتدخل المستشفي وتموت بعدها بااسبوع

وفاكر كويس جدا جدا جدا
قد ايه هي صبرت لما خالي توفي قدام عينها في 6شهور ولم تفعل الا مايرضي الله


وفاكر كويس اوي رؤية شوفتهلها بعد ماتوفيت

كاني في شقتنا وقت الفجر ،وغرفتي بقت ممر طويل مظلم وفيه كشك منور فيصيت عليه فلقيتها بداخله
فبسالها بلهفة في الرؤية

انت كويسة ياستي فتهز راسها بالايجاب
فبقولها انت في الجنة دلوقتي فتبتسم وتهز راسها بالايجاب

فتخرج معي للصالة وتقولي انا ماشية عشان هما عاوزني دلوقتي فبقولها مين فوجدت كئن السماء انشقت عن يد نزلت وامسكتها وطلعت بها لاعلي

وفي مرة امي شافتها وهي بتلف في الكعبة وبتمسك براس امي وتدخل راسها لكي تبوس الحجر الاسود

طيب انا بحكي القصة اللي انا عارف انها متهمش كثير منكم ليه؟؟؟؟؟؟؟؟؟
انا عايز اوصل حاجة ستي دي ست بسيطة للغاية مش هاقول انها الاخت السوبر الداعية الي الله والكلام الكبير ده كله
لا
كانت شخصية بتتعامل مع الله بفطرتها بتعبده بفطرتها
في ناس يوم القيامة كانوا بيعملوا اعمال في الدنيا (وهي اعمال واجبة)بيعتقدوا ان الاعمال دي هي اللي هاتنجيهم من عذاب الله فيجدوا الاعمال دي هباء منثورا
واعمال تانية كانوا لايلقوا لها بالا قد تنجيهم من خذي يومئذ

كان هناك احد العلماء وهو الامام جنيد
فبعدما مات وجده احد تلامذته في رؤية
فقال له الامام جنيد ان كل اغلب دروس العلم ضاعت كلها هباء مابين السمعة والرياء
وقال:ولكن لولا ركيعات في جوف الليل كنا نصليها لهلكنا
انا قصدي ايه من الفيلم ده

لاتحقرن من المعروف شيئا1

تعامل مع الله بفطرتك ولاتتكلف (مع التادب معه سبحانه وتعالي في دعائك وطلبك منه اي شئ)2
الطرق التي قد توصلك للجنة كثير فلاتحرم نفسك3

(متنساش تقرا البوست اللي قبل ده مهم للغاية وجاوب علي اسئلته مع نفسك)
اخوكم اليعقوبي

عدنا

الحمد لله وكفي وسلام علي عباده الذين اصطفي

والصلاة والسلام علي رسولنا عليه افضل الصلاة والتسليم

لماذا بعدت فترة عن التدوين؟

ده لاسباب

ا-كنت محتاج ارجع نيتي لله عز وجل

ب-حسيت اني بدون لمجرد التدوين وبعلق لمجرد التعليق

ج-لقيت ان التدوين بياخذ وقت طويل مني ،في الوقت اللي محتاج اعمل فيه حاجات تانية

د-كنت لازم احدد انا عايز ايه من التدوين انا هاوصل ايه هاقدم جديد ايه

نظرة علي التدوين واللي بيدونوا واللي بيعلقوا

في خلال الفترة اللي بدات ادخل فيها المدونات لاحظت الاتي

1في ناس بتدون وخلاص وناس بتعلق وخلاص

يعني مثلا تلاقي مدون يقولك في بوست انه مش عارف يكتب ايه

وده هل لان مشاكل الامة انتهت فمش لاقين حاجة نكتب عنها ؟

ام هل لان المدون نسي هو بيدون ليه اونيته فسدت بالوقت (ماكان لله دام واتصل وما لغير الله انقطع وانفصل)؟

ام هل ده لانه زهق من اللي هو بيعمله فكان لازم يدور علي حاجة تانية يضيع فيها وقته؟؟؟؟؟؟؟؟؟؟؟؟؟؟؟؟؟؟؟؟؟؟

وفي ناس بتعلق والسلام

يعني لايضيف شئ للبوست فقط مجرد كلمة جزاك الله خيرا او بوست رائع ربنا يباركلك(فين الاضافة في تعليق زي ده فان لم تضف علي الحياة فانت زيادة عليها)

شوية اسئلة كنت بسالها لنفسي في فترة الانقطاع وعايز كل واحد يجاوب عليها

ا-هل بتجدد نيتك قبل ماتدون او تعلق او قبل ماتفتح النت اساسا؟

ب-هل تنتظر اوتتاثر بالرد علي بوستك او تعليقك والمدح فيهما؟

ج-هل بضيف جديد في المدونة ام هل انا مدون وخلاص؟

د-هل لو تحول التدوين لمجرد كلام وخلاص هاركب الموجة زي بقيت الناس؟

لو سمحتم جاوبوا الاسئلة دي وراجعوا انفسكم عشان منجيش في الاخر نلاقي عمل كنا معتقدين اننا هناخذ من وراه حسنات فانقلب علينا عملنا وذلك لاننا نسينا نوايانا واهدرنا وقت كثير في امر حلال مع وجود امور اخري حلال اضعناها

والسلام

اخوكم اليعقوبي