السبت، 27 أكتوبر 2007

الاسلام ال..........

بسم الله والصلاه والسلام علي رسول الله ,,,,, مش عارف في الحقيقه اكلم معاكوا عن ايه ممكن علشان اول مره اكتب موضوع علي مدونه مش عارف طب اتكلم معاكوا عن الاسلام السياسي ولا الاجتماعي ولا الاقتصادي ولا ولا مش عارف بس عايز عارف هو في حاجه اسمها كده عن نفسي لااظن طب في ايه اه في حاجه اسمها الاسلام الشامل ! شامل ايه بالضبط اقولكم (ان الاسلام عقيده وعباده\ووطن وجنسيه \وسماحه وقوه \وخلق وماده \وثقافه وقانون) وعلي ذلك عاش النبي واصحابه فبالاسلام كانوا يحكمون وله كانوا يجاهدون وعلي قواعده كانوا يتعاملون وفي حدوده كانوا يسيرون , لالالابص ياعم انا بصلي وبصوم وبحج اه انما الدين دين والسياسه سياسه مدخلناش كله في بعضه يعني ايه احكم بالاسلام ازاي يعني انت هدخل الدييييييين في السياسه استغفر الله العظيم ,طب معلش اسمعني وهفصلك يقول الله تعالي (ياايها الناس قد جاءكم برهان من ربكم وانزلنا اليكم نورا مبينا .فأما الذين امنوا بالله واعتصموا به فسيدخلهم في رحمه منه وفضل ويهديهم صراطا مستقيما) يعني ايه مش فاهم ,هقولك اهو يعني (السلام عقيده وشريعه .والشريعه عبادات ومعاملات واخلاق ,والمعاملات تشريعات تنظيميه واداريه وجزائيه تشمل كل جوانب الحياه,فالعقيده والعباده والاخلاق هي التي يقوم عليها الجانب اليربوي في الاسلام الذي من شأنه ان يوقظ الضمير ويوجد ملكه مراقبه الله عز وجل,,,واما المعاملات التنظيميه فتشمل الجوانب المدنيه واحكام الاسره واحكام القضاء ونظام الحكم وقواعده وكيفيه اختيار رئيس الجمهوريه وشكل الحكومه وعلاقات الافراد بها وحقوقهم ازائها ,وتنظيم العلاقات الماليه المتعلقه بموارد الدوله ومصارفها والعلاقه بين الدوله والافراد, واما المعاملات الجزائيه فتتعلق بتحديد علاقه الفرد بالدوله من جهة الافعال المنهي عنها......ولما كان الاسلام دين شاملا وخالدا فقد اتسمت شريعته بالمرونه والتطور لان الحياه بطبيعتها متطوره,ولذلك فقد جاءت الشريعه بقواعد عامه ومباديء كليه في جوانب الحياه المتغيره والمتطوره وسمحت بل امرت (العلماء العلماء العلماء) المجتهدين في استنباط الاحكام المناسبه لكل عصر ومكان) لذا فأن الاسلام منهج شامل وشريعه كامله لايأتيه الباطل من بين يديه ولا من خلفه ,وان الاسلام اقتصاد وسياسه واجتماعيات ومعاملات واخلاق وسلام وحرب بل وترفيه وحياه فلا فرق بين اي من هذه المعاني ,,,, خلاص وصلت اي ياعم انت نمت ولا ايه , وجزاكم الله خير اللهم اني اعوذ بك ان اشرك بك شيء اعلمه واستغفرك لما لااعلمه(فستذكرون ما اقول لكم وافوض امري الي الله ان الله بصير بالعباد)

الأربعاء، 24 أكتوبر 2007

مواقف من الصعيد الجزء الاول

بسم الله والصلاة والسلام علي رسول الله


كنت في مرة منزل بوست وقلت لكم في اخره اني منزله من الصعيد


فعلا يااخوانا في بقعة من بقاع مصر منسية اسمها الصعيد بدات الدولة تنتبه لها الفترة اللي فاتت دي


حدث لي بعض المواقف فيها وسمعت فيها قصص وحكايات غريبة وشوفت عادات وتقاليد كنت اظن انها اندثرت


ندخل في الموضوع بس انا هحكي في البوست ده وصف للصعيد بوجه عام او البلد اللي انا رحتها بالاخص وهي قنا وموقفين حدثوا معي


اول حاجة هناك الناس طيبة اوي ولما بتحب حد تحبه بجد والراجل فيهم راجل بجد يعني ميبيعكش في اول السكة زي مابيقولوا تحكمهم قبلية شنيعة وكانت مسيطرة عليهم حكاية التار بشكل غيرعادي وبطريقة صعبة شوية لازالوا يقدموا العادات والتقاليد في بعض الاوقات عن الدين والصوفية هناك متواجدون بشكل غير عادي حاجة صعبة اوي وطرق صوفية كثيرة


تقسيماتهم القبلية عرب وهوارة واشراف المحافظة تحوطها الجبال وهي بالقرب من البحر الاحمر حتي انك تجد ان اغلب اهلها شغالين هناك


الطبقة الوسطي دي عندهم شبه مندثرة الناس نوعين اصحاب ممتلكات والنوع التاني شغال عند الاول


يهتموا جدا بالمظهرية وشكلهم امام الاخرين المراة هناك محتشمة يعني من الاخر اللي بايعاها دي اللي لابسة بنطلون واسع طبعا الكلام ده ميننطبقش علي النصاري


عندهم هجس امني بسبب الفترة السودة اللي شافوها ايام مقاومة الدولة للارهاب بس الصراحة الامن مسبش هناك خد عاطل علي باطل مفرقش الوحش من الحلو
المراة هناك كانت شبه متبهدلة شوتين تلاتة اربعة لحد فترة قريبة بس بدات تشم نفسها بعد العلم وكده وعشان بس اصورلكم موقف المراة في بعض القري هناك يكفي ان اقول لك انها هناك لايمكن ان تخرج من بيتها الا ثلاث مرات لما تتولد عشان تشوف الدنيا شكلها عامل ازاي ولما تروح بيت جوزها ولما تموت عشان تروح قبرها بس كده وهابقي احكي عن مواقف في هذا الامر ان اشء الله فيما بعد
الناس هناك اغلبهم بيصلوا فعلا في ناس كتير بتصلي هناك بس نظام خلص عشان اللي بعدك يمشي اللي هي الصلاة السويدي يكفي اني اقلكم اين في رمضان رحت هناك فترة فصليت التراويح في مسجد كان بيصلي الركعة باية طبعا كانت الساعة سبعة ونص وانا مخلص اربع ركعات تراويح ايام ماكانت العشا الساعة سبعة وعشرة يعني العشا بالاقامة بالذكر بعد الصلاة باربع ركعات تروايه تلت ساعة وكفي الله المؤمنين القتال
الموقفين
اول موقف ان اول ماولدي راح هناك قبله واحد من الناس اللي هناك كان لسه والدي جاي وميعرفش الراجل وهما هناك بيقولوا عليه مبروك او من الناس الطيبة اللي مكشوف عنها ومبيخدش حاجة من حد فانا مش فاهم
فالراجل ده راح لوالدي وقاله انت ربنا هيكرمك يابشمهندس وهيكرملك عيالك وبالذات ابنك الكبير ربنا هيكرمهولك دنيا واخرة وام اداه تلات ملبسات لولاده
تاني موقف كان السنة اللي فاتت برضه واحنا بنخرج معرض في الكلية جالنا شوية عيال بلطجية وكده وشكلهم محدوفين من الامن وقابلونا واحنا بنخرج الحاجة بره الجامعة الحمد لله مخدوش الحاجة بس اتخنقنا معاهم ومحدش منهم لحد قبل الخناقة ماتنتهي بلحظات عرف يعمل مع اخوكم وكنا اربعة وهما ماشاء الله كتير ومعاهم شوم بتاع الكراسي فالمهم في الاخر واحنا بنرجع منهم وقعت اتزحلقت علي الارض وبس وهما قالوا هاتوا الواد ده ونزلوا ضرب
فرحت قنا بعدها بفترة فواحد هناك اعرفه فبيقولي يااستاذ محمود انت اتخنقت من فترة وكان حواليك ناس بيضربوا فيك!!!!!!!!!!!!!!!!!!!!!!!!!!!!!!!!!1ا
فقال لي انا حلمت ان ملموم عليك ناس وبيضربوا فيك
فسكت وتوهت اسال ابي اقله انت قلت له حاجة علي الخناقة اللي حصلت ظظ0انا مفهمهم في البيت انها خناقة مع صيع)قال لي يابني انا لقيته مرة بيقولي الاستاذ محمود اتخناق واضرب صح يابشمهندس
فقلت له ايوه عرفت منين قال لي انا حلمت بكده
وده قصتين من القصص اللي حصلت لي في الصعيد
وابقي اكلمكم الباقي
وطبعا كلنا لازم نرحب في النهايو بعمي وعم عيالي مستقبلا ان شاء الله الجعفري باشا هو مش هيكتب حاجة دلوقت لسه اما اعلمه الكلام ده كله يعني ممكن انزله تدريب في مدونة علي جنب كده
والسلام
اليعقوبي

الاثنين، 22 أكتوبر 2007

المدينة الفاضلة

بسم الله والصلاة والسلام علي رسول الله عليه من الله افضل الصلاة واتم التسليم
عندما تقرا او تسمع عن (اليوتوبيا)او المدينة الفاضلة التي تخيلها افلاطون تري مدي جهل شخص مثل افلاطون ومحدش يزعل اذا كان بيحب افلاطون
فهي مدينته الفاضلة اي المدينة التي بلا اخطاء مدينة الكمال المطلق كما صورها هو
ولكن عندما انظر الي مدينة افلاطون الفاضلة وانظر الي مدينة رسول الله(صلي الله عليه وسلم)اجد ان مدينة الرسول عليه الصلاة والسلام هي التي كانت المدينة الفاضلة التي يبحث عنها كل البشر
مدينة كانت باخطاء لان اهلها بشر ولكن هذه الاخطاء تصلح
مدينة كان اهلها يحبوا بعضهم البعض لان كل واحد منهم كان يتقرب الي الله في معاملته للاخر
مدينة كان اذا فعل احد منها خطا ذهب الي حاكم المدينة عليه الصلاة والسلام واعترف بخطائه بل وفي غرابة شديدة يطلب ان يطبق عليه حد الاسلام لانهم كانوا في الاصل يراقبوا الله
مدينة كان شغل اهلها الشاغل هو ارضاء الله فقط
مدينة كان قائدها وسط اهلها يفرح لفرحهم ويحزن لاحزانهم عليه الصلاة والسلام
مدينة كان كل من فيها يؤثر الاخر علي نفسه
مدينة كانت تحمل هم الحق والذود عنه
بل ان اجمل مافيها واعظم مافيها واروع مافيها انها مدينة وطئها واساسها وربي اهلها خير البشر اجمعين
انا بتمني اني اعيش في مدينة مثل هذه
ولم اجد هذه المدينة الا عند الرسول( صلي الله عليه وسلم)واتمني ان بلدي تتحول بالوقت الي هذا الجمال الروحي والنفسي اولا والتقدمي والتحضري اخلاقيا علميا ثانيا
وفي النهاية بحب اوجه اعتذار الي افلاطون واقول له عفوا مدينتك ليست فاضلة بل هي خيالية لان اهلها بما تصفهم ليسوا بشر ولكنهم ملائكة ولا وجود للملائكة علي ارضنا هذه
اما مدينة رسولي فارتقي باهلها من قمة الجهل والتخلف الحضاري الي قمة التطور والتقدم والازدهار الحضاري
والسلام
اخوكم اليعقوبي

الأربعاء، 17 أكتوبر 2007

التاج الثاني

بسم الله والصلاة والسلام علي رسول الله

تاني تاج وصلي من الاستاذة ايمي من مدونةكلو ماشي

ندخل في التاج علي طول

لو قالك اختار عصر من عصور مصر تعيش فيها كنت هتختار اي عصر؟

ايام قطز في فترة محاولة التتار غزو مصر لاني بعشق هذا الرجل قطز وكنت اتمني اني اكون في جيشه

اهم اولوية في حياتك عيلتك ولا شغلك ولا اصحابك؟

سئلت اعرابية من احب اولادك اليك


قالت الصغير حتي يكبر

والمسافر حتي يعود
والمريض حتي يشفي


وكل لبيب بالاشارة يفهموا

ايه اكتر حاجة بتحبها في رمضان؟

القرب من الله وتجمع العائلات واخواني

اوصف ايه اجمل افطار ممكن تفطره؟

لما بكون مع اخواني بتوع الكلية او مع العيلة

لو انت حاكم علي مجموعة من الافراد هتكون عادل؟

اسال الله انه يرزقني العدل في وقتها

ايه اللي يبوظ الحكام نفسهم ولا الشعب ولا الحاشية؟

يافرعون ايش فرعنك قالك ملقتش حد يلمني

بس خلاص

مين اكتر اعلامي في مصر بتحبه؟

حمدي قنديل واحمد منصور ووائل الابراشي

لو ممكن تشتغل شغلانة تانية غير اللي انت شغالها كنت هتشتغل ايه ؟

باذن الله انا هشتغل في التسويق والدعاية والاعلان بس كان نفسي وانا صغير اطلع رائد فضاء عشان اشوف الارض من فوق واتنقل في الفضاء ده زمان ولكن لو دلوقت كان نفسي ابقي ظابط جيش

اي بلد تتمني تعيش فيها بعد مصر؟

من الحاجات اللي بتضحك الناس اللي تعرفني كويس علي وانا عيل زمان كنت بقول اني هتجوز اربعة واحدة من فلسطين وواحدة لبنان وواحدة من ام الدنيا وواحدة من الشيشان واخدهم اجاهد بيهم كل في بلادها يعني لما اروح فلسطين ابقي مع الفلسطنية ولما روح الشيشان عشان اجاهد هناك ابقي مع الشيشانية وهكذ1ا وطبعا المصرية عند الاستقرار في مصر بعد ماحرر كل البلدان دي

ملحوظة:لم تكن العراق احتلت بعد ولو كانت اجتيحت في وقتها لكنت استبدلت المصرية باخري عراقية

اوصف ليا اجمل ترتيبات فرح ممكن تحضره؟

الافراح الاسلامية اللي مبيكنش فيها الهبل اللي بيحصل في اغلب افراحنا اللي تطلع ترقصلك واللي يهزلك وسطه زي الغوازي وحاجة بتغم

انما الافراح الاسلامية الرجال لوحدهم والنساء لوحدهم وكل يفرح بطريقته بس بادب مش بهز الوسط

بتراعي كلام الناس والقيل والقال؟

طبعا بحاول اني اراعي الكلام عشان لو عملت حاجة غلط اصلحها اما لو كان كلامهم ميرضيش الله فلا اخذ به

صحيت من النوم ملقيتش الموبايل ولا الكمبيوتر ولا الكاميرا ولقيتنا رجعنا لعهد الحمام الزاجل هتعمل ايه؟

هبقي منشكح جداااااااااا ومبسوط اوي لان الجو القديم ده بحبه النوم من بعد العشاء والطبيعة البكر التي لت تهدسها ايدي البشر اما الموبايل فمبحبوهوش رغم انه معايا والكمبيوتر رغم فوائده الا انه بياكل الوقت والكاميرا امرها عادي بالنسبة لي

السعادة هي؟

رضي الله الذي تحسه في حياتك وقلبك والقرب من الله والتوفيق في الطاعات ومقابلة اخواني في الله

عندك امل اسبابك؟

طبعا عندي امل لاني تعلمت من ديني هذا ان افقد الامل مهما حدث وان اثق في نصر الله وتمكينه خاصة ان السكة اللي احنا فيها طويلة ومليانة ابتلائات واحباطات فان لم يكن عندك امل فستتركها

يقول تعالي:(وَلا تَيْئَسُوا مِنْ رَوْحِ اللَّهِ إِنَّهُ لا يَيْئَسُ مِنْ رَوْحِ اللَّهِ إِلاَّ الْقَوْمُ الكَافِرُونَ )ا

لما تحب تهرب بتروح فين؟

بيجي عليا بتعب ومرض لما موضوع يتازم والدنيا تقفل حواليا

امتي اخر مرة قعدت مع نفسك وخدت نفس عميق وقلت ياه انا فعلا كبرت؟

وانا بصلي من كام يوم وبركع لقيت رجلي طولت عن الاول كتير وكل ماابص في المراة يعني شكلي مبقاش زي زمان وفكري واهتمامتي واهدافي الحالية

لما بتعمل اي عمل خيري بتحب ايه يكون دافعك الاول؟

رضي الله فهذا يجب ان يكون الدافع الاول في كل شئ وا لا حبط العمل ونعوذ بالله من ذلك0

بتشرب سجاير ولا وايه شعورك لو شفت ست بتشرب سجاير؟

الحمد لله بطلتها من تلات سنين ولو شفت واحدة بتدخن بشمئز من منظرها

تعرف ايدك اليمين من الشمال ازاي ؟

ايدي اليمين هي اللي في النحية اليمين والشمال هي اللي في النحية الشمال

ايه اكتر موسيقي بتحبها؟

مبحبش الموسيقي

ليه في رايك الذوق والنخوة اتعدموا ؟

عشان الناس بقت بتعامل ناس زيها مبقتش بتعامل الله في الناس

حد فاهم حاجة

تحب يبقي عندك ارض زراعية ولا اجنص عربيات ولا فلوس في البنك؟

فلوس في البنك

فبيها ممكن اجيب الارض والاجنص

البحر ولا النيل؟

البحر في التامل والعوم والنيل في الشرب

مركب ولا طيارة؟

المركب لو في البحر والطيارة لو في الجو

عاقل ولا مجنون؟

طبعا عاقل

يقول تعالي :(ولقد كرمنا بني وحمنالهم في البر والبحر)وكرم بني ادم بعقله والجنون شئ سئ مش جميل

بس في ناس لازم تعملها مجنون عشان تلم نفسها

تقرا كتاب ولا تتفرج علي فيلم؟

كتاب
هتمرره لمين؟
اي حد مجالوش التاج ده قبل كده اي حد

والسلام

اخوكم اليعقوبي

الجمعة، 12 أكتوبر 2007

هدية العيد

كان يامكان كان في زمان كام تاج اتبعتولي
من مدونة هتكلم وهقول اسلام توفيق ومن مدونة واخرتها ومن مدونة كلوماشي
المهم انا عايز كل اللي يدخل هنا يعرفني كويس فانا اعتقد انه فرصة جيدة للتعارف ولمعرفة الاخرين
ندخل علي اول تاج وهو من اسلام توفيق واستاذة دعوة الفردوس
اسم مدونتك؟
يارب ثبات علي طريقك
لماذا اخترته وما نيتك من وراء اختياره؟
اخترته لاني حسيت في لحظة من اللحظات لما كنت عامل مدونة قبل دي اني حدت عن طريقي ونسيت نيتي وضياع النية معناه الضياع وتشتت الهدف ،الاسم بقي مهم اوي لاني اخاف ان اضل عن طريق الله كما ضل الكثير قبلي وكان اولهم ابليس عليه لعائن الله وعلي فكرة هو بيهنيكم بمناسبة فوات شهر رمضان واديكم هتحسوا بيه اليومين الجايين دول وربنا يثبتنا
هل فكرت في اغلاق المدونة؟
لما هحس ان المدونة دي لا نية لي فيها هقفلها ،واعتقد ان ربنا من علي بنعمة اني مبضحكش علي نفسي وازين لنفسي الغلط ممكن اغلط كتير بس بفوق في لحظة واخذ قرار معاكس
يعني في المدونة القديمة كنت قاعد ادام النت قبل الفجر ونزلت صليت وانا راجع من الصلاة فكرت في نواياي وطلعت اخذت قراري بغلق المدونة
صورتك في المدونة وايه رمزيتها؟
مفيش صورة
لماذا دخلت عالم التدوين من الاساس؟
في الاصل كنت بدخل اعلق علي بعض المدونات وقررت بعدها اني اعمل مدونة ل،مدونتي دي منبري الدعوي الخاص بي وهدفي منها توصيل بعض خواطري وافكاري ومحاولة لمعالجة اخطاء اراها امامي
جملة قيلت في وصف مدونتك؟
مش فاكر
التعليقات بالنسبة لك واهميتها؟
مهمة جداااااااااا بالنسبة لي وتمثل لي الكثير والكثير فهي نصح من قرا البوست لي وهي اثراء لمدونتتي وتشريف لها ويفترض من التعليقات ان اعرف بها طباع من يعلق عندي والمفترض ان من يعلق يكمل النقص في موضوعي
احلي بوست كتبته؟
انتحاريون ولكن
من احب البوستات الي قلبي والذي لم يقراه استاذنه يقراه لان هؤلاء الناس كفيلين http://hafedelya3qopy.blogspot.com/2007/09/blog-post_16.htmlبالبكاء عليهم
حد قل ادبه في التعليق ايه رد فعلك؟
لو اختلاف عنيف معايا عادي برد عليه انما لوشتيمة فاخره معايا الريسيكل بن
اسوا مدونة؟।
مدونات الملاحدة والمثيلين ومن علي شاكلتهم
هيحصل ايه لايميلك لما تموت؟
ما عرفش لاني هموت
اديت الباسورد لحد ؟
اه لمحمد صاحب مدونة كش ملك
ايه علاقتك بيه؟
واحد غلبان كنت بمد له يد المساعدةسواء كانت مادية اومعنوية كان جي الكلية ميعرفش اي حاجة وكنت ولله الحمد موكل بتعليمه كيفيية العمل الطلابي في الكلية وفوق ده كله انا عمه وعم عياله
صاحبي في الكلية
اسمك ايه ؟
اسمي الحقيقي محمود
المشهور بيه وسط صحابك؟
لا كتير
كل واحد يعرفني بيناديلي باسم
يعني مثلا
اليعقوبي و عز و نيجر ومحمود
شخصيتك نوعها ايه؟
انا من النوع الهزلي شوية يعني بحب الهزار وحاجة كده عندنا في العيلة اغلبنا دمنا خفيف يعني ابويا عمي وولاد
عمي وخلاني وود خالي اغلبنا بنحب الهزار
ومن الشخصيات الفطرية يعني بعامل الناس بفطرتي وبحاول اني مبعدش عنها ومبزعلش من حد خالص حتي لو ضايقني وجه شوفته ابتسم في وشي يبقي خلاص انتهت ،ومشكلتي اني معنديش صبر وبزهق بسرعة وبعاني من عدم النظام بس هتجاوز الازمة دي ان شاء الله
السفر بالنسبة لك؟
شئ جميل اوي لاني سافرت كتير من وجه بحري للصعيد وقعدت كتير هناك وتعلمت من طباع البشر اللي هنا وهناك
ودنيا بنشوفها وسياحة في الارض وضحك لما بروح الصعيد لانهم اخف دم بشر ممكن تقعد معاهم وهبقي انزل بوست عنهم ان شاء الله
المود بتاعك؟
حماسي وعايز ادغدغ اي حاجة ومبتسم علي طول مع صحابي لما بجي البيت علي حسب مزاجهم هما بكون
الصفات اللي اخدتها من بابا؟
اللون فانا اسمر زيه
النسيان فابويا بينسي علي طول ومبيشيليش لحد
انا عندي مبدا ان كل واحد منا هو جزء من ابوه وامه في كل شئ حتي صفاتنا بس انت بتحاول تحاول تخيليها صفات ايجابية شوية
الصفات اللي اخدتها من ماما؟
امي ما ربتنيش ستي هي اللي ربتني وخدت منها حته التعامل مع الناس ومع الله بفطرة وبدون تكلف
اكتر ست حاجات بتكرهها؟
الكفر
المعصية
الشيطان
الظلم
الافترا علي مخاليق ربنا
الست المترجلة والراجل اللي مش راجل
يعني من الاخر البشر الدبل فيس
اكثر ست حاجات بتحبها؟
الله ورسوله
دعوة ربنا
الشهادة في سبيل الله
مريم بنت خالتي (تحت السن)ا
العيال الصغيرة اللي دمها خفيف وبتناغش معاك فلو عيل
المكرونة البشاميل والاكل عموما
الشخصية اللي هتجوزها بعد كده رغم اني ماعرفهاش
الانترنت بالنسبة لك؟
شئ جميل وقاعد عليه وقت كتير بس مقطع يعني في اليوم حوالي ساعاتين مقطعين وسكينة ممكن تقطع بها الاكل وممكن تقتل بها
هتمرره لمين؟
لبابا وماما وعمو بالهرم وعمتي بمدينة نصر ولستي في تربتها
اي حد ما جاوبش علي التاج ده قبل كده يجاوب عليه ماشي
والسلام اخوكم
اليعقوبي

الأربعاء، 10 أكتوبر 2007

اذا ماضاقت واستحمكت حلقاتها فرجت وكنت اظنها لاتفرج

بسم الله والصلاة والسلام علي رسول الله عليه افضل الصلاة واتم التسليم
اولا جزاكم الله خيرا كلكم علي الدعاء والله سبب ان هذا الامرفرج من عند الله اولا واخيرا ثم ببركة دعائكم
القصة ان الحاجة اللي اتخدت مننا الاسبوع اللي فات في الجامعة كنا احنا اساسا ماضين علي استلامها من صحابها
وكان اخوكم ماضي وصل امانة علي بياض عشان استلام السوندات والهيد اللي اتقلبوا مننا وفضلوا مع الامن والراجل صاحب الحاجة كل شوية يكلمني ويستعجل الحاجة وانا اماطل معاه لحد مارحلي البيت بس ولله الحمد استقبله اخويا وكلمني وقالي ان الحاجة لازم تبقي عنده يوم الاربعاء ،فطبعا مشكلة، مش مشكلة انه يعمل مشاكل علي حاجته المشكلة هتبقي مع امي وابويا لما يعرفوا اني ماضي علي حاجات عشان اخواني فطبعا كنت هسمع كلام زي السم ومشاكل لاحصر لها وضغط جامد في البيت والمشاكل
وبعدين الراجل برضه حاجته في رقبتنا
فالحمد لله الحاجة رجعت النهاردة بعد العصر ورجعت لصاحبها وربنا يسر الامور وراح اخواني جابوا الحاجة واستلمنها
علي فكرة دي كانت حاجات بما يوازي 4000او5000جنيه الهيد والحاجة بتاعة المعرض يعني خراب بيوت مستعجل
ولكن ولله الفضل والمنة رجعت الحاجة بفضل الله ثم ببركة دعائكم
وفعلا جزاكم الله خيرا علي الدعاء انا حسيت بيه النهاردة
اني احبكم في الله
والسلام
اخوكم اليعقوبي

الثلاثاء، 9 أكتوبر 2007

اسالكم الدعاء

بسم الله والصلاة والسلام علي رسول الله
استحلفكم بالله تدعو لي كثير عشان في حاجة كده اسال الله ان كان فيها شر وفتنة في ديني انها متمش ،كل شخص بيدخل المدونة هنا لازم يدعيلي جامد
عسي الله ان يتقبل من احدكم
والسلام
اخوكم اليعقوبي

السبت، 6 أكتوبر 2007

انتحاريون ولكن؟؟؟؟؟؟؟؟؟؟؟؟؟؟؟؟؟


بسم الله والصلاة والسلام علي رسول الله









من اغرب الحاجات اللي كنت بستغرب لها هي قيام اي شاب بعملية انتحارية وتفجير نفسه في احد الاسواق وسط المسلمين او اهل بلده



ما الذي جعله يفعل هذا الامر؟؟؟؟؟؟؟؟



سيبونا نحلل الامر من الاول ونعرضه في شكل قصة لعها توصل المعني



القصة



.............................



قصتنا بتبتدي بطفل ابوه شده من ايده عشان يوديه الحضانة والطفل بيبكي بحرقة شديدة كعادة الاطفال في مثل هذه المواقف



ويدخل الطفل الحضانة ويكمل مسيرته في التعليم وهاهو يدخل الابتدائية ثم الاعدادية وينجح بتفوق ويفرح ابواه كثيرا ويهنئانه بالنجاح ثم يبدوا في التفكير في مستقبله في الثانوية وكيف سيتم تدبير الاموال من اجل الدروس



ويدخل بطل قصتنا الثانوية وينجح بتفوق ويدخل ادي كليات القمة



وهاهو يدخل الي عالم جديد لم يراه من قبل حيث الانفتاح الذي لم يره طوال حياته



حيث فرحة اهله به بسبب دخوله لهذه الكلية



حيث الزمالة بين الولد والبنت



حيث الدخول زالخروج من المنزل وقتما شاء



حيث الحرية والانطلاق



وتعدي سنين الجامعة زي ماعدت سنين الابيتدائية والاعدادية والثانوية بس المختلف المرة دي انه قبل كده كان اهله مطالبين بتوفير كل السبل له



لم يكن يفكر في نفسه



لم يكن يحمل هم الزواج



لم يكن يحمل هم العمل وتكوبن اسرة



نسيت اقولكم كان تقديره جيد جدا



وبعد الجامعة راح وادي واجب بلده في الجيش



وبعد الجيش بدا يدور علي شغل وتقدم لاكثر من وظيفة ورفض اصله معهوش وسطه زمايله اللي تقديرهم كان اقل منهم قبلوا في وظائف بسبب وسايطهم



فعمل زي مااي شاب بيعمل في ظروف الاحباط والياس اللي زي دي راح قعد علي القهوة واستني فرج الله وشوية بقي يدخل الجامع ويصلي لحد ماقبله واحد في الجامع اخذ يتودد اليه ويحاول ان يكلمه عن الدين وللاسف وصل له الدين بشكل خاطئ فهمه ان الناس اللي بره دول ظلمة لانهم بيعصوا الله



انت لازم تدافع عن دين ربنا وتحارب اعداء دين الله



وقعد يوصلوا مفاهيم خاطئة في الدين



مفاهيم ليست من الدين في شئ



مفاهيم تكفر وتستحل دم الناس



وصاحبنا للاسف مش فاهم ليه ؟؟؟؟؟؟؟



لانه محاولش يعرف حاجة عن دينه قبل كده



لانه تاثر بالافلام والمسلسلات التي تظهر وتهيئ للناس ان اللجوء لله لايكون الا عند الشدة والضائقة



لانه مفكرش يروح درس علم واحد يحاول يفهم في دينه صح



طب ازاي هيروح درس علم والدولة قفلت المساجد بعد الصلاة ومنعت العلماء وطردتهم خارج البلاد



طب مين اللي هيفهم الناس دينها



مش اساسا مهمة العلماء هي تربية الشعب وتقويم الحاكم والحفاظ علي العلم الشرعي ومواجهة التطرف في الدين والانحلال الخلقي في الشعب






نرجع تاني



يجره صاحبه للانضمام في خلية تحمل نفس هذه المفاهيم تتكون من شباب مثله ناقمين علي مجتمع لفظهم خارج منه



مجتمع لم يعطهم مكانتهم وحقهم



ويقرروا انهم يفجروا نفسهم في احد اسواق البلد لكي يعلموا هؤلاء الناس دينهم ولكي ينصروا فلسطين والعراق وبلاد المسلمين



ويقع الاختيار علي صاحبنا ويلبس حزامه الناسف استعدادا لتفجير نفسه وهم يقولون له



الي الجنة يااخانا



الي دار النعيم المقيم والراحة



حيث لاتعب ولانصب



حيث لاظلم ولا كبت



حيث الانطلاق والحرية



حيث الحور العين والجنات الواسعة التي عرضها السموات والاض



الي الشهادة يااخانا



الوداع



ويلبس هو حزامه الناسف ويقف في وسط السوق ويتلو الشهادة



ويجري امامه شريط حياته



هاهو يتذكر ايام اخذ والده من يده الي الحضانة



هاهو يتذكر عندما كان ينجح بتفوق



هاهو يتذكر احضان امه له وهو تهنئه بكل نجاح



هاهو يتذكر اباه الرجل الذي تعب من اجله حتي ادخله كلية



يتذكر كليته وتفوقه فيها وتقديره المرتفع



وهاهو يتذكر ويري ويتسرجع لما انهار كل هذا امام عينيه بعد تخرجه



وتذكر كلام صاحبه له وهو يمنيه بجنات سيرتاح فيها



جنات سيحقق فيها كل ماتمناه
وذرفت عيناه دمعة حارة علي حياة لم يستطيع ان يعيشها
وابتسم ابتسامة ارتياح علي موتة تريحه ويحقق فيها اماله



واخذ قراره وشد فتيل حزامه الناسف



ومات الكثيرين من الاطفال والنساء والشيوخ والرجال والابرياء الذين ليس لهم ذنب في شئ



ومن بين هذه الجثث ضحية تمني حياة جميلة ناجحة ولم ينالها

ومناه غيره بجنات جزاء مافعل وايضا لم ينالها

والسلام

اخوكم اليعقوبي

الثلاثاء، 2 أكتوبر 2007

بلطجية امن الدولة الي اين؟؟

بسم الله والصلاة والسلام علي رسول محمد
اليوم هو الثلاثاء
الميعاد حوالي الساعة التاسعة صباحا
المشهد بعض من طلاب الاخوان يدخلون اشياء خاصة بمعرضهم داخل الكلية
معلش نرجع من الاول
كلنا يمكن سمعنا ان في واحد من طلاب الاخوان اتخطف في كلية التجارة جامعة القاهرة
ايه اللي حصل؟؟؟؟
اللي حصل اننا كطلاب اخوان بندخل حاجات بتاعة معرضنا ومرة واحدة لقينا حرس الجامعة بيمنعنا من تدخيل الحاجة وكان معانا تاكسي فمنعونا من ان الحاجة تدخل ودفعونا الي اننا نطلع بره الجامعة علي سور كلية تجارة
لنجد رجال امن الدولة والمباحث في انتظارنا ويحدث اشتباك مننا معاهم لاننا كنا بندافع عن حاجتنا وعن نفسنا
فالمهم احد اخواني ركب التاكسي مع السواق ووقفت عشان احاول ابعدهم عن التاكسي مع مراعاة اننا صائمون فالمهم تكاتروا وواحد منهم جري قعد جنب السواق فحاولت اني انزله فلقيت منظر غريب السواق والله صعب عليا الظابط اللي يفترض انه صائم نزل ضرب في السواق علي وشه بغباء يدل علي انه فعلا لايعرف اي شئ عن الرحمة اسف كلمة رحمة دي تنفع مع الحيوانات عندما تتراحم مع بعضها اما هذا فانه كالانعام بل هو اضل
فحاولت انزله من جنب السواق فاشتبكت مع مخبر في الوقت اللي هما اخذوا فيه التاكسي ومشوا به
فبتاع حرس الكلية حاش بيني وبين المخبر ده وخدني داخلني جوه الجامعة
في نفس الوقت علي نفس الطريق الظابط بينزل وينزل الاخ اللي معاه في التاكسي وينط بعض اخوانا من فوق السور عشان يلحقوه هو والحاجة ،فماذا يفعل كلب السلطة هذا؟؟؟؟
الباشا يطلع الطبنجةويضرب بظهرها حتي انه خبط احد اخواني علي راسه بها والمخبرين اللي معاه يطلعوا المطاوي ويلوشوا بيها ويبتدوا يضربوا في الاخ اللي اتخطف وهو صائم لحد مافرهد منهم وتعب فوقفوا تاكسي ورموه جواه وطلعوا علي مديرية الامن وطبعا خدوا سواق التاكسي اللي ملوش اي ذنب في اي شئ
والمهم حصل اعتصام امام الجامعة والاخوة قالوا انهم مش هيمشوا الا لما يرجع اخونا
علي الساعة ثلاثة او ثلاثة وربع ولله الحمد رجع بسلامة الله
وعندي وقفة......................ا
ماذا يحدث ببلادنا الظابط اللي مفروض يحيمني بيضربني وبيعذبني ليه عشان عايز اعمل معرض في كليتي وده حقي كطالب في الجامعة
معرض فيه شرائط وكتب دينية وادارية
ليه احنا بالذات ؟؟؟؟؟؟
ليه متحاولش تمنع الولد اللي قاعد مع بنت في وضع اقل ما يقال عنه انه مخل بالاداب العامة ؟
ليه متحسبش السرقة اللي في اتحادات الطلاب ؟
ليه احنا بالذات يجيلنا تحقيقات انا هبقي محترم واقول انها مستفزة ؟؟
واليكم بعض هذه الاتهامات
قراءة قران في المدرجات ،حض البنات علي لبس الحجاب ،تعليق لوحات تحث علي فضائل الاخلاق ،الاعتراض علي الشطب من الانتخابات المفروض بقي انك تتشطب وتقولهم امين وتدعيلهم في البيت وعلي الفطار وفي الجامع بعد كل صلاة
لماذا يتم اعتقال الطلبة وسحلهم في المعتقلات ؟؟؟
لماذا امن امن الدولة داخل الجامعة رغم عدم شرعيته ؟؟
لماذا هذا التضييق ولمصلحة من يارجال دولتنا ؟؟
وبعدين نطلع نقول بوقين حمضانين ان الناس دي ميلشيات وعندهم جيش سري وبيستعدوا عشان ينقضوا علي الدولة شغل هبل في هبل
زي احدي نساء حزب التجمع وقاداتهم بتقول بعد حكاية الازهر ان الاخوان لازم يعلنوا عن عدد الجيش اللي في الاخوان وتسليحه عامل ازاي
طبعا كلنا نقول في نفس واحد تيت تيت ياحاجة
انا هقول عن الجيش وهاعترف بكل حاجة لاني عندي معلومات مهمة في الحكاية دي
اساسا في حاجة ميعرفهاش غير الاخوان الواصلين اللي زي حالاتي احنا يااخوان عندنا انسان الي ضخم طوله حوالي 25متروعرضه10متر ومجهز باحدث الاسلحة الفتاكة وغير الفتاكة ومستنين اللحظة الحاسمة عشان نطلعه ونقضي علي اركان الدولة الاستعمارية
وهو اسمه (البنا واحد)ا
وده تحذير لكل من تسول له نفسه اللعب مع الاخوان
يا عمي دي ناس فايقة وكلة اكلة تقيلة وعملها حموضة فظفارة البطن بتطلع علي البوق
وربنا يهدي
ادعوا لاخانا هذا كثيرا ان ربنا يثبته
هو خرج ولله الحمد بس ادعوا له كثيرا
والسلام
اخوكم اليعقوبي

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا