الأربعاء، 24 أكتوبر، 2007

مواقف من الصعيد الجزء الاول

بسم الله والصلاة والسلام علي رسول الله


كنت في مرة منزل بوست وقلت لكم في اخره اني منزله من الصعيد


فعلا يااخوانا في بقعة من بقاع مصر منسية اسمها الصعيد بدات الدولة تنتبه لها الفترة اللي فاتت دي


حدث لي بعض المواقف فيها وسمعت فيها قصص وحكايات غريبة وشوفت عادات وتقاليد كنت اظن انها اندثرت


ندخل في الموضوع بس انا هحكي في البوست ده وصف للصعيد بوجه عام او البلد اللي انا رحتها بالاخص وهي قنا وموقفين حدثوا معي


اول حاجة هناك الناس طيبة اوي ولما بتحب حد تحبه بجد والراجل فيهم راجل بجد يعني ميبيعكش في اول السكة زي مابيقولوا تحكمهم قبلية شنيعة وكانت مسيطرة عليهم حكاية التار بشكل غيرعادي وبطريقة صعبة شوية لازالوا يقدموا العادات والتقاليد في بعض الاوقات عن الدين والصوفية هناك متواجدون بشكل غير عادي حاجة صعبة اوي وطرق صوفية كثيرة


تقسيماتهم القبلية عرب وهوارة واشراف المحافظة تحوطها الجبال وهي بالقرب من البحر الاحمر حتي انك تجد ان اغلب اهلها شغالين هناك


الطبقة الوسطي دي عندهم شبه مندثرة الناس نوعين اصحاب ممتلكات والنوع التاني شغال عند الاول


يهتموا جدا بالمظهرية وشكلهم امام الاخرين المراة هناك محتشمة يعني من الاخر اللي بايعاها دي اللي لابسة بنطلون واسع طبعا الكلام ده ميننطبقش علي النصاري


عندهم هجس امني بسبب الفترة السودة اللي شافوها ايام مقاومة الدولة للارهاب بس الصراحة الامن مسبش هناك خد عاطل علي باطل مفرقش الوحش من الحلو
المراة هناك كانت شبه متبهدلة شوتين تلاتة اربعة لحد فترة قريبة بس بدات تشم نفسها بعد العلم وكده وعشان بس اصورلكم موقف المراة في بعض القري هناك يكفي ان اقول لك انها هناك لايمكن ان تخرج من بيتها الا ثلاث مرات لما تتولد عشان تشوف الدنيا شكلها عامل ازاي ولما تروح بيت جوزها ولما تموت عشان تروح قبرها بس كده وهابقي احكي عن مواقف في هذا الامر ان اشء الله فيما بعد
الناس هناك اغلبهم بيصلوا فعلا في ناس كتير بتصلي هناك بس نظام خلص عشان اللي بعدك يمشي اللي هي الصلاة السويدي يكفي اني اقلكم اين في رمضان رحت هناك فترة فصليت التراويح في مسجد كان بيصلي الركعة باية طبعا كانت الساعة سبعة ونص وانا مخلص اربع ركعات تراويح ايام ماكانت العشا الساعة سبعة وعشرة يعني العشا بالاقامة بالذكر بعد الصلاة باربع ركعات تروايه تلت ساعة وكفي الله المؤمنين القتال
الموقفين
اول موقف ان اول ماولدي راح هناك قبله واحد من الناس اللي هناك كان لسه والدي جاي وميعرفش الراجل وهما هناك بيقولوا عليه مبروك او من الناس الطيبة اللي مكشوف عنها ومبيخدش حاجة من حد فانا مش فاهم
فالراجل ده راح لوالدي وقاله انت ربنا هيكرمك يابشمهندس وهيكرملك عيالك وبالذات ابنك الكبير ربنا هيكرمهولك دنيا واخرة وام اداه تلات ملبسات لولاده
تاني موقف كان السنة اللي فاتت برضه واحنا بنخرج معرض في الكلية جالنا شوية عيال بلطجية وكده وشكلهم محدوفين من الامن وقابلونا واحنا بنخرج الحاجة بره الجامعة الحمد لله مخدوش الحاجة بس اتخنقنا معاهم ومحدش منهم لحد قبل الخناقة ماتنتهي بلحظات عرف يعمل مع اخوكم وكنا اربعة وهما ماشاء الله كتير ومعاهم شوم بتاع الكراسي فالمهم في الاخر واحنا بنرجع منهم وقعت اتزحلقت علي الارض وبس وهما قالوا هاتوا الواد ده ونزلوا ضرب
فرحت قنا بعدها بفترة فواحد هناك اعرفه فبيقولي يااستاذ محمود انت اتخنقت من فترة وكان حواليك ناس بيضربوا فيك!!!!!!!!!!!!!!!!!!!!!!!!!!!!!!!!!1ا
فقال لي انا حلمت ان ملموم عليك ناس وبيضربوا فيك
فسكت وتوهت اسال ابي اقله انت قلت له حاجة علي الخناقة اللي حصلت ظظ0انا مفهمهم في البيت انها خناقة مع صيع)قال لي يابني انا لقيته مرة بيقولي الاستاذ محمود اتخناق واضرب صح يابشمهندس
فقلت له ايوه عرفت منين قال لي انا حلمت بكده
وده قصتين من القصص اللي حصلت لي في الصعيد
وابقي اكلمكم الباقي
وطبعا كلنا لازم نرحب في النهايو بعمي وعم عيالي مستقبلا ان شاء الله الجعفري باشا هو مش هيكتب حاجة دلوقت لسه اما اعلمه الكلام ده كله يعني ممكن انزله تدريب في مدونة علي جنب كده
والسلام
اليعقوبي

هناك 36 تعليقًا:

عصفور المدينة يقول...

يا نهارك أبيض انا مسافر قنا يوم الأحد إن شاء الله
أرجع أكمل

عصفور المدينة يقول...

شكرا على المعلومات هو انا مش حاطوا أصلا بس كويس أعطيتني صورة
بس بخصوص الراجل فموضوع الرؤى ده مش غيب يعني إن اللي حصل لك ما هواش سر على الشياطين فرؤية واحد في المنام لشيء مثل هذا ممكن يكون تلبيس على الناس ليعتقدوا في هذا المبروك ويضلهم به

أما إذا كان من أهل الصلاح ورأى مثل ذلك فهذا يوضع ايضا في مكانه الحقيقي من الشرع أي لايزيد كرامته
وإنما
الحسب المال والكرم التقوى

ما هي نصائح سيادتكم للسفرية

غير معرف يقول...

بالسم بالقتال بالسم بالقتال انا قولت بالسم وانا قولت بالقتال محدش فاهم حاجه عمك الجعفري ياه

الفاتح اليعقوبي يقول...

استاذي محمد
ربنا يكرمك يااستاذنا علي فكرة البلد هناك جميلة جدا يعني المدينة هتلاقيها نضيفة اوي يعني لو هتقعد فيها اسبوع اعتقد الجو هناك يكون عقل شوية لانك لو قريب من الصيف كان هتلاحظ الجو
الناس هناك لو قابلت واحد هناك جدع بجد صاحبه لانه بيبقي صاحب صاحبه اوي
وطبعا سافر في القطار ويفضل يكون درجة اولي لان سكتك طويييللللة شوية 9ساعات بالميت
الكلام ده كله عرفته لما قعدت معاهم فترة كبيرة يعني كنت قاعد معاهم وبدخل بيوتهم يعني عشت معاهم
وجزاك الله خيرا علي التوضيح لاني قلقت لما بيقولي انا شوفتك مش عارف ايه
انا قلت دا شاف ايه تاني ربنا يهديه
والسلام استاذي الكريم

غير معرف يقول...

تموت العير في الصحراء جوعا والماء علي ظهورها محمول برده عمك الجعفري ياه

الفاتح اليعقوبي يقول...

متلم نفسك ياعم النجم بدل ماااجي اولع فيك
اهدي ووحد الله كده
انا عارف انها كانت شورة سودة وربنا يستر
سلام ياصاحبي

غير معرف يقول...

صدقني يابني انا قرأت الموضوع مره واتنين وقعدت اطلع وانزل وقلب فيه لالالالالالا حصل خير متزعلش نفسك انت عندك شوجر ولسه صغير احنا عايزينك وانسي برده عمك الجعفري

nourhetler يقول...

احييك علي المدونه العظيمه التى ارفعللك القبعه من اجلها شكرا

الفاتح اليعقوبي يقول...

nourhetler
ربنا يثكرمك يااستاذنا انا اللي يشرفني زيارتك للمدونة
والسلام

جمعاوى روش طحن يقول...

يعقوبى باشا

ايه يا عم النجم

مالك ؟

إيه الكلام ده ؟

متابع بشده


آه كنت ح أنسى


ماله عمك الفاتح الجعفرى


قله دوشتنا

خف شوية

وائل_صح ولا غلط_ يقول...

انت جلتلي انت من وين يا عز يا ولدي؟؟؟؟؟؟؟؟؟؟؟؟؟؟؟؟؟؟؟؟؟؟؟

عصفور المدينة يقول...

شكرا عز باشا أو محمود

coca يقول...

اولا شراكه موفقه انشاء الله وتقدموا مواضيع متميزه
ثانيا بقي احمد اخويا راح قنا من فتره كدا وعجبته جدا وعجبه هدوء الناس والبساطه
وحببني اني اروحها هي دايما طبيعه الانسان اللي بيرتبط بالارض والزراعه
بتكون طبيعته متدينه بعيده عن الانحراف بشكل كبير

الفاتح الجعفري يقول...

لابجد المره دي فعلا يا اخي الصعيد بقعه منسيه فعلا واظن انها بقصد ان تنسي وذلك لعده اسباب ان الناس هناك متدينه بالفطره وانهم عندهم عزه نفس يعني مينفعش حد ينضرب علي قفاه وتعدي بس ده ميمنعش ان في ناس بتضرب علي قفاها هناك المهم انهم هناك عائلات وده يديهم قوه وترابط المهم ان الصعيد ارض خصبه جدا للتطوير في شتي المجالات بس في سؤال مين اللي نسي الصعيد الحكومه ؟ولا اهل الصعيد نفسها ؟ولا مين اظن ان كله نسي الصعيد يارب نفتكرها ثانيا اخي الحبيب ممكن الراجل اللي انت بتقول عليه يكون فعلا صالح وممكن يكون غيرذلك المهم ان الحاجات دي لايبني عليها عمل وكذلك لاتنقض عمل يعني من الاخر لازم تعمل وتشتغل علشان ربنا يكرمك ثالثا وده الاهم ان انت للما وقعت علي الارض واتلموا حوليك مش عارف تعمل صنيه طب كنت اديني ميسد وان كنت اجي اقفلك الجامعه وجزاكم الله خير

طال الليل يقول...

أخبارك إيه ياأخى الغالى

فعلا كلامك عن الصعيد وصف دقيق لما أعرفه بوصفى تربيت فى بيت صعيدى
لكن موضوع التار ده مش هينتهى بسهولة
يعنى ممكن أحوال المرأة تتحسن ممكن اقبلية تقل شدتها شوية ممكن التعليم والتطوير يغيروا بعض العادات ممكن الصوفية تنحسر بس التار لع لع لع
يارب تكون بخير وتطمنى عليك

غير معرف يقول...

اذا كنت مستغني عن القليل من وقتك لمعاينة مدونة مثيرة يطلق عليها
مدونة الرخيص
تحكي مواقف من زمن الرخصاء
زورها
www.alrakhes.blogspot.com
دمتم يا غاليين

امام الجيل يقول...

بس اعتقد الصعيد اتغير من زمان اوى مش من قريب بس الحمد لله ان الناس لسه مبقوش زى العاصمة وما فيها
لسه فيه امل
انا اعرف واحد صاحبى كان بيدرس فى سوهاج وكان بيقولى كده برضه
الحمد لله
اما حكاية الصلاة السويدى يعنى
ليها حل ان شاء الله
المهم الناس مقبلة على ربنا
ومبارك على الفاتح الجعفرى
لما بخض المدونة ببقى عايز ابوس البوست
اسمائكم صوفية كده ليه
هههههههههههههههه
ربنا يكرمكم

الفاتح اليعقوبي يقول...

جمعاوي عامل ايه ياجميل
انت بتقول ايه ياصاحبي
الجعفري دوشك انت كمان يالا اهو كله بثوابه
والسلام

الفاتح اليعقوبي يقول...

استاذ وائل
انا من الديزة صح ياكبير
والسلام

الفاتح اليعقوبي يقول...

استاذة كوكا
البلد هناك جميلة جداااااااااا
بس انا بحكي عن طباع بشر في فرق انك رايح زيارة وانك قعدت مع الناس كلت وشربت معاهم قالوا لك ماثوراتهم وكيانهم


اما حكاية الارض فهي فعلا ماثرة جدا معهم نادرالما تلاقي حد مبيصليش
بس صلاتهم فيها بدع وحاجات غريبة تاثرا بالصوفية اللي نتشرين بشكل غير عادي
ولسه هكمل يمكن حضرتك نغيري رايك ومتروحيش
والسلام

الفاتح اليعقوبي يقول...

الجعفري
كلامك صح ياصاحبي وربنا يهدك اسف يكرمك
فعلا هما عايشين علي فطرتهمااوي وتحكمهم قبلية مقيتة في بعض الاوقات
بس بالوقت الكلام ده بيتجاوزوه

المرة الجاية هبقي ارن لك حاضر بس تيجي بسرعة
والسلام

الفاتح اليعقوبي يقول...

استاذي محمد
عامل انت ايه ياجميل وحشني جدا عايزين نتقابل في يوم كده ان شاء الله؟
كلامك تمام بس التار حدته هديت شوية يعني قبل 200
كان عدد حالات التار في قنا وحدها 720الي 750حالة تار مصيبة بس خفت دلوقت الحمد لله وربنا يهدينا ويهديهم يارب
وبسعد جدا بزيارتك يااستاذي
والسلام اخي الفاضل

الفاتح اليعقوبي يقول...

استاذ محمد امام الجيل
الصعيد بدا يتغير في الفترة القريبة اللي فاتت وانا اقصد بالاخص سوهاج وقنا هي مسئلة وقت التغيير اعتقد جه بعد سنة 2000
الصلاة السويدي دي انا هاحكيلك العشا تاذن وانا ادخل الحمام اتوضا وانزل الاقيهم في الركعة التالتة
بس خلاص


اسامينا مش صوفية بل هي القاب للعائلة عندي وعنده
والسلام

دعوة الفردوس يقول...

السلام عليكم

خد بالك انا صعيديه شحط محط بس من المنيا
يعني اي غلطه كده ولا كده هشوف شغلي

فعلا الصعيد دي كنز بشري وموارد هائله جدا بس تقول لمين

في حاجات حضرتك بتحكيها انا بصراحه مشوفتهاش عندنا لما روحت المنيا من حوالي 5 سنين

بس اكتر حاجه بحبها هناك الرجوليه بتاعتهم
يعني هناك اي كانت السلبيات
الرجاله رجاله
والستات ستات
يعني مفيش تبادل الادوار اللي بينرفزني في اللبس ده
واجمد حاجه بقى
ان الرجاله غيوره وعندها دم في زمن الدم البارد

اسلام ابوغزاله يقول...

مين الجعفري ده يا عمو؟

mazlomen يقول...

ممكن أكون مش حضيف جديد

بس ممكن تقبلني صديق

في وقت الضيق

الفاتح اليعقوبي يقول...

استاذة دعوة الفردوس
ربنا يكرمك يااستاذة علي فكرة المنياوية مش صعايدة اوي يعني صعايدة علي ماتفرج الصعيد بجد الصعايدة بتوع النكت من اول اسيوط الي قنا واسوان


الفكرة ان الصعيد بداوا يهتموا يهتموا به قريبا اما من قبل فليس هناك من اهتمام يذكر بل ان الصعيد متاخر عن بحري مالايقل عن 10الي15عام

حكاية النخوة دي فعلا موجودة بقوة عندهم ومعنهمش حكاية تبادل الادوار دي حتي بين النصاري
والسلام

الفاتح اليعقوبي يقول...

اوب غزالة
الجعفري ده عمي وعمك وعم الشباب في كل زمان ومكان
انتظرررررررررررروه
والسلام

الفاتح اليعقوبي يقول...

مظلومين
يشرفني اخي الكريم ذلك بل ويسعدني
والسلام

اسلام ابوغزاله يقول...

عمك! ... طب ماشي
لكن ازاي عمي وعم الشباب كلها؟

وبعدين انا معنديش عم اسمه الجعفري

دعوة الفردوس يقول...

استطراد

عارف يااخي موقف الاخ اللي حلم بحضرتك ده
حصل معايا من كام يوم ومعرفتش الا بعد ماعلقت على البوست ده

من كام يوم حلمت بواحده صاحبتي اتقرا فاتحتها والمفروض الخطوبه الاسبوع اللي جاي
حلمت بيها جايه علي وبقولها كان ماله (س)من الاول ماقولنا كده
قالتلي معلش نصيبي
علما ان (س)كان واحد ممتقدم ليها قبل خطيبها ده والمفروض في الحلم انها فسخت

فضلت قلقانه عليها يومين وخايفه اسال اصلا اذا كان في حاجه
تالت يوم واحده صاحبتنا تالته اتصلت قالتلي فلانه فسخت في الوقت اللي انا شفت فيه المنام ده

:)

الفاتح اليعقوبي يقول...

ابو غزالة
طب ياسيدي اعتبر ان بقي ليك عم جديد اسمه الجعفري فيها ايه خلاص
وبما انه عمي اذن هو عمك وبما اانه عمك اذن هو عم الشباب بسيطة صح
اذن الجعفري عم الشباب
والسلام

الفاتح اليعقوبي يقول...

استاذة دعوة الفردوس
لعله خير الرؤي شئ جميل وغريب
يقول رسول الله صلي الله عليه وسلم:الرؤية الصالحة من الله والحلم من الشيطان

في حاجة في ستي الله يرحمها وامي وانا حكاية الرؤي يعني بعض الاوقات بشوف رؤي عيانا بيانا وحاجات بتحصلي بعد كده
فالمهم هي لاياخذ بها ولايبني عليها ىعمل او شرع بس يستانس بها وان كانت خير فاحكيها لمن تحبين وان كانت شر فلا تقوليها لاحد
يقول الرسول (صلي الله عليه وسلم:الرؤيا معلقة برجل طائر ايها اولت سقطت
والسلام

مهندس مصري يقول...

أولاً المدونة جميلة و تدل على عقلية مش واحد بيكتب و السلام
ثانياً لم ردود التعليقات مع بعض في تعليق واحد بلاش نظام العدد في اللمون ده و البوست نص تعليقاته تكون ردود مش منظر حلو
ثالثاً أنا كنت في أسيوط سنتين من 9/1997 إلى6/1999
يعني سنتين دراسيتين محسوبك كان هندسة أسيوط قبل ما يحول هندسة إسكندرية و الصعايدة أجدع ناس خصوصاً الصعيد الجواني أسيوط و إنت مقبل
أما الصعيد البراني المنيا و بني سويف فصعايده نص نص
يعني نص بحراوي و نص صعيدي
و ميزة جامعة أسيوط إنها كانت أقل مجموع في كل الكليات وقتها رغم إمكانياتها العالية جداً وده كان سبب إني إتعرفت على ناس من كل محافظات مصر و عرفنا الجدعان من الأندال
أما التشديد الأمني فما أقولكش سنتها لو تفتكر حصلت حادثة الأقصر اللي تولى على إثرها حبيب العادلي وزارة الداخلية و كان معظم المتهمين بتنفيذ العملية طلبة في جامعة أسيوط و إتقلبت أسيوط كماين في كل ناصية و مدرعات في الشوارع أحياناً
غير التدقيق في الجامعة و المدينة الجامعية و حملة إعتقالات لكل المشتبه فيهم بما فيهم الطلبة اللي يكونوا ساكنين في أوضة واحدة في المدينة الجامعية مع الطالب المشتبه بيه
غير حملات التفتيش الليلية على شقق سكن الطلبة الخارجي
دول فتشوا الشقة اللي كنت ساكن فيها في أول 1999م 3 مرات في ترم واحد
كان الله في عون الصعايدة على الأمن بس لو يعقلوا و يبطلوا التار بس
الصعايدة رغم طيبتهم و جدعنتهم دماغهم ناشفة و ساعة لما بيتربسوا ياله السلامة
بس برضه أجدع ناس

اسلام ابوغزاله يقول...

ايه يا عم انت ,, انت فارد نفسك انت وعمك الجعفري علينا كده ليه؟
مش كل واحد تخليه عمك يبقى عمي ,, لا
اصح وصحصح

على فكرة انا مكنتش متقبل إن الجعفري يكون عمي ولكن أول ما عرفت هو مين اصبح الآن عمي بحق , ولكنه اخي قبل أن تلقبه بعمي
وسلامي لكل البشرية وكل الناس إللي فاردة نفسها زيك يا يعقوبي

مهندس مصري يقول...

فين الرد بتاعي يا يعقوبي مليش دعوة انا عايز رد
:(
النت رجع و ملكش حجة

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا