الأربعاء، 17 أكتوبر 2007

التاج الثاني

بسم الله والصلاة والسلام علي رسول الله

تاني تاج وصلي من الاستاذة ايمي من مدونةكلو ماشي

ندخل في التاج علي طول

لو قالك اختار عصر من عصور مصر تعيش فيها كنت هتختار اي عصر؟

ايام قطز في فترة محاولة التتار غزو مصر لاني بعشق هذا الرجل قطز وكنت اتمني اني اكون في جيشه

اهم اولوية في حياتك عيلتك ولا شغلك ولا اصحابك؟

سئلت اعرابية من احب اولادك اليك


قالت الصغير حتي يكبر

والمسافر حتي يعود
والمريض حتي يشفي


وكل لبيب بالاشارة يفهموا

ايه اكتر حاجة بتحبها في رمضان؟

القرب من الله وتجمع العائلات واخواني

اوصف ايه اجمل افطار ممكن تفطره؟

لما بكون مع اخواني بتوع الكلية او مع العيلة

لو انت حاكم علي مجموعة من الافراد هتكون عادل؟

اسال الله انه يرزقني العدل في وقتها

ايه اللي يبوظ الحكام نفسهم ولا الشعب ولا الحاشية؟

يافرعون ايش فرعنك قالك ملقتش حد يلمني

بس خلاص

مين اكتر اعلامي في مصر بتحبه؟

حمدي قنديل واحمد منصور ووائل الابراشي

لو ممكن تشتغل شغلانة تانية غير اللي انت شغالها كنت هتشتغل ايه ؟

باذن الله انا هشتغل في التسويق والدعاية والاعلان بس كان نفسي وانا صغير اطلع رائد فضاء عشان اشوف الارض من فوق واتنقل في الفضاء ده زمان ولكن لو دلوقت كان نفسي ابقي ظابط جيش

اي بلد تتمني تعيش فيها بعد مصر؟

من الحاجات اللي بتضحك الناس اللي تعرفني كويس علي وانا عيل زمان كنت بقول اني هتجوز اربعة واحدة من فلسطين وواحدة لبنان وواحدة من ام الدنيا وواحدة من الشيشان واخدهم اجاهد بيهم كل في بلادها يعني لما اروح فلسطين ابقي مع الفلسطنية ولما روح الشيشان عشان اجاهد هناك ابقي مع الشيشانية وهكذ1ا وطبعا المصرية عند الاستقرار في مصر بعد ماحرر كل البلدان دي

ملحوظة:لم تكن العراق احتلت بعد ولو كانت اجتيحت في وقتها لكنت استبدلت المصرية باخري عراقية

اوصف ليا اجمل ترتيبات فرح ممكن تحضره؟

الافراح الاسلامية اللي مبيكنش فيها الهبل اللي بيحصل في اغلب افراحنا اللي تطلع ترقصلك واللي يهزلك وسطه زي الغوازي وحاجة بتغم

انما الافراح الاسلامية الرجال لوحدهم والنساء لوحدهم وكل يفرح بطريقته بس بادب مش بهز الوسط

بتراعي كلام الناس والقيل والقال؟

طبعا بحاول اني اراعي الكلام عشان لو عملت حاجة غلط اصلحها اما لو كان كلامهم ميرضيش الله فلا اخذ به

صحيت من النوم ملقيتش الموبايل ولا الكمبيوتر ولا الكاميرا ولقيتنا رجعنا لعهد الحمام الزاجل هتعمل ايه؟

هبقي منشكح جداااااااااا ومبسوط اوي لان الجو القديم ده بحبه النوم من بعد العشاء والطبيعة البكر التي لت تهدسها ايدي البشر اما الموبايل فمبحبوهوش رغم انه معايا والكمبيوتر رغم فوائده الا انه بياكل الوقت والكاميرا امرها عادي بالنسبة لي

السعادة هي؟

رضي الله الذي تحسه في حياتك وقلبك والقرب من الله والتوفيق في الطاعات ومقابلة اخواني في الله

عندك امل اسبابك؟

طبعا عندي امل لاني تعلمت من ديني هذا ان افقد الامل مهما حدث وان اثق في نصر الله وتمكينه خاصة ان السكة اللي احنا فيها طويلة ومليانة ابتلائات واحباطات فان لم يكن عندك امل فستتركها

يقول تعالي:(وَلا تَيْئَسُوا مِنْ رَوْحِ اللَّهِ إِنَّهُ لا يَيْئَسُ مِنْ رَوْحِ اللَّهِ إِلاَّ الْقَوْمُ الكَافِرُونَ )ا

لما تحب تهرب بتروح فين؟

بيجي عليا بتعب ومرض لما موضوع يتازم والدنيا تقفل حواليا

امتي اخر مرة قعدت مع نفسك وخدت نفس عميق وقلت ياه انا فعلا كبرت؟

وانا بصلي من كام يوم وبركع لقيت رجلي طولت عن الاول كتير وكل ماابص في المراة يعني شكلي مبقاش زي زمان وفكري واهتمامتي واهدافي الحالية

لما بتعمل اي عمل خيري بتحب ايه يكون دافعك الاول؟

رضي الله فهذا يجب ان يكون الدافع الاول في كل شئ وا لا حبط العمل ونعوذ بالله من ذلك0

بتشرب سجاير ولا وايه شعورك لو شفت ست بتشرب سجاير؟

الحمد لله بطلتها من تلات سنين ولو شفت واحدة بتدخن بشمئز من منظرها

تعرف ايدك اليمين من الشمال ازاي ؟

ايدي اليمين هي اللي في النحية اليمين والشمال هي اللي في النحية الشمال

ايه اكتر موسيقي بتحبها؟

مبحبش الموسيقي

ليه في رايك الذوق والنخوة اتعدموا ؟

عشان الناس بقت بتعامل ناس زيها مبقتش بتعامل الله في الناس

حد فاهم حاجة

تحب يبقي عندك ارض زراعية ولا اجنص عربيات ولا فلوس في البنك؟

فلوس في البنك

فبيها ممكن اجيب الارض والاجنص

البحر ولا النيل؟

البحر في التامل والعوم والنيل في الشرب

مركب ولا طيارة؟

المركب لو في البحر والطيارة لو في الجو

عاقل ولا مجنون؟

طبعا عاقل

يقول تعالي :(ولقد كرمنا بني وحمنالهم في البر والبحر)وكرم بني ادم بعقله والجنون شئ سئ مش جميل

بس في ناس لازم تعملها مجنون عشان تلم نفسها

تقرا كتاب ولا تتفرج علي فيلم؟

كتاب
هتمرره لمين؟
اي حد مجالوش التاج ده قبل كده اي حد

والسلام

اخوكم اليعقوبي

هناك 30 تعليقًا:

طال الليل يقول...

ياسلام على أخى محمود
إجاباتك تحمل أسئلة للعقول لتصحح الطريق وتستعيد الوجهة القويمة
فعلا الناس بتعامل بعضها مش بتحط فى دماغها موضوع التعامل مع الله

شكرا لك على عيدية العيد التى قدمتها لى
طمئنى أخبار حضرتك فى الجامعة ولك منى تحية وسلام

عصفور المدينة يقول...

لكنت استبدلت المصرية باخري عراقية

قل لي صحيح العبارة الصحيحة كدة
ولا كدة
لكنت استبدلت بالمصرية أخري عراقية

جميل التاج يا هو انت غيرت للون الأسود؟

أعانك الله والتاج جميل وياريت تبقى تحكي لنا عن الإقلاع عن التدخين عشان الناس اللي بتدخن تاخد نفسها شوية

امام الجيل يقول...

ايه الاجابات الشافيات دى
معظم الاجابات هتبقى اجاباتى
على فكرة
ربنا يكرمك
مش عارف اعلق على ايه واسيب ايه
بس تاج جميل
واجابات جميلة
حلوة حكاية تفكر تعيش فى اى عصر
سلام عليك
ومبروك عليك القالب الجديد قلى جبته منين اصلى بدور اليومين دول عايز اغير

EmY يقول...

الحقيقه انا بحترمك اوي و بحب اقرالك و خصوصآ التاجات عرفتنا عليك اكتر بس مش كتير عليك 3 يالا ماشيه معاك حظوظ بقي

بس ليه مش بتحب الموسيقي

و ايه الطمع ده تتجوز 4 مره واحده ليك حق مش جالك 3 تيجان

الجمعاوي الاصيل يقول...

ايه ياعم الدبلوماسية دي كلها
حته على الماشي
لو العراق كانت محتلة
كنت هجوز الفلسطينية وجرر فلسطين وبعدين اطلقها واجوز اللبنانية واحرر لبنان وبعدين اطلقها واجوز الشيشانية واحرر الشيشان وبدين اطلقها وبعدين اتجوز العراقية احرر العراق وبعدين اطلقها
وبعدين استقر في مصر
اصل انا قلبي مساكن شعبية

أمير القلوب يقول...

السلام عليكم ورحمة الله وبركاته
أخي عز
أو اليعقوبي
ردودك بجد بسيطة وموضوعية
وده إن دل فيدل على شخصيتك المتواضعة
جزيت خيراً
بس لي سؤال؟
ليه اليعقوبي ده؟ ليك أقارب من العائلة دي أصل لي صديق من عائلة اليعقوبي بس سعودي
وياريت تشرفني بزيارتك
تحياتي

دعوة الفردوس يقول...

وصلت متأخر حبيتين بس معلش الومين دول غريبين جداااااااا معايا ومش عارفه مالي بجد

بالنشبة للاجابات استوقفتني الاجابة دي
كان نفسي ابقي ظابط جيش
استغربت جدا

وبالنسبة للعصر كان عصر رائع فعلا ايام الشيخ "العز بن عبد السلام"أعشق هذه الشخصية بصدق

حلو اوي اوي الاجابة بتاعة النخوة دي بجد جميلة
ربنا يعزك ويجعلها من الاقوال اللي ترفعك يوم القيامه وتعلي درجتك واسال الله لك الاخلاص

وحلوة حكاية الجواز دي
والاحلى رد اخوك الجمعاوي الاصيل
ضبطتوا الموضوع على نفسكوا وتقولولي جهاد
ماتتجوز واحده وتلف بيها ارض الجهاد في حته بقى ولا هو الموضوع موضوع التنويع ده :)


وكلمة للاخ



عصفــــــــــــــــور المديــنـــة

عبارة حضرتك هي الصح

لان الباء بتلحق بالشيء المتروك

وممكن نراجع الحته دي في المصحف هنلاقي امثلة كتيره

اليعقوبي يقول...

استاذي وحبيبي في الله استاذ محمد
عامل ايه يااستاذي ؟
جزاك الله خيرا
هذا سر الاسلام انه يجعلك تتعامل مع الله في كل حياتك


لاشكر علي واجب يااستاذي ولما ننكررها تاني هابقي اكلم حضرتك
والسلام

اليعقوبي يقول...

استاذي عصفور المدينة

لاازكيك علي الله يااستاذي واسال الله لك الاخلاص كلامك صحيح تماما باء المتروك

قلبناها اسود مفيش مشكلة

اما عن حكاية التدخين فمن غير سبب حسيت اني بعمل حاجة ملهاش لازمة وبطلتها علي طول وعلي فكرة بطلتها قبل ماالتزم لاني اساسا كنت رياضي لاعب كرة يد سابق وكان الشلة بتاعتي واحد بيلعب هوكي وواحد بيلعب طائرة حتي من تاثيرهم علي اي تاثير الصحبة بوجه عام رجعت يد فترة وسيبتها بعدها
والسلام

اليعقوبي يقول...

امام الجيل
ربنا يكرمك يااستاذي كويس ان اجابتنا كانت هتبقي زي بعض

هو انت كمان كان نفسك تعيش مع قطز اساسا عين جالوت دي معركة وهم ربنا يكتب لنا الجهاد في سبيله يااخي

جبت البتاع منين لا بسيطة
ادعي ربنها انه يرزق شكل جديد لمدونتك وهتلاقيه ان شاء الله
والسلام

اليعقوبي يقول...

استاذة ايمي
ربنا يكرم حضرتك واتمني ان يكون الاحترام هو السائد بينا

ارزاق هنعترض علي فكرة التاجات دي من قبل رمضان بكتير اوي
بس قلت انزلها علي العيد


دي كانت افكار بتراودني وانا عيل ولها رواسب دلوقتي بس المقصد حتة الجهاد
اريد ان اموت شهيدا ولذلك ساعيش مجاهدا طائعا لله لكي القاها عند مماتي واثبت عليها

والسلام

اليعقوبي يقول...

الجمعاوي الاصيل
ماشي ياباشا اتجوز وطلق زي ماانت عاوز حد يقدر يقولك حاجة
وانا سعيد جدا بزيارتك
واتمني منك تكراراها
والسلام

اليعقوبي يقول...

استاذ امير القلوب
ربنا يكرم حضرتك وجزاك الله خيرا

اليعقوبي نسبة لاحد جدودي وكان اسمه يعقوب
فهذا نسبة له
والسلام

اليعقوبي يقول...

استاذة دعوة الفردوس
ربنا يوفق حضرتك الي مافيه الخير
ظابط جيش لاني كان نفسي احارب واجاهد بحب جدا رجال الجيش وبري نفسي دائما رجل حرب وانا صغير

الشيخ العز بن عبد السلام رحمه الله
قصة من اكبر القصص في تاريخ الاسلام


وعين جالوت دي قصة تانية

ايه حكاية الجواز دي كل واحد يدخل يعلق عليها
وفيها ايه يااستاذة هظبطتها مع الاخ جمعاوي وكل واحد يجاهد في حتة


الاستاذ عصفور يااختنا
هو استاذ ربنا يحفظه
والسلام

الجعفري يقول...
أزال المؤلف هذا التعليق.
خالد - كلام من القلب يقول...

استاذ عز

الله يكرمك ايجابتك بجد ما شاء الله

الله يكرمك

ونسال الله الاخلاص

صانعة الحرية يقول...

السلام عليكم
جميييييييل التاج ما شاء الله
فى اجابات عجبتنى كتير
زى النخوه ليه اتعدمت فعلا الناس بقت بتعامل الناس مش بتعامل ربنا

الاربع زوجات
ما شاء الله حضرتك جهادى من صغرك

ابن حـجـر الـعـسـقـلانـى يقول...

السلام عليكم
اجاباتك عجبتنى بصراحة .. خصوصا نظريتك فى الجهاد :) المعتمدة على وجود قاعدة أسرية (زوجة) فى كل بقعة جهادية

جمعاوى روش طحن يقول...

الباشا الكبيير

معلش جييت متأخر

ما إنت أكيد ح تقدر مش لسه مكلمك الصبح ف التليفون

قصدى إنت اللى مكلمنى

معلش بقى اليومين دول يومين فرم ف الجامعة

بس إجابباتك روعة عل التاج

وقفت أمام كتيير منها

و بعدين إلحق ظبط رقبتك

أكيد فاهمنى ؟؟؟؟؟؟

اليعقوبي يقول...

عمي خالد
جزاك الله خيرا امين يارب
والسلام

اسلام ابوغزاله يقول...

ايه يا بني ده ,, دا انت عديت خلاص
انا كنت فاكر ان بتوع الرياضية معندهمش مخ ,, ولكن الحمدلله انا كده اتطمنت , وانت فاهم قصدي طبعاًَ

انا بدعي ربنا انه يحفظك من الحسد والحاسدين ,, , قول آمين

اشوفك دائما بخير يا ريس
ســـلام

اليعقوبي يقول...

استاذة صانعة الحرية
ربنا يكرم حضرتك المخلصون هم من يعاملون الله في اي وقت ومكان


الجهاد يااستاذة هو سبيل من يريدون الشهادة
اسال الله ان نلاقيه شهداء
والسلام

اليعقوبي يقول...

ابن حجر العسقلاني
ربنا يكرم حضرتك وانا سعيد بزيارة حضرتك لمدونتي المتواضعة
نظرية جامدة صح
بس ربنا يقدرنا علي تطبيقها ومفيش مشكلة في تطبيقها لو رحنا الصومال مثلا
والسلام

اليعقوبي يقول...

عمي جمعاوي
المفروض اني مرضش عليك لانك معايا علي الميل دلوقتي بس يلا ياعم هرد عليك ربنا يكرمك ياسيدي ويكتر من امثالك اللي بيعرفوا يحافظوا علي رقبتهم
والسلام

أميرة محمد محمد محمد يقول...

ردودك دمها خفيف كالعاده مش هتلحق تتجوز اربعه لان المصريه هتقتلك لو فكرت تتجوز وطبعا مش هيدخل عليها حوار انك هتروح تجاهد فمضطر تتجوز واحده من البلد اللي انت فيها

ربنا يكرمكِِ

coca يقول...

اجاباتك مريحه للنفس
وكل كلامك تقريبا مريح نفسيا
ربنا يكرمك

اليعقوبي يقول...

عمي ابو غزالة
عامل ايه ياجميل
مداهية لتكون بخير تعرف يااسلام تبقي مصيبة
طبعا يبني عندنا دماغ وبنفكر لسنا الالات سيدي الفاضل

امين يارب
عايز حاجة ولا اقول يااسلام متكسفش داانا عمك في الله يلا خير
والسلام

اليعقوبي يقول...

استاذة اميرة محمد محمد محمد
عودا احمد يااستاذة
مين دي اللي تقتلني داانا اخلص عليها واخد جممتها اشرب فيها دمها

علي فكرة انا فعلا وانا عيل صغير كنت بقول الكلام ده بس الحمد لله تاب الله علينا وعقلنا

والسلام

اليعقوبي يقول...

استاذة كوكا
النفس ترتاح وتهدا عندما تريد ذلك وتتاهب له وتتقرب الي ربها
والسلام

مهندس مصري يقول...

دا إنت طلعت جامد يا ابني
أنا حأتابعك من هنا ورايح علطول

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا