السبت، 6 أكتوبر، 2007

انتحاريون ولكن؟؟؟؟؟؟؟؟؟؟؟؟؟؟؟؟؟


بسم الله والصلاة والسلام علي رسول الله









من اغرب الحاجات اللي كنت بستغرب لها هي قيام اي شاب بعملية انتحارية وتفجير نفسه في احد الاسواق وسط المسلمين او اهل بلده



ما الذي جعله يفعل هذا الامر؟؟؟؟؟؟؟؟



سيبونا نحلل الامر من الاول ونعرضه في شكل قصة لعها توصل المعني



القصة



.............................



قصتنا بتبتدي بطفل ابوه شده من ايده عشان يوديه الحضانة والطفل بيبكي بحرقة شديدة كعادة الاطفال في مثل هذه المواقف



ويدخل الطفل الحضانة ويكمل مسيرته في التعليم وهاهو يدخل الابتدائية ثم الاعدادية وينجح بتفوق ويفرح ابواه كثيرا ويهنئانه بالنجاح ثم يبدوا في التفكير في مستقبله في الثانوية وكيف سيتم تدبير الاموال من اجل الدروس



ويدخل بطل قصتنا الثانوية وينجح بتفوق ويدخل ادي كليات القمة



وهاهو يدخل الي عالم جديد لم يراه من قبل حيث الانفتاح الذي لم يره طوال حياته



حيث فرحة اهله به بسبب دخوله لهذه الكلية



حيث الزمالة بين الولد والبنت



حيث الدخول زالخروج من المنزل وقتما شاء



حيث الحرية والانطلاق



وتعدي سنين الجامعة زي ماعدت سنين الابيتدائية والاعدادية والثانوية بس المختلف المرة دي انه قبل كده كان اهله مطالبين بتوفير كل السبل له



لم يكن يفكر في نفسه



لم يكن يحمل هم الزواج



لم يكن يحمل هم العمل وتكوبن اسرة



نسيت اقولكم كان تقديره جيد جدا



وبعد الجامعة راح وادي واجب بلده في الجيش



وبعد الجيش بدا يدور علي شغل وتقدم لاكثر من وظيفة ورفض اصله معهوش وسطه زمايله اللي تقديرهم كان اقل منهم قبلوا في وظائف بسبب وسايطهم



فعمل زي مااي شاب بيعمل في ظروف الاحباط والياس اللي زي دي راح قعد علي القهوة واستني فرج الله وشوية بقي يدخل الجامع ويصلي لحد ماقبله واحد في الجامع اخذ يتودد اليه ويحاول ان يكلمه عن الدين وللاسف وصل له الدين بشكل خاطئ فهمه ان الناس اللي بره دول ظلمة لانهم بيعصوا الله



انت لازم تدافع عن دين ربنا وتحارب اعداء دين الله



وقعد يوصلوا مفاهيم خاطئة في الدين



مفاهيم ليست من الدين في شئ



مفاهيم تكفر وتستحل دم الناس



وصاحبنا للاسف مش فاهم ليه ؟؟؟؟؟؟؟



لانه محاولش يعرف حاجة عن دينه قبل كده



لانه تاثر بالافلام والمسلسلات التي تظهر وتهيئ للناس ان اللجوء لله لايكون الا عند الشدة والضائقة



لانه مفكرش يروح درس علم واحد يحاول يفهم في دينه صح



طب ازاي هيروح درس علم والدولة قفلت المساجد بعد الصلاة ومنعت العلماء وطردتهم خارج البلاد



طب مين اللي هيفهم الناس دينها



مش اساسا مهمة العلماء هي تربية الشعب وتقويم الحاكم والحفاظ علي العلم الشرعي ومواجهة التطرف في الدين والانحلال الخلقي في الشعب






نرجع تاني



يجره صاحبه للانضمام في خلية تحمل نفس هذه المفاهيم تتكون من شباب مثله ناقمين علي مجتمع لفظهم خارج منه



مجتمع لم يعطهم مكانتهم وحقهم



ويقرروا انهم يفجروا نفسهم في احد اسواق البلد لكي يعلموا هؤلاء الناس دينهم ولكي ينصروا فلسطين والعراق وبلاد المسلمين



ويقع الاختيار علي صاحبنا ويلبس حزامه الناسف استعدادا لتفجير نفسه وهم يقولون له



الي الجنة يااخانا



الي دار النعيم المقيم والراحة



حيث لاتعب ولانصب



حيث لاظلم ولا كبت



حيث الانطلاق والحرية



حيث الحور العين والجنات الواسعة التي عرضها السموات والاض



الي الشهادة يااخانا



الوداع



ويلبس هو حزامه الناسف ويقف في وسط السوق ويتلو الشهادة



ويجري امامه شريط حياته



هاهو يتذكر ايام اخذ والده من يده الي الحضانة



هاهو يتذكر عندما كان ينجح بتفوق



هاهو يتذكر احضان امه له وهو تهنئه بكل نجاح



هاهو يتذكر اباه الرجل الذي تعب من اجله حتي ادخله كلية



يتذكر كليته وتفوقه فيها وتقديره المرتفع



وهاهو يتذكر ويري ويتسرجع لما انهار كل هذا امام عينيه بعد تخرجه



وتذكر كلام صاحبه له وهو يمنيه بجنات سيرتاح فيها



جنات سيحقق فيها كل ماتمناه
وذرفت عيناه دمعة حارة علي حياة لم يستطيع ان يعيشها
وابتسم ابتسامة ارتياح علي موتة تريحه ويحقق فيها اماله



واخذ قراره وشد فتيل حزامه الناسف



ومات الكثيرين من الاطفال والنساء والشيوخ والرجال والابرياء الذين ليس لهم ذنب في شئ



ومن بين هذه الجثث ضحية تمني حياة جميلة ناجحة ولم ينالها

ومناه غيره بجنات جزاء مافعل وايضا لم ينالها

والسلام

اخوكم اليعقوبي

هناك 16 تعليقًا:

طال الليل يقول...

تحليل رائع للغاية بارك الله فيك
إنت جمعت الأسباب كلها تقريبا
فعلا قلة السبل للعلم الشرعى والحماس الغير مرشد والتهميش المتعمد وغيره كلها أسباب للجوء للعنف ضد المجتمع
كرد فعل إنتقامى وإشارة لرفض التناقضات والإنحرافات فى المجتمع


إيه الحلاوة دى ياعم عز بس تعرف
إنت موهوب فى القصص ممكن تنمي الموهبة دى وتقدم نموذج للقصة ذات القضية
بجد تدوينة ممتعة

خالد يقول...

حبيب قلبى

بارك الله فيك تحليل دقيق وجميل جداً
بجد بجد ممتاز
بس فى حاجة جت فى خاطرلا وانت بتحلل الموقف وهى ان ازاى نخفى الظاهرة دى
لو الادراك والفهم يتوسع شوية ولو الناس تربى اولادها على الدين لكن الاب والام يخافوا على الولد فيقفلوا عليه لغاية ما يكبر وهو ميعرفش حاجة فيبقع بسهولة اسال الله ان يثبت على دينه الجميع . لى تكملة فيما بعد

coca يقول...

جمييييييب جدا بجد بوست فعلا صح ميه في الميه
وقيس علي فهم الدين الغلط مصايب كتير ممكن تحصل بإسم الدين وقيس علي جهل الشباب كذلك طيب مثلا انا جاهله بس علي الاقل بدور وببحث وبسمع رجال الدين وحضرتك قولت جمله اكتر حاجه بتأثر فيا جدا انه من ضمن الناس اللي موتهم دول انسان كان بيحلم بنجاح وحياه او واحد ملحقش يرجع صلته بينه وبين ربنا
تحياتي وبشده

انا عن استاذ راغب السرجاني سمعت اول جزء ولسا الباقي وهقول لايمي عليه
شكرا يا استاذ عز

اليعقوبي يقول...

محمد باشا
ربنا يكرمك ياحبي ويحفظك تعرف المشكلة اننا بنحاول نعالج المشاكل اللي زي دي بالعنف ونقعد نعيط بعد الفاس ماتيجي في الراس لكن لو حاولنا نعرف ايه السبب من الاول هنوفر علي نفسنا ارواح ونفوس وفلوس وحاجات تانية كثيرة
وادعيلي اوي بالله عليك عشان محتاج الدعاء اليومين دول اوي
والسلام

اليعقوبي يقول...

خالد باشا
انا مش قولت لك متجيش هنا تاني اطلع بررررره
هههههههه
ايه النور اللي انا فيه ده عمي وعم عيالي خالد معايا في المدونة
ربنا يبارك فيك ياصاحبي وجزاك الله خيرا وربنا يتقبل
من اجمل ماسمعت للامام البنا
كلمة (مطلوب الان الفهم قبل الاخلاص)0
تعرف ياخالد محتاجين نفهم ونفهم الناس دينها

ويقال ان اغلب اهل النار سيدخلون النار بسبب اهلهم وابائهم واتباعهم الاعمي لهم في المعاصي
وقد يعوق ايضا الاب ابنه كما يعق الابن اباه
والسلام

اليعقوبي يقول...

استاذة كوكا جزاك الله خيرا
مشكلة فهم الدين دي مشكلة المشاكل


(محتاجين نفهم دينا كما اراد لنا الله ورسوله ان نفهمه وليس كما نريد ان نفهمه)


علي فكرة انا كنت اقصده هو الشخص نفسه
الشخص نفسه كما هو جاني ومعتدي هو ايضا ضحية لظروف كثيرة حوله احبطته وهدمت له احلامه فقرر انه ينهي حياته من جنات واهمة في راس من مناه بها


اما عن دكتور راغب فده شخصية فعلا محتاجة بوست لوحدها ولما تسمعه غير لما تتقابل معاه
هو علي فكرة دكتور في طب القاهرة ومعه دكتوراه من امريكا وله مكانة علمية طبية مميزة علي مستوي العالم وليس علي مستوي مصر فقط
وهواستاذ في التاريخ الاسلامي ايضا
ربنا يكرمه ويحفظه
والسلام اختنا الفاضلة

October 7, 2007 7:13 AM

EmY يقول...

عز باشا بعد البوست ده مش هاقولك الا يا باشا الناس مقامات و انت طلعت استاذ

ايه الكلام الجميل ده و الفهم ده لظروف مجتمع بيطلع ارهابيين جهله بدينهم كارهين بلدهم

بجد ممكن قاقولك ان ده احلي تحليل قريته لظاهرة التفجيرات بحزام ناسف بين اهل بلده فعلا للاسف ده بيحصل

المشكله ليه احنا مش بنجيب كتب عن الاسلام و نقرا ليه مش بنعلم ولادنا حب الوطن
ليه شبابنا بقي مش فاهم يعني ايه وطن دين

ايه السبب اهل مش عارفه تربي ولا شاب مش عارف عايز ايه ولا حكومه مديونه عاجزه ولا ايه

تحياتي ليك

coca يقول...

استاذ عز بعد اذنك عايز اعرف رأيك في الموضوع اللي في البلوج دا
http://2mwag.blogspot.com/2007/10/blog-post_07.html
يمكن تكون دخلت علي البلوج دا ويمكن لا
بس عايزه اعرف رايك في الموضوع وايضا في الصحفي عبد المنعم محمود بلوج انا اخوان
اسفه هتعبك معايا

اليعقوبي يقول...

استاذة ايمي
ربنا يكرمك ويجزيكي خير
فعلا مشكلة الجهل بالدين مشكلة تواجه الجميع قد تجدي استاذ صاحب مكانة علمية اقل مايقال انها فائقة ولا يستطيع ان يقرا القران صح ويخطئ اخطاء شنيعة
وقد تجدي شخص قرا لكل طوب الارض اليساري واليمني والليبرالي والاشتركي وقرا لكل الناس ولايعرف سيرة رسوله صلي الله عليه وسلم بل لايعرف اسمه رباعي

وللعلم فقط قرا الكتب لوحدها لاتكفي
فهناك قاعدة تقول (من كان شيخه كتابه فقد ضل)وللعلم فقط اغلب هذه الجماعات التي توصف بالارهابية ماهي الا ضحية لكل من:-ا
1-الفهم الخاطئ للدين وليس الجهل بالدين
2-ظروف مجتمعية طاحنة تجعلهم يهربون من الحياة ويلجئون الي الانتقام من ظروفهم ومجتماعتهم التي لم تقدرهم
3-اعداء للوطن يستغلون ظروفهم واحوالهم ليزيدوا لهم في كراهية المجتمع يوما بعد يوم واقناعهم بتلك المفاهيم الخاطئة
4-الظلم قد يحول اي شخص الي قاتل
مثال
مصطفي شكري بتاع التكفير والهجرة ومؤسس تلك الجماعة في مصر اصلا هو كان من الاخوان وظل فترات ايام عبد الناصر في المعتقل ايل ان حدث له ذلك واخذ يكفر يمين ويسار بدون تفريق وبالتالي يستحل دم هذا ودم هذا

باذن الله هتكلم عن الموضوع ده بتوضيح اكبر في بوست بس مش قصة لحنا كلنا كمجتمع محتاجين نحلل
ليه شباب زي الورد بيقدموا علي امور زي دي
ليه شاب بيوهم نفسه انه لما يفجر نفسه في الجزائر مثلا فانه بهذا بيعيد الاندلس للمسلمين وهذه الجملة قالها احد الانتحاريين في وصيته قبل تفجير نفسه

وربنا يكرم حضرتك


اللهم اجعلني افضل مما يظنون واستر عنهم مالا يعلمون
والسلام

اليعقوبي يقول...

استاذة كوكا
ليه التسخين ده احنا مش كنا ماشين كويس لاحول ولا قوة الا بالله
انا بهزر يااستاذة


اولا:راي في الوضوع انه لايعبر الا عن وجهة نظر صاحبه وصاحبه فقط خانه التعبير عن رايه وخانته الالفاظ اما ما المعلقين سخنوا الدنيا اوي ووصفوه بالتكفيري وما شابه ذلك والرجل لم يقصد بوصفهم بالسبئيين انهم منافقين او كفرة بل كان يقصد انهم مثيري فتن لااكثر
وهذا رايه
وانا معه في بعض الامور منها ان النت ليس مكان لمناقشة العيوب والاخطاء الادارية في الاخوان او الحركية

وللعلم لحضرتك الاخوان بالفعل يمثلوا شبكة عنكبوتية في تنظيمهم الاداري يعني كل واحد فينا عارف مين اللي فوقه ومين اللي تحته ولو انما مثلا اتقبض عليا مين اللي هيمسك مكاني ولو اللي تحتي اتمسك مين اللي هيبقي مكانه وكده
فالاولي ان الاخ اللي زعلان من حاجة يذهب لمسئوله ويناقشه فيها مش يروح علي النت وعلي الملاء ويقعد يديها هذا لايصح
(النصح علي الملاء فضيحة)
وكمان في بالفعل ناس مبتصدق يعني اللي مخبر واللي يساري واللي تبع الدولة فمبيصدقوا يسخنوا الدنيا حوالينا فالاخ ده يهاجم ده ويحدث صدام شديد بين الااخوة

انا افضل النقد في الاشخاص وكل الاشخاص قابلين للنقد وليس النقد في السياسات الخاصة بالجماعة علي الملاء لاننا يجب ان نكون اكثر تماسكا في الفترة دي ودي ضريبة التدوين اللي بتدفعها جماعة الاخوان للاسف زي مافي ناس اقتنعت بفكرنا في ناس بدات يحدثلها شبه نفور او اختلاف شديد معنا


بس اقول لحضرتك حاجة من اجمل اجمل اجمل مافي الاخوان
هتلاقي حضرتك
الاخ اللي دمه خفيف وتلاقي الاخ الشيخ وتلاقي الاخ الثورجي وتلاقي الاخ المتحدث وتلاقي الاداري والقائد والمفكر
ولله الفضل والمنة الاخوان لديهم تنوع كبير وهذا بفضل الله وحده
فمثلا فائدة امر مثل هذا
ناس زي اليساريين ينفع معاهم اخ زي منعم واستاذ مجدي والنجار
ناس زي السلفيين ينفع يكلمهم الاخ الشيخ
شباب روشين تلاقي الاخ اللي دمه خفيف بيعيش معاهم وبيقرب منهم
وكده ده قصدي
التنوع هذا من اجمل مافي الاخوان
ووحدة الكلمة هذا ايضا اجمل مافي الاخوان
مينفعش بعد مااخوانا الكبار في مكتب الارشاد مثلا ياخدوا قرار اجي انا واقول مش هنفذه لاني مش مقتنع بيه في الاخر بنتحاسب انما في وسط العمل كلنا بنشتغل ايد واحدة وبعد كده بنحاسب بعض
وهذه هي الشوري اهل الحل والعقد الذين هم اكثر علما وثقافتا وادراكا يناقشوا بعضهم في الامور الخاصة بالجماعة بشكل عام وعندما يستقر راي الاغلبية علي امر واحد في النهاية ينفذ الكل المعارض والموافق


لخبطت الدنيا في الكلام صح كلامي مش منظم بس خير


تاني حاجة راي في استاذ منعم

منعم اخ سبقني في الاخوان وشخصية احبها مدام اخ لي في الله ويحمل الفكرة الاسلامية
بس انا لااب ارائه وهو من الشخصيات المثيرة للجدل في الجماعة
فقط انا لااعتد باراه وقد اختلف معه في رايه ولكن هذا لايمنع احترمي وتقديري له فهو ابتلي ابتلاء لم ابتلاه واسئل الله ان يجعل هذا في ميزان حسناته ويثبته بس
حضرتك طبعا مبسوطة وبتنفذي كلامك في التعليق اللي انت شيلتيه
علي العموم خير
وربنا يكرم حضرتك

جمعاوى روش طحن يقول...

لامست منى حد الدموع

اسلام ابوغزاله يقول...

اخي اليعقبي , والله إني لأحبك في الله , وكنت اتمنى ان ارافقك هذا العام , ولكن الظروف منعتني من هذا , ولكن أعلم ان الظروف ابعدتني عنك قالبا , ولكني معك قلبا

وياريت تخلي بالك من تدويناتك وخليك براحة شوية , عشان انا وصلي كلام ان اللي بيتكلم في الحاجات ديه بيتشيع

والسلام يا ريس

coca يقول...

استاذ عز
طبعا مبسوطه ومين ميبقاش مبسوط وهو بيعرف الدنيا حواليه والناس بتفكر ازاي

وبعدين كل ما هدخل هلاقي البلوج اتغير كدا انت بقي ربنا كرمك بقرشين هتضيعم في علب باكين للبويات وتبيض البلوج
والسلام

اليعقوبي يقول...

عمي جمعاوي
ربنا يكرمك ياجميل هم يستحقوا ان يبكوا علي انفسهم كثيرا اكثر مما يبكي عليهم غيرهم
يقول تعالي:(قُلْ هَلْ نُنَبِّئُكُمْ بِالأَخْسَرِينَ أَعْمَالاً *الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعاً (104)

هم اولئك ياصاحبي
والسلام

اليعقوبي يقول...

ابو غزالة
احبك الذي احببتني فيه ياجميل شد حيلك في الشغل ربنا يكرمك
قد تحول بيننا الازمنة والامكنة ولكنها قلوب معلقة ببعضها يااخي الكريم

وبلاش الحركتين اللي قلتهم في الاخر خلي حد غيرك يقولهم
والسلام

اليعقوبي يقول...

استاذة كوكا
ربنا يبسطك كمان وكمان ويعرفك الناس بتفكر ازاي كل الناس ويعرفك الحق من الباطل والصح من الغلط

مجرد تغيير الحياة لاشئ بدون تغيير وتجديد

والسلام

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا