الأربعاء، 2 يناير 2008

المكتوب علي الجبين لازم تشوفه العين

بسم الله والصلاة والسلام علي رسول الله
اسكتوا مش انا طلعت في مجموعة (هيه)واترايني طول السنة بذاكر مجموعة (واو)مشكلة
ماذا تفعل لو كنت مكاني ؟؟؟؟؟؟؟؟
ايه شعورك لودخلت امتحان لقيت كلام غير اللي انت قعدت توجع قلبك فيه طول التيرم واليومين اللي فاتوا بالاخص
ايه شعورك وانت قاعد زي التايسون في الامتحان حوالي اكتر من نص الامتحان حاجات اول مرة تسمع عنها
ايه شعورك لما تعرف ان نظام المواد التخلف اللي في رابعة اتغير السنة دي لالالا انا عايز شعورك لما تعرف الموضوع ده بعد ماتكون دخلت اللجنة وسلمت الورقة يعني بعد الامتحان
طب ايه شعورك لما تحس ان الامتحان اللي امتحنته كان عامل زي برنامج الكاميرا الخفية
وواحد بيقولك عايز تحل حل مش عايز يبقي لازم برضه تحل
طب ايه شعورك وانت رايح امتحان اغلبه رياضة وانت في الميكروباص اكتشفت انك نسيت الالة الحاسبة
ولما رحت جبت الالة من البيت واتشعبطت في ميكروباص اول متاحطيت رجلك فيه عطل فسبته ومشيت اول ماسيبته اشتغل ومشي ونسيت اقول لكم ان الميكروباص الاولاني بتاع الالة الحاسبة الكوتش بتاعه اتخرم
ايه شعورك وانت حاسس كانك لابس في حيطة رخام
في الاخر اكيد طبعا شعور لذيذ ورائع بس اكيد شعورك هيبقي اكيد زي شعور واحد اسمه اليعقوبي
وفي الاخر ادعولي كتير ان الدكاترة يتعموا عن المادة الجديدة اللي اكتشفتها في ورقة الاجابة
والسلام
اليعقوبي

هناك 20 تعليقًا:

ابن حـجـر الـعـسـقـلانـى يقول...

مرحب يا زمل ... أهلا بيك عضو فى التيم

Unknown يقول...

الله يخرب بيت المخدرات اللي ضيعت الشعب
ايه يابني ياحبيبي لاحول ولاقوة الابالله
منك لله علي الفضايح اللي انت فاضحنا بيها علي طول
بس اوعي ياوله تكون دخلت فرقه غلط وده مثلا امتحان الفرقه الثالثه (ه)مثلا وان انت كنت صح في الاول ولاتكون امتحنت في اداب ولاتربيه
والله يابني بعد الكلام اللي انت قولتهولي في التليفون لغايت اما قرأت البوست مكنتش مستوعب صدقا مستوعبتش وممكن اقعد يومين مستوعبش
يابني انت شكلك ملبوس احنا لازم نوديك لشيخ يشوف اللي عليك ده ايه لحسان انت حالتك بقت صعبه
بس في الاول والاخر لااااااااااااااازم الوم نفسي انا غلطان سامحني يامحمود يابني انا اللي ربتلك الرعب وضغت علي اعصابك لحد اما جالك زهيمر
اهيء اهيء اهيء
سامحني يابني
مع البتنجان
اسف مع السلامه
ربنا يستر بكره بقي ومنتفجأش زي النهارده
علشان خاطر ربنا يابني متفجأناش حاول تعدي بكره علي خير معلش هنزعجك
روح يابني الله يكون في عونك

MerMaid يقول...

انا لو مكانك؟؟؟
انا بجد اقولك كان ايه اللي هيحصللي

اول حاجة هافقد التركيز
و تاني حاجة هافقد أعصابي علي أي حد قدامي
تالت حاجة..هاروح الامتحان هاتنرفز علي الورقة واقول ماهي كدة كدة بايظة و اروح دالقة الكلمتين بتوع المادة اللي ذاكرتها في امتحان مادة غير المادة طبعا
و كان الله بالسر عليم

و اخرج من الامتحان رافعة راسي

و باغني
ارفع راسك يا أخي قد مضي عصر الاستعباد
ايوة..دلوقتي بقينا حرين
نذاكر مادة غير المادة ..و نمتحن فيها كمان
كل واحد حر بقي

:))
هارد لك

معلش ..تتعوض المادة الجاية

hui mu han يقول...

متفكرش حتى تروح الامتحنات تاني للبلد تولع اعرف واحد زيك فكر يذاكر خالته ماتت شال السنة اسهله

بالمرة ايه شعورك لما تروح امتحان الرياضة ومش اي رياضة دي
advanced
وتلقي الامتحان كله تشويسس (اختار) والخطا طبعا تشطب واحدة صح
ولا في امتحان تاني سؤال صعب محدش يحله غيرك والسؤال الاسهل اللي عليه درجة اكبر المعيدة نسيت تدهولك في السكشن

ولا امتحان تاني كله وصل اربعة على اليمين و18 على الشمال طب دي اعمل حادي بادي معاها ازاي

ربنا يستر بكرة همتحن النظري بلاش انت تدعيلي خلي الجعفري هو اللي يدعي

عصفور المدينة يقول...

يا نهارك أبيض ياعز ربنا يستر يا ولدي مرحبا بك في نادي قانون مورفي

Coca يقول...

ههههههههههههههههههههه

معلش تعيش ومتاخدش غيرها

بس صدقني حصلت مع ناس كتيييييييير


اولهم اختك اللي هو انا يعني

وواضح من التعليقات ان كلهم طلعوا زمل برضه

بس ادعي بس ان الراجل اللي بيعلم الورقه مياخدش باله زيك كده ويعلم علي اساس انك مجموعه ه هههههه

ان شاء الله خير بس كدا بقي تتعلم تركز اكتر وتسال علي الحاجه مليون مره

دكتور حر يقول...

قشطه

اقفل المدونه
وقوم ذاكر

خليك جنب أبو العساقيل

هههههههه

بنت الصالحين يقول...

ايه ده بجد

معلش تتعوض

بس و كنت مكانك
كنت قعدت اعيط الاول لحد ماعينى تورم واعقل كده وبعدين حل اللى اقدر عليه واتوكل على الله

لاما هتجيلى هستريا ضحك وهكتب كلمتين ينجحونى واطلع بعد نص الوقت بالظبط

بس اعتقد انه الحل الاولانى اللى هعمله

الحمد لله انى خلصت


ربنا معاكو باذن الله وبالتوفيق

DR.HAMAS يقول...

الصراحة موقف لذيذ

أنا بقى حصل لى موقف ألذ بكتيييييير

بس ممكن موقفك انت كان ليك سبب فيه

أنا بقة كانت حصلت لى ظروف فى سنة تانية و كنت هشيل مادة و تترفع عادى و أطلع تالتة

ظهرت النتيجة انى شايلها و المفروض تترفع
لكن شايل كمان مادة معاها .. ليه معرفش

و المادة التانية منعت ان الاولى تترفع

و الكلية خلتنى أعيد سنة عشان كدة
بالمناسبة كليتنا مينفعش تطلع سنة و معاك مادة واحدة حتى


المهم بعد ما السنة عدت
و دخلت امتحنت مادة

دخلت أمتحن التانية..و بعد ساعة من الحل فى الورقة ..

لاقيتهم بيقولولى انت ناجح فى المادة دى انت جاى ليه ؟؟

!!!!!!!!!!

يعنى مكنش المفروض أعيد السنة من أساسه
و ربنا يــ........ اللى كانوا السبب



قول لى انت بقة شعورك ايه لو حصل لك كدة ؟؟؟؟؟



متاخدش ف بالك

من ده كتييييييييير

و اللى يعيش ياما يشوف

انت بتتعلم فى مصر



د.حمــــــاس

DR.HAMAS يقول...

على فكرة انا كنت شوفت النتيجة و شئون الطلبة قالوها

لكن هما اللى كانوا غلطو

و اللى حصل حصل بقة الحمد لله

و كانت أفيد سنة ليا فى حياتى

و لله الحمد و الشكر


د.حمــــــــاس

جمعاوى يقول...

أيووووووووووووووووووووووووووووو

يا فرحة الجعفرى فيك يا عز

و عاملى حوار طول الليل

و إدعولى و خدوا بالكم منى

ربنا يسامحك يابنى


قوم ياض ذاكر بدل ما انط ف كرشك

ابو صهيب ( الجمعاوي الاصيل)سابقاً يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

حبيب قلبي

قليل البخت تطلع مجموعته مجموعة تانية

والله مصدقتش والجعفري بيتصل بيه يقولي

معلش بقى خيرها في غيرها

على الله بس تعوض في الباقي

وربنا يستر

وايه اخبار الحيطة الرخام

محمد الجرايحى يقول...

السلام عليكم ورحمة الله وبركاته
أخى الفاضل
قرأت ماسطرته وشعرت بصعوبة هذا الموقف كان الله فى عونك
صحيح: كم فيك يامصر من مضحكات مبكيات

تقبل تقديرى واحترامى

أخوك
محمد

مهندس مصري بيحب مصر يقول...

لازم تركز أكتر من كده سيب المدونة ملك خالص للجعفري بدون شريك لحد ما تخلص إمتحانات
ربنا يستر عليك يا بني
انا زعلت لك و الله
ربنا يوفقك في اللي جاي و أوعى أشوف وشك على النت لحد ما الإمتحانات تخلص

Unknown يقول...

عملت تحليل دم ولا لاء

الجعفري شكله معاه حق في كلامه ولا ايه

بس عندي ليك سؤال انت متأكد انك دخلت الامتحان بتاعك احسن تكون طلعت علي جامعة جنوب الوادي

ركز شويه و استهدي بالله و اقرا الدعاء الي قلتلك عليه

ربنا يوفقك و يكرمك و ترفع راسنا بامتياز يا عز يا ابن الجعفري يا رب

NIDAAL .R يقول...

اكتشاف مذهل لمادة جديدة
ازيك يا يعقوبى انت و جعفرى
اتمنى ان تكونوا بخير حال
بالنسبة للموضوع كله و خاصة حكاية الميكروباص
عايز راى بصراحة
هحس انى منحوس ..منحوس
هههههههههههه
و بالذمة فيه واحد يقعد زل السنة ولا التيرم يذاكر فى مواد هو مش هيمتحنها
لالالا...... روح بخر نفسك كدة
اكيد فيه حاجة غلط .. انت شكلك اتحسدت و العين جت ف الذاكرة
ربنا معاك .. بس انا مش هقدر ادعى على اى حد
قول ربنا يجعلهم دكاترة جايين من كنترول الابتدائى
يااااااااااااااااااااارب
سلام : و طمنونى عليكم
بارك الله فيكم

الفاتح اليعقوبي يقول...

السلام عليكم
استاذنا بن حجر العسقلاني
ماشي بس العضوية دي مش محتاجة اجراءات والكارنيه هيطلع امتي وعامة دا شرف ليا ياكبير


الجعفري
بص يالا انت انت تلم نفسك بدل ما لبسك الحيطة الرخام في وشك رعب مين ياتعبان اللي انت بتعمله ده
انت ياجعفري
تعبااااااااااااااااان
افهمة بقي يابني


MERMAID
انا سعيد بزيارة حضرتك للمدونة
بس القصة ومافيها المادة هي هي بس الدكاترة والمنهج مختلف والامتحان كمان

والحمد انك مش مكاني لاني مش ممكن اعمل كده انا ممكن اقعد اضحك واهرج في اللجنة وادلق الكلام اللي اعرفه في الورقة وتني خارج وايكش تولع لانرفزة ولا اي حاجة
واتمني تكرار زيارة المدونة


HI MU HAN
بص يازعيم شعوري هايبقي عامل بالظبط زي شعور واحد اسمه هاي مو هان
واما الدعاء فيكفي اني اقولك اني قلت للجعفري ادعيلي شوفت ايه اللي حصل ،متخفش هاوصي عليك لما يجي يدعيلك


استاذي عصفور المدينة
طبعا نهار ابيض من اوله كاوتشات بتفرقع وعربيات بتعطل وامتحان لدكتور غير الدكتور اللي انت ذاكرتله مفيش احسن من كده
وانا قبلت عضوية النادي المحترم ده بس عايز كارنيه


كوكا
والله كويس اني مش لوحدي وانت كمان برضه كنت بتدخلي امتحانات غير امتحاناتك يالله خير واللي يعيش ياما يشوف ،طبعا هاسال ودي فيها كلام رنا يبعد عنا السؤال ده ويالا خير
تعيشوا كلكم وتاخدوا غيرها

دكتور حر
قشطة يامان هاقفلها ونقعد كلنا حوالين ابو العساقيل هه هه ههه ههههههههه
كررررررررررررركرر


عاشقة الفردوس
والله يااستاذة لما تقعد علي نفوخها كلية تجارة صعب اني اعيط في امتحان دي اووووووووي يعني من الاخر ايكش تولع
كنت عيط في الثانوية لا اصل العياط لو هنعيط هنعيط كتير
امين يارب


دكتور حماس
انا سعيد جدا بزيارتك للمدونة ااخي واتمني تكرارها
انت بتتكلم بجد
انا لو حصل معايا كده مش بعيد اطلع اضرب العميد بالوكيل باي حد اشوفه في وشي وادخل الشئون واقفل الباب عليا وعليهم ويكون معايا كرباج ولا خلص عليهم لا يخلصوا عليا

تقبل الله منك معنديش حاجة تانية
اللي يشوف بلاوي الناس تهون عليه بلوته
والسلام اخي الكريم



الجمعاوي الروش والجمعاوي الاصيل
انت الاتنين في تعليق واحد
ربنا يبعد عنكم الحيطان الرخام ووجعها بتكلموني عشان تضحكوا في التليفونات بدل شد حيلك ياعز تعوضها في سبتمبر في اي حاجة ماشي يامعلمين انت اللي اخترتم السكة دي هي الحرب اذن

والسلام

استاذي محمد الجرايحي
عامل ايه ياجميل ربنا يكرم حضرتك ويتقبل منك دعائك يارب
تقبل خالص تحياتي وتقديري لحضرتك


مهندس مصري
مين اللي قال اني مش سايبها للجعفري مذكور والماسوف عليه مبكرا متخفش ادعيلي بس جامد وسيبها علي الله


ايمي
تحليل دم ليه يااستاذة انا كنت صاحي وفي كامل قواي العقلية ومضربتش حاجة قبل مادخل
الجعفري مين اللي كلامه صح ده غلباااااااااااان جدااااااا واخره الكلام بقالي معاه 16 سنة مخدتش منه غير الكلام ومن كتر كلامه بطلته يلعب بروافيليوشن علي الكمبيوتر حلف قال لو غلبتني مش هالعبها تاني وطرقعته
ده كلامنجي
والله فعلا يااستاذة اللي بيسد مع الواحد في الامتحانات هو توفيق الله ودعاء الناس لي


الباشا الكبير اوي نضال
ازيك ياجميل عامل ايه
ربنا يكرمك انا والجعفري بخير الحمد لله
لا انت فهمت البوست غلط
احنا عندنا في تجارة كل مجموعة في السنة ليها دكتور بمنهجه الخاص بيه انما هي نفس المادة فبس انا ذاكرت لدكتور غير دكتور مجموعتي لان النظام اتغير وانا مسالتش ومعرفتش

اما بالنسبة للميكروباصات هو يوم كام جاااااااامد اوي
وكان الصراحة ختامه مسك بعنبر بريحان ببلاوي سودة كتير

وربنا يكرمك ياحبي انا فعلا اتحسدت اتفقعت عين بس عين اصلي
امييييييين

سلام ياجميل

محمد عبد الرحمن يقول...

لا حول ولا قوة إلا بالله

طب معلش يا محمود تتعوض بأمر الله
زعلان شوية عشانك
خللى بالك يا يعقوبى إعمل معروف

الفاتح اليعقوبي يقول...

السلام عليكم
استاذي محمد عامل ايه ياجميل
لا خير الحمد لله ادعيلي بس ان ربنا يسهلها والله المستعان وان شاء الله خير
والسلام

GRF يقول...

من الجهه الطبيه نقدر نشخص حالتك ديه انها شحار وده نتيجة فعلا مس شيطاني زي ماتفضل الفاتح الجعفري وشرح وانت لازم تتعالج علاج كورتيزوني مكثف

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا