الثلاثاء، 2 أكتوبر 2007

بلطجية امن الدولة الي اين؟؟

بسم الله والصلاة والسلام علي رسول محمد
اليوم هو الثلاثاء
الميعاد حوالي الساعة التاسعة صباحا
المشهد بعض من طلاب الاخوان يدخلون اشياء خاصة بمعرضهم داخل الكلية
معلش نرجع من الاول
كلنا يمكن سمعنا ان في واحد من طلاب الاخوان اتخطف في كلية التجارة جامعة القاهرة
ايه اللي حصل؟؟؟؟
اللي حصل اننا كطلاب اخوان بندخل حاجات بتاعة معرضنا ومرة واحدة لقينا حرس الجامعة بيمنعنا من تدخيل الحاجة وكان معانا تاكسي فمنعونا من ان الحاجة تدخل ودفعونا الي اننا نطلع بره الجامعة علي سور كلية تجارة
لنجد رجال امن الدولة والمباحث في انتظارنا ويحدث اشتباك مننا معاهم لاننا كنا بندافع عن حاجتنا وعن نفسنا
فالمهم احد اخواني ركب التاكسي مع السواق ووقفت عشان احاول ابعدهم عن التاكسي مع مراعاة اننا صائمون فالمهم تكاتروا وواحد منهم جري قعد جنب السواق فحاولت اني انزله فلقيت منظر غريب السواق والله صعب عليا الظابط اللي يفترض انه صائم نزل ضرب في السواق علي وشه بغباء يدل علي انه فعلا لايعرف اي شئ عن الرحمة اسف كلمة رحمة دي تنفع مع الحيوانات عندما تتراحم مع بعضها اما هذا فانه كالانعام بل هو اضل
فحاولت انزله من جنب السواق فاشتبكت مع مخبر في الوقت اللي هما اخذوا فيه التاكسي ومشوا به
فبتاع حرس الكلية حاش بيني وبين المخبر ده وخدني داخلني جوه الجامعة
في نفس الوقت علي نفس الطريق الظابط بينزل وينزل الاخ اللي معاه في التاكسي وينط بعض اخوانا من فوق السور عشان يلحقوه هو والحاجة ،فماذا يفعل كلب السلطة هذا؟؟؟؟
الباشا يطلع الطبنجةويضرب بظهرها حتي انه خبط احد اخواني علي راسه بها والمخبرين اللي معاه يطلعوا المطاوي ويلوشوا بيها ويبتدوا يضربوا في الاخ اللي اتخطف وهو صائم لحد مافرهد منهم وتعب فوقفوا تاكسي ورموه جواه وطلعوا علي مديرية الامن وطبعا خدوا سواق التاكسي اللي ملوش اي ذنب في اي شئ
والمهم حصل اعتصام امام الجامعة والاخوة قالوا انهم مش هيمشوا الا لما يرجع اخونا
علي الساعة ثلاثة او ثلاثة وربع ولله الحمد رجع بسلامة الله
وعندي وقفة......................ا
ماذا يحدث ببلادنا الظابط اللي مفروض يحيمني بيضربني وبيعذبني ليه عشان عايز اعمل معرض في كليتي وده حقي كطالب في الجامعة
معرض فيه شرائط وكتب دينية وادارية
ليه احنا بالذات ؟؟؟؟؟؟
ليه متحاولش تمنع الولد اللي قاعد مع بنت في وضع اقل ما يقال عنه انه مخل بالاداب العامة ؟
ليه متحسبش السرقة اللي في اتحادات الطلاب ؟
ليه احنا بالذات يجيلنا تحقيقات انا هبقي محترم واقول انها مستفزة ؟؟
واليكم بعض هذه الاتهامات
قراءة قران في المدرجات ،حض البنات علي لبس الحجاب ،تعليق لوحات تحث علي فضائل الاخلاق ،الاعتراض علي الشطب من الانتخابات المفروض بقي انك تتشطب وتقولهم امين وتدعيلهم في البيت وعلي الفطار وفي الجامع بعد كل صلاة
لماذا يتم اعتقال الطلبة وسحلهم في المعتقلات ؟؟؟
لماذا امن امن الدولة داخل الجامعة رغم عدم شرعيته ؟؟
لماذا هذا التضييق ولمصلحة من يارجال دولتنا ؟؟
وبعدين نطلع نقول بوقين حمضانين ان الناس دي ميلشيات وعندهم جيش سري وبيستعدوا عشان ينقضوا علي الدولة شغل هبل في هبل
زي احدي نساء حزب التجمع وقاداتهم بتقول بعد حكاية الازهر ان الاخوان لازم يعلنوا عن عدد الجيش اللي في الاخوان وتسليحه عامل ازاي
طبعا كلنا نقول في نفس واحد تيت تيت ياحاجة
انا هقول عن الجيش وهاعترف بكل حاجة لاني عندي معلومات مهمة في الحكاية دي
اساسا في حاجة ميعرفهاش غير الاخوان الواصلين اللي زي حالاتي احنا يااخوان عندنا انسان الي ضخم طوله حوالي 25متروعرضه10متر ومجهز باحدث الاسلحة الفتاكة وغير الفتاكة ومستنين اللحظة الحاسمة عشان نطلعه ونقضي علي اركان الدولة الاستعمارية
وهو اسمه (البنا واحد)ا
وده تحذير لكل من تسول له نفسه اللعب مع الاخوان
يا عمي دي ناس فايقة وكلة اكلة تقيلة وعملها حموضة فظفارة البطن بتطلع علي البوق
وربنا يهدي
ادعوا لاخانا هذا كثيرا ان ربنا يثبته
هو خرج ولله الحمد بس ادعوا له كثيرا
والسلام
اخوكم اليعقوبي

هناك 27 تعليقًا:

Unknown يقول...

انا بس بحجز اول تعليق و بقولك ان ليك تاج عندي

بجد انا مش مصدق الكلام ده انه حصل هنا في بلادنا و في رمضان كمان م طلاب من غير مظاهره ولا اي حاجه

ليه ده يحصل و ازاي ضابط محترم مجازا يمد ايده علي طالب و يهينه بالكلام و الفعل ده عدم احترام لنفسه قبل مايكون للطلبه

بجد انا تنحت و انا بقرا كلامك

معلش انا هاقرا الموضوع تاني و اعلق تاني

طلب شخصي لو سمحت متتأخرش تاني كده في كتابة البوست

هاستنا الجديد

دعوة الفردوس يقول...

يااخي لا تتعجب
وابتسم انت في مصر
تحكمك قوانين أمن الدولة
بجد انا بقرف من الناس دي من تصرفاتهم وافتراهم
يااخي احنا العام الماضي بسبب حفلة احياء ذكرى استشهاد الشيخ ياسين
الاخوه كانوا عايزين يدخلوا سماعات المهم مدخلتش ومش بس كده ضربوا الاخوه وعدموهم العافيه وفي اخ بقى طاردوه و مسكوه ضربوه ضرب لايطيقه بشر والاخ ده كان لسه عامل عملية في عنيه وده اول يوم كان ينزل الكليه بعد العمليه
انضرب يومها في عنيه وافتكر بعض الاصابات تفقؤ بقرنية العين اليمنى ودخول جسم زجاجي في مقدمة العين لانه كان لابس نضارة شمس علشان العملية اللي كان عاملها طبعا كسروهاله في عنيه
المهم الاخ ده في بادء الامر قيل انه اصيب بالعمى في عينه اليمنى
ولم نلقى منه سوى الاحتساب والصبر وكان كل خوفه على والدته لانها كبيرة في السن ووالده متوفي على حسب ماسمعت
لكن بفضل الله
شفته بعد كده في امتحانات اخر السنة كان لابس نضارة طبعا بس عرفت ان عينه ربنا اراد شفاءها وذاكر ودخل امتحانات التيرم كنت سعيدة بيه بشكل لاتتخيلوه لدرجة كنت هروح اقوله سلامتك
:)
احتسب
وادعي على كل من ظلم مسلما

محمد عبد الرحمن يقول...

ممكن تصحيح هم ليسوا ضباطا فى بلادنا بمعنى ضباط العالم كله بل هم ضباط حماية النظام وليس الدولة
المشكلة أنكم جئتم الساعة 9يعنى متأخرين
وكمان بتاكسى ما هذا الدلع والإستخفاف
ياعالم دول ناس فاهمة شغلها تعلق لوح للفضائل وتقرأ قرآن وتعمل مذكرة إمتحانات تساعد بيها زمايلك من غير تفريق فى الفكر والدين ياعالم إن لم يكن هذا فساد فما الفساد أظنك هتقولى إكرامية بكم ألف يأخذها راجل طيب جدا عشان يخلص موضوع صغنن ولا يمكن عاوزينه يشتغل بلاش
كمان إنت طلعت غلاوى عاوز مفيش بنت تقعد مع ولد فى رومانسية ليه الحقد دة طيب الأفلام والأغانى دى كلها بيعملوها وبنصرف عليها من دم الحى وفلوس الأرامل واليتامى لييه
عالم غريبة الجماعم المتدينين ياسيدى فرفش كده وعيش اللحظة نحن فى زمن العولمة يعنى بدل أم كلثوم بقى عندنا مادونا وشاكيرا والهايفة والهئ والمئ

يا عز
أقولك
لنا الله

Coca يقول...

استاذ عز
مهزله بكل المقاييس انك تهين بني ادم وتنزل ضرب فيه ومهزله اكبر ان دا يحصل في شهر زي شهر رمضان ولكن تعالي نحسبها بطريقه تانيه واللي هقوله مش تبرير للحكومه ابدا ولا للداخليه اللي مش الاخوان بس متبهدلين من ظباطها
دلوقتي في قلق ما بين الحكومه والاخوان وكل من ينتمي للاخوان ليه
علشان معارضه اقامه حزب علي اساس ديني ودا انا موافقه عليه
طيب خوفا من ان مصر تبقي دوله سلفيه:::متشدده ببساطه الشعب المصري بطبيعيته غير محب للتطرف بجميع اشكاله
وانا مقصدش الاخوان طبعا انا بتكلم في العام طيب اما مقدرش احكم بجد علي اللي حصل بينكم وبين االظباط لاني مشفتش بعيني
ولكن متصوره همجيه الشرطه وفي نفس الوقت مينفعش احط ايدي جوا النار واقول النار لسعتني ليه
ما اقصده هو في وقت فيه ازمه ما بين الاخوان والحكومه ما ينفعش الاستفزاز دا لو كاان حصل استفزاز منكم ليهم
اوي سوري في اللفظ مجرد شكل الاخوان بيستفز الشرطه ليه مش عارفه

الفاتح اليعقوبي يقول...

استاذة ايمي
حضرتك صدقي كل حاجة احنا عايشين في بلد فيها ناس بتاذي وناس بتتاذي وناس بتسمع عن الاذي بس ماشفتهوش
واكثر من كده في تحقيق جه لاحد اخواني السنة دي وهو كان راقد في البيت عامل عملية
وربنا يهدي
ومستني التعليق ووصل التاج علي العيد ينزل هو وااخواته
والسلام

الفاتح اليعقوبي يقول...

اختنا دعوة الفردوس
يقول تعالي:(إِنْ يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِثْلُهُ وَتِلْكَ الأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنْكُمْ شُهَدَاءَ وَاللَّهُ لا يُحِبُّ الظَّالِمِينَ (140)

اتمني من الله ان يقبل منا فقط فان لم يكن به علينا غضب فلانبالي
والسلام

الفاتح اليعقوبي يقول...

اخي محمد
عامل ايه ياجميل ربنا يكرمك يارب

لنا الله يااخي اسال الله ان نكون غرباء في هذا الفساد
والسلام

الفاتح اليعقوبي يقول...

الاستاذة كوكا
انا مش هتناقش في بعض امور تعليق حضرتك
لان حضرتك لو كنتي موجودة وقتها كنت عرفتي وشوفتي بعينك
حضرتك عارفة يعني ايه واحد يرفع علي طلبة في جامعة طبنجة ويضربهم بيها ولا حضرتك تعرفي ان واحد كان بيوطي عشان يجيب مطوة من شرابه عشان يضربني بها انا واخواني
يااستاذة ده حقي في الدولة اني اعمل نشاط طلابي وللعلم احنا بقالنا فترة شيلين شعار الاخوان المسلمين انا مش ببيع مخدرات للطلبة ولا اي حاجة غلط
الكلام ده بيتم من سنين وهما بيضربوا فينا من سنين
السنة اللي فاتت برضه بعتولنا شوية بلطجية بشوم وبرضه حصلت ضرب جامد بينا وبينهم
والسنة اللي قبلها عميد الكلية شخصيا نزل خد كرنيهين من اخواني في نفس اليوم بالليل كان الكرنيهين في امن الدولة والاخوة معملوهم استدعاء امن دولة

يااستاذة عايزك تتصوري طلبة بيتخانق معاهم ظباط الحرس وكان فيهم مباحث وامن دولة اقل جتة فيهم زي الطور ربنا يهدهم


انا استغربت جدا من تعليق حضرتك ايه علاقة الدولة السلفية باللي حصل لنا ايه علاقة اقامة حزب علي اساس ديني باللي حصلنا
انا مكتبتش عن اي حاجة من دول

في بعض الاوقات لازم احط ايدي في النار لجلب منفعة واقامة دين الله في الارض
فسيدنا ابراهيم لم يضع يده في النار ولكن القي فيها
احنا كان معانا كتب وسيديهات وحاجات خاصة بالمعرض من كتب اسلامية مرخصة من الازهر وشرائط وكان معنا كتب ادارية

لاني من اهدافي الاساسية الدعوة الي الله وممكن توصل الدعوة بكلمة او بقراءة قران في المدرجات او بمعرض زي اللي كنا هنعمله
علي فكرة هما سرقوا مننا حاجات بحوالي 4000ج

والسلام اختنا الكريمة

أبرار يقول...

السلام عليكم ورحمه الله وبركاتة
أخى فى الله اليعقوبى بصراحة مفيش إى شئ من إللى قلتة جديد عادى هى دى مصر يعنى لو فى تصالح بين الإخوان والحكومة يبقى دة فعلا إللى مش عادى

بس معلش ليا سؤال عند حضرتك وياريت حضرتك تتفضل وتجاوب علية
هو فى فعلا تهمة إسمها تهمة التحريض على الحجاب؟؟؟؟؟ولا دة نوع من التريقة؟؟؟؟
جزاك الله خيراورزقك الفردوس الأعلى من الجنة
أختك فى الله
أبرار

الفاتح اليعقوبي يقول...

استاذة كوكا
اسف تاني بس نسيت احكي لحضرتك علي اللي حصل للسواق
بسال اخويا ده بعد مارجع هما عملوا ايه مع السواق ياعلي
قال لي اللي انا خدته هو خد زيه بالظبط بس انا مكنتش بنطق خالص وهو كل مايقول اي حاجة اويقول يارب يضربوه تاني

سؤال لحضرتك طب سواق التاكسي ده ايه ذنبه في الحكاية دي
والله انا شوفته عمال ياكل اقلام وكشافات علي جنب وشه صعب عليا
الصراحة هو كان يستاهل وما يستاهلش
لانه كان مفطر
فربنا يستر عليه وعلينا
وعلي فكرة هما بعتوا ناس علي بيت اخويا اللي كان في بيته الحاجة
والسلام

الفاتح اليعقوبي يقول...

استاذة ابرار
ربنا يكرمك علي زيارة المدونة

ثانيا كل التهم اللي انا كاتبها كلها صح ومفيهاش ولا واحدة تريقة من اول حض البنات علي لبس الحجاب الي تعليق لوح تحس علي مكارم الاخلاق الي تعليق لوح تحض علي منع التدخين
وتهم تانية تضحك وتبكي غير اللي بتفبرك
يعني في مرة جالي تحقيق اني نططت سوندات من فوق سور الكلية رغم اني في نفس الوقت كانت ايدي مكسورة ومتجبرة ومعرفش اشيل بها 2كيلو اوطة عشان اشيل ساوند
وكل عام وانت بخير والسلام

Coca يقول...

لو هي كتب مرخصه من الازهر يبقي من حقك والله ترفع قضيه عليهم علشان حقك ميضعش والحاجات اللي راحت منكم المفروض ترجعلكم ومدام الكتب مرخصه من الازهر يبقي مفيش مانع
وانتم معملتوش حاجه غلط
وبجد محبش انكم تسيبوا حقكم مهما حصل

الفاتح اليعقوبي يقول...

الاستاذة كوكا
باذن الله عز وجل لن نترك حقنا
الكتب كانت للشيخ الغزالي والقرضاوي وكتب لابراهيم الفقي وكتب ادارية اجات كلها عامة وليست خاصة

وادعي لنا كثيرا لاننا بالفعل لن نترك حقنا هذه ملكنا يعلم الله وحده كيف احضرنها
والسلام

khobayb يقول...

أهلا وسهلا بيك في عزبة أبوهم الشهيرة بمصر

صراحة هما فاكرينها عزبة أبوهم ، لكن احنا عارفين انه ورثنا : "ولقد كتبنا في الزبور من بعد الذكر أن الأرض يرثها عبادي الصالحون"

فيا سيدي خليهم يفرحولهم سنين عشان لما يأخذهم الله لا يفلتهم

تقبل الله منكم

أميرة محمد محمد محمد يقول...

نفس اللي بيحصل عندنا يا يعقوبي
بجد مهزله ربنا ينتقم منهم
مش عايزين اي حد يقول اي حاجه فيها دين وهدايه للشباب الضايع في الجامعه

ربنا يثبتنا يا يعقوبي وباذن الله لن نكف عن النضال مهما فعلوا

Unknown يقول...

انا جيت تاني يا عز باشا

طبعآ انت عارف اني مش اخوانيه و مش مع الفكر الاخواني بس انا ضد مصادرة رأي اي حد و سياسه الضرب علي القفا

انا مش مع ان الضابط يضرب اي حد مهما كان جريمته الا جرايم الاغتصاب علشان دول يستاهلو اي حاجه و مش بني آدمين اصلا

فا ازاي ضابط المفروض انه ابن ناس و متعلم و محترم يمد ايده و رجله علي طالب اكيد هو مايرضاش ان ده يحصل مع اخوه او اخته بس للأسف احنا عندنا فكر انا مش زي باقي الناس

البلطجه مش بس من المجرمين البلطجه وصلت للشرطه

و دي كارثه لما حاميها يبقي حرامي و بلطجي و ماعندوش اخلاق ولا شرف مهنه

استحمل رغيي معلش

جمعاوى يقول...

أخويا عز

إنتوا اللى غلطانيين ..ليه ؟

أقوللك ليه

عاوزييين تعملوا معرض فى رومضان يحبب الناس فى العبادة ؟

و كمان يخليوهم يصلوا و يعرفوا ربنا ؟
لا و إيه ..ف الجامعة كمان ؟


لالالالالالالالا


ده إنتوا كده عاوزيين لامؤاخذه تتعدموا


منكم لله مليتوا البلد

بالمناسبة إحنا عندنا حاجة زى دى لسه حاصلة يوم الأحد

تفاصيل الأخبار اللينكات بتاعتها على مدونتى


معلش إنت فى عزبة أبوهم على رأى أخوك خبيب

الفاتح اليعقوبي يقول...

عمي خبيب
ازيك ياجميل فينك
هي بالفعل عزبة ابوهم
بس
والعاقبة للمتقين
دولة الظلم ساعة ودولة الحق الي قيام الساعة
والسلام

الفاتح اليعقوبي يقول...

استاذة اميرة
لن نتوقف مهما حصل ومهما فعلوا فهذه بيعة لله ليس لنا نقضها
فقط اسال الله ان يعافينا من الابتلاء وان ابتلانا يرزقنا الصبر والثبات
والسلام

الفاتح اليعقوبي يقول...

استاذة ايمي
ربنا يكرمك يااستاذة كلامك صح لما حاميها يبقي حراميها تبقي مصيبة سودا

وبعدين حضرتك استحمل ايه هو حضرتك قلتي حاجة غلط انت لم تقولي حاجة غلط
ربنا يتقبل منك
والسلام

الفاتح اليعقوبي يقول...

عمي جمعاوي
عامل ايه ياباشا كويس
احنا بالفعل اللي نستاهل اللي يحصلنا

اخرجوا ال لوط من قريتكم انهم اناس يتطهرون

شوفت ياصاحبي اللي حصل لاخونا بتاع دمنهور ربنا يثبتكم ياجميل
ان غدا لناظره لقريب
والسلام

Coca يقول...
أزال المؤلف هذا التعليق.
Coca يقول...

coca said...
انا عرفت الموضوع دا من كام يوم في مدونه اليعقوبي
بس مكنتش اعرف انهم اخدوا طالب وان الطلبه عملوا اعتصام
وعرفت الطلبه من جماعه الاخوان كانوا داخلين بكتب مرخصه من الازهر ومفيش مشكله فيها يبقي ليه اللي حصل دا
هي بقت بلطجه فعلا

October 5, 2007 7:24 AM

دا كان تعليقي في مدونه مصطفي محمود
عن اللي حصل

http://lenin1917.blogspot.com/

الفاتح اليعقوبي يقول...

استاذة كوكا
جزاك الله خيرا علي الوقوف بجانب الحق حتي لو اختلفتي مع اهله
سؤال
انت ليه مسحتي تعليقك اللي قبل ده
انا قراته علي فكرة
وعلي فكرة كان تعليق يضحك جدا
انا ولله الحمد مبترفزش الا لما يكون هناك ظلم او ان احد لايفهم دينه جيدا

طلب من اخوك في الله اليعقوبي
في لينك علي المدونة بره للدكتور راغب السرجاني ممكن اتعب حضرتك نزلي السيرة للدكتور راغب واسمعيها جيدا لعل حضرتك تؤمني بعدها بالحل الاسلامي لبلادنا
وهذه السيرة في فترة مكة
http://www.elsergany.com/AVSeries.aspx?ScholarID=1&SeriesID=A.1.6


وهذه في فترة المدينة الاولي
http://www.elsergany.com/AVSeries.aspx?ScholarID=1&SeriesID=A.1.7

وهذه في فترة المدينة الثانية
http://www.islamway.com/?iw_s=Scholar&iw_a=series&series_id=3272

معلش هي طويلة وممكن حضرتك تسمعيها وقت ماانت عايزة انت واستاذة ايمي وعلي فكرة الدكتور راغب من الناس المحترمة جدا ومن هؤلاء الذين يخاطبون العقول قبل العواطف
فقط خطوة لمعرفة دين الله بشكل اوسع واكبر
والسلام اختنا الفاضلة

خالد - كلام من القلب يقول...

حبيبى ايها اليعقوبى

هذا هو حال بلادنا ولكن الى اين والى متى

لقد طفح الكيل

لية تكملة .

الفاتح اليعقوبي يقول...

عمي وعم عيالي مستقبلا ان اراد الله
مضلم البلوج ياكبير
الي اين والي متي ؟؟؟
هذا ما ستوضحه الايام لنا
والسلام

اسلام ابوغزاله - مدونة ليه بس ؟ يقول...

اخي اليعقبي , والله إني لأحبك في الله , وكنت اتمنى ان ارفقك هذا العام , ولكن الظروف منعتني من هذا , ولكن أعلم ان الظروف ابعدتني عنك قالبا , ولكني معك قلبا

اخي اذكر نفسي واياك بهذه الايات

وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ (42) مُهْطِعِينَ مُقْنِعِي رُءُوسِهِمْ لَا يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاءٌ (43) وَأَنْذِرِ النَّاسَ يَوْمَ يَأْتِيهِمُ الْعَذَابُ فَيَقُولُ الَّذِينَ ظَلَمُوا رَبَّنَا أَخِّرْنَا إِلَى أَجَلٍ قَرِيبٍ نُجِبْ دَعْوَتَكَ وَنَتَّبِعِ الرُّسُلَ أَوَلَمْ تَكُونُوا أَقْسَمْتُمْ مِنْ قَبْلُ مَا لَكُمْ مِنْ زَوَالٍ (44) وَسَكَنْتُمْ فِي مَسَاكِنِ الَّذِينَ ظَلَمُوا أَنْفُسَهُمْ وَتَبَيَّنَ لَكُمْ كَيْفَ فَعَلْنَا بِهِمْ وَضَرَبْنَا لَكُمُ الْأَمْثَالَ (45) وَقَدْ مَكَرُوا مَكْرَهُمْ وَعِنْدَ اللَّهِ مَكْرُهُمْ وَإِنْ كَانَ مَكْرُهُمْ لِتَزُولَ مِنْهُ الْجِبَالُ (46) فَلَا تَحْسَبَنَّ اللَّهَ مُخْلِفَ وَعْدِهِ رُسُلَهُ إِنَّ اللَّهَ عَزِيزٌ ذُو انْتِقَامٍ (47) يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَوَاتُ وَبَرَزُوا لِلَّهِ الْوَاحِدِ الْقَهَّارِ (48) وَتَرَى الْمُجْرِمِينَ يَوْمَئِذٍ مُقَرَّنِينَ فِي الْأَصْفَادِ (49) سَرَابِيلُهُمْ مِنْ قَطِرَانٍ وَتَغْشَى وُجُوهَهُمُ النَّارُ (50) لِيَجْزِيَ اللَّهُ كُلَّ نَفْسٍ مَا كَسَبَتْ إِنَّ اللَّهَ سَرِيعُ الْحِسَابِ (51) هَذَا بَلَاغٌ لِلنَّاسِ وَلِيُنْذَرُوا بِهِ وَلِيَعْلَمُوا أَنَّمَا هُوَ إِلَهٌ وَاحِدٌ وَلِيَذَّكَّرَ أُولُواْ الْأَلْبَابِ (52)
ابراهيم

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا