الاثنين، 26 مايو 2008

يوم الاستقلال

بسم الله والصلاة والسلام علي رسول الله صلي الله عليه وسلم
اول حاجة ان شاء الله في ميعاد للمدونين في مكتب عمر بوك استورز يوم الخميس القادم باذن الله وان شاء الله هاجي انا والجعفري
تاني حاجة ادعو لي اووووووووي عشان عندي امتحان كمان سبع ساعات
ندخل بقي الموضوع كنت قاعد في البيت امبارح الصبح والشيطان لعب في دماغي ووزني عشان اتفرج علي الفيلم بتاع يوم الاستقلال بصراحة الفيلم عالي اووووي يعني اللي ينظر الي السينما الامريكية يعرف ليه الامريكان بيعملوا كده ليه في العالم يعني في بداية الفيلم تلاقي ان اول سفينة فضاء نزلت علي العرب الهمج اللي لسه قعدين مع المعيز والجديان وحاجة غريبة الصراحة وتلاقي دايما ان انقاذ العالم سياتي علي يد المواطن الامريكي (السوبر مان الامريكي )عن طريق فك شفرات المخلوقات الفضائية وتحميل فيروسات وركوب طيارات والهجس بتاعهم بس الصراحة الجرافيك بتاع الفيلم عالي جداااا وهذا مايميز افلاهم بيستخدموا فيها التكنولجيا فيها بشكل مبالغ فيه اوي
المهم مش ده الموضوع ،الموضوع اللي عايز اقولكم عليه وقعدت افكر فيه شوية بعد الفيلم واثناءه وهو تخيلوا كده فعلا ان فيه مخلوقات فضائية  هجمت علي مصر وعلي عشر محافظات مثلا تخيلوا كده شكل المقاومة وتخيلوا فئات المجتمع وهي تحارب هذا الاستعمار الجديد
اول صنف  الجبناء
وهم المفلقتية يعني اللي بيعتدوا ان الجري نص المجدعة بل المجدعة كلها مع اختلاف الاقوال وبرضه عندهم مبدئ عيش جبان تموت مستور وامشي جنب الحيط وجوه الحيط وعلي الحيط ودول هايخدوا ديلهم في سنانهم ويخلعوا من محافظاتهم لا مش كده دول ممكن كمان يسيبوا البلد كلها وده اعتقد ان الصنف  موجود في بلدنا بكثرة وتصرفهم ده راجع اما لطباع شخصية عندهم واما لاحسساهم بعدم الانتماء للبلد التي ينتمون لها او لعدم فهمهم انه وقتها دفاعهم عن بلدهم هو واجب شرعي
الصنف التاني الحرامية
   ودول طبعا ماهيصدقوا واما انهم يعملوا فوضي واعمال نهب وسرقة في البلد لو كانوا حرامية صغيرين ولو كانوا كباااااااار(عارفينهم طبعا)هايتاكدوا من ارصدتهم اللي برة عشان لما يخرجوا يبقوا متاكدين انهم في امان وايكش البلد تولع بصحابها
الصنف التالت الحزن الوطني
هههههههههه دول بقي اعتقد  انهم مش هايفهموا اساسا يعني ايه كائنات فضائية وهيجروا عليهم عشان ياخدوا اما كورسات او يخدوا منهم موافقات علي اعمال البناء ومشاريعهم اللي بيحتكروا بها البلد وهتلاقي منهم اللي بيعرض نفسه علي الكائنات الفضائية ويكتب علي صدره (نحو مستقبل افضل)وطبعا مش هاينسي يقولهم انهم اخصائيين في سلق القوانين ورفع الايادي بالموافقة وطبعا الكائنات الفضائية لما تخطف اربعة منهم وتقعد تحلل فيهم وتلاقي دراعاتهم مرفوعة علي طول هايعرفوا وقتها السر في تقدم البلد بتاعتنا

الصنف الرابع الشباب وبتوع الميكروباصات

اما الشباب فحدث ولا حرج هايقعدوا يتكلموا عن نساء الكائنات الفضائية وعن اشكالهم واد ايه هما حلوين وهايتكلموا عن سجاير وبانجو وحشيش الكائنات الفضائية وازاي الحاجات بتاعتهم بتتول وبتنسي كل حاجة واما بتوع الميكروباصات فتخيلوا معايا شاب من بتوع الميكروباصات اللي مكتتكتين شعرهم وتقولوا الحق ده فيه كائنات فضائية هاتحتل البلد هيرد عليك بصوته اللي بيتخنه ويقولك طب انا عايز اي كائن ابن.......وانا هاطلع ايه واعمل ايه وطبعا لازم يسب لسلسفين اللي خلفوهم مع بعض الموسيقي التصويرية من انفه وممكن تاخده الجلالة ويطلع السنجا ولا ايد الكوريك اللي مخبيها في الميكروباص ويرفعها ويعلي صوته عشان يسمع بتوع السفن الفضائية ويرفعلهم السلاح يقولهم لو رجالة ومن ضهر رجالة انزلونا وطبعا لو نزلوا وحد فيهم ضربوا بحاجة هيجري عشان ينادي بقية السواقين اللي في الموقف بتاعه عشان يتخانقوا معاهم
الصنف الخامس شرفاء البلد  من كل التيارات
طبعا هايقفوا ضد الكلام الفارغ ده وهايرفعوا السلاح ضد المعتدي وهايقتلوا حتي اخر رجل فيهم ومنهم من ستحركه قوميته ومنهم من ستحركه افكاره ومنهم من سيحركه دينه وايمانه بالله ودفاعه عن مقدسات بلاده
الصنف السادس المدونين
طبعا المدونين هيقوموا بدور كبير في وصف السفن واحوال الحرب معاهم وسيكونوا اشبه بمراسلين في كل المحافظات ويوصلوا للناس ايه اللي بيحصل بالظبط في البلد وان اللي دخلوا بلادنا دول ليسوا الا مجموعة من المحتلين الغاصبين وهايوصفوا للناس شكل المخلوقات دي واوصافها وقدراتها مع بعض التهويل في بعض الاحوال
بس اللي خايف منه ان المخلوقات دي تقطع وسائل الاتصال واولها النت



وبس خلاص انتهي تخيلي وانتهي تفكيري في احوال الناس وهي بتحاول تقاوم وترفض او تنجي من الكائنات الفضائية

بس مينفعش اعدي البوست كده من غير ماابارك للريس واتباعه من نواب الحزن الوطني علي مد قانون الطوارئ لسنتين قادميتين واقولهم بس الف الف الف مبروك وان شاء الله نتحاسب عند ربنا في كل شهد زور او كان امعة او ظلم اهل بلاده او اعتقل خمسين الف مواطن بدون تحقيقات منذ 27 عام الي الان بدعوي قانون الطوارئ
واهدي لهم هذه الاية لعلهم يتذكرون
عندما تحدث الله عز وجل عن فرعون وتعامله مع قومه يقول تعالي :(فاستخف قومه فاطاعوه انهم كانوا قوما فاسقين)وابقي خليه ينفعكم يانواب شعبنا
والسلام
اليعقوبي





هناك 21 تعليقًا:

أخـــ مسلمة ـــت يقول...

ههههههههههه
أنا مشهد خاطف من الفيلم لكن فكرته رعب فقلبت علشان اخواتي بيخافوا
لو كنت اعرف انه الموضوع كده كنت سبته

بصراحة أحسن رد فعل هو رد فعل سواق الميكروبص
حد مخلص وبيجيب من الاخر

مش لسه هيقعد ويفكر ويعمل استراتيجيات

جزاكم الله خيرا علي البوست الرائع
ولا ننسي أن نهنئ أنفسنا بمد قانون الطوارئ

حسبي الله

أميمة كامل يقول...

الأفلام الأمريكى كلها تعتمد فكرة المخلص والمنقذ الأمريكى

واسلامنا يربى كل فرد على انه له دور ومسئول أمام الله عن تأدية دوره
وبإتقان واخلاص

وهكذا يصبح الجميع
منقذ ومخلص
فتنهض الأمة

Fahd يقول...

ثواني بس هو ايه موضوع يوم الخميس ده

ربنا يوفقك في امتحانك

وسيبك من الافلام الامركاني دي حيث ان براعتهم دي ظهرت علي ارض الواقع بشكل منقطع الهدوم في العراق وافغانستان ومن قبلهم فيتنام

جنّي يقول...

بالنسبة للفيلم
طبعا الفئة بتاعة الحزن الوطني سيغيرون الشعار ليصبح : العبور للمستقبل مع المحتل افضل
أما عن نهاية البوست

عادي .. أحنا بقالنا سبعة وعشرين
سنة نرفل في نعمة هذا القانون ..

أحنا لازم نضحي بالشعب علشان بابا حسني وماما سوزان والوريث الشرعي يعيشوا
دا الشعب بيحس بطعم الكايزر والكافيار لم ينزل بقهم

الشعب ها ينام عريان وهما يستغطوا
ها ينام جعان ومهما يستعشوا

لنا الله
تحياتي
said

Unknown يقول...

موضوع جميل جدآ

الفكره لي الرغم من بساطتها و خيالها بس فيها تقسيم و تحليل جميل للجتمع المصري فعلآ بحييك عليه

و تصويرك لسواقين الميكروباص واقعي جدآ و فيه كوميديا تجنن

انا هداف عن البلد مع السواقين و لما اضرب هاجي الم المدونين

سلامي و تحياتي ليك و للجعفري

Unknown يقول...

يوم استقلال ايه وافلام امريكاني ايه!!!يابني ااقعد اقرا كلمتين يمكن ربنا ينقذك وتعدي علي خير
صابح عندك امتحان فكرت في الفيلم وحللته وقمت كتبت تدوينة ولسه سايبنا قبلها من شوية
يابني الله يكون في عونك
ههههههههه
متنمش الا لما اديلك الدش بتاع كل يوم ,حاكم انت عامل زي الارض لازم تتسبغ علشان تنتج
:)
وكانت نفعتهم الافلام الامريكاني الا راجعين في نعوش او بينتحروا بس احنا اللي خلينا خنازير الارض توصلنا للمرحلة دي
اللهم انصر الاسلام واهله واهزم الباطل وحزبه
وجزاكم الله خير ياعمنا

الفاتح اليعقوبي يقول...

السلام عليكم
اخت مسلمة
معلش يااستاذة خيرها في غيرها تتعوض في اقرب فيلم ان شاء الله
وعلي فكرة بتوع الميكروباصات دول فئة في الشعب فظيعة ليها دماغها واغانيها وحياتها الخاصة بها والناس اللي محتكتش بيهم متعرفهمش كويس
والسلام

الفاتح اليعقوبي يقول...

السلام عليكم استاذة اميمة كامل
الافلام الامريكية هي كدبة كبيرة عاشها الامريكيون وللاسف صدقوها فاعتقدوا انهم عندما يذهبوا لاحتلال بلد فسيصبحوا كلهم رامبو والنار مش هتاثر فيهم لانهم امريكان

واما عن ديننا فلاوجه للمقارنة بين الجاهلية المتقدمة الان والتي تمثلها امريكا ودين اخرج البشرية جمعاء من الظلام الي النور
والسلام

الفاتح اليعقوبي يقول...

السلام عليكم
عمنا في الله فهد بيه
يوم الخميس ياصاحبي مدونين من اللي نزلت لهم بوستات في الكتاب وبعض المدونين هايتقابلوا الخميس القادم في مكتبة عمر بوك استورز الساعة 6


وياسيدي ن كان علي امريكا فهي خيبة الامل راكبة جمل
وفعلا خيبتهم بانت بس برضه مش عايزين ننسي اننا غرقانين اكتر منهم وعايزين نفوق
والسلام

الفاتح اليعقوبي يقول...

السلام عليكم جني
مش عارف اقول ايه والله بس فعلا لااجد افضل من كلمة
لنا الله
لك الله يامصر
وجزاك الله خيرا يافندم
واهم حاجة زي ماانت قلت لازم الشعب يموت عشان النظام يعيش
والسلام

الفاتح اليعقوبي يقول...

السلام عليكم
ايمي
وده اللي كنت قصده من ورا التدوينة هو فعلا فكرة تقسيم الشعب وطوائفه وسواقين الميكروباصات دول بقي الفايكنج بتوع مصر وعايزة تحاربي معاهم حاربي بس لما تضربي وتلمي المدونين ابقي ناديني انا والجعفري انا بالبندقية وهو بالسيف زي البروفايل بتاعي وبتاعه
والسلام

الفاتح اليعقوبي يقول...

السلام عليكم
جع جع بيه
اعوذ بالله من الخبث والخبائث -ظهر الفساد
ايه عايز ايه وانت مال معاليك يافندم اكتب ولا مكتبش ايه ياعم الحاج مالك رجلك شايلاك ليه كده
وبعدين ياعم جع جع انت برضه الاستاذة يعني لو انا زي الارض اللي لازم تتسبخ عشان تنتج فانت السباخ اللي بيضيف للارض عشان تنتج


وفعلا ياصاحبي ياريتها نفعتهم الا كلهم راجعين في نعوش عقبالك لما تستشهد كده في مسيرة وبتوع الامن المركزي يقطعوا وينسلوا في جتتك واقعد الم اشلائك من جزم بتوع الامن المركزي والمهم واقعد اعيط جنب اشلائك طبعا

وربنا ينصر الاسلام والمسلمين
ويلا امشي من وشي دلوقتي

والسلام

عاشــــــ النقاب ـقــــة"نونو" يقول...

اولا شوية تهاني كدة على الماشي
الف مبروك اللوك الجديد والبانر الجميل دة للمدونة:)
ثانيا نهني نفسنا والشعب المصري اجمع على مد قانون الحرية والكرامة الجليل قانون الطواريء سنتين بس ادام
:(
انا شفت الفيلم دة واي فيلم من النوعية دي قبل ما تتفرج لازم تبقى عارف ان ما حدش هينقذك غير الكائن الامريكي اصله غير اي كائنينات تاننية
تحياتي

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات

سلااااام

الفاتح اليعقوبي يقول...

السلام عليكم
استاذة عاشقة النقاب
ربنا يجزي حضرتك خيرا باذن الله
وفعلا كلام حضرتك صح المخلوق الامريكي غير باقي المخلوقات او الكائنات
والسلام

الفاتح اليعقوبي يقول...

نسر الشرق
شكرا
والسلام

khobayb يقول...

ههههههههههههههههههه

يا عيني يا بني

دانتا واضح إنك متبهدل في الامتحانات !

بس واضح برضه إنك شاب مجتهد ؛

رايح تكتب بوست قبل الامتحان بسبع ساعات

روح يا بني ..




وتعالى بسرعة !

---

جئت في سلام !

إلى اللانهائية وما بعدها

غير معرف يقول...

السلام عليكم
عمنا في الله خبيب بيه
عامل ايه يافندم
ياسلام شوف الاخوة الجامدة التعليق الساعة تلاتة ونص يعني ماشاء الله شكلك كده كنت بتقوم الليل يادكترة
هكذا عهدناك يااخي صواما قواما لاتترك نافلة بالليل او بالنهار الا صليتها وان نسيتها قضيتها
ياااااااااه هو ده خبيب اللي انا اعرفه


شوف بقي بتب بوست وعندي امتحان كمان سبع ساعات معلش اصل لي شعار في ايام الامتحانات بص ياصاحبي اللي ذاكر ذاكر من اربع اشهر فاتوا مش هاتيجي علي سبع ساعات يعني وبعدين اهم حاجة في الامتحان بجد البال الرايق
والله المستعان ادعو لي كتير
والسلام

ام يحيي يقول...

حضرتك نسيت حاجة مهمة
الصحف القومية الصفرا والحمرا وكل الالوان

عايزين نعرف عناوين الاخبار
ولو اني متخيلة ..

نلاقي مثلا الهرام كاتبة بالبونت العريض

في اليوم الاول

دعاوي واشاعات معرضة اطلقها بعض العابثين المحظوريين بوجود احتلال فضائي ليضروا بالاقتصد القومي والسياحة .. ولكننا نؤكد ان الامرمستتب وسنضرب بيد من حدد (انتو نسيتوان في طؤارئ وللا ايه

اليوم التاني

بعض العنصر الارهابية تنكرت في زي كائنات فضائيه واحتلت قصر الرئاسة .. ولكن ما زلنا نؤكد الوضع تحت السيطرة (وهنمد الطؤارئ سنتين كمان

اليوم التالت :في خطوة عبقرية تنم عن تفتح الذهن قرر السادة المسؤلين بدء المفاوضات مع اصدقائنا المحتلين حبا في السلام الشامل الدائم

اليوم الرابع
قرر وزير الصفاقة بدء علاقات تطبيع مع اخواننا المحتلين وهو يتقدم بجزيل الشكر لما قدموه لشعبنا من خدمات وافكار حضارية

اليوم الخامس
منح جائزة نوبل الكونية للسلام لحبيبنا اللي عارفينه هو وابنه


اليوم السادس

تحويل بعض الدونين الذين يهددون امن وسلامة كوكب الارض لمحاكمة عسكرية نزيهه ومستقة تماما

العام التاني

شكر خاص لاحمد موسي

الفاتح اليعقوبي يقول...

السلام عليكم
ام يحي
ربنا يجازيك خيرا
بس لعله خير ان شاء الله وينضربوا من الكائنات دي ومن القرف بتاعهم ومن نفاقهم
وفعلا شكرا خاص لعمهم الكبير اوي احمد موسي استاذهم ده
وسعدت بزيارة حضرتك
والسلام

صيد الخاطر يقول...

لا والانكت من كده ان اللي بينقذ العالم واحد يهودي
اللي هو الواد ابونظارة

دي انا شفتها في ملف عن العر ب والمسلمين في هوليوود

طلع الشاب ده يهودي وكان لابس الطاقية بتاعتهم وبيقرا نم التوراة قبل ما يطلع للوحش

طبعا كل ده محذوف هنا

والله يا حبيبي
العيب مش عليهم

ده واحد خصل على مكاسب وبيحافظ عليها

الدور والباقي علينا احنا اللي سابينهم ياكلوا على قفانا

حفظك الله ولك مني خالص التحايا والاشواق

محبك

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا