الأحد، 18 مايو 2008

ذكريات تضحك

بسم الله والصلاة والسلام علي رسول الله صلي الله عليه وسلم
الفترة اللي فاتت اغلب المدونات تجد فيها حالة حزن وكابة كده واللي معتزل التدوين فترة الامتحانات وكده فقلت انزل بوست اكسر بيه حالة مدونتي انا والجعفري وهاحكي علي ذكريات مع السالف الذكر
عايز تلاتين قرش لو سمحتي
في مرة من المرات كنت باخد درس عربي انا والجعفري في الثانوية العامة ومعانا واحد زميلنا وبنت جارتنا فالمهم الاستاذ في اليوم ده كان جايب معاه تلخيص قصة وااسلاماه المقررة علينا فكان الملخص كبير فالاستاذ كان معاه نسختين بس فاعطي البنت نسخة وقالها خدي انت النسخة دي وملكيش دعوة بيهم واعطانا نحن الثلاثة نسخة واحدة فقلنا خلاص تمن النسختين اللي فاضلين نقسمهم علي بعض وكانوا وقتها انا فاكر تمن تصوير النسختين 360قرش يعني كل واحد هايدفع 120قرش
فالمهم مشيينا شوية مع الاستاذ فكان الجعفري ماشي جانبه (كعادته يهوي القرب من مراكز السلطة)وكنت انا وزميلنا التاني ماشين وراهم فالاستاذ بعد ماوصلناه قال مجيتم دي غالية عليا اوي فاعطانا نسخة زيادة هدية فبدل كده ماهانصور نسختين هانصور نسخة واحدة فالجعفري خدها وقال لا دي بتاعتي
يابني عيب مايصحش يهيدك يرضيك ،المهم انه تنشن فقلت له خلاص هات النسخة اللي معاك دي عشان فيها حاجات زيادة هاشيلهالك فقالي خدها فقالبتها منه وقلت له انت كده هاتشيل تصوير النسخة اللي فاضلة كلها علي حسابك فقعد يقول لا ومينفعش وكده فقعدنا نتجادل لحد ماوصلنا عند بيبتنا فقال بصوا مش هاينفع كده وهانزعل مع بعض فصاحبنا التاني قاله خلاص خدالنص جنيه ده وقمت انا مديله نص تاني فبقي معاه جنيه ويفضل 80قرش قلنا له ادفعهم انت عشان طمعك فقال لا انا هادفع نص جنيه بس زيكم فقلت له خلاص ادفع نص جنيه واطلع خد تلاتين قرش من البنت اللي معانا في الدرس فانا متوقع انه يقولي عيب مايصحش دي بنت برضه واحنا شحطة مش هايكل
لقيته بيقولي يلا بينا قمت قايله يلا بينا
فطلعنا في الدور بتاعها ووقفنا في الطرقة وعندنا الطرقة واسعة اوي فيها حوالي تمن شقق فوقفنا في نصها
فقلت له :ياتخبط علي الباب لتكلمها اننا ناخد منها الفلوس
فقال :انا هاخبط
قلت له :خبط
فراح خبط علي الباب واول ماخبط جريت انا وصاحبنا التاني فهو مش يستني لحد ماتفتح لا خبط وجري معانا ونزلنا جري علي السلم وقعدنا نضحك لحد مانفسنا اتقطع من منظره لما لقانا جرينا وهو ام محصلنا وكان في راجل واقف في الرطقة وكان منظرنا الصراحة 000ا
فالمهم طلعنا تاني وقلت له المرة دي بجد ياميدو ياتخبط ياتكلم
فقال لي انت هاتجري قلت له لا
فقال انا هاروح اخبط فراح وخبط وانا كاتم ضحكة جامدة ورجع وقف معانا في وسط الطرقة بعيد عن بابها
فقلت له روح خبط تاني فراح واول ماخبط البنت قامت فتحت الباب فهو بيتكسف اساسا فرجع وهوم حاطط وشه في الارض وراجع وضهره للباب اللي واقفة عليه البنت
فقلت لها هو بس حضرتك ميدو عايز تلاتين قرش عشان يصور الورق فبتقول ايه تلاتين قرش
فميدو رد فبيقول لالالا مش انا ده احمد يسري (زميلنا التاني)فقلت له لا ياميدو انت اللي عايز التلاتين قرش
فدخلت واديتنا الفلوس بشكل صعب اوي لانها مش متخيلة ان تلات شحطة ممكن يطلعوا مع واحد عشان يشحتولوا تلاتين قرش
ووقتها نزل لامي يشتيكلها مني وعشان ترجع الفلوس اللي خدها من البنت بعد مااحس باللي حصل فيه وشكله اللي بقي صعب وقالها ياطنط ممكن ترجعي الفلوس للبنت دي وهي جارتنا وامها تعرف امي وامه
وكان منظره يقطع القلب الصراحة بعد مااحس بالمقلب والتدبيس اللي اتدبسه بعد مايعتبر شحت تلاتين قرش من بنت
ههههههههههههههههههههههههههههه
....................................................................................
موقف تاني
كنا في مرة في لقاء تبع الجامعة فكان جايلنا محاضر فقعد يكلمنا وبعد ماخلص بيقول حد عنده سؤال فخرج اخ وقال له انا عندي سؤال
فقال اتفضل
فقال له احنا علي طول بنعمل مسيرات وبنطلع بره الجامعة بنتنفخ وبنضرب والاخوات بيبقوا جوة
فالمحاضر بيقوله يعني انت عايز ايه
قال له يطلعوا ويضربوا زي مااحنا بنضرب
فالمحاضر قال له ماتخفش ماهما بيدوعلكم لما انتم بتتدعكوا بره
وقلب اللقاء كله ضحك وقتها
.......................................
موقف تالت
في مرة كنا في مسيرة وحصل ضرب وكده فواد من بتوع الامن المركزي اللي لبسين ملكي دول دخل وسطنا وام ضارب كام اخ بغباوة والواد ماشاء الله اربعة في خمسة (تور بشري)فضرب اخ اسمه محمود حمدي بوكس في وشه
فالاخ محمود راح لاخ اسمه الريدي وقال له ياريدي الواد البغل ده ضربني جامد وعايز اخد حقي منه
فالريدي قاله بص عليا
فكان في حوالينا كردون امن مركزي وبيبقي محوط كردون بتاع اخواناوورا الكردون بتاعانا فيه بقيت الاخوة المشاركين في المسيرة فالريدي دخل في وسط المعمة دي وعمال يقولهم يااخوانا اهدوا وعمال يهدي في العساكر واخوانا لحد مابقي ضهره في ضهر الواد بتاع الامن ده وقام لافف ورزعه قفا موووووووووووووووووت طاااااااااااااااااااااخ نااااااااار وجري وسط اخوانا الواد معرفش يدخله فقعد يشتم ويسب ويلعن لحد الصبح وشوية تاني وانا واقف ادام الواد ده والدنيا هديت مفيش ضرب ولقيت حد من ورايا قام زاقنني علي جنب وقام رازع الواد ده شلوت بين رجله موووووووووت برضه
وبس خد بعدها جزائه وقعدنا بعد المسيرة ميتين علي نفسنا من الضحك من اللي حصل فيه
واي حد عنده موقف بيضحكه يقولوا لنا يااخوانا عشان نكسر ولو شوية صغيرين حالة الكابة اللي احنا عايشين فيها
والسلام
اليعقوبي

هناك 24 تعليقًا:

Unknown يقول...

ايه ياد يايعؤوب قلة الذوق دي كده برضه علي التسييح ده طيب اصبر عليه ده انت ليك ايام برتقاني غامق وكله هايطلع
---
فاكر وانت في 2ثانوي لما ضربت الاستاذ واتفصلت من المدرسة ايام لما كنت بلطجي ....
ولافاكر لما استاذ عبد النعيم بتاع الانجليزي ضربك بالحزام وانت لابس الجلبية السودانية اللي عامله زي فستان العروسة
....
ولافاكر لما موضوع الدش بتاع درس الالماني ,ولا اقولك بلاش ان الله حليم ستير
....
كل ده ورق مش هاحرقه بس هطلعه وقت الشدة
ههههههههههه
يا خلبوص
وقعد ذاكر وخلي السنة دي تعدي علي خير انت في وقت شدة وخليني في صفك احسن يايعؤوب
واصبر عليه لما تخلص انا بس مش عايز احطمك دلوقتي ,وبرضه لسه مجاش وقت اللعب علي المكشوف
:)

Unknown يقول...

وبعدين مكنش 30 قرش انت لازم تسبكها كان 50 قرش ,وبعدين ان خدتها عند معاك قال 30 قرش قال
انت فاكر الكلب اللي طلع يجري وراك بعد الدرس انت وابراهيم وغبت 1/2ساعة ورجعت بخشبه تقول هو فين ولا نسيت
ولا فاكر يوم الفرح لما كنت زعلان وعمرو قعد يهدي فيك ولانسيت
ههههههههههههههههههههههههههههههههههههههههههههههه
يلا سلام متعيطش بقي ياعز امسك نفسك

جمعاوى يقول...

هو ده اليعقوبى

واحشنى ياااض

و نفسى اسمع صوتك

مشروع انسان يقول...

:)

ايه التدوينة الحركات دى
جميلة جداااااا

بس جميل اوى موقف التلاتين قرش دول ههههههههه
عرفوا بالحالة الاقتصادية يفرقوا بين الاخوة :)

مش عارف عملتوها ازاى دى

وعلى فكرة يا يعقوبى انت طلعت بينى وبينك صلة دكتور حر قاللى

يعنى قول اللى عايزه ومحدش هيكلمك

عايز افتكر موقف كوميدى
مممممممممم

اه فيه موقف كنت لسه فكرة من يومين كنا اتزنقنا فى حركات كده ومعرفناش نصلى الجمعة فى المسجد ودى لاول واخر مة نعملها المهم
قام اللى صلى بينا الجمعة كان ما شاء الله بشمهندس قد الدنيا

وكانت خطبة الجمعة عن الصناعة فى مصر والمشاريع ودراسات الجدوى

هههههههههههه

والله طول الخطبة النص كم دى كنا هنضحك وهو يا عينى كان بيتكلم بجد ومستغرق اوى بس كانت اول خطبة احضرها علمية كده المهم عدت بخير الحمد لله
والناس كانت عمالة تبص لبعضها ومساكة نفسها من الضحك

بس مر الموضوع بسلالالام
واخر مرة هنصلى الجمعة وراه
:)

Empress appy يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه بجد ربنا يكرمك انا كان عندي حاله كئابه ملهاش حل بس لما قريت كلامك موت المهم يا يعقوبي اصلا انا من ساعه ما شوفتك بقول عليك شرير ههههههه والجعفري طيب هههههه لا بجد ربنا يخليكوا لبعض

أميمة كامل يقول...

أضحك الله سنك

وأدخل السرور عليك كما أنت حريص

أن تدخل السرور علينا

ودعواتكم لنا وانتم فى زنقة الامتحانات

Fahd يقول...

كويس والله انك بتفكر بالطريقة دي

الحياة بقت صعبه قوي

مدونات تتكلم عن الفساد

عن الجوع والمرض والفقر

زكثيرين تكلموا عن الغلاء

واكثر منهم تحدثوا عن النكبة

ومنهم من تحدث عن بوش وزيارته المشؤمه للمنطقه

كل هذا كان يمثل سوادا قائما وحالة حداد دائمة

اتمني بمدونتك هذه ان تبدا مرحلة جديده من الامل والتفاؤؤل

جميلة هي تلك الذكريات

طبعا انت شردت للاخ الجعفري لكن لازم يتحمل ذلك علشان نضحك

رفقة عمر يقول...

ماشاء الله ربنا يديم عليكم نعمه الحب والصداقه وتفضلوا كدة تعملوا مقالب فى بعض لغايه لما تبقوا جدود ان شاء الله
بس هاتبقى مقالب ولا اروع

عاشــــــ النقاب ـقــــة"نونو" يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
هموت من الضحك مش ممكن
ربنا يبارك فيكم ويخليكم لبعض ويديم المعروف والاخوة ما بينكم
احنا كدة لازم نشوف بعض في المصيف هنروح اسكندرية مخصوص علشان نتقابل
سلام وتحية من خالد زوجي لكم
تحياتي وودي

الفاتح اليعقوبي يقول...

السلام عليكم
جع جع بيه
ههههههههههه
تسييح مين ياغلبان انا ممكن انسفك برضه والدنيا مش زي ماانت فاكر وانت برضه ايامك برضه زي نعل الجزمة
وفاكر انت درس الالماني وعبدالنعييم كان بيقولك ايه في درس الانجليزي
ولا فاكر البير بتاع الواحات والبحر كنت بتنزله ازاي

وعلي فكرة كويس انك فكرتني هي ماكانت تلاتين قرش ولكن البنت اديتك 50 قرش عشان ماكنش في فكة
وياصاحبي عيب لسه معي ورق محرقتوش
وعامة خير
وبلاش حكاية الكلاب دي اللي انت بتتكلم عنهالانك لو شفت كلب ماشي في شارع تسيب له الشارع كله
الا طبعا لوكنت انا ماشي معاك فالامر مختلف


والسلام

الفاتح اليعقوبي يقول...

عمي جمعاوي
ازيك ياصاحبي وحشني جدا والله علي فكرة انا كلمتك من فترة ومرضتش بس عامة خير في اول فرصة يافندم نكلم حضرتك ده شرف لنا
وشوفت ياعم شردت لك صاحبك اي خدمة ولو عايزني افصلهولك من المدونة افصلوا مفيش اي مشكلة

واي خدمة يازعيم
والسلام

الفاتح اليعقوبي يقول...

عمي وعم عيالي ان شاء الله امام الجيل
ايه رايك يازعيم تدوينة جامدة مش كده تظبيط شردت صاحبك وبعدين اخوة مين يابن عمي ولا كنت سمعت بيهم وقتها كنا عايشين علي ماتفرج فالحمد الله الذي من علينا بعدها بنعمة الاخوان
في صلة بينا وبين بعض هو الدكتور محمد قالك لالا بقي انت اللي متخفش من اي حد وقول اللي انت عايزه احنا طلعنا نفس الكلر

وجامد اوي خطبة دراسة الجدوي دي والاحوال الاقتصادية

وربنا يجازيك خير ياجميل
والسلام

الفاتح اليعقوبي يقول...

السلام عليكم
استاذة ابي
ازي حضرتك
فرج الله همك وانت اول ماشفتي الجعفري قلتي انه طيب ولما شفتيني قلت اني شرير

لا القصة مش كده القصة اني كابت الجعفري مش مديله فرصة خالص
ههههههههههه
والسلام

الفاتح اليعقوبي يقول...

الاستاذة امنية
شرفت بزيارة حضرتك
واتمني اني اكون ادخلت السرور علي زوار المدونة بدل حالة الكالة اللي بتصيب بالشلل اللي احنا عايشنها

ودعواتكم انتم لي عشان الامتحانات
انتم اللي تدعولي اكتر وانا هادعي لكم
والسلام

الفاتح اليعقوبي يقول...

عمنا فهد
والله ياجميل متوقع ان كل المدونات تتكلم عن اللي انت قلته خاصة في الفترة دي بعد خطاب بوش في الكنيست وزيارته لمصر
ومش عارف الناس هاتقول ايه مهو معروف ويفترض بنا ان نكون واضحين وفهمين الدنيا صح
ونكسر شوية حالة النكد اللي في كل المدونات
والسلام

الفاتح اليعقوبي يقول...

السلام عليكم
استاذة رفقة عمر
جزاك الله خيرا يااستاذة وربنا يديم صدقاتنا واقعد البسه كل مقلب ومقلب يطلع من نفوخه
والسلام

الفاتح اليعقوبي يقول...

السلام عليكم
الاستاذة عاشقة النقاب
اسال الله ان نكون ادخلنا البسمة عليكم انت وزوجك الاستاذ خالد اللي مبنشوفهوش خالص هو فين مينفعش كده خالص
عايز نشوفه والله المستعان
والسلام

جنّي يقول...
أزال المؤلف هذا التعليق.
جنّي يقول...

ياجماعة حصل خير
خلوهها علي المرة دي عايزين كام؟
أنا أحسن أعلق على التعليقات الخاصة بالجعفري ورد اليعقوبي ياريت تعملوها بوست لوحدها .. المهم اني ضحكت في أيام ضنت علينا حتى بابتسامة ..
جزاكم الله خيرا
لك شكري وتحياتي
said

غير معرف يقول...

السلام عليكم

الموقف الثانى : حضرتك ممكن تطمن الاخ ده و تقولوا خلاص الامن مابقاش يفرق معاه بنت و لا ولد و كله هايضرب بعد كده
و مش هتلاقوا حد يدعلكوا

روينا يقول...

بجد مواقف فطستنى من الضحك
على ال30قرش
وبعدين اللى مخنوق ان هو بينضرب والاخوات مبيننضربوش
ميعرفش ان هما بيكونو نفسهم يطلعو بره
ده انا بحث ان المظاهره اللى مفهاش ضرب بتكون دمها غلس

الفاتح اليعقوبي يقول...

السلام عليكم
عمنا جني
ازيك ياجميل منور المدونة
خلاص عليك انت المرة دي انت اللي نجيت الجعفري من تحت ايدي وعامة خير وتعلق علي اللي يعجبك
ونورتنا ياجميل
والسلام

الفاتح اليعقوبي يقول...

ان الاوان
تشرفت بزيارة حضرتك يااستاذة
وعلي فكرة الاخ وقتها كان بيتكلن بجد مش بيهزر ومفيش مشكلة ان شاء الله ندعي لبعض كلنا بدل هي جاية علي الكل
والسلام

الفاتح اليعقوبي يقول...

روينا
اتمني اننا نكون ادخلنا السرور علي زوارنا
واحنا يافندم عارفين انكم نفسكم تتطلعوا بره وتشتبكوا مع الامن احنا واخدين بالنا يافندم وفعلا المسيرة اللي ميكونش فيها ضرب بيقي دمها تقيل اوي
يعني احنا نتاكل علق برة ودمنا يسيح عشان الناس تتبسط بسيطة
والسلام

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا