الخميس، 8 نوفمبر 2007

مواقف من الصعيد الجزء الثاني


بسم الله والصلاة والسلام علي رسول الله عليه من الله افضل والتسليم

اوحشتموني جدا والله والقصة ان النت عندنا فصل فترة المهم خير

ندخل علي الموضوع عدل من غير لف ولا دوران

انا كنت بتكلم علي امور رايتها في احدي بقاع مصر وهي الصعيد رايت عادات وتقاليد غريبة شوية ميعرفهاش غير اللي عاش معاهم فترة من الزمن يعني ندخل في المهم

المراة

اللي انا شوفتوا هناك ان في احدي الاوقات المراة كانت شئ مهمل في المجتمع يعني لادور لها الا تربية الاولاد ولامشاركة مجتمعية لها (والمراة عامة لها مشاركة في المجتمع ولكن بضوابط شرعية)فكانت اشبه بالوعاء الذي ينجب للرجل

ولكن بمرور الوقت والتقدم بداوا يسمحوا للمراة بالتعلم وبدات يظهر منهم نساء متعلمات يشاركوا في المجتمع

ولكن لازالت هناك عائلات لامجال معها الي هذا وانا اعرف هذه العائلات المراة عندهم لاتتعلم ولا تخرج من بيتها نهائيا لدرجة انه ايام السيول اللي اجتاحت الصعيد في التسعينات الناس دي بيوتها تحت الجبل فكانت السيول تجرف كل شئ حتي البيوت

فبعض هؤلاء الناس تركوا النساء الي دخلت المياه بيوتهم وقتلت بعضهن

ومرة احد رجال هذه العائلات وهم للعلم من الهوارة ذهب للحج واخذ زوجته معه فعندما رجع كانوا قد فصلوه من العائلة

دي ناس انا شوفتها هناك ولن اقول جهال ولكنهم من اكبر عائلات الصعيد والمتعلمون فيهم كثير

القبلية

عشان اوضح القبلية هناك هذه البلدان واقصد قنا تحديدا وده اللي شوفته ان هناك قوي في المجتمعات هناك العرب والهوارة والاشراف والنصاري التيارات الاسلامية هناك ضعيفة شوية

فعشان مثلا تضمن معركتك الانتخابية انت تظبط مع كبير العائلة دي وهو يجيبلك اهله وناسه ويخلصلك القصة وما فيها بس انت ظبط معاه

وبسبب القبلية دي فضل الصعيد فترة من الزمن غارق في بحور الدم من القتل بسبب التار وهناك كثيرين ولائهم الاول والاخير للعائلة او التقاليد وليس للدين

كانت احصائية بيقولها مدير امن قناالسابق في برنامج البيت بيتهم من فترة وهي انه كان فيه حوالي 725او اكثر قليلا او اقل قليلا حالة تار في قنا وحدها

وفي بلدان هناك كانوا عشان اهل القتيل يفضلوا فاكرين تارهم كانوا بيدفنوا قتلاهم في الحوش بتاع البيت

يعني دي امثلة وفي كتير

الدين

شئ جميل تلاحظوا هناك ان فيه ناس كتير بتصلي بس القصة في ايه (وجدنا ابائنا كذلك يفعلون )طبعا الا من رحم الله وجدت ناس يصلون وبعضهم يحتكم الا العادات والتقاليد قبل الدين وجدت ناس يصلون وحياتهم وتصرفاتهم غريبة للغاية

ومن الاشياء الملفتة للنظر اوي انتشار الصوفية بينهم بغباء وبكثرة غير عادية والتخريف في دين ربنا وفي مرة ابقي انزل بوست للختمة اللي رحتها لهم واحكي لكم علي اللي حصل فيها

بس الملتزم منهم ملتزم بحق يعني بياخذ الامر بجدية تامة بلا تهريج او استهبال وعلي فكرة الامن هناك شبه مؤيد للظاهرة دي وان لم يعلن يعني هناك لاتجد تيارات اسلامية منتشرة اوي نظرا لبعض الظروف الامنية الصعبة للغاية

والبدع في الدين كثيرة يعني مثلا بعد الصلاة تلاقي واحد جالك بيقولك الاذكار بصوت عالي ياعمي مينفعش غلط الرسول عليه الصلاة والسلام مكنش بيعمل كده مفيش فايدة

واغلب الصعايدة القناوية علي المذهب المالكي برضه(وجدنا ابائنا كذلك يفعلون)ا

المخدرات والحشيش والافيون

محدش يضحك الناس دي اصحاب مزاج عالي وكنت مثلا هناك في احدي البلدان الصبح اهلها بيشتغلوا وباليل بيحششوا تلاقي وانا اسف ملحين وحاطط الجوزة في بوقه عادي جدا وشبه مفيش رقابة فعالة من الامن علي الكلام ده ليه؟؟؟؟؟؟؟؟

الاصل في القصة دي ان موزعين او تجار المخدرات الكبار هناك كانوا شغالين تحت عين الامن ودي كانت صفقة

الجماعات الاسلامية اللي كانت متبنية العنف كانت بتعمل عمايلها وتتطلعه علي الجبل فوق بيستخبوا والامن صعب انه يطلعلهم فوق في الجبل يعني تقدر تقول مش ارضهم فكانوا بيعملوا صفقات مع تجار المخدرات والسلاح اللي هناك زي عزت حنفي ونوفل سعيد انهم يتعملوا مع البشر دي ويظبطوهم في مقابل اطلاق ايديهم في المخدرات والسلاح ولما الامن بيلاقيهم زودوها وبداوا يرغوا وهيفضحوا الدنيا يعملوا الفيلم ده كله عشان يوقعوهم وللعلم نوفل سعيد الامن معرفش يوصله لان بلده تحت الجبل (حمر دوم)بس سلطوا عليه بن عمه اللي قتله

تجد ان الدولة هي اللي بتخلق الارهاب والمخدرات والبلاوي السودة دي بايدها مش بايد حد تاني

وعشان كده تلاقي البلد هناك فعلا المخدرات والسطل علي عينه الا من رحم الله

خفة الدم والاخلاص

البشر هناك فعلا يااخوانا تقعدوا معاهم بالذات لما يبقوا مبسوطين بيخربوا الدنيا متعرفش تقفل بوقك من الضحك ومشكلتهم انهم بيهزروا في اي وقت وبتجاوز شوية يعني المهم انهم يضحكوا وخلاص

اما الاخلاص فحدث ولا حرج تلاقي لو حد منهم حج يكتب كده علي بيته

الحاج فلان الفلاني وحرمه حاجا وزارا سنة مثلا1420هجريا و1999م

في مرة كنت قاعد هناك مع واحد بيحكي لي علي واحد من بلدهم وسماه لي كان عنده تجارة عني محلات وكان ناقصه ان يتكتب عليه محلا ت الحاج فلان الفلاني فبيقولي انا كنت بروح احج كل سنة خدمة حجاج او سواقة فقال لي خدني معاك السنة دي وهاطلع معاك بيقولي خدته ياااستاذ محمود ولقيته جايب في عزاله شوال فحم وشوال معسل

ويجولي يااستاذ محمود واحنا في التفتيش في المينا السعودي في كلاب بعض الاوقات تفتش في العزال بيجولك لجيتلك الكلب بيشمشم في شوال الفحم والمعسل وشوية لجيت الكلب رجد زي ابو الهول جنب الشوال والراجل السعودي بتاع المينا لما عرف اللي جوا الحاجة بيجول والله يااخي ماتنفع لك حجة هكذا يجوله ملكش دعوة وانت مالك

الراجل اللي بيحكي لي بيقولي يااستاذ محمود مصلاش هناك اساسا

فربنا يلطف بينا

الكرم

حاجة تلاحظها هناك ان الناس كرمة للغاية ومينفعش تدخل بيته الا لما يكرمك كويس جدا والراجل هناك راجل بجد يعني تلاقي فيه نخوة ورجولة مش دياثة ودم بارد

انا فاكر كنت بروح بعض البيوت كانهم بيعلفوا فيك علفا (مفعول مطلق)وهم اهل كرم واشهد لهم بذلك

وفي الاخر انا كان قصدي ايه من التدونتين دول انا كنت اوجه الضوء علي بقعة بدات الدولة تنظر اليها بعد فترة كبيرة من تركها ،منطقة مليئة بالخير الكثير سشواء في ابشر او في الثروات ومحتاجين اننا كدعاة نلفت نظرنا ليها شوية لان الناس هناك محتاجين فعلا اللي يعلمهم دينهم وبعض الامور فيه

بس انا كنت بحكي علي امور شوفتها بعيني وممكن يكون حد شاف حاجة تانية

والسلام

اليعقوبي

هناك 22 تعليقًا:

عصفور المدينة يقول...

سبحان الله أنت تعلق عندي وانا هنا

تصحيح الآية

وجدنا آباءنا كذلك يفعلون

أكمل القراءة

عصفور المدينة يقول...

بارك الله فيك وحمدا لله على سلامتك
جميل البوست ومليء بالفوائد

المشكلة أن الدعوة في أوساط غلاة الصوفية والمنخرطين في الطرق والموالد صعبة جدا بيكون دماغهم قافل بشكل غير عادي وعدهم عداء مسبق للملتزمين

إيميلي في البروفايل موجود

الفاتح اليعقوبي يقول...

السلام علكم استاذي عصفور المدينة
كنت متاكد انك اقول واحد هتعلق

ربنا يكرمك انا حاولت اكلم فعلا بعضهم بس فعلا متربسين علي الاخر ومحتاجين لين وشدة نظرا لطبيعتهم نفسها لانهم من النوع اللي بيقفل

المشكلة بقي يااستاذنا البروفايل عندي مبيفتحش استاذنك ممكن تبعتهولي علي الجي ميل
والسلام اخي في الله
والله اني احبك في الله

أمير القلوب يقول...

السلام عليكم ورحمة الله وبركاته
أخي الكريم: اليعقوبي
المشكلة في الصعيد عموماً إن الناس متعلمين ممكن بس يفهموا دي صعبة شوية يعني في الوقت اللي ممكن تقنع فيهم واحد بفكرة ممكن بكلامك مع واحد كافر تدخله الإسلام وده لسه مقتنعش أصلا ًبس لو إقتنع بالفكرة بيبقى على إستعداد يموت من أجلها علشان كده تلاقي الصوفية منتشرة هناك لأنهم بيورثوها زي الميراث التاني بالضبط
على العموم شكراً على العادات اللي عرفتها لينا من البوست ده
تقبل تحياتي

Unknown يقول...

عوده الندله اي يابوعز
فعلا ياعز والله اسوء حاجه لما العباده تتحول لعاده يعني لما الناس تفقد المفهوم الاساسي للدين وتفتكر انه مجرد حركات هيرضي بيها ربنا (مالكم كيف تحكمون) اما الامن هناك بيزرع الشر واللي بيزرع شر بيحصد شر يعني لما تلاقي الارهاب رجع تاني هناك متستغربش
وربنا يسترها معانا ويتم نوره وجزاكم الله خير يااستاذي ومعلمي

محمد عبد الرحمن يقول...

أخى وحبيبى فى الله محمود
عود حميد
شوف بأه يابو العم الصعايدة دول ولو إنهم أهلى وناسى بس الحق حق
ميراث التهميش والإهمال وبعدهم عن مصادر التعليم وأساب الإختلاط مع الحضارات جعلتهم منلقين بس مش أغبياء بالعكس هم بس تفكيرهم محاصر بعادات ومفاهيم متحجرة لكن اللى منهم بيعرف يتعداها بيعدى ويبقى فوق
الفكرة بقى إن الدعوة معاهم مش محتاجة نمط تقليدى يعنى لازم يحبك الأول ويطمنلك كويس وبعدين من معاملاتك خصوصا الواجبات الإجتماعية يبدأوا يسمعولك يعنى نفس طويل شوية


المهم الحمد لله إنى إطمنت عليك وربنا يديم المحبة

khobayb يقول...

عارف فين بيت القصيد ؟

"وجدنا آباءنا كذلك يفعلون"

التعصب للإسلام كالتعصب لغيره .. أعمى لا عقل فيه

الإسلام دين يؤخذ بالعقل ، ويعمل له بالعقل ، ويدعى إليه بـ ...؟

صح

بالحكمة ، والموعظة الحسنة

والمتعصب لا حكمة عنده ، ولا صواب إلا ما وجد آباءه يفعلون ، لا ما أحل الله وأمر به

غير أن منهم رجالا لا مثيل لهم

حين تصاحب هذه الصلابة ، رجاحة في العقل

لا مثيل لهم

أميرة محمد محمد محمد يقول...

ربنا يكرمك يا يعقوبي و تكون انت سبب الصحوه الاسلاميه هناك و تقدر تعمل تغيير

مهندس مصري بيحب مصر يقول...

تصدق أنا فعلاً في أسيوط لما كنت هناك
شفت صعايدة من جميع محافظات الصعيد و كل اللي انت قولته صحيح
خصوصاً الهوارة ليهم دماغ تانية غير دماغ بقية البشر
و الصعيدي لما بيتربس بيقى قفل مسوجر
بس لما ربنا يكرمه و يهتدي و يعقل بيبقى من أحسن جند الله و من أحسن الدعاة في سبيل الله
ربنا يعينك و تقدر تعمل حاجة
و مرحباً بعودتك وحشتنا يا راجل و قعدت أسأل عليك الجعفري و لا عبرني

Unknown يقول...

نورت البلوج يا استاذ
كنت تحت الحصار ولا ايه

نتكلم في الموضوع انا عندي رأي بسيط ان الناس دي محتاجه توعيه و نصح و ارشاد
و ممكن الازهر يقوم بالدور ده فيه الدعاه و الامكانيات بس للأسف هو مشغول بحاجات لا هاتقدم ولا تأخر
لو شيخ الاززهر ينفض دماغخه من السياسه و مجاملة الحكام و يلتفت للمشاكل الي في المجتمع زي التار و اهانه المرأه و التفاخر بالدين و العصبيه و القبليه
و نعرف الناس دي ان الاسلام و الرسول صلي الله عليه و سلم نهي عن كده و قال لا فضل لعربي علي اعجمي الا بالتقوي
و نبعت دعاه لكل قريه في مصر و نفهمهم اهميه الاخلاق الاسلاميه الي هاتحل المشاكل دي بالتدريج

نيجي بقي لمخدرات نقدر نقول ان دي وسيله الهاء يعني بدل ما نفكر في الخصخصه و الفقر و المعونه اهخو ناخد حجرين و نتسطل احسن

الموضوع جميل جدا و ياريت يحصل توفير لاحتياجات المناطق دي

ahmed mefrh يقول...

اخى اليعقوبى

اخشى انه هناك الكثير من العادات التى ترسخت على مر العصور و اصبحت جذور المجتمعات خارجه تماما على روح الدين و روح العصر منها ما ذكرت اخى فى المجتمع الصعيدى

تحياتى اليك
ابو مفراح

الفاتح اليعقوبي يقول...

السلام عليكم
اخي امير القلوب
ربنا يكرمك فعلا ممكن كافر يدخل في الاسلام والصعيدي ممكن يقفل نحية دينه الصوفية هناك اشبه بغسيل المخ وبتتورث فعلا شيخ الطريقة بيورث لللي بعده وهكذا
والسلام اخي الكريم
..............................
الجعفري
انت ايه اللي جابك هنا طب لما اشوفك يانجم
فعلا ياصاحبي اسوء حاجة لما العبادة تتحول لعادة تفقد روحها تماما وتصبح كانه شئ ضخم خاوي
واما الامن فربنا يهديهم شغالين علي الاخوة هناك والملتزمين وسايبين بتوع المخدرات وفيه كلام غريب سمعته عن حكاية الجماعات الاسلامية هناك،هذا ماقدمت ايديهم
اما حكاية اني استاذك ومعلمك ماانا عارف الكلام ده ومتحرجنيش ادام الناس وتقولهم اني اللي مربيك مينفعش يااخ احمد كده
والسلام
..........................
استاذي محمد طال الليل
عامل ايه ياجميل صح محتاجين طولة نفس واستقرار وسطهم لينبهروا باخلاقك معهم وتصرفاتك ثم ياتي التغيير
والسلام اخي في الله

الفاتح اليعقوبي يقول...

خبيب
عامل ايه يادكترة اتمني تكون بخير وسلملنا علي نصيف اوي
المتعصب اخي في الله كالمغمض العينين يسير الي مفترق الطرق لايعرف الا انه يمشي والسلام ولكن لو فتح عينيه وتيقن الطريق لاختلف الامر
الناس اللي هناك دول مشكلة ياصاحبي ربنا يهدينا ويهديهم
والسلام ومتقطعش كده طمنا عليك انت ونصيف
................................
الاستاذة اميرة محمد محمد محمد
امين يارب يااستاذة كل يسد ثغره
وموضوع بن لادن عامل ايه يااستاذة عايزين نشوفه
والسلام
.............................
استاذي مهمندس مصري
عامل ايه ياباشا الدنيا عاملة معاك ايه دلوقت فعلا الهوارة دول مشكلة في مرة كنت عندهم وكانوا عازمني علي رحلة فين تخيل فين؟؟؟؟؟؟؟؟
نطلع الجبل بالليل ومعانا البنادق ونصطاد غزلان وديابة ومعانا طبعا الكاسيت وطبعا الحاجة الساقعة جو فظيع مش كده
بس لما بيتربسوا بيبقوا مشكلة من الاخر معندهمش مدخلات
والسلام
..............................
الاستاذة ايمي
الفكرة يااستاذة ان المعاهد الازهرية هناك كثيرة بالفعل والازهريين كثر ولكنها موروثات وعلي راي حضرتك بدلا من الالتفات الي مصائب الحكام والفساد تخرج علينا الفتاوي التيك اواي بتاعةالمفتي وشيخ الازهر
الازهر فقد دوره والدائرة الان في حمل الدعوة انتقلت الي الجماعات الاسلامية
يقول تعالي :(وان تتولوا يستبدل قوما غيركم ثم لايكونوا امثالكم)0

اما المخدرات فدي لوحدها قصة تانية الناس هناك غريبة الصراحة
وعلي فكرة الخصخصة مش موضوع ملفوظ علي طول الخط العبرة في مصر في تنفيذه الخاطئ وشبه الفساد والانتفاع من وراءه انما لو حضرتك درستي اقتصاد دول زي المانيا وفرنسا ودول اوربية كثيرة تقوم بالخصخصة ولكن الشبه في الفساد


اما حكاية توفير الخدمات هناك ان شاء الله هكلم المسؤلين وهقلوهم يظبطوا الدنيا
والسلام
................................
استاذ ابو مفراح
فينك يااستاذنا
كلامك تمام القصة هي تحول العادات الي دين بعد ذلك وافراغ الدين من روحه واستبداله باهواء وعادات وتقاليد
والسلام اخي الفاضل

جمعاوى يقول...

الباشا الكبيييييييير


طولت علينا يا مولانا

ايه يا عم التحليل الجامد ده


انت تنفع تشتغل بتاع علم إجتماع

ولى عودة

مشروع انسان يقول...

كنت عايز اعلق على البوست
بس شفت التطورات
خاصة بتاعة النجم الساحلى
ايه الروح الرياضية دى
الاخوة من تونس :)
لالالالالالالالالالالالا
لازم يكون فيه روح رياضية يا جماعة
كلنا لها

ياسر شمس الدين يقول...

عتتريج على الصعايدة يا ولد
ربنا يسامح يا جعفرى
وبعدين ايه شعار النجم الساحلى ده لو فيه عدل فى الدنيا كان زمان النتيجة 4/3 للاهلى لكن عشان المعلم الكبير حضر المباراه النحس جة معاة
وبعدين الزمالك ما هو عمال يتهرس من طوب الارض
طلائع على اسماعيلى على حرس على هلال والنجمه الذهبيه
على فكرة الصعايدة اجدع ناس اتخلقوا على وجة الارض واطيب ناس بس الجهل هو اللى موديهم فى داهية
وتوضيحا لبعض الامور فى البوستات السابقه
انا مش معارض يا يعقوبى لقيام دولة يحكمها الاسلام لكن اللى انا معترض عليه ان احنا نتحكم
زى زمان خليفة وملكيه واشكال الحكم اللى اخدتها الدولة الاسلاميه من زمان
انا عايز يحكمنى اسلام مودرن حديث
وده مش هيكون ولا يحصل الا لما الفكر بتاعنا يتغير عن شكل الدولة ونظم الحكم المناسبة للزمان والمكان يعنى محتاج مننا اننا ندور ونبحث ونجدد فى فكرنا الاسلامى

Unknown يقول...

كويس ياعز ان انت شلت صوره النجم الساحلي انقذت نفسك فعلا بينك وبين ربنا عمار

الفاتح اليعقوبي يقول...

السلام عليكم
جمعاوي
معلش ياصاحبي النت كان فاصل يلا خير
حكاية علم الاجتماع دي جامدة وتضحك هو لو قدر الله وتقابلنا ممكن تعرفني اكثر انا احب الحكايات جدا واستفيد منها واجيد الرغي والكلام فعلي طول بحكي واحكي وبسمع
ومستنيك ياصاحبي
والسلام
...................................
امام الجيل
جامدة التطورات بتاعة النجم الساحلي احنا بنشجع اللعبة الحلوة يااستاذنا مش مهم من تونس ولا من اي حد المهم ان الاهلي يتغلب
ونورتني يااستاذي انا بسعد بزيارتك جدا
والسلام اخي في الله
علي فكرة انا بهزر
.........................
استاذ ياسر شمس الدين
اول حاجة انا مليش دعوة النتيجة كانت المفروض تبقي كام المهم بقت كام وبالنسبة للنحس فهناك حكمة:_ا
(عندما تضيع ثمانين مليون فمن السهل عليك تضييع 11لاعبا)
مستني ايه ياكبير دي بلد بحالها ضاعت مش عايز الاهلي يشيل

الصعايدة فعلا جدعااااان جدااااا بس الجهل اخذ منهم مااخذ وقتل منهم ماقتل واضاع من اعمارهم وتقدمهم ماضاع
بس الامور بدات تتغيير في العشر سنين اللي فاتوا

اما بالنسبة للتعليقات السابقة
هو بس يااستاذي مفيش حاجة اسمها اسلام مودرن واسلام مش مودرن
الاسلام هو الاسلام والدين هو الدين
وانا افهم ماتقصده حضرتك ولكن تعليقي كان علي الالفاظ لانها مهمة


اما ماتقصده يااستاذي فالاسلام دين مرن يتقبل التغييرات ويستوعبها ولكن اذا كانت هذه التغييرات ضد صحيح الدين فلنقل لها وداعا انت لاتلزمينا فنحن نتبع الدين ولا نتبع عصور
اما مسئلة التجديد في الدين فممكن حضرتك تقرا كتاب جدد حياتك للشيخ محمد الغزالي لاني اعتقد ان افراد الحركة الاسلامية عامة بدوا يستوعبوا التغييرات التني تدور حولهم في العالم وبدوا يتعاملوا علي هذا الاساس
والسلام

Coca يقول...

اولا الحمد لله انك بخير
ثانيا
بحب دايما اللي بيتكلم يحكي عن واقع شافه بيعينه
والاجمل انك تحاول تشوف ازاي توجه انظار الناس لواقع يبدو ان جذوره طيبه وفيه خير وفيهم صفات جميله
لكن مشوهه الي حد ما
ربنا يكرمك يا استاذ عز
والسلام

الفاتح اليعقوبي يقول...

السلام عليكم
فعلا انقذت نفسي بس يابني انا شيلتها لاخ تونسي يدخل يلاقي الشكل ده فيحاولوا يجندوني لبلادهم
انما علي فكرة ياجعفري نجم نجم بجد
والسلام
.................................
استاذة كوكا
ربنا يكرم حضرتك واجمل حاجة في الدنيا حكاية القصص سماعها ورؤيتها خاااصة لو كانت واقعية وحقيقية
والسلام

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته
اخي الفاضل
انا ارى ان من الصعب تغيير الحال في الصعيد وذلك لان نسبة المتعلمين ضعيفة جداً في الصعيد وهم نشأوا وتربوا على عادلت وتقاليد من المستحيل ان تتغير الا بمعجزات فانا اتفق مع العصفور انه من الصعب الدعوة في اوساط المغالاة الصوفية والموالد
وجزاكم الله خيراً
ادعوكم لزيارة مدونتي لمعرفة انجازات السيد نظيف

محمد جمعه يقول...

بارك الله فيك اخى الحبيب
مدونة رائعة
واسلوب اروع

---
فعلا اخى كنت فى الاسكندرية وجلست مع واحد من الصعيد وعرفت منه انهم اما كان بيخلص منهم الحشيش
بيجبوه من عند صاحبهم
ظابط المباحث
وهكذا
وتكلم معى عن الكثير والكثير

--
دى اول زيارة ان شاء الله مش هتكون الاخيرة

يسعدنى تشريفك بمدونتى

تحيااااتى

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا