الأحد، 2 سبتمبر، 2007

ياعزيزي لولا الابتلاء ماعرفنا الطريق

الوادضاااااااااااااااااع
بهذه الكلمة نطق في احدي المحاكمات التي تمت في بيتنا
نرجع من الاول معلش فلاش باك
كلنا اكيد فاكرين اللي حصل في انتخابات اتحاد الطلاب السنة اللي فاتت في جامعة القاهرة والدنيا لما اتقلبت وكده فالمهم اخوكم نابوا من الحب جانب واتهبشت وقتها ولله الحمد تحقيق
فالمهم طبعا وقتها ابويا وامي تاكدوا تماما ان ابنهم تبع الاخوان وشغال معاهم وكده
فانا وقتها سجدتهم وقولتلهم دي مفيهاش حاجة والعملية هتعدي علي خير
وبعدها بفترة تتطور الحكاية ويبقي ولله الحمد مجلس تاديب
وانا كفيت علي الخبر ماجور وكل مايكلموني في البيت عن الحوار ده اقولهم لا خلاص التحقيق انتهي وهو فعلا انتهي بس اتصعد ونسيوا
فالمهم مرة ابويا راجع من السفر وكان معاه جرائد يقرا فيها في القطار فوجد ان اخواني المحولين معي في الجرنان وبيتكلم عن الحكاية دي وبيحكي (ربنا يسامح اخوانا بتوع الاعلامية )
فابويا فققس الموضوع
وقرروا وقتها عمل محاكمة عسكرية لاخوكم في الله تتكون من الاتي ذكرهم:-
عضو اليمين ابويا وعضو الشمال امي
والقاضي عمي (لانه في الاساس رجل قانون)وبس
محمووووود تعالي
انا كنت في الاوضه وقتها
ابويا:قولنا يابني علي اللي حصل بالظبط
انا :محصلش حاجة يابابا الموضوع هيخلص وهيعدي ان شاء الله
عمي :احكي يابني براحة ووفهمنا ايه اللي حصل
انا:وابدا في سرد الموضوع حتي النهاية
امي :يابني وبعدين هتعملوا ايه دلوقت مستقبلك هيروح في زفت داهية
انا:مفيش احنا دخلنا مع محامين وان شاء الله هتنفك
ابويا:يابني ايه اللي مشاك مع الناس دي اساسا يابني هتودينا في داهية
انا :يابابا عادي انا بخدم ديني وبدعو الي الله مع الناس دي
عمي :يابني هو لازم تدعو كده ده الرسول عليه الصلاة والسلام ابتدا الدعوة في السر
مقاطعة ودي يااخوانا حجة كثير من الناس الدعوة سرا
الدعوة سرا اساسا كانت ثلاث سنوات فاغلب الناس بينسوا العشرين الباقين وعايزين يعمموا الثلاث سنوات دول
انا:بدخل معاهم في نقاش او بمعني ادق جدال وبحاول اقنعهم بالحسني والحجة ومحدش فيهم معاه حجة ولله الحمد اقوي مني بل حجتهم الاساسية انك يابني هتودي نفسك وتودينا في داهية
ابويا :يابني انت مش عايز تسمع الكلام ليه انت خلاص في داهية لما تخرج برا البيت ده اعمل اللي انت عاوزه انا مش عايز حد يكسر الباب علي امك واختك بالليل
انا عايز اربي اخواتك انت خلاص بقيت زي الشحط تقدر تعيش في الدنيا العيال دي مين هيربيها
انا:يابابا متخفش مفيش حاجة هتحصل ان شاء الله
ثم يبدا عمي في سرد القصص والاساطير عن الناس اللي اتخدوا ومرجعوش تاني واللي اختفوا ثم يبدا في سرد السي في الخاص به ويقولي يابني انا كنت بشتغل زمان ايام عبد الناصر وكنت في مصنع وكان معايا مهندسين اخوان ولما دخلت سنه65اختفوا من وسطتنا واللي سمعنا انه مات واللي مخرجش غير بعدها بقد ايه
انا:وابتدي ارد واقولهم عن سنة الابتلاء التي يجب ان تصيب الدعاة الصادقين
وكيف ان رسولنا عليه الصلاة والسلام عندما حكي ظروف بداية الوحي لورقة بن نوفل فقال له ورقة
ياليتني كنت جذعا فانصرك حين يطردك اهلك ويطاردوك
فقال عليه الصلاة والسلام:او هم طاردي
فقال ورقة
(وكل واحد يحفظ الجملة دي كويس ")
ماجاء احد بما جئت به الا اوذي في قومه
نرجع تاني
ولله الحمد طريق الاقناع وكده فشلوا فيه معايا
ندخل علي الطريق التاني
امي :يابني انت مكسوف تخلع منهم وتسيبهم وتسيب شغلك اللي هما مدينهولك في الجامعة
ابويا :شغل ايه اللي في الجامعة(اصله كل ده كان فاكرني ماشي في مظاهرة فحصل معي اللي حصل)انت بقيت تبعهم خلاص بقيت منهم
مقاطعة لاتامن اي امراة علي سر حتي لوكانت امك
مهما حصل هتقول لابوك وتقوله متقولش حاجة ادامه وسيبه انا هتصرف
بس خلي بالك
برضه هي هتحكيله
نرجع
انا:يابابا وفيها ايه
انا لما كنت بمشي مع بنات محدش فيكم عمل معايا كده
لما كنت بشتم ولساني منيل محدش كلمني كده
لما كنت بشرب سجاير محدش فيكم خد موقف زي ده
ولما اجي امشي مع ناس صالحة ليها فضل علي في التزامي تعملوا معايا كده
ويبدا الشد والجذب والمساومات الي ان ياسوا ولله الحمد فينطق ابي كلمته التي كلما اتذكرها اضحك كثيرا
الواد ضاااااااااع
امي :والله ماضاع ده هيبقي كويس بس هي شوية
ابي وهو ممسك راسه ويهزها:والله ضااااااع وانت السبب انت كنتي عارفة ومقلتيش في
الاول
والمصحف ده والمصحف ده وحط ايده فعلا علي المصحف
هابلغ عليك وخلاص انا مش عايز حد يكسر الباب علي امك واختك بالليل
انا :وبدات فعلا ابكي اني هونت علي والدي وبيقولي الكلام ده رغم اني عارف اني مش هاهون عليه وكده
ونقف لحد هنا
ولي تعليق
ان لم تبتلوا يااخواني فتاكدوا انكم تسيرون خطا والله ماعلمت الطريق الي الله الا عن طريق الابتلاء
يقول رسولنا (صلي الله عليه وسلم):اشد الناس بلائا الانبياء فالصالحين فالامثل فالامثل
واصعب فتنه هتمروا بيها فعلا هي فتنة البيت والاهل والمساومات ونسيانهم كل شئ فعلته من اجلهم ولكن اثبتوا واستعينوا بالله وسيثبت قلوبكم
فيها ايه لما اهلك يعملوا معاك كده
فيها ايه لما تتشد وتتضرب وتتاذي
فيها ايه لما مالك يضيع
الخ
اليست الجنة غالية
اما تعلمون اننا سننسي شقاء دنيانا فيها
انسينا ان الاخرة قريبة وتبدا اخرتك بنهاية حياتك ووقتها ستقتص ممن ظلمك وعذبك وحرض اهلك ضدك
االم الدنيا ام الم الاخرة
ااوجاع الدنيا ام ااوجاع الاخرة
ماذا سنقول لربنا اذا سئلنا عن دينه لماذا لم نمكن له ولماذا لم نعمل له
يامن اذيتومنا وحرضتم اهلنا ضدنا
انتم تعيشون ونحن نعيش
انتم ستموتون ونحن سنموت
ولكن
نرجو من الله مالا ترجون
ونطمع في رحمته اكثر مما تطمعون
الايذاء في سبيل الله له طعم اخر
وتذكروا هذه القصة جيدا التي تؤثر في كثيرا
الاما احمد بن حنبل في فتنة خلق القران ثبت وثبت الله به الدين هي وقفة لله يااخواني
ففي احد المرات راه احد تلامتذته في المنام يلبس اجمل الثياب ويمشي في خيلاء
فقال له يامام لم اراك تلبس هكذا ولاتمشي هكذا في الدنيا ما بك ياامام
فقال الامام احمد له جئت لربي وفقال لي يااحمد لماذا جلدت قلت جلدت فيك يارب
فقال الله له (هكذا يحكي الامام احمد في الرؤيا )فلك الجنة يااحمد ولك المزيد
فقال الامام اهناك مزيد عن الجنة يارب
قال نعم ان تراني يااحمد
فصبرا اخواننا
واثبتوا
ورابطوا في سبيل الله
وكونوا كالجبال الرواسي تاتي رياح الابتلا فتتفرق عنكم ولاتكونوا كالريش تاخذكم وتتلاعب بكم رياح الفتن والابتلاء
والمرة الجاية ان شاء الله هاقولكم ايه اللي حصل مع اهلي وعلاقتي بهم ازاي دلوقت
والسلام
اخوكم اليعقوبي

هناك 17 تعليقًا:

عصفور المدينة يقول...

انا برضه رغم إني خرجت ورجعت قلت اعلق لما ارجع
ثبتك الله وأعانك

أبرار يقول...

السلام عليكم ورحمه الله وبركاتة
أخى بجد شرف ليا دخول مدونتك أول ما قرأت كلمة والد حضرتك وهو بيقول الولد خلاص ضاع فكرتنى بكلمة أمى لما لبست النقاب من وراها قالتلى أنتى ضعتى روحى بقى للناس إللى لعبو فى دماغك
ربنا يرزقنا جميعا الهداية
أختك فى الله
أبرار

طال الليل يقول...

بارك الله فيك
إن شاء الله يكون الواد ضاع من شياطين الإنس للأبد
وتتلقاه يد المعرفة بالله وتحرسه عين الرعاية الربانية
وإذا العناية لاحظتك عيونها نم فالمخاوف كلهن أمان

بارك الله فيك وثبت على الحق قلبك ولسانك

اليعقوبي يقول...

استاذي عصفور المدينة
ربنا يكرمك يااستاذي ثبتنا الله واعاننا جميعا
والسلام

اليعقوبي يقول...

استاذة ابرار
انا من له الشرف بتدوين حضرتك عندي
صدقيني يااختاه من اصعب الفتن التي من المفترض ان نمر بها هي فتنة الاهل
ولكن الحمد لله الذي عافانا وثبتنا بحوله وقوته


احد اخواني في المنطقة والده عرف انه ماشي مع الاخوان وضغط عليه ضغط شديد جدا فمنفعش معاه عمل ايه ابوه تخيلي حضرتك؟؟؟؟؟؟؟؟؟
حلف عليه بالطلاق انه لو مشي مع الناس تبقي والدته طالق وعزل من المنطقة كلها


الناس بتقتل ولادها وهي مش حسة بكده وفاكرين انهم بيحموهم
يارب ثبات علي طريقك
والسلام

اليعقوبي يقول...

اخي في الله طال الليل
كلام حضرتك جميل
فعلا اتمني ان اضيع من شياطين الجن والانس
والله يااخي نعمة الالتزام دي او القرب من الله دي لها طعم تاني خالص انا مش متخيل ازاي اقدر ابعد عن جو الملتزمين لو الواحد اتاخر شوية في فرض او قصر في اي امر من اوامر الله بيكتئب
اتمني من الله ان يغفر تقصيرنا ويستر علينا عيوبنا ولا يفضحنا امام خلائقه في الدنيا او الاخرة

بمناسبة ثبات اللسان والقلب
اذا نقي القلب من الذنوب واثرها فبفضل الله سيثبت
وما اقوالب الالسن الا حصائد لما في القلوب
وجزاك الله خيرا يااخي
والسلام

جمعاوى روش طحن يقول...

الباشا الكبييير

كلامك صحيح 100

%

و خد منى نصيحة يابنى


أى صدام ف بداية الطريق

ح تكون و بلا شك

إنت الخسررران

EmY يقول...

الحمد لله ان المحاكمات دي عدت علي خير و طلعت سلييم
بس هما دلوقتي تقبلوا الامر ولا لسه معترضيين

coca يقول...
أزال المؤلف هذا التعليق.
coca يقول...

coca said...
ربنا يرضي عنا جميعا

اولا:
بس هما اهلكك كانو معترضين علي الاخوان لذات الاخوان ولا زي ما انا فهمت عشان الحكومه مش سايباهم في حالهم ؟

ثانيا:
هل احنا كمصريين بقينا فعلا زي ما جه في فيلم عماره يعقوبيان (الشعب المصري ماسك في ايدين الحكومه كأنها امه اللي ولدته حتي لو الحكومه دي ماشيه علي حل شعرها )
؟

ثالثا
سوال خاص بحضرتك
لو لقيت انك مبقتش مقتنع بمنهج الاخوان
وليقيت ان الموضوع مهواش دعوه في سبيل الله وانها مجرد مبارازات سياسيه
ايه هتكون وجهتك وطريقك اللي هتاخدوا للدعوه بما ان مفيش حزب زي حزب الاخوان المسلمين

والسلام

اليعقوبي يقول...

عمي الكبير جمعاوي
فعلا لازم الواحد يطلع خسران في اول معركة فالحل انك تهدي علي قد ما تقدر
وربنا يكرمك ياصاحبي ويرزقك الاخلاص والتثبيت
والسلام

اليعقوبي يقول...

استاذة ايمي
ربنا يرضي عنا جميعا فهذا ما نسعي اليه
تقبلوا ام لم يتقبلوا ؟؟؟؟
عملوا ايه ؟؟؟
المرة الجاية
والسلام

اليعقوبي يقول...

استاذة كوكا
اسف جدا اني مكنتش واخد بالي من حكاية كوكا وكوكو
اولا
زي ماحضرتك فهمتي
ثانيا
انا مشفتش فيلم عمارة يعقوبيان
الجملة في راي خطا احنا شعب معندوش روح التغيير والسعي ليه القصة مش حكومة القصة في شعب بيتبهدل ومش عايز ياخذ خطوة ايجابية بل هو راضي
واعتبري الحكومة ام غير شرعية ليه
يعني ممكن يغيرها في اي وقت لو هو عايز ولو هو شعب ايجابي ميرضاش بالذل
ثالثا
انا بالفعل شوفت مناهج دعوية كتير قبل الاخوان واقتنعت بالفعل بمنهج الاخوان لان الطبيعي ان اي جماعة او حزب تحمل سلبيات وايجابيات
اما لو ضل الاخوان الطريق وظهر من هو افضل منهم فساتبعه
نحن نبايع الله علي الدعوة ولا نبايع الاخوان
اما هتبع مين دي معرفش هدور ليه لا
والسلام

أميرة محمد محمد محمد يقول...

كالعاده تدوينه رائعه بجد مدونتك من اكتر الحاجات اللي بتضحكني.
ربنا يثبتك علي الطريق وتبقي زي الامام احمد.
بالفعل اي حاجه هتقولها لمامتك هتلاقي بباك عارفها اول مايدخل من باب الشقه كل الامهات كده.
بس ماننساش ان مسئولية تربيتنا مش عليها هي لوحدها واي حاجه هتحصل الام بتبقي اول من يلام في هذا.
اللهم اغفر لكل الاباء والامهات وارحمهم كما ربونا صغار وادخلهم الجنه واعنا يارب علي طاعتهم وبرهم.

اليعقوبي يقول...

استاذة اميرة جزاك الله خيرا
امين يارب ابقي زي الامام احمد
الامهات دول زي العسل بس لما بيعملوا الحركات دي الواحد بيتخنق
اللهم اغفر لي ولوالدي ولمن دخل بيبتي مؤمنا وللمؤمنين والمؤمنات يوم يقوم الحساب
ادعي بها دائما يااختنا عسي ينفعنا الله بها
والسلام

شقاوة شعب يقول...

هذه اول زيارة لمدونتك الرائعة اخ يعقوبى
ربنا يوفقك وينفع بك

ربنا يرزقنا الصبر على البلاء ويثبت قلوبنا على دينه

القوة يقول...

ربنا يثبتك

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا