الأربعاء، 29 أغسطس 2007

البداية وليس النهاية

اولا جزا الله كل الخير من تابعني في غزعبلاتي
فانا لم اكتبها الا لتذكر لحظات جميلة في حياتي لحظات كنت اجاهد نفسي فيها بحق ولكن يبدو ان نسيت فكنت اذكر نفسي بما مضي حتي تهدا نفسي وحتي يعرفني من يدخل مدونتي
ويعرف شخصيتي وحياتي فليس لدي ماخفيه علي احد
وقفنا المرة اللي فاتت فين ايوه عند المعسكر!!!!!!!!!!!!!!!!!!!ا
كانت اول مرة اسافر مع اخواني في مصيف وكنت وقتها دي 0اف(الاخوان اللي هيدخلوا هنا هما بس اللي هيعرفوا الدي0اف)
تعرفوا رحنا فين تخيلوا كده ؟؟؟؟؟؟؟؟
مارينااااااااا
ايوه وكانت اجمل سفرية في حياتي
انا كشخص كان لدي عادات سيئة في كل مصيف اروحه زي اي شاب عادي
فالمرة دي كانت مختلفة
نزلنا ورحنا الشاليه
وكان يومنا منظم جدا وده من الامور التي تعلمتها في هذا المعسكر
يعني من الساعة كذا الي كذا مثلا فطار ومن الساعة كذا الي كذا اذكار المساء او الصباح والصلاة الساعة كذا
فكانت الدنيا منظمة جدا
وكانت بس المشكلة في البحر عايزكم تتخيلوا مارينا واللي فيها
فكنا بننزل البسين هناك بعد عن الناس فكنا كتير ووينهزر والناس بتخاف تهوب نحيتنا
وكان في وقت لمحاضرة وكان في وقت للقران وللعب
يعني كانت رحلة مختلفة بالنسبة لواحد زي انا
مااعتقدش اني بصيت لواحدة في الرحلة دي والصلاة والقيام كانت من اول مرات حياتي اللي اصلي فيها قيام في غير رمضان
ورجعنا ووصلني اني حولت وبقيت بالفعل طالب في تجارة القاهرة
ونويت والنية لله اني مش هاكلم اي بنت في الجامعة دي خالص وكنت بقيت بارتباط قوي باخواني في الحي وشوفت بعض اخوان الجامعة ولكن لم احدثهم
ويدخل رمضان وكانت وقتها انتخابات مجلس الشعب
فاول عشر ايام دول كانوا من اجمل ايام حياتي رحت وقتها مسجد ال رواس والدكتور خالد ابو شادي وكان جو غريب علي اوي وفي المنطقة بنكلم الناس عن الانتخابات بس حصلت حاجة وقفت بعدها وقعدت في البيت بقيت رمضان
حصل لوالدتي حدثة واتجبست 4شهور فقعدت معاها الفترة دي وماروحتش في حته قعدت في البيت والحماس اللي خدني في الاول بدا يهبط انا من نوع البشر اللي شارع عندها زي البحر للسمك فقعدت اربع او ثلاثة مش متذكر اوي
وتيجي اجازة نص السنة وجدتي ام والدي تتوفي
ياااااااااااه ستي اللي كانت معرفش ايه وصحتها عاملة ازي وكانت تتهزلها الدنيا وكانت من الستات الاقوية رحمها الله
وكانت في اخر ايامها كنت اقرب شخص لها ولله الحمد
فقبل ماتدخل المستشفي الساعة واحدة ولا حاجة كنا في عربية عمي وبتنظر حواليها وبصرها زايغ وبتبص لي وكانها تودعني رحمها الله
فافتكرت الاية
فاذا برق البصر*وخسف القمر *وجمع الشمس والقمر *يقول الانسان يومئذ اين المفر*كلا لاوزر *الي ربك يومئذ المستقر
شوفتها بعيني
ورحنالها تاني يوم وجدناها دخلت في غيبوبة وخلاص ساعات وتقترب النهاية وماتت رحمها الله ودفناها
كان في مشكلة بين عمي ووالدي وكانوا شبه مقاطعين بعض وكانت ستي تشتكيلي من الحكاية دي وكانت تدعي ان ربنا ياخذها ويجمعهم مع بعض تاني
واستجاب الله لها،رحمها الله
وبعد ماوالدتي فكت الجبس نزلت الكلية الترم التاني وكنت بدات اجلس في اسرة مع اخواني في الحي فقلت لمسئولي انا عايز اشتغل مااخواني الجامعة اعمل ايه
قال لي روح للاخ اللي عندك في المدرج وقول له عايز اشتغل معاكم
ااااه نسيت نجاح الاخوان في الانتخابات والدنيا اللي اتقلبت بالفوز المفاجئ ده
ورحت لاخويا ده وقابلته فقلت له انا اخوك في الله فلان الفلاني وعايز اشتغل معاكم
فابتسم ابتسامة سمجة وقالي والله طب هات نمرتك وخدت منه نمرته
وطبعا كان فاكرني مخبر مزقوق عليه
وبدات فعلا اشتغل مع اخواني في الجامعة وبدا التغير الحقيقي في حياتي
وكنت متحمس جدا وكان في نفس الوقت بدا معي احد اخواني الذي اصبح فيما بعد من اقرب الناس لي
محمد صاحب مدونة كش ملك http://kishmalik.blogspot.com
ولمن لايعرف علاقتي بمحمد فانا ولله الحمد عمه وان اعطاه الله عمرا وتزوج وانجب ساصبح ايضا عم عياله يعني هبقي عمه وعم عياله
وموقف بعدها عرفت يعني ايه اخوة بجد
الاخ اللي قلت لكم عليه في الاول اللي رحت قلت له انا عايز اشتغل معاكم
كنا في مسيرة كبيرة وكانت الدنيا متوترة قبلها شوية وتحقيقات واستدعائات امن دولة وكلام من اللي بالكم فيه
فكانت مسيرة يوم الغضب الجامعي
وكنا واقفين علي باب وكنا حوالي 20او 25اخ وكان شغلنا ان الباب ده الامن ميقفلهوش
فشوية خدنا بالنا من الظابط بيتكلم في اللاسلكي وبيكلم حد انهم يبعتوا له قوات امن مركزي عشان يبعدونا من علي الباب
فوجدت اخي هذا بيقولي اخلع الجاكت فخلعته ولبسه هو ووقف اول واحد فينا بحيث لو جائوا يشيل الضرب من علي اخوانه رغم انه جسديا نحيف بس لا ازكيه علي واحسب انه يوزن كثير عند الله وبعدها رايت منه مالم اراه من احد في الاخوة والخوف والتضحية من اجل دعوته ومن اجل اخوانه
وفي الفترة دي كنت متوقع اني هيجلي استدعاء وكده فكنت متوتر اوي من الحكاية دي
وتعدي الايام وتفوت السنة ولله الحمد ومحدش من اخوانا البعدا بتوع امن الدعوة يعرف اسمي وهذا من فضل ربي
وحصلت لي محاكمات عسكرية في البيت ؟؟؟؟؟؟
طب ايه اللي حصل فيها نكمل المرة الجاية
والسلام
اخوكم اليعقوبي

هناك 18 تعليقًا:

عصفور المدينة يقول...

متابع
ولي تعليق أن محمد كش ملك هذا شخص رائع وأنا أحبه كثيرا

محمد عبد الرحمن يقول...

ربنا يحفظك أخى
صحيح الفكرة حين يخلص لها بشر وتجد فى قلبه موضعا يتشربها تتغير حياته كلها ويصبح لها معنى وهدف


أكمل أخى بارك الله فيك

Coca يقول...

اعتقد ان النظام مهم اوي اوي ودا عامل اساسي ينقصنا في المجتمع ككل ابتدا من الفرد
في انتظار الباقي
بس كان عندي سؤال
ممكن تقولي الاسباب اللي خلتك عايز تشتغل مع الاخوان ؟
تحياتي

الفاتح اليعقوبي يقول...

استاذي عصفور المدينة
طبعا محمد ده شخص رائع مش انا عمه وعم عياله لازم يبقي رائع


محمد ده ربنا يكرمه قضينا مع بعض ايام جميلة جدا كنا احنا الاتنين في بداية عملنا مع الاخوان والحماس كان واخدنا اوي فكنا اغلب الوقت بنتحرك مع بعض
وجزاك الله خيرا علي المتابعة يااستاذي
والسلام

الفاتح اليعقوبي يقول...

استاذ طال الليل
كلامك جميل وصحيح يااخي ربنا يرزقنا الثبات علي مبادئنا وعلي دعوتنا
وبارك الله فيك يااخي وجزاك الله خيرا
والسلام

الفاتح اليعقوبي يقول...

استاذة كوكو
النظام بالفعل من اهم الاشياء في بناء المجتمعات والحضارات
اما الاسباب التي جعلتني اعمل مع الاخوان
فهي كثيرة
بس انا كنت واخد علي نفسي حاجة اني لازم اعمل لدين الله بوجه عام ولفيت مابين التيارات الاسلامية الاخري التي علي الساحة فهذا الاساس بالنسبة لي
العمل لدين الله والعمل علي دعوة الناس اليه سواء بالامر بالمعروف او النهي عن المنكر

اما لماذا الاخوان فهذا للاتي:0
1-الاخوان هم الجماعة الاكثر تنظيما علي الساحة المصرية ككل
2-الاخوان يرون ان الدين هو الشمولية في كل مناحي الحياة فالاخوان
دعوة سلفية : لأنهم يدعون إلى العودة بالإسلام إلى معينه الصافي من كتاب الله وسنة رسوله.

وطريقة سنية : لأنهم يحملون أنفسهم علي العمل بالسنة المطهرة في كل شيء ، وبخاصة في العقائد والعبادات ما وجدوا إلى ذلك سبيلا .

وحقيقة صوفية : لأنهم يعلمون أن أساس الخير طهارة النفس ، ونقاء القلب ، والمواظبة علي العمل ، و الإعراض عن الخلق ، والحب في الله ، والارتباط علي الخير .

وهيئة سياسية : لأنهم يطالبون بإصلاح الحكم في الداخل وتعديل النظر في صلة الأمة الإسلامية بغيرها من الأمم في الخارج ، وتربية الشعب علي العزة والكرامة والحرص علي قوميته إلي أبعد حد .

وجماعة رياضية : لأنهم يعنون بجسومهم ، ويعلمون أن المؤمن القوي خير من المؤمن الضعيف ، وأن النبي صلي الله عليه وسلم يقول : (إن لبدنك عليك حقاً) و إن تكاليف الإسلام كلها لا يمكن أن تؤدي كاملة صحيحة إلا بالجسم القوي ، فالصلاة والصوم والحج والزكاة لا بد لها من جسم يحتمل أعباء الكسب والعمل والكفاح في طلب الرزق ، ولأنهم تبعاً لذلك يعنون بتشكيلاتهم وفرقهم الرياضية عناية تضارع وربما فاقت كثيراً من الأندية المتخصصة بالرياضة البدنية وحدها .

ورابطة علمية ثقافية : لأن الإسلام يجعل طلب العلم فريضة علي كل مسلم ومسلمة ، ولأن أندية الأخوان هي في الواقع مدارس للتعليم والتثقيف ومعاهد لتربية الجسم والعقل والروح .

وشركة اقتصادية : لأن الإسلام يعني بتدبير المال و كسبه من وجهه وهو الذي يقول نبيه صلي الله عليه وسلم : (نعم المال الصالح للرجل الصالح) ويقول : (من أمسي كالاً من عمل يده أمسي مغفوراً له) ، (إن الله يحب المؤمن المحترف)

وفكرة اجتماعية : لأنهم يعنون بأدواء المجتمع الإسلامي ويحاولون الوصول إلي طرق علاجها وشفاء الأمة منها .

3-الاخوان تاريخهم ملئ بالنضال والكفاح من اجل دين الله عز وجل ومن اعلامهم
الامام البنا رحمه الله والشيخ سيد قطب والقاضي عبد القادر عودة والشيخ التلمساني والشيخ عبد الحميد كشك
اما من خارج مصر فالشيخ احمد
ياسين والدكتور الرنتيسي والمهندس يحي عياش والدكتور عبد الله عزام احد المجاهدين ضد الروس وغيرهم الكثير الذين لم يسعفني تذكرهم
4-رايتهم مترابطين للغاية مع بعضهم البعض بل هم كالبنيان المرصوص ومتكاتفين كوحدة واحدة كما هو الظلم والتيارات الفاسدة وحدة واحدة
5-ابتلائهم الشديد طوال التاريخ من ايام عبد الناصر واللي عمله الي حافظ الاسد عليه من الله مايستحق الي بابا حسني هداه الله
6-التخطيط لدين ودعوة الله بشكل منظم يعني احنا مثلا عارفين احنا هنعمل ايه كمان سنة او كمان 10سنين

مثلا حاجة زي نجاح 88من الاخوان في مجلس الشعب كان غير متوقع بس كان هيحدث باذن الله بس اخوانا قدروا ميعاد حاجة زي دي بعد فترة اكبر شوية
7-اهتمامهم بقضايا الامة جمعاء وليس تلك القومية العقيمة التي يعيشها مناضلوا اليوم
8-الايجابية اعتقد انهم فيهم ناس كثير ايجابين وبيعلموا افراد الصف الايجابية
9-اسلمة المجتمع
يعني مثلا فيها ايه لما نلعب كورة بس تكون مجدد نية لله عز وجل يعني مثلا تقوية الجسد التقرب الي احد اخواني وكده 00
و



واسف علي التطويل
والسلام

Coca يقول...

شاكره جدا علي الرد ولكن اسمحلي بسؤال تاني

انا كنت سمعت من صديقه ليا ان في طالب قدر انه يوصل للستاذ مهدي عاكف وكان في حديثه قال "" احنا لما نوصل للحكم هندي اعدءنا بالجذمه"" اسفه بس هو ا اللي اتقالي
مش عارفه صحه الكلام دا بس ناس كتير عد كدا قالتلي انه جه علي برنامج البيت بيتك ؟!!!

طيب عايزه اعرف كمان بعد اذنك
هل لو الاخوان وصلوا للحكم هيكون الوضع كما هو في السعوديه
تطبيق الدين بطريقه غير صحيحه

وانا عرفت وجه نطر حضرتك في موضوع النقاب ولكن هل ممكن حاجات زي النقاب واللحيه تكون فرض في الدوله
يعني اشياء من هذا القبيل
تحياتي

الفاتح اليعقوبي يقول...

استاذة كوكو
للاسف الشديد الحملة التي تعرض لها الاخوان في الفترة التي تلت الانتخابات كانت صعبة للغاية ومع المرشد علي الاخص
الفكرة يااستاذة
الكلام معاه كان قص ولزق
انا سمعت عن حكاية الجزمة دي لكن معرفش تفاصيلها الصراحة وزي برضه حكاية طظ لمصر
كلمة طظ اتخدت قص ولزق لكن لو حطيتيها في السياق هتقولي انت كمان طظ يعني العملية اغلبها قص ولزق


اما برنامج البيت بيتهم
فده برنامج الصراحة لااحترمه يعني مثلا يقعدوا يهاجموا في الاخوان ويجيبوا اعدائهم يرزعوا في الاخوان واللي خلفوا الاخوان
طب من الاولي انهم يجيبوا حد من الاخوان حتي يصبح هذا الاعلام اعلام محايد
صح ام خطا
عشان كده البشر اللي بتشتم في الاخوان لما بيقعوا في مواجهة مع احد الاخوان علي الدش شكلهم بيبقي وحش اوي لانهم غير منطقيين ومتحاملين زيادة عن اللزوم
ده اعلام النظام الحاكم فمش من المطلوب منه انه يجيب اي شئ كويس عن الاخوان

فهذه البرامج في راي ليست حجة علي الاخوان
وحضرتك في الاول والاخر لسنا ملائكة ولسنا مثل الصحابة ولكننا نسعي الي ان نجدد من انفسنا ونصلح اخطانا
وجماعة بكل تاكيد تحمل عيوب وقابلة للنقد مثلها مثل اي تيار ولكن صدقا هم بالفعل الافضل علي الساحة وده اللي انا شوفته والله اعلي واعلم



السعودية اختي الفاضلة لاتطبق الشرع هي فقط تطبق الحدود كحد السرقة والقتل والزنا 000الخ
والدين ليس تطبيق حدود فقط الدين امر اوسع من هذا وتطبيق الحدود امر واجب تطبيقه
يقول رسول الله (صلي الله عليه وسلم):لان يطبق حد من حدود الله في امتي خير من تمطر السماء سبعين عاما0
او كما قال عليه الصلاة والسلام
بس انا قبل ماتطبق مثلا حد السرقة لازم اولا اكون اكلت الناس وشربتها ولقيت للشباب وظائف وبعدين لو حد سرق اتطبق الحد
انما ميكونش الناس جعانة والفقر واكلها وبتموت من الجوع وناس تانية بتموت من كتر الاكل وبعدين اتطبق الحد طب ازاي ده المفروض ان انا اللي يتطبق عليا الحد

انا هضرب لحضرتك مثال عن ناس تربوا تحت يد الاخوان
حزب التنمية والعدالة النركي
مسك تركيا وهي خلاص كانت علي وشك انهيار اقتصادي صعب للغاية وفعلوا تنمية واسعة في البلاد ولهم انجازتهم وبدوا يعيدوا لتركيا بعض ثوابت الدين
يعني مثلا قريبا هيتعدل الدستور هناك من ضمن بنود التعديل السماح للنساء بارتداء الحجاب في العمل والدراسة وده كان ممنوع
حماس
وحضرتك متتسرعيش في الحكم
حماس هي في الاصل اخوان فلسطين ولهم تاريخ جهادي في سبيل الله لاينكره الا اعمي
مسكوا الحكومة في بلادهم ايه اللي حصل
حصار اقتصادي من الخارج ومساندة بعض الخونة للحصار من الداخل
القبض علي الوزراء ونواب المجلس التشريعي 000الخ
حتي في الاخر القصة بتاعت غزة بدات فتح في افترائتها وفضحهم الله علي مرئا ومسمع من العالم كله
وحزب النتمية والعدالة في المغرب والتطور والتفاف الناس حوله
وفي مصر صناع الحياة استاذ عمرو خالد وهو معروف انه كان احد الاخوان وفكرة التنمية بالايمان وهكذا يااستاذة
وفي امثلة اكثر بس الوقت


انا قصدي ايه الاخوان لهم وجهة نظر معينة في ان الدين هو التطور والتقدم والرقي والجهاد في سبيل الله لاسترجاع كرامة وعزة امه محمد (صلي الله عليه وسلم)


حضرتك بتقولي انك عرفتي راي عن النقاب واللحية
النقاش اللي حصل في مدونة حرتك انت والاستاذة ايمي
انا كنت عايز اوضح ان النقاب واللحية امور موجودة بالفعل في الدين وبعض العلماء يروها واجبة بس انا راي ايه انا مقولتش راي
ومسئلة فرض الدين علي الناس ده شئ خاطئ
الناس لو حبت دينها ستفرضه علي نفسها اسف
الناس لو فهمت دينها هي اللي هتفرضه علي نفسها
بس
بفهم مين انا ولا انت ولا هو؟؟؟؟؟؟؟
لالالا
بفهم الصحابة والسلف الصالح من التابعين والعلماء وقبل كل هؤلاء

بفهم رسولنا عليه من الله افضل الصلاة والتسليم
والسلام اختي الفاضلة

Coca يقول...

شاكره علي الرد جدا

أميرة محمد محمد محمد يقول...

الاستاذ اليعقوبي اولا كلامك مش خزعبلات انا قلتلك ان ناس كتير جدا بتتاثر بالاسلوب ده اكتر من اي شئ تاني .مارينا مره واحده بصراحه لااحب ان اي حد ملتزم يروح هناك لان ده مكان فتن ولا اظن انه لو جاءك الموت هتحب انه يكون في مكان زي ده الساحل الشمالي كبير ومليان مناطق محترمه وماتنساش انكم كنتم هناك للترفيه فقط يعني لوكنتم هناك للدعوه في سبيل الله كنت هقول ماشى.لما تروح مكان زى ده كله غلط وانت عارف انك مش هتقدر حتي تحاول تغيره لانه مجتمع مختلف تماما فيبقي من الافضل انك متروحش وماتنساش قصة قاتل المائه لما الرجل الصالح نصحه بمغادرة القريه الفاسده علشان مايتاثرش بيهم .افتكر مهما كنت ملتزم فالفتنه مش بعيده عليك فاتقي مواضع الشبهات.واذكر نفسي بذلك قبلك.ولاتنسي خلق الانسان ضعيفا.ربنا ينصرنا واياك علي انفسنا.ردك عليcocaينفع يبقي بحث.ربنا يزيدك

جمعاوى يقول...

الباشا الكبييير

الحمد لله إن أول واحد أعلق على موضوع

الدى ....فى

و أكيد يا معلم

كان فيه

ر.ط

و لا ايه ؟

و كمان

ع .ع

أى خدمة يا باشا

يا إختصاراتك يا يعقوبى


متابع المحاكمة العسكررية

الفاتح اليعقوبي يقول...

استاذة اميرة محمد محمد محمد
جزاك الله يااختنا الكريمة علي النصح فالمؤمنون والمؤمنات بعضهم اولياء بعض يامرون بالمعروف وينهون عن المنكر

الرحلة دي يااستاذتنا كانت قبل الدراسة بفترة قليلة جدا
و
وكانت في شاليه مقفول علينا وكنا شبه منعزلين عن القرية والغريب في الوقت اني اول مرة اسافر مصيف واغض بصري كانت في المكان ده ويمكن دلوقتي ماروحاش بس الفكرة اننا كنا كتير في الوقت ده فلو واحد عينه زاغت كان الباقي بيفكره والقرية ولله الحمد كانت فاضية في الوقت ده
وعلي العموم جزاك الله خيرا يااستاذة
ويارب ثبتنا علي طريقك
والسلام

الفاتح اليعقوبي يقول...

عمي جمعاوي باشا
سباق دايما ياباشا انت عارف احلي حاجة في اخوانك انهم اختصروا الحاجات عشان احنا منحرش في داهية تخيل لو بنقول الكلام ده امام الناس يبقي رحنا في داهية
ربنا يكرمك يامعلم
والمحاكمات العسكرية دي فعلا مش الهايكستب ولكن في بيوت كثير منا
والسلام

Unknown يقول...

حلو اوي الموضوع و بجد عايزاك تكمله علشان اعرف كل الحكايه
اسلوبك جميل و سهل و مشوق
تفتكر ان المسيرات و المظاهرات ممكن تغير حاجه
و معلش عندي سؤال
حضرتك مطلق اللحيه ولا بتهذبها
اسفه للفضول

Unknown يقول...

انا موافقه علي كلامك بس في البيت و مش هاتلم و اخد علي قفايا
الواحد يعيش بكرامته احسن و كمان انا شايفه ان الاحتجاج دلوقتي مش بيغير حاجه
مستنيه باقي الحكايه

الفاتح اليعقوبي يقول...

استاذة ايمي
انا عايز اوصل لحضرتك حاجة او ارد علي حضرتك في كلامك بس اقولك استني البوست الجاي فيه رد لحضرتك علي كلامك
وثبتك الله ورزقك الاخلاص يااختنا الكريمة
والسلام

Future_Preacher يقول...

السلام عليكم و رحمة الله و بركاته
اخي اليعقوبي
انا اكيد حظي وحش لكن ملحوقة
لأني مش متابعة سلسلة حياة حضرتك من البداية
أعذرني كنت مشغولة فعلا
لكن اللي قرأته بيدل علي شخصية حضرتك اللي احسبها علي خير و لا ازكي احد علي الله
انا رايحة اقرا اللي فاتني
و مستنية اللي جاي ان شاء الله
سلام عليكم

الفاتح اليعقوبي يقول...

استاذة فيوتشر
اسال الله ان يغفر لنا جميعا
واللهم اجعلني افضل مما يظنون واستر عنهم مالا يعلمون
والسلام

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا