الأحد، 1 نوفمبر، 2009

من أجله هو


(بنينا كباري من أجلك أنت ومدارس من أجلك أنت ومصانع من أجلك أنت ومستشفيات وبرضه من أجلك أنت)

الصراحة أنا أنشكحت انشكاحة مش عارف أقول لكم عاملة أزاي بعد الاعلان ده

حسيت بعد الاعلان ده كأني برفرف فوق السحاب وحسيت قد إيه بابا تعب عشاني قوي وقد إيه أنجازته دي بترمي ليا في النهاية وشعرت بحالة حب شديدة لوالدي لانه عمل ده كله عشاني

وأنتم المشكلة متعرفوش أد إيه بابا بيحبني ده حتي في مرة قلت له له يابابا العربية اللي بتوصلني المدرسة بتوصلني متأخرة فقال لي خلاص ياحبيبي نبني لك كوبري من مدينة نصر لحد الدقي عشان متتأخرش علي المدرسة تاني وقال لي ياحبيبي وده عشانك أنت

أنتم مستغربين مستغربين ليه ده حتي أنا في مرة رحت لبابا وكان معايا واحد صاحبي اسمه عز فقلت له يابابا عز صاحبي كنت ماشي أنا وهو في الاسكندرية مع بعض فشاف يابابي مصنع جميل أوي عند الدخيلة فقال لي المصنع ده جميل أوي فقلت له ميغلاش عليك ياعز ده أساسا بتاع بابا لان البلد بتاعة بابا فقال بجد فقلت له يلا بينا علي بابي وهو هايكتب المصنع باسمك دلوقتي ،فقلت لبابي تقدر تكتبوا باسمه يابابي فقال ياحبيبي طبعا ده كفاية انه صاحبك ومن يوميها والمصنع بقي بتاع عز

شوفتم بابي بيحبني أد إيه

وفي مرة كنت خدت شوية صحاب ليا في البيت عشان بنذاكر مع بعض فدخل علينا بابي وقلنا شدوا حيلكم ياحبابيي لو نجحتوا وخلصتوا جامعة ليكم عليا أشكلكم وزارة حلواني عشانكم بس عشان أنتم صحاب حبيبي فقلت له بجد يابابي قال لي بجد ياحبيبي ده كفاية أنهم صحابك وقلت له يابابا طب وأنا ،قال لي أنت هاتخد الكرسي ياحبيبي فقلت له بجد يابابا قال لي بجد ياعيون بابا يلا بوسة كبيرة أوي لبابا قلت له بوسة بس يابابا ده بوسة وحضن لاحلي بابا في الدنيا

وبوست بابا وحضنته لانه وعدني بالكرسي

ومش قادر أوصف لكم قد إيه صحابي كانوا فرحانين بوعد بابا ليهم لدرجة أنهم كانوا عمالين يقولوا الحمد لله علي نعمة أننا صحاب حبيب بابا الحمد لله علي نعمة أننا صحاب حبيب بابا

وكنت قاعد في يوم بتفرج علي التليفزيون فلقيت ناس وجعت دماغي أوي عمالين يقولوا بلاش ظلم وبلاش فساد وبلاش سرقة ونهب في البلد وعمالين يقولوا عايزين حريتنا في بلدنا فوقتها أنا خفت منهم أوي وخفت لياخدوا مني الكرسي وعيطت جامد فبابا قال لي مالك ياعيوني فقلت له أنا خايف يابابا أحسن الناس دي تاخد الكرسي بتاعي اللي أنت هاتسيبوا ليا والعياط زاد وزنهرت فبابا قال لي ياسلام ياحبيبي ده أنا احبسهملك ولادال...وأسجنهم عشان خاطر حبيب بابا ،وفعلا بعدها بابا بقي يحبس أي حد بيقول الكلام اللي بيتعبني ده

ياحبيبي يابابا

وفي الاخر زي ماأنتم شفتوا بابا عملي إعلان في التليفزيون وعمال يقول لي من أجلك أنت من أجلك أنت والناس مش فاهمة الاعلان قصده إيه لكن أنا الوحيد اللي فاهم قصده إيه وفرحت أوي بالاعلان لان كل حاجة هاتبقي ليا في الاخر أنا شوفت بابا بيضحك من ورا الشاشة لما أنا ضحكت ياتري شوفتوه أنتوا كمان.......

مع تحياتي


حبيب بابا

والسلام

هناك 14 تعليقًا:

مجداوية يقول...

السلام عليكم
آااااااااااه وأنا أقول هم قصدهم ايه

:)

يبقى اسمه كده بقى

أنت مبارك

:)

أنت مبارك مفجر ثورة التطوير

:)

فعلا شر البلية ما يضحك

على عبدالله يقول...

السلام عليكم

ردا على الاخت مجداوية

لا
لا
لا
انت جمال مفجر ثورة التطوير

هق هق هق

الفاروقة يقول...

شر البلية مايضحك

جزيت خيرا أخي الكريم لتوضيحك لنا الإعلان

محمد خيري يقول...

ودينا بقى ورا الشمس بكلامك ده يا عمنا يعني هتفضل كده على طول تضرب فيهم في الجامعة وبره الجامعة كمان

بالراحة شويه خلي بابا ينام شويه مش عارف ينام منك .. بتخليه يصحى على كابوس وينام على نفس الكابوس .. بالراحة شويه يا عم عز

الكلام ده من أجلك انت

shaimaa samir يقول...

تحليل منطقى!!
:)

اخوانية وأقتخر يقول...

هههههههههه هو فعلا وكأن مبارك بيقول لجمال
من أجلك أنت
أكرمكم الله اخانا فلقد حفرت البسمة فى صخرة المأساه

مجداوية يقول...

السلام عليكم

الأخ الكريم علي عبد الله
كده يبقى موصلتكش النكتة بتاعتي

أنا قصدي أن اسمه أنت بدل جمال فبقى اسمه أنت مبارك بدل جمال مبارك

بايخة ؟

:)

الفاتح اليعقوبي يقول...

السلام عليكم
الاستاذة مجداوية
ربنا يكرمك يااستاذة
هو فعلا مفجر وياخوفي ليضيعنا معاه في وسط التفجير

والمدونة مدونة حضرتك اتفضلي ردي في أي وقت
والسلام

الفاتح اليعقوبي يقول...

الاستاذ علي عبد الله
ماخلاص يااستاذي الاستاذة مجداوية وضحت هي قصدها مين وبعدين جمال إيه ومبارك إيه
وعامة لعله خير
والسلام

الفاتح اليعقوبي يقول...

الاستاذة الفاروقة
أهم شئ أنه يكون المعني وضح
والسلام

الفاتح اليعقوبي يقول...

عمي في الله محمد بيه خيري
والله أنت شكلك اللي هاتودينا في داهية
وبعدين مش كلامي ده اللي مش هايخليه ينام ولا يصحي ده كفاية الظلم اللي بيظلمه ده كفاية أطفال غزة بس يطلعوا له في المنام عشن يأروقوا راحته
وعامة نورتنا ياعمي وعايز نشوفك لايف ياعمنا حدد وجدد وشوف ممكن نتقابل أمتي
وسلامنا لليوم ورجالة الفيوم

والسلام

الفاتح اليعقوبي يقول...

الاستاذة شيماء سمير
انا بقول كده برضه
والسلام

الفاتح اليعقوبي يقول...

الاستاذة أخوانية
أكرمك الله يااستاذة
وهو طبعا كان قصده جما أمال كان قصده مين عشان يورث براحته
ولعله خير
والسلام

طال الليل يقول...

فهمت كلامك يا سيدي فهمت
ولا عجب أن أهيما

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا