هو فيه إيه؟؟؟

كل عام وأنتم بخير وبصحة وعافية وتقبل الله منكم والعام القادم إن شاء الله تكونوا بخير حال
علي طريقة فيلم محمد فؤاد هو فيه إيه ؟؟
كنت قد قمت بتحميل مذكرات اعتماد خورشيد من علي النت بغرض القراءة وبعد كلامها المخيف ده الواحد ذهبت رأسه بعيدا ولا اعلم هل ستأتي أم لا
لما تخرج علينا اعتماد خورشيد وتقول أن صلاح نصر كان بيجهز للعمل مع الامريكان فهذه مصيبة غير متخيلة إطلاقا ،هل انتم متصورين أن رئيس المخابرات المصرية المصرية كان يعمل لحساب أمريكا
طب بلاش دي
مذكرات علوي حافظ والتي ذكر فيها كيف أن السفارة الامريكية كانت تساند الثورة وكيف أن عبدالناصر كان يجلس هو وعلوي حافظ ومندوب من السفارة في فيلا في الهرم ليجهزوا للثورة!!!!!!!!!
رغم أن عبدالناصر كان يتشدق مثلا بمحاربة أمريكا والحد من نفوذها
طب بلاش دي
يقال أن الوحدة بين مصر وسوريا خرجت من دماغ أحدهم أثناء جلسة كيف في سوريا فطلبت معاه أنه يحصل اتحاد مابين مصر وسوريا
وتم الاتحاد !!!!!!!!!!!!!!
طب بلاش ده ولا ده ولا ده
في قضية صلاح نصر صوت الشريف كان شغال إيه في المخابرات وقتها؟؟؟؟؟؟
وهو دلوقتي ماسك إيه ؟؟؟؟؟؟؟؟؟؟؟
وإيه دوره في البلد زي ماانتم عارفين ؟؟؟؟؟؟؟؟؟؟
طب بلاش ده
طيب المشكلة مابين هيكل ومصطفي أمين وصلت لدرجة إيه ؟؟؟؟

طب إيه اللي بيحصل في بلدنا دلوقتي شيخ الازهرلما طلع ومنع النقاب في المدارس
طب ليه لم يمنع مثلا الكباريهات و محلات الخمور وطلع وحارب الدعارة المرخصة باسم السياحة !!!!!!!!!!!!!!!!!!!!!!!!!!!!!!
هل هذا منطقي

طيب بلاش ده
اللي بيعتقلوا في الشرفاء في البلد من أي انتماء وبيقطعوا أرزقهم (وهم أضعف من ذلك ولا يمكلوا لانفسهم شيئا وأنا اعلم هذا)هما شغالين لحساب مين بالضبط هما عارفين ولا مكبرين دماغهم هما عارفين عقوبة الظلم ومعاونة الظالمين إيه ولا ناسين ولا إيه الحكاية معاهم بالظبط

طيب بلاش ده
مثلا مهاجمة التيار السلفي في بعض الاوقات للاخوان وللتيارات الاسلامية الاخري يعني أحنا خلاص قضينا علي العلمانية والفساد والسرقة والنهب وفضينا لبعض ،مثلا كثير من شيوخ السلفية يتحدثوا عن محاربة البدعة يعني توريث الحكم مش بدعة واعتقال الدعاة مش بدعة ولما الشيخ نفسه يطلع علي التليفزيون ويشرح آية في القرأن للناس ولا يكملها للنهاية لان اخرها يتحدث عن الجهاد في سبيل الله مش بدعة

وغيره وغيره وغيره
الواحد دماغه هاتنفجر من كثرة التفكير عامة لعله خير والاستعصام بكتاب الله وبصحيح سنة نبيه صلي الله عليه وسلم هو السبيل للخروج من هذه الدوامة لان لكل هذا إجابات في كتاب ربنا وفي سنة نبينا عليه الصلاة وأتم التسليم
(فتن كقطع الليل المظلم يصبح المرء فيها مؤمنا ويمسي كافر ويمسي مؤمنا ويصبح كافرا يصبح الحليم فيها حيرانا)
وكل عام وأنتم بخير

والسلام
اليعقوبي

الحمد لله الدكتور جمال عبدالسلام خرج بفضل الله البارحة بعد منتصف الليل

وأسأل الله أن يتقبل منه وأن يأجره وأهله جميعا وأن يخرج جميع أخواننا المعتقلين

وألف مبروك ياعمر وتوكل علي الله يامعلم

ولكن فقط لي تعقيب

بعد كل هذه الايام التي يقضيها أخواننا في السجن ظلما وزورا وبهتاناً

هل لانت عزيمتهم ؟؟

هل تراجعوا عما يؤمنوا به ؟؟؟

هل عزموا علي عدم العودة والنكوث علي أدبارهم؟؟

إجابات كل هذه الاسئلة هي لا طبعا بل ظلوا صامدين كالجبال الرواسي محتسبين الاجر عند الله معتبرين هذه الايام مهراً لجنان عرضها السماوات والارض

ومشكلة الذين يعتقلون أخواننا أنهم لايرون إلا أسفل منهم ولكن لو نظروا أمامهم لعلموا أن النهاية ستكون في ملاقة الله فيوفيهم أجورهم دون أن يترك شيئا

أبشركم يارجال أمن الدولة ومن خلفكم بدعوة زوجة تبكي ليلا علي زوجها المظلوم

أبشركم بدعوة طفلة أحست بطعم اليتم وأباها علي قيد الحياة ولكنه خلف القضبان يدفع ضريبة نصرة بلاده وضريبة الاصلاح

أبشركم بدعاء الصالحين عليكم عندما حولتم بينهم وبين أستاذتهم ومربيهم

أبشركم بعقاب الله لكم بسبب لاأقول تعطيلكم الدعوة ولا إيذاء المسلمين ولكن علي ظلمكم أنفسكم وظلمكم لغيركم

أعدوا أنفسكم للسؤال عند الله عندما يسألكم عن سبب أعتقالكم للدعاة والمصلحين من عباده

أعرف وقتها ماذا ستقولون ،ستقولون كنا نطيع الاوامر يارب

ستقولون يارب إنا أطعنا سادتنا وكبرائنا

فيذكركم الله بآياته :(يوم تقلب وجوههم في النار يقولون ياليتنا أطعنا الله وأطعنا الرسول *وقالوا ربنا إنا أطعنا سادتنا وكبرائنا فأضلونا السبيل ربنا وأتهم ضعفين من العذاب ولعنهم لعناً كبيرا)

بعد كل ماتفعلون أؤكد لكم يقينا لاشك ولاريب فيه أن الغلبة ستكون لنا بموعود الله لعباده المؤمنين(والعاقبة للمتقين) فلستم بقوة فرعون ولا هامان وإن أعتقدتم أن هذا ماضي فلكم في من سبقكم عبرة لكم في عبدالناصر عبرة ولكم في الملك عبرة تسبب في قتل الامام الشهيد باذن الله حسن البنا وبعدها مات في نادي قمار في أحضان عشيقته ونعوذ بالله من الخذلان

وفي النهاية هذا مات وهذا مات ولكن شتان بين الميتتين أي نعم قد تتعدد الاسباب ولكن الموت ليس بواحد فمن مات واهبا حياته لدينه ودعوته وبلاده خير أم من أفني عمره في إعانة الظالمين علي أهل بلاده وعاث في الارض بطشا وجبروتا

وفي النهاية بعد كل مافعلتموه أري أنكم ستكون سلما لنا لنعبر به إلي الجنة وإن كان في قلوبكم ذرة ندم فارجعوا وقولوا لا ليس لنا بل لله ولله وحده فهو محاسبكم ورادكم ليوم لا شك فيه

وأترككم مع شعر لاخي خبيب وهذا منقول من مدونته

1*
اسرقْ .. ولا تشبعْ
اسرقْ .. فإن المالَ – يا مولايَ – لا ينفعْ !
متى مدَّ الدواءُ العمرْ ؟
أيبتاعُ الحزينُ النومَ إنْ قضوا له مضجعْ ؟
إذن .. فاسرقْ
مِن القاصي ، مِن الداني ... مِن المُدقِعْ !
ولا تمضُغْ
فإن المضغَ للأوقات مضيعةٌ !
بل ابلعْ كل ما تَلْقَى مباشرةً ..
إلى "كِرشكْ"
مساحةُ بطنِ مولانا .. "ولا أوسعْ" !
إذا كانت قد ابْتَلَعَتْ بلادي كلَّها أصلاً ..
فإن كانت تريدْ نقودَ إخواني كـ"تحليةٍ" !
فما يمنعْ ؟
أتخشى ربنا ؟
عفواً
أتعبدهُ ؟!
- وأعني اللهَ لا الكرسيّْ - ؟
إذن .. ما شئتَ فلتصنعْ !
وسَبِّحْ حمدَ كُرسيِّكْ ..
وسَلْهُ بأن يُخَلِدَكَ ..
فإن إلهَكَ المَزعومَ – يا فِرعونُ – لا يسمعْ !
*2*
تبرعْ ..
بالإخوانِ قاطبةً ..
كقربانٍ لآلهتكْ :
لأمريكا ، لإسرائيل ، للكرسيِّ
هيا اسجُدْ ، وهيا اركعْ
تبتَّل تحت قدميها
وإن أمرَتْكَ أن تجني لها شعباً ..
لكي تُبقيكَ معبوداً ..
أَطِعْ .. واسمعْ !
وإن أَمَرَتْ بمد الغازِ ، حربِ الدِينِ ، قَمعِ الناسِ
أو حتى بِقَتْلِهمو
لأجل سلامةِ الكرسيّْ
أطعْ .. واسمعْ !
*3*
ولا تأبَهْ ..
لتَعليمٍ ، لأمراضٍ ، لحُرياتِ أقوامٍ ؛
فهذا .. ليس مِن شَأنِك !
فتَعريفُ الرئاسة عندكم :
"نشاطٌ زائدٌ مُمْتِعْ ..
ويعني : الأكلَ ، ثم اللعبَ ، ثم الصيدَ – صيدَ الناسِ – ثم وُرودَكَ المَهْجَعْ " !
وتِكرارٌ لِذَلِكَ كل يومٍ ..
فإن تسأمْ ..
فأعطِ العرشَ للـ"نَّنَُوسِ" يستمتعْ !
*4*
أَقِمْ للحقِ مِشْنَقَةً ..
فإنَّ الحقَّ .. اسمُ اللهِ
إن اللهَ لا يُصرعْ !
أقِمْ للنور .. مِطفَأةً !
وحاولْ قدرَ طُغيانِك ..
فأنت تظنَُ – يا مسكينُ – أنَّ لِبِضْعِ غَيْماتٍ ..
فإن الشمسَ لن تسطعْ ؟
تظن بأن سنواتٍ ..
وراء السجنِ قد تردعْ ؟
عَجِبْتُ لِمَنْ يظنُ الجذرّ بعضُ الريحِ تقلَعُهُ !
ويبْكي .. حين لا يُقْلَعْ !
تظنُ بأن أموالاً تؤرِقُهُم ؟
وَهِمْتَ .. فعبدُ المالِ قد يجزعْ !
وعبدُ اللهِ .. لا يجزعْ
عَجِبْتُ لجهلكَ المُفْجِعْ ..
أما تدري بوعدِ الله أن الأرضَ لن تخضعْ ..
لغيرِ الصالحين ومنْ ..
لِغيرِ اللهِ لا يخشعْ ؟
*5*
سأُنهي ما أقولُ هنا ..
أساساً أنتَ لن تفهمْ !
كما أني ..
أخافُ مرارتي "تُفقعْ" !

كلمات رائعة معبرة عن ما يجول بخواطرهم جزا الله صاحبها خيرالجزاء

والسلام

اليعقوبي

من أجله هو

(بنينا كباري من أجلك أنت ومدارس من أجلك أنت ومصانع من أجلك أنت ومستشفيات وبرضه من أجلك أنت)

الصراحة أنا أنشكحت انشكاحة مش عارف أقول لكم عاملة أزاي بعد الاعلان ده

حسيت بعد الاعلان ده كأني برفرف فوق السحاب وحسيت قد إيه بابا تعب عشاني قوي وقد إيه أنجازته دي بترمي ليا في النهاية وشعرت بحالة حب شديدة لوالدي لانه عمل ده كله عشاني

وأنتم المشكلة متعرفوش أد إيه بابا بيحبني ده حتي في مرة قلت له له يابابا العربية اللي بتوصلني المدرسة بتوصلني متأخرة فقال لي خلاص ياحبيبي نبني لك كوبري من مدينة نصر لحد الدقي عشان متتأخرش علي المدرسة تاني وقال لي ياحبيبي وده عشانك أنت

أنتم مستغربين مستغربين ليه ده حتي أنا في مرة رحت لبابا وكان معايا واحد صاحبي اسمه عز فقلت له يابابا عز صاحبي كنت ماشي أنا وهو في الاسكندرية مع بعض فشاف يابابي مصنع جميل أوي عند الدخيلة فقال لي المصنع ده جميل أوي فقلت له ميغلاش عليك ياعز ده أساسا بتاع بابا لان البلد بتاعة بابا فقال بجد فقلت له يلا بينا علي بابي وهو هايكتب المصنع باسمك دلوقتي ،فقلت لبابي تقدر تكتبوا باسمه يابابي فقال ياحبيبي طبعا ده كفاية انه صاحبك ومن يوميها والمصنع بقي بتاع عز

شوفتم بابي بيحبني أد إيه

وفي مرة كنت خدت شوية صحاب ليا في البيت عشان بنذاكر مع بعض فدخل علينا بابي وقلنا شدوا حيلكم ياحبابيي لو نجحتوا وخلصتوا جامعة ليكم عليا أشكلكم وزارة حلواني عشانكم بس عشان أنتم صحاب حبيبي فقلت له بجد يابابي قال لي بجد ياحبيبي ده كفاية أنهم صحابك وقلت له يابابا طب وأنا ،قال لي أنت هاتخد الكرسي ياحبيبي فقلت له بجد يابابا قال لي بجد ياعيون بابا يلا بوسة كبيرة أوي لبابا قلت له بوسة بس يابابا ده بوسة وحضن لاحلي بابا في الدنيا

وبوست بابا وحضنته لانه وعدني بالكرسي

ومش قادر أوصف لكم قد إيه صحابي كانوا فرحانين بوعد بابا ليهم لدرجة أنهم كانوا عمالين يقولوا الحمد لله علي نعمة أننا صحاب حبيب بابا الحمد لله علي نعمة أننا صحاب حبيب بابا

وكنت قاعد في يوم بتفرج علي التليفزيون فلقيت ناس وجعت دماغي أوي عمالين يقولوا بلاش ظلم وبلاش فساد وبلاش سرقة ونهب في البلد وعمالين يقولوا عايزين حريتنا في بلدنا فوقتها أنا خفت منهم أوي وخفت لياخدوا مني الكرسي وعيطت جامد فبابا قال لي مالك ياعيوني فقلت له أنا خايف يابابا أحسن الناس دي تاخد الكرسي بتاعي اللي أنت هاتسيبوا ليا والعياط زاد وزنهرت فبابا قال لي ياسلام ياحبيبي ده أنا احبسهملك ولادال...وأسجنهم عشان خاطر حبيب بابا ،وفعلا بعدها بابا بقي يحبس أي حد بيقول الكلام اللي بيتعبني ده

ياحبيبي يابابا

وفي الاخر زي ماأنتم شفتوا بابا عملي إعلان في التليفزيون وعمال يقول لي من أجلك أنت من أجلك أنت والناس مش فاهمة الاعلان قصده إيه لكن أنا الوحيد اللي فاهم قصده إيه وفرحت أوي بالاعلان لان كل حاجة هاتبقي ليا في الاخر أنا شوفت بابا بيضحك من ورا الشاشة لما أنا ضحكت ياتري شوفتوه أنتوا كمان.......

مع تحياتي

حبيب بابا

والسلام