الخميس، 5 مارس 2009

خواطر

أوحشتموني كثيرا بعد كل هذه الفترة وكم اشتقت حقا إلي جو التدوين وتعليقاتكم وتدويناتكم التي كنت استفيد منها عايز افضفض شوية فاستحملوني الشوية دول

.................................................

اعتقال البشير

نزلت اجازة من فترة وبشوف الاخبار لقيت ان في مذكرة اعتقال طالعة في حق البشير رئيس السودان وسبحان الله أهي دايرة وبتلف وياريت اصحاب الالباب يفقهوا مايحدث حتي لاياتي الدور عليهم ووقتها نراهم تحولوا الي زعماء وطنين واصحاب حناجر جهورية ويملئون الدنيا صياحا وهتافا عن الجهاد والنضال وياجبل مايهزك ريح وياجبل مايهزك شبشب وكله هجس في هجس والواحد ميعرفش الروليت هتلف علي مين المرة الجاية واعتقد انها والله اعلم ممكن تلف علي صاحبنا اياه ربنا يصلح حاله فواحد يطلع يقولي طب ازاي صاحبنا ده حبيبهم وراجلهم في المنطقة وميتقلعش من الرجل الصراحة فاي التهم سيتهم بها

اقول انهم هايتلككوا علي اي حاجة يعني ممكن يجبوه في محكمة العدل عشان بيقتل في المنايفة مثلا عشان يبقي هو الوحيد الباقي من ذلك الجنس (المنوفي) النادر الوجود

واللي هايبقي صعبان عليا اليتيم اللي هايسيبوا صاحبنا مين هايوديه الملاهي ببلاش ومين اللي هايخليه يخرب في البلد وسمعني احلي ندابة وهي بتقول بكي اليتيم علي امه لحد ماالدموع غرقت كمه (علي فكرة الندابات بيقولوا كده فعلا)

..........................................

حادث الحسين

بداية قبل ماندخل في التريقة، أي مسلم التزامه بسيط كان او متعمق بيرفض الفعل ده ويدرك تماما أن هذا اضر بالدعوة والاسلام اكثر مما نفعه وكلنا يعلم أن هناك تيارات معتدلة ترد علي هذه التيارات المنحرفة وتحد من وجودها واقولها بملء فمي أن التيارات الاسلامية متمثلة في الاخوان والسلفيين يحدون كثيرا من تواجد هذه التيارات ويقفون لها فكريا وليس هناك تقارب في التوجهات بينهم لان ببساطة هذه التيارات المنحرفة تكفر الاخوان وبعض شيوخ السلفيين وتسفه من ارائهم
وكم ساعدت القنوات الاسلامية في نشر الالتزام الصحيح بين الشباب وبين الاسر المصرية بدلالة كثرة التساؤلات التي تاتي علي شاشات التلفاز ،وان كان في راي الفتوي لاتاخذ هكذا ولكن هذا وإن دل علي شئ فانما يدل علي حرص الناس علي عدم تخطي حدود الله والحرص علي عدم التجاوز فيها .
ولكن كعادة الباقة العلمانية (زي باقة الايه.أر .تي)كرهوا يشوفوا مصر الالتزام فيها بدأ يزيد شوية
وطبعا ماصدقوا شافوا موضوع الحسين ده عشان يعددوا ويلطموا ويشقوا الجيوب ويخرفوا عشان يربطوا اللي حصل بالقنوات الاسلامية اللي بدأت تنتشر بقوة ويربطوا الكلام ده بعلامائنا وشيوخنا الافاضل
ولكن أنا مبسوط أن هما ابتدوا يرغوا تاني عشان نتمايز كبشر وكمسلمين
نتمايز من منا يريد الخير لدين الله ومن يضمر الشر والحقد علي الدين والمسلمين
(قد بدت البغضاء من أفواههم وما تخفي صدورهم أكبر)
..............................................
الزمالك
طبعا واحد يقولي ياكابتن عز إيه اللي بيحصل للزمالك ده ؟
أقولكم إنه بمنتهي البساطة الفرقة دي فيها شوية قرنات زي جمال حمزة وشيكابالا ازرق ومحدش عارف يلمهم ويقولهم كفاية كده شغل الرسم والنفخة علي زملائكم لانكم مش رجالة عليهم ولكن طبعا النادي اساسا مفهوش ادارة وكل شوية تلاقي شوية ملمومين ويعملوا لجنة انقاذ
ولكن أنا عندي فكرة
هما يقلبوا النادي نادي العاب مائية عشان يريحونا ويبقي اسمه نادي الزمالك للالعاب المائية ويعلم غطس وباليه مائي (رجالة فقط طبعا بمايوهات شرعيةعشان أنا عارف أن في ناس هاتدخل تقولي باليه مائي ايه ياعم الحاج)
والمهم لو الزمالك ده حاله اتصلح اعرفوا ان البلد دي لسة فيها ناس بتفكر وبتعرف تحل مشاكل ادارية ولكن طالما الوضع علي ماهو عليه في النادي فيقفلوا النادي أحسن بدل وجع الدماغ ده كله
......................................................................
كتب المدونين
غبت شوية عن التدوين ورجعت فلقيت نص المدونين منزلين كتب وعاملين كتب واخرهم كتاب عنصري اسمه (أنا انثي ) وكتاب تحس من اسمه انك بقي في كتب حريمي وكتب رجالي وانطلاقا من هذا التوجه العنصري وحفاظا علي حقوق الجنس الذكري قررت أننا نعمل كتاب اسمه (أنا ذكر)وهخلي الواد الجعفري يكتب فيه براحته ويتجعس في الكتاب بدل تدويناته الطويلة دي
والله الواحد خايف يجي اليوم اللي نعمل فيه المجلس القومي لحقوق الرجال ونطالب في حقنا في المشاركة الاجتماعية
ولكن عامة ظاهرة الكتب اللي بيخرجها المدونين بمنتهي البساطة المستفيد الاول منها دور النشر وليس المجتمع لان هناك بعض الكتب لم تضف
(وأهو المدونين ينفعوا بعض أنا نزلت كتاب النهاردة فزميلي نفعني بكرة أنا انفعه وكله علي عينه ياريس )
وأجمل مافي التدوين في رأي الشخصي أنك خلف الشاشات تشاهد تجارب وخواطر الاخرين وتحاول الاستافادة منها
ولكن فكرة الكتب فلنفكر جيدا من المستفيد منها هل نحن أم دور النشر أم المجتمع؟؟؟
إيه هدفنا الحقيقي من ورائها؟
وربنا ييسر الحال ادعو لي كثيرا فكم اشتقت بالفعل الي المدونة واليكم جميعا وكنت اسال الجعفري علي احوالكم دائما
فاتمني لكم الخير دائما ومحدش يزعل مني إن كان في كلام دايق اي حد
والسلام
اليعقوبي

هناك 25 تعليقًا:

Soul.o0o.Whisper يقول...

اييييييييه داااااااااااا


و كمان أول تعليق؟؟؟


ياما انت كريم يارب

Soul.o0o.Whisper يقول...

أولا حمدلله ع السلامة
و فضفض براحتك

ياللا أعتبر المدونة مدونتك
:)

بالنسبة لاعتقال البشير
فأنا ماقدرش أحكم

ماهو صحيح الراجل مش كويس
بس بردوا القرارات دى حسب هواهم
و اللى يحبوا يخلصوا منه

الله المستعان
...........

بالنسبةلحادث الحسين
فكلامك صح


مافيش انسان اصلا ، مش هاقول مسلم
يصدق ان دا دعوى لاى شئ غير انه ارهاب و خروج عن المألوف

فطبيعى لأى مسلم إنه يستنكره
لأنه بينافى طبيعة الاسلام

لكن تعمل ايه بئا فى النفوس المريضة؟؟

...........

بالنسبة للزمالك ماليش فيه
و لا فى الاهلى

و لا اى نادى
كفاية عليا نفسى
ههههههههههههه


.............

بالنسبة لكتب المدونين

أعتقد عندك حق
و يمكن ابئا اتكلم فى الموضوع دا



ياللا بئا كفاية عليا رغى لحد كدا




سلام

Unknown يقول...

هههههههه
ياعز ياغلبان
انت خلاص بقي بقيت احمد سبع الليل
يابني ملكش دعوة بأنا انثي او انا ذكر
خليك انت في الجيش بتاعك وخليها تعدي علي خير
---
علي العموم انا قولتلك انطباعي
ما هي اهداف العمل ؟
يعني ايه السبب وايه هو المضمون وعلي اي اساس قام العمل وغيره
----
وهو في حاجة اسمها زمالك دلوقتي "يازملكاوي ياقديم" في بقي بتروجيت والحرس بترول اسيوط وغيره انما الزمالك خلاص انتهي
بيقولك السنة الجاية هيبقي ماتش القمة في دوري الدرجة التانية
بين الزمالك وبني عبيد
ربنا يوفقكم
---
اما محاكمة البشير فحسبنا الله ونعم الوكيل
وهذه من المآسي التي تمر بها الامة
---
وجزاكم الله كل خير ياعسكري

akeed يقول...

كل شخص له الحق فى الفضفضة
بوست جميل


تحياتى


أكيــــــــــــــــــــــــــيد

جمعاوى يقول...

):


إضرب رجلك جامد ترهب العدو

(:



i miss you

Unknown يقول...

يكفيه الدويقة
.................
قد بدت البغضاء من أفواههم وما تخفي صدورهم أكبر)
أكبر بكتيييييييير
حسبنا الله ونعم الوكيل
..................
ماليش في الكوره
:)
.................
من رأيي ان محاولة اغراء المدونين بانزال الكتب نوع من أنواع قص اجنحه التدوين
لنا الله

خديجة عبدالله يقول...

عودا محمودا يا فندم أهلا بكم
خواطر شيقة ماشاء الله
1- عادى بس ساعتها الخوف من الشعب العاطفى يقوم يقول لاه إلا ده حضرتك عارف بقه احنا شعب حمول ونساى جدا
2-لم تعد تلك الحركات النص كم تنطلى على الناس .. لكن معرفش ليه حسيت أنها تغطية لملعوب تانى ربنا يسترها
3-الزمالك .. الزمالك .. سمعت الاسم ده فين ؟؟؟ .. الفشل الادارى ده ككل .. الزمالك مجسم صغير جدا ربنا يصلح حالنا
4-كتب المدونين .. أنا أنثى زهراء كتبت فيه يبقى حلو وجميل تعصب لأختى الكريمة طبعا :) .. عقبالكم
بالنسبة للهدف الله اعلم لكن خير تجربة لها ايجابيات وسلبيات أكييييد
5- ربنا يوفقكما وجزاكما الله خيرا ونفع الله بكما
كل التحية والاحترام

أخـــ مسلمة ـــت يقول...

أهلا بكم من جديد
أنرتم عالم المدونات

بالنسبة لاعتقال البشير
الموضوع بيذكرني بصدام حسين بالرغم من الفرق بين الشخصيتين الا انه الشعب العراقي بعد احتلال العراق اصبح يهتف باسم صدام ولا كأنه كان الديكتاتور اللي بيعذبهم ومطلع عينهم ياعيني

أعتقد انه ده حصل بعد ماشافوا البلاوي اللي عملها الاحتلال
فأصبح الشعب راضي بالحاكم المستبد لانه مهما كان مش محتل (وان كان محتل من نوع آخر) .. تماما هو ده اللي هيحصل لما الحاج (المنوفي) يحصله نفس الموضوع

لكن أوعد حضرتك اني اول واحدة هفرح فيه :)

أما بالنسبة لحادث الحسين
فقد اقترح البعض ان ناتي بالمفتش كرومبو ليحل طلاسم الحادث اللي الداخلية زودتا مش حلتها
لانها قدمت شوية تخاريف وفبركت شوية شهود اي كلام واعتقلت كام واحد
وخلصت الحكاية ومبروك علينا قانون الارهاب
أما عن العلمانيين
أعتقد انه الموضوع ببساطة (فكر مقابل فكر) والبقاء للاقوي والاصلح معا
وبم اني انسانة متعصبة :) أؤكد ان الاسلام هو الاقوي والاصلح
لانه ببساطة دين الله
واللي مش عاجبه يورينا نفسه ويشوف هيعرف يخلع الناس من دينها ازاي

الزمالك
NO COMMENT

كتب المدونين
أعتقد انه مش بيشتريها غير المدونين
:)
والمستفيد فعلا دور النشر
بصراحة فكرت فيها لقيت انه احنا بنقرا كل المدونات اللي نزلت الكتب طيب وليه نطبعها؟ماهي موجودة؟؟؟؟؟

المهم مبروك لكل واحد نزل كتاب
لكن أيضا ارجو اننا نعقل الموضوع

حمدا لله علي السلامة
نتمني عدم الغياب مرة اخري
بوركتمـ

محمد عبد الرحمن يقول...

أخى الحبيب محمود
البشير ليس هو المقصود وحده بل المطلوب هو النفط واليورانيوم وبما أن المذكور لا يبدى تعاونا كافيا فلي هناك بد من إزاحته خصوصا وأن البدائل جاهزة والسيناريو مرسوم وبمباركة دولية وإقليمية رغم الظاهر من مواويل الإستهلاك المحلى للأبواق الإعلامية


حادث الحسين ممكن إستيعاب حصوله فى أى بلد فى العالم وربما كانت أسبابه ودوافعه أتفه من كل ضجة الجوقة العلمانية لكنها فرصة لفضح البواطن


الزمالك بيب بيب زمالك مدرسة الكرة فى الزمالك يظهر كدة حال بلدنا لا يختلف عن حال الزمالك
نحيا على أمجاد قديمة نجترها ونعرف أننا نتهاوى إلى قاع سحيق دون أن نقدم جهدا مخططا ومنسقا للإنقاذ
متقلقش الزمالك مش هيهبط بس يمكن الدورى هو للى ممكن يصعد هههههه
بس متنساش إن الزمالك لا يزال فى المقدمة فى اللعبات الأخرى يعنى بلاها كورة اللى هتوجع قلوب الزملكاوية



التدوين بدون اليعقوبى يفقد قدرا كبيرا من معناه عندي على الأقل

الفاتح اليعقوبي يقول...

السلام عليكم
شرف لنا يااستاذة ان تكوني اول تعليق
وجزاك الله خيرا
وشكرا لعرض وجهة نظرك في هذا البوست
والسلام

الفاتح اليعقوبي يقول...

الجعفري بيه
مين ده سبع الليل ياخرطوشة السجاير
أنت
عز هيفضل طول عمره عز
وبعدين تعليقك سطحي جدااااا
يعني ايه في حاجة لسه اسمها الزمالك
والله العظيم في نادي اسمه نادي الزمالك وسيبقي رغم الالام والاحزان مرفوع الراس خافق القلب

وأنت عايز ايه تاني
ولا اقولك أحسن

والسلام

الفاتح اليعقوبي يقول...

الاستاذ أكيد
ربنا يكرمك
أكيد أكيد أكيد

والسلام

الفاتح اليعقوبي يقول...

ايه ياعم الوحش الانوي النادر
جمعاوي بيه

أنت فاكر نفسك ايه ياعم الحاج
وعايز اقولك حاجة بسيطة بما أنك هاتقدم الفترة الجاية أو الدفعة الجاية وعايز اطمنك لو دخلت
الدفعة اللي لو ربنا قدر ليك ودخلت فيها
دي اسمها دفعة العبيد وهي اكتر دفعة بتتسحل في الجيش فانا بطمنك من اولها عشان تضرب بالرجل كويس

وبعدين ايه Imiss you
أنت بتعاكس واحدة ياعم الحاج
اسمها وحشتني يااخ عز فانا ارد وانا كذلك يااخ هيثم
أنما لما تقول لي imiss you اقولك ايه
؟؟؟؟؟؟
اخوة اخر زمن
والسلام

الفاتح اليعقوبي يقول...

أنا انسان
هي الدويقة بس

والعبارة والقطارات والطيارات وحوادث الطريق وقتل وتعذيب المعتقلين
ربنا يصلح الحال
.......
أما موضوع الكتب
مش قص أجنحة التدوين ولا حاجة لان التدوين كل يوم بيزيد واحد عن التاني وبالعكس تطور الموضوع بدخول الكثير ممن لايحملون انتماءات أو هموم سياسية وهذا علي غير بداية التدوين والتي كانت مقصورة علي المهمتمين بالسياسية واصحاب الفكر
ولكن الكتب التي تنزل ستفقد التدوين جوهره ألا وهو المناقشة وتبادل الافكار من خلف شاشات الكمبيوتر والتقائية في العرض علي عكس الكتب
والامر الثاني
فكرة من المستفيد من فكرة الكتب هذه؟؟

وجزاك الله خيرا علي تعليقك
والسلام

الفاتح اليعقوبي يقول...

الاخت خديجة
والله يااستاذة الموضوع ده لو حصل عندنا واجبنا اننا نقف معاه مش ضده لان الامر هنا لن يتعلق بشخصه ولكنه يتعلق بكرامة البلد وسيادتها وفعلا الناس ستنادي وقتها بحياته وفي ناس هاتشتم في اللي خلفوه ويقولوايستاهل بس الصواب في رأي هو ماذكرته أولا
.................
(الزمالك .. الزمالك .. سمعت الاسم ده فين ؟؟؟)
حضرتك سمعتي به هاهنا والزمالك سيبقي فريق القرن علي االاقل حسب تصنيف الفيفا واهو الزمالك ده رغم كل فضايحه وبلاويه منسحبش من بطولة عشان فيها الاهلي مش زي الاهلي اللي انسحب من بطولة العرب عشان وقع في مجموعة واحدة مع الزمالك
وعامة ربنا ينتعه بالسلامة
,,,,,,,,,,,,,,,,,,,,
وربنا يوفق اللي كتبوا وييسرلهم امورهم أما بالنسبة للسلبيات والايجابيات فده طبيعي ولكن ماالغرض أو الهدف من اصدار الكتب؟؟؟
وعامة ربنايوفقهم جميعا
والسلام

Unknown يقول...

لا لا لا ياعز اقف معوج واتكلم عدل اه زمالك مين اللي منسحبش انتم انسحبتم امام الاهلي 3 مرات اه مش تقولي بطولة ومش بطولة
وبعدين بطولات مين انتم غلابة ده كان زمان ايام نادي فاروق
ههههههههه
"بني عبيد يتوعد الزمالك بتكرار المزبحة الشهيرة"
"طلحة راغب ينفي انضمامه للزمالك ويفضل الانضمام لسكر الحوامدية"
" عنتر الشربيني يفسخ تعاقده مع الزمالك بعد اغراءات ناد البداري المادية"
ههههههههه
قال زمالك قال

الفاتح اليعقوبي يقول...

معلش نقطع التعليق علي التعليقات ونشوف عم الحاج اللي واكل أكلة طبقة علي نفسه الجعفري بيه
ايه ياحلاوة جبت كلامك ده منين
نسيت غزل السويس بتاع الاتنين صفر
نسيت حكشة بتاعة البلاستيك ولا نسيت سيد عبدالنعيم بتاع انبي ايه ياعم الحاج تصدق وتأمن بايه أنا كنت بعلق وكنت هاكتب في التعليق والكلام ليك ياجعفري ولكن أنت شكلك من الناس اللي بيحسوا بالبطحة اللي علي روسهم
وبعدين ايه ببني عبيداللي انتم شابطين فيها ده علي اساس انكم خرجتم من مانشيستر يونايتد ده انتم خارجين علي ايد بترول اسيوط والواد اللي جاب فيكم الجون رحتم اشتريتوه بعد الماتش واهو كله بثوابه بس الحق يقال بتوع الجاز مش عاتقينكم خالص من اول ماطلعوا الدوري وهما مزفتينها علي النادي بتاعكم
ويلا نام عشان تصلي الفجر ان كنت هتصلي
والسلام

ابو صهيب ( الجمعاوي الاصيل)سابقاً يقول...

السلام عليكم ورحمة الله
حبيبي وحشني والله
معلش الموضوع جه خطف كده
على العموم انا راجع يوم 17 /3 ان شاء الله
عاوز اشوفك ضروري
اول اجازة تلم خلجاتك وتيجيلي
اعوز اكلم معاك واخد رايك في حاجة كده

ابو صهيب ( الجمعاوي الاصيل)سابقاً يقول...

اما عن موضوع الزمالك فمبرو ك الهبوط يامعلم
هههههههههههههههههههههه

Unknown يقول...

طيب ياعز مش عيب تبقي راجل كبير وفي الجيش وتقول الكلام اللي يضحك اوي ده
مش بترول اسيوط ده اللي غلبكم في الدور الاول 2/0 ,, وبعدين انت جايب اسامي لعيب او اتنين انما لو انا فتحت هجيب نص لعيبة الدوري ,اللي علموا علي الزمالك ,, وبعدين انت ناسي الحرس اللي غلبكم 5/0 مع الرأفة ايام روقه وبعدين مش عيب تقارن بين بني عبيد والبترول ياراجل اتقي الله ,, ده بني عبيد ده في وسط الجدول في دوري المظاليم طيب لو كنتم قبلتم سكر ابوقرقاص كان عمل فيكم ايه ,, ده كان الواد سيد كنبه قطعلكم الشبكة
ههههههههههه
يالا يازملكاوي ياقديم جهز شنطك علشان تروح الكتيبة

مشروع انسان يقول...

طيب منتظرين كتاب انا ذكر

ما تسميه انا جدع احسن
:))

صيد الخاطر يقول...

السلام عليكم
كيفك ياحبيبي
والله زحشني
لعلك بخير
سلملي على عز كتير

ثانيا
هو انت كنت فين اصلا عشن ترجع

walaa rizk يقول...

اولا انا قرأت الموضوع م ژمان وكنت فاكره علقت واكتشفت انه لا
اعلق بقي
اولا عودا احمد
ثانيا
انا انثي بالرغم م اختلافي مع بعض ما نشر فيه لكن فعلا خطوه جميله لتناول القضيه بشكل متوازن واقعي
ومش عنصريه ولا حاجه وبعدين منتظرين كتاب انا رجل
وبعدين النبي قال رفقا بالقوارير) مش رفقا باي حد
ثانيا موضوع الحسين
خليه قاعد جمب اخواته
ثالثا
قضيه البشير ليست مجز قضيه فز
انما المخطط الصهيو امريكي للدوله المزعومه م النيل للفرات ناهيك ع تقسيم السوادن وتفكيكه وصدقا ان الاوان ان الناس تفهم
واخيرا
دائما الزملكاويه عايشين حقايق غريبه
ربنا يعنيكم والله انا بتمني ليكوا الخير
وبس

الفاتح اليعقوبي يقول...

السلام عليكم
أخت مسلمة
جزاك الله خيرا يااستاذة علي تعليقك
ولكن لي تعقيب بسيط وقتمتا سيحدث مع صاحبنا مثلما حدث البشير لن نفرح ولكن سنكون الي جواره لان الامر وقتها لا يتعلق به او بنا او باي احد ولكن الامر وقتها متعلق بسيادة الدولة وكرامة الدولة وهو امر لايقف علي شخص ولا جماعة فوقتها انا شخصيا سؤيده لانه مهما بلغ من الفساد لن يكون مثلما لو اتي احتلال لبلدنا

وجزاك الله علي التعليق يااستاذة ومسئلة الغياب هذه ليست بيدي ولكني الان (دفعة)فالامر ليس بيدي
وجزاكم الله خيرا
..............................
استاذي وحبيبي في الله استاذ محمد طال الليل
ربنا يكرمك فعلا الغرض ليس البشير ولكن اري ان الاغراض كثيرة ومتنوعة ساحاول ذكرها في بوست منفصل
وربنا يجازيك خير يااستاذي ادعو الله لي ان تمر هذه الفترة علي سريعا
وجزاك الله خيرا
............................
ابوصهيب المصري
باذن الله نتقابل قريبا أنا نزلت اجازة باذن الله وان شاء الله نتقابل قريبا
وبالله عليك بلاش التعليقات السمجة اللي انت بتعلها دي ايه الزمالك هايهبط ده امال مين اللي هاينكد عليكم بعد كده
والسلام

الفاتح اليعقوبي يقول...

صيد الخاطر
ازيك ياجميل انا عز مش الجعفري
وربنا يكرمك يارب وادعو الله لي
.......................
المغترب الثاني امام الجيل
عمي في الله وحشني جدااا
وعامة ساحجز لك اول نسخة من كتاب انا ذكر وعشان خاطرك هاخلي الجزء التاني منه انا جدع
هههههههه
ومتقطعش علينا كتير ياشيخنا

.................................

عاشقة الاقصي
ربنا يكرمك يااستاذة
علي التعليق
بس انا معنديش مشكلة في موضوع انا انثي ولا انا ذكر ولا انا اي حاجة الموضوع وما فيه هو افاد التدوين لجوهره انه خواطر وتجارب خلف شاشات الكمبيوتر وةشجع الكثيرين علي التعبير عن ارائهم بحرية ودون قيود ومشكلة الكتب في موضوع بسيط من المستفيد منها
وعامة لعله خير وربنا يوفق اصحاب الكتاب للخير
واما الزمالك فهو كالنجم الساحلي في السماء واعمق من البترول ومنظم اكثر من غزل (السويس) وانقي من البلاستيك
واغني من شركة انبي

وجزاك الله خيرا
............................
د/توكل سعيد
ربنا يكرمك يادكتور ويجازيك خير يارب
وشكرا علي المرور
والسلام

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا