السبت، 2 أغسطس 2008

ذكريات في الجامعة 1


الان علي عاصفة النار

سبحانه وتعالي عما يشركون

.........................................................................



في اخر يوم في امتحاناتنا السنة دي اخواننا في الدفعات التانية عملوا حفلة بسيطة لاخوانهم بتوع رابعة اللي ان منهم واثناء جلوسي مع اخواني فناداني احد زملائي في المدرج في سنة تالتة بس افترقنا لدخولي ادارة اعمال وهو كمل في محاسبة فوجدته ينادي علي فقمت من وسط الحفلة بتاعة اخواننا وسلمنا علي بعض فقال لي حاجة اسعدتني كثيرا وجدته بيقولي أنا جي ابشرك بحاجة فقلت له ربنا يكرمك ياعم يوسف في ايه ؟؟؟؟





فوجدته بيقولي بشرة بحق فقال لي :أنا جي اقول اني دلوقتي الحمد لله التزمت من فترة والحمد لله حالي اتغير وسيبت شلة البنات اللي كنت معاهم واتعرفت علي ناس كويسة ملتزمة فادعو لي ربنا يثبتنا





والله ياخوانا فرحت وقتها جداااا فرح فعلا قد تعجز كلامتي عن وصفه ويعبر عن وصفي هذا حديث النبي صلي الله عليه وسلم :(لان يهدي الله لك رجلا واحدا خير لك من الدنيا وما فيها او خير لك من حمر النعم او خيرلك مما طلعت عليه الشمس )نرجع تاني ليوسف





فقال لي أنا كنت عايز ابشركم عشان انا كنت بسال نفسي سؤال انتم ليه بتعملوا كده يعني وجعين دماغكوا وممكن الناس تنفضلكوا وانتم ماشاء مكملين


وخلصنا كلامنا وكلمني عن حاله شوية


وسلمت عليه وسلم علي ومشي





معلش انا ابتاديت من الاخر بس ده كان لازم لعله يثير حماس بعض اخوانا واخواتنا الذين يعملون في الجامعة في الدعوة الي الله ان مهما كان تعبهم والاذي اللي قد يتعرضوا له هو في النهاية يؤثر في البعض ولا يذهب سدي


واسال الله ان يتقبل منا جميعا ويرزقنا الاخلاص





فلاش باك





نجيب من الاول وتبتدي ذكرياتي في الجامعة وفي العمل مع طلاب الاخوان الذين شرفني الله بالعمل معهم وشرفني اكثر باني كنت منهم





البداية كانت عند التيرم التاني من سنة تانية كنت قاعد مع استاذي وهو ماشاء الله كان احد طلاب الاخوان في الجامعة وكان من الناس النشطة جدااا وكنت بقوله انا حابب اني اشتغل مع اخوانا في الجامعة وصلني بيهم





فقال لي توصيلك ده ممكن ياخد وقت روح علي طول قلهم انا اخوكم في الله فلان الفلاني وعايز اشتغل معاكم





ففعلا تاني يوم رحت فقالبلت اخواني في المدرج فسبتهم أسف قصدي وقفتهم وقلتهم انا اخوكم في الله فلان الفلاني ومن منطقة كذا وعايز اشتغل معاكم فالاخ خاف( وهو قال لي بعدها انا كنت فكرك مخبر ياعز)وقتها وقال لي طيب انت تعرف مين في منطقتك وسالني علي كام اخ في المنطقة عندي وهو اتاكد اني واحد من الاخوان بعدها والاخ ده بقي واحد من اعز واقرب الناس الي قلبي





وقابلته تاني يوم وطلعت نتيجة التيرم الاول ونجحنا ولله الحمد واتميشنا مع بعض شوية وتعرفنا علي بعض بشكل اكبر وقبل مااكمل كلامي بس انا عايز اوضح الظروف وحال الجامعة في السنة اللي انضميت فيها لاخواني في الجامعة





اولا :دي كانت اول سنة ينزل فيها طلاب التيار الاسلامي باسم طلاب الاخوان المسلمين والكلام في الجامعة اللي كان جي من اخوانننا المسئولين ان اي حد يسالك انت مين تقول له انا فلان الفلاني من طلاب الاخوان المسلمين





ثانيا :دخولي الجامعة كان بعد نجاح 88عضو من الاخوان في مجلس الشعب فكان ده دافع اننا نكمل بشكل اقوي ونستغل الفرصة دي والدنيا كانت سخنة والاحداث متلاحقة واستكملت باكتساح حماس للانتخابات





ثالثا :نظام الحملات والنظام ده اتطبق قبل دخولي بسنة وكان حملة يلا نحب بجد ثم حملة معا للاصلاح اللي كان فيها مسيرة جامعات مصر





واليكم بعض الصور عن تلك المسيرة الضخمة
العدد كان في اللمون يوميها




فكانت الظروف كلها تتجه نحو العمل لاثبات الذات وتوضيح الاخوان بالنسبة للطلبة في الجامعات


ونرجع تاني لكلامنا


فبدات شغل مع اخواني في الكلية وبدات في مدرجي وكنا بنتعب جدااا عشان نسكت الطلبة عشان نقرا القران ونقول الكلمة بالذات في مدرجنا العدد كان ضخم والمكان ضيق فكان مجلس الدفعة كله لازم يدخل المدرج ده عشان يسكته فاتفقت انا والاخ اللي هو مسئول المدرج واخواننا الاخرين باننا نتوغل وسط الطلبة يعني نعمل قوافل دعوية ومسابقات في قطاعات عشان الطلبة تعرفنا اكتر وتسكت لنا وبالفعل ولله الفضل والمنة كان حوالي اكتر من تسعين في المية من المدرج كان عارفناو في اخر السنة وفي السنوات اللي بعدها كنا بندخل المدرج لما بنقف علي المنصة عشان نقرا القران الكلمة قبل المحاضرات كان الطلبة كلها بتسكت لان بمنتهي البساطة يااخواني الناس بتحب اللي قريب منها ويتوغل وسطها ويبقي قريب منها ،منين كانوا هايسكتوا لنا وهما ميعرفوناش ازاي ؟؟؟


وكلامي ده يوجهوا لاخواني اللي شغالين الان في الجامعة وهي وصية من اخاكم ابقوا وسط الطلبة عشان الطلبة تتفاعل معاكم ولالاتعاملوا مع الطلبة بمنطق الامر والنهي


وكان من الحاجات الجميلة اللي الطلبة عرفتني بها الملبس كنت علي طول اشتري بجزء من مصروفي ملبس اعمل بيه مسابقات وقوافل دعوية


واختم البوست بموقف حصل


بعد حالة النشاط اللي اصابت طلاب الاخوان كان رد فعل الامن عنيف وعندنا في الجامعة مجالس التاديب نزلت ترف علي دماغة اخواني واستدعاءات امن الدولة وما شابه هذا


وحصل بالفعل موقف مشين في حق وزارة التعليم العالي كلها


كان عندنا معرض في الكلية بنعرض فيه بعض الشرائط الاسلامية والسيديهات وبعض الكتب الادارية والكتب العامة وكلها منتجات مرخصة فانا كنت واقف علي المعرض انا ومعي اتنين من اخواني فجاء معاد محاضرتي فقلت لهم انا رايح المحاضرة ولما اخلص هاجي لكم


وحضرت ورجعت ففوجئت بفاجعة الاستاذ الدكتور المبجل عميد الكلية هو ومعه رائد اتحاد الطلاب في كلية التجارة جامعة القاهرة نزلوا بنفسهم مش بعتوا حد ولا الحرس وفكوا المعرض وخدوا كارنيهات اتنين من اخوانا فعملنا اعتصام امام مكتب العميد عشان الكارنيهات ترجع والمفاجأة الكبيرة جداا ان يتعمل استدعاء امن دولة لواحد من اخواني الاتنين دول بعدها بيوم وكارنيهو يروح امن الدولة !!!!ا


فضيحة والله يااخواني ازاي عميد كلية او دكتور يرضي انه يتحول لمجرد تابع ذليل لضابط امن دولة بالله عليكم ازاي حتة ظابط بنسر علي كتفه يمشي كلية باللي فيها من اول العميد لحد الجزماتية اللي في الكلية اللي بيشتغلوا له مخبرين علي الطلبة


ازاي أنا ارضي علي نفسي وانا دكتور جامعي ان حتة ظابط لاراح ولاجيه يامرني ويخليني زي المخبر بتاعه بنفذ اوامره بس ومقدرش اقول له لا


وكمل الامن بلاويه في السنة دي وكان لازم يكون هناك رد فعل من اخوانا وكان رد فعل فعل قوي وصعب و هو يوم الغضب الجامعي


اللي هانتكلم عليه باذن الله البوست القادم


والسلام


اليعقوبي

هناك 27 تعليقًا:

طال الليل يقول...

موضوع شيق ومفيد
فعلا مسألة التعريف و القرب من الناس مهم جدا لتوضيح الصورة و دحض الشبهات وتفنيد الصورة السلبية التى داب الإعلام المضاد نشرها عن أشرف من قابلت وأرقى من عرفت وهم شباب الإتجاه الغسلامى بجناحيه الإخوانى والسلفى

عاشقه الاقصى يقول...

الموضوع حلو اوى

على فكره أنا كل يوم بحمد ربنا انى عرفت الاخوات من اول يوم ليه فى الكليه

بجد الصور دى فكرتينى بشغل السنه دى فى الجامعه

أظن حضرتك طالما جامع هالقاهره تتذكر يوم مسيره ومؤتمر المحاكم العسكريه

يوم لن ينسى فك الله أسرهم

انا بشوف عندنا فى الكليه الاستيكر بتاع يلا نحب بجد

بقول يااه لو كنت موجوده أيامها

بس ان شاء الله

ربنا يستعملنا ولا يستبدلنا

واحلى ايام حياتنا تكون فى الجامعه

على فكره ماشاء الله اخوان تجاره دايما رافعيين راسنا كده

ربنا معاكم

أظن حضرتكم عمركم ما هتنسوا الايام الجميله ديه

دا انا شغل سنه وشويه عشان انا مش حاسبه اول سنه وكل يوم أقول امتى الدراسه ترجع مابال حضرتك بقى

منتظرين باقى الموضوع بشغف شدييييييييد

جزاكم الله خيرا

حطم القيود يقول...

فعلا العمل الطلابي في الجامعه مش ممكن يتعوض.....بجد الواحد هيفتقده جدا

صور المسيره ما شاء الله جميله اوى...فكرتنى بحاجات كتير

ربنا يرزقنا الاخلاص ويخلف علينا من الاعمال الصالحه ما نعوض به ما تركنا

جزيتم خيرا

أبو أسامة - مدونة كباية شاي يقول...

السلام عليكم ورحمة الله وبركاته

حياك الله يا أخي

كلامك رائع ونبهتني لأكثر من نقطة هامة جدا :

أهمية التواصل المباشر مع الناس كما قلت ببساطة شديدة الناس مش هتسمعلك إلا إذا كانوا عارفينك .

برضو موضوع الملبس والمسابقات ده موضوع ظريف جدا أنا كنت بعمله أيام ثانوي بس معملتوش في الجامعة .

جزاكم الله خيرا
نسألكم الدعاء .
والسلام عليكم ورحمة الله وبركاته

حسن حنفى يقول...

بسم الله ما شاء الله


ياااااارب يثبت قلبك ويثبت اخوانك

ويجزيك الله اجر العمل اللذي تقوم به

جمعاوى روش طحن يقول...

عز يكتب ذكرياته


ليه ؟

هو إنت مفكر نفسك




جمعاوى

(::



منور يا ريس

ياريت تبقى بنفس حلقات الإلتزام


فاكرها ؟

(::

(::

عبالعزيز يوسف لسه بحلم يقول...

أنا كنت فى سنة رابعة السنة دى
يعنى أخر سنة
زى حضرتك
وطلاب الإخوان
من أكتر الأسماء اللى إتعلقت بيها

الزهراء يقول...

السلام عليكم ورحمة الله وبركاته
ذكريات الجامعة وذكريات العمل طبعا ايام لاتنسى اسأل الله ان يرزقنا أجرها ........
فكرة الملبس دى فكرة بتجيب نتايج كويسة فعلا عن تجربة ان شاء الله ارجع انفذها تانى واحافظ عليها
..........
اما عن ذلك العميد ذكرتنى بعميد كليتنا وموقفه ذلك العميد دكتور مشهور بالعمل الجيد وخصوصا العمل الطلابى كان رائد لاسرة صناع الحياة ويرعى اعمالهم ويستضيف د.ابراهيم الفقى وله سيرة رائعة لكن حين تولى عمادة الكلية للاسف لا يستطيع فعل شىء فالكلية لا يحكمها عمداء ووكلاء وانما يسير امورها امن الدولة اذكر موقفه حينما اعددنا لمعرضنا السنوى وكانت دوما اسرتنا اسرة الشموع(اسرة الطالبات بطب المنصورة) تأخذ افضل معرض سنويا سرقوا لوحاتنا من مكتبة المسجدقبل المعرض بيوم وقدمنا له شكوى ووعدنا باعادتها لكن طبعا مرجعتش ومقدرش يعمل حاجة واقيم معرض الاسر فى موعده وتم التقييم لكننا اثناء اليوم الاول يوم التقييم وضعنا لوحات سوداء وكن من يدخل نشرح له ماحدث حتى اتى الدكتور مسئول لجنة لاسر بالاتحاد وطلب منا تغيير تلك اللوحات وان يمد لنا ايام المعرض والحمدلله بعد يومان فقط اعددنا معرض من 4اركان واستمر لمدة تزيد عن اسبوع وكان ناجحا بفضل الله
............
كنت اليوم ارى صور المعرض ورادونى
شعور هذا العام انهم لن يسمحوا لنا بتسجيل اسرتنا واننا سنقيم
معرضنا فى الهواء الطلق
ربنا يستر

امام الجيل يقول...

ياه فكرتنا يا ولدى بايام زومان
:)

كانت ايام جميلة جدا

محدش يقدر ينساها
مقدرش انسى اول يوم دخلت الكلية
ولقيت ناس دخلت ومعاهم زينة وبلالين وبينشدوا

والطلبة تسخر منهم وتعلى صوتها
ودول الابتسامة على وجوههم متغيرتش

اثر الموقف ده فيا كتير وكنت عايز اقولهم انا منكوا
والحمد لله اتعرفت عليهم
وعشات اجمل ايام عمرى

الحمد لله على هذه النعمة العظيمة

elkenany يقول...

ماشاء الله أخى ربنا يبارك فيك وفى جهدك
انى احبك فى الله من قبل ان القاك

بس انا حاسس انك قاعد تتكلم كأنك فى أسرتك مش على النت

المهم أود التواصل معك

elkenany87@yahoo.com

الفاتح اليعقوبي يقول...

السلام عليكم
حبيبي في الله
استاذي محمد
ربنا يكرم حضرتك يااستاذي
من اهم الاشياء فعلا توضيح الصورة الي الناس وتفيند شبهات الاعلام بالفعل اكر من القول
والسلام

الفاتح اليعقوبي يقول...

استاذة عاشقة الاقصي
ربنا يوفق حضرتك وشد حيلك في الشغل وفي دراستك لان دي شكلها اول سنة فربنا يعيين حضرتك
ومين ينسي يوم المحاكمات العسكرية اليوم ده ربنا يتقبله مننا لان في ناس كتير اضربت بره مع الامن وكان شكلنا صعب اوي واحنا داخلين وجنبنا تشريفة البلطجية واقفلينا علي الباب
لما يجي وقته نبقي نتكلم عليه
واخوان الجامعة كلهم هابقي اوضحهم للناس في البوست القادم باذن المولي سبحانه وتعالي
وتقبل الله منك صالح عملك انت وجميع من يعمل لله في الجامعة
والسلام

الفاتح اليعقوبي يقول...

استاذة حطم القيود
والله يااستاذة ربنا يصبرنا ويبتنا ونكمل شغل بره الجامعة برده لان اللي شغال لله هايدعو في اي مكان
وجزاك الله خيرا
والسلام

الفاتح اليعقوبي يقول...

استاذي ابو اسامة عندي ايه الهنا اللي انا فيه ده ربنا يكرم حضرتك يااستاذي
ومسئلة الملبس دي مهمة جداا
حتي انك تعلق في زهن الطلبة بالموضوع ده

واعانكم الله
والسلام

الفاتح اليعقوبي يقول...

حسن حنفي
ازيك ياجميل
تقبل الله دعائك يارب وتقبل مني واخواني صالح الاعمال
والسلام

الفاتح اليعقوبي يقول...

جمعاوي بيه
ازي معاليك
شفت بقي بكتب ذكرياتي ؟؟
ماانا مش جمعاوي
انت صدقت ولا ايه ياصاحبي
مااحنا كاتبنها قابلك يازعيم
علي الاصل دور
صح يازعيم

وادعو لي ان يرزقني الله الاخلاص في القول والعمل
والسلام

الفاتح اليعقوبي يقول...

عبدالعزيز يوسف
ربنا يكرمك ويكرمهم
وقولي عامل ايه في الجيش يابطل ربنا يوفقك ويعينك
والسلام

الفاتح اليعقوبي يقول...

الاستاذة الزهراء
ربنا يوفقكم في شغل الجامعة والكراسي بتغير يااستاذة ربنا يحفظنا من فتنتها
وباذن الله السنة القادمة تعملوا معرضكم ويكون انجح معرض
واسلوب القمع والمنع ده مبيجبش همه خصوصا مع اصحاب الفكر نفسي الناس دي تفهم كده
تقبل الله منكن
والسلام

جمعاوي يقول...

الله عليك يا عز ذكرتني بالذي مضى

عى فكرة أنا كت بجهز لموضوع زي ده بالضبط على المدونة وكت هبدأه من وقت مسيرة طلاب جامعات مصر فعلا ....لأن المسيرة دي بتحمل لي ذكريات كتييييييييييير....ومن كواليس هذه المسيرة أني كلفت بالإذاعة وقتها وبعدين الناس بتقولي إننا هنهتف باسم طلاب الإخوان المسلمين
المهم أنا كنت فرحان جدتا بس قعدت أسأل هو أخواننا هيرددوا بجد ؟!!!!!وبعدين المسيرة بدأـ بعد حورات كتيير حيث كان المفروض تبدأمن بره وكل جامعة ليها علم تتجه ناحيته وبعدين بدأنا من جوه وووووووووو........ذكرتني بالذي مضى يا عز

ربنا يكرمك يا حبي

الفاتح اليعقوبي يقول...

استاذنا الكبير امام الجيل
اكرم الله اولئك الغرباء وتقبل الله منهم بعد ذلك علي فكرة الطلبة تحبهم وتسمع لهم لانها تسال نفسها هما ليه بيعملوا كده
ولا اجبة لهذا الا انهم يعملوا لله
والسلام

الفاتح اليعقوبي يقول...

الكناني بيه
وانا كمان بحبك في الله ياجميل
وشفت ياعم طلعنا قرايب ازاي اي خدمة يازعيم
وبعدين ياعم متخفش انا مش الاسرة
لان ابويا وامي مش معايا
ولا انت قصدك اسرة تانية
!!!!!!!!!!!!!
والسلام

الفاتح اليعقوبي يقول...

علاء بيه
مش ممكن انا في هنا وسعادة
اكتب ياصاحبي عن اليوم المشهود ده اللي للاسف محضرتوش لان التيرم الاول كله كانت ولدتي راقدة في البيت عشان كانت تعبانة
يلا قدر ىالله وماشاء فعل
وتتعوض في غيرها
والله المستعان
والسلام

عاشقه الاقصى يقول...

هو البوستات راحت فين ذكريات 2\3

عاشقه الاقصى يقول...

هو البوستات راحت فين ذكريات 2\3

أميرة محمد محمد محمد يقول...

اولا بس عايزه اقول اني ماكتبتش تعليق علي ردك عندي في المدونه عشان كنت كاتبه رد عريض طويل واتمسح فجالي اكتئاب صراحة وباذن الله ردي عليك هيبقي ببوست كامل ان شاء الله
الحق استخبي بقي

حضرتك عارف البوست اللي انت كاتبه اثر فيا قد ايه
لن تتخيل حضرتك الازم اللي بتحصلي لما كان اخ يدخل يكلم الناس في المدرج ويفضلوا يتريقوا عليه ومايسمعوش كنت ببقي قاعده خلاص هعيط وانا مش قادره انصره بحاجه
بجد طريقتك دي جميله جدا وحاول تنشرها علي باقي الاخوه اللي تعرفهم

ربنا يثبتك انت وكل الاخوه ويحفظكم للدعوه

مهندس مصري يقول...

فين ذكريات الجامعة 2 و 3 انا قريتهم على الريدر
ربنا يوفقك و يكرمك يا عز انت و احمد و إخوانكم المخلصين كلهم
:)

دعوة الفردوس يقول...

ما أجملها من ذكريات
جعل الله تلك الساعات في ميزان حسناتك



بس بالنسبه للعميد
ماهو علشان رضي بكده بقى عميد
ولو مكنش رضي مكنش هيبقى اي حاجه طبعا
طالما قلت عميد خلاص وصلت يعني

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا