الجمعة، 25 يوليو، 2008

بيمارستان العلمانين

غالبا عندما تتحدث مع العلمانين أو عندما تسمع ارائهم ووصفهم مخالفيهم بالمتخلفين او الارهابين او الظلامين والكثير من تلك التهم المعلبة جاهزة الصنع التي تلوكها السنتهم ليل نهار عندما تختلف معهم
عامة خير ومفيش مشكلة وانا اكتب البوست هذا لاوضح فقط عكس كلامهم
اولا
مسئلة الارهاب
لما تبحث في التاريخ الحديث عن الارهاب سيتم تلقائيا تسليط الضوء علي الاسلامين سواء كانت القاعدة او طالبان او اي جماعة اسلامية اخري ،يعني تلاقيهم بيجيبوا من الشمال واليمين وتلاقيهم شوية يقولوا الاخوان اغتالوا النقراشي والخازندار وشوية يكلموك عن العمليات الارهابية اللي حصلت في خان الخليلي للاقصر لبعض الاخطاء والانتهاكات والتطرف التي انتكها البعض باسم الدين
طيب سؤال بنساله دلوقتي ،أعتي الجرائم اللي ارتكبها الاسلاميين المتطرفين كانت ايه ؟؟؟
11سبتمبر مش كده مات فيها كم واحد قالوا فوق الخمسة الالاف
طيب
نمسك بقي العلمانين او اصحاب الفكر العلماني علي مستوي العالم وجرائمهم
نتتكلم مثلا عن فرنسا وجرائمها في افريقيا والالاف الذين قتلوا وقتلهم لمليون جزائري اثناء احتلالهم للجزائر ولا نتكلم عن انجلترا الدولة العظمي والاحتلال وسرقة ونهب الثروات وبيع الرقيق والنخاسة بتوع حقوق الانسان ؟،ولا نتكلم عن الملايين اللي قتلوا في الحرب العالمية الاولي والثانية ،اسلاميين برضه اللي قتلوا الملايين دول ولا الاسلاميين هما اللي قصفوا مدينة دريسدن الالمانية ولا الاسلاميين هما اللي القوا القنبلة الذرية علي هيروشيما ونجازاكي ومات فيها فوق الثمانين الف في ضربة واحدةوشوهوا اجيال قادمة ووطبعا لاننسي ام الاجرام العالمي روسيا الشيوعية وقتلها ملايين المسلمين هي واذانابها من كلاب الصرب
ومن الصعب عندما نقيم فعل مثل الحادي عشر من سبتمبر ان نقيمه منفردا علي انه ارهاب ومن الخطا ان نقيم ونحكم علي رد الفعل ولا نقيم الفعل الذي تسبب في ردة الفعل هذه
أليس هذا ارهابا وانا رايت والله بام عيني احد العلمانين في رده علي احد معلقيه في مدونته يدافع عن الصرب ومافعلوه في البوسنة والهرسك والجبل الاسود قائلا ان هذا رد فعل طبيعي علي فتح الدولة العثمانية لتلك البلاد !!!!!ا
لاتعليق
طيب بلاش ده كله اصلي عارف اللي هايتقال ،هايتقال طيب دي دول اوربية ودول خارجية واحنا ملناش دعوة بيهم واحنا اهم حاجة عندنا بلادنا وولادنا وبتنجانا
نمسك بقي جرائم علمانيو الوطن العربي وفضائحهم
تجد أن من اوائل من باعوا قضية مصر مع انجلترا في فترة الملك كان مين غير حزب الوفد اللي الانجليز كانوا بيشكلوا الحكومات ويأمروا الملك بتعيينها
وطبعا نفتكر الانحطاط الاخلاقي اللي كانت وصلت ليه مصر وقتها من اباحة للجنس والعهر حتي ان وزارة الصحة المصرية اعتقد سنة 44أو 45الغت حكاية البغاء اللي كانت بتم في كباريهات عماد الدين وفي ناس بعدها استاءت للغاية من هذا القرار أليس هذا هو طرح العلمانين الاخلاقي في بلدنا
عبدالناصر الرجل الاشتراكي القومي طبعا مع احترامي لتاريخه ووطنيته ولا اشكك في هذا والإ اكون مجحف له بس انا هاتكلم البلاوي اللي هو عملها واللي اتسبب فيها
قتله لالاف الاخوان في المعتقلات والتعذيب اللي قد تستحي الوحوش في البرية ان تفعله باقرانها ،هو مش ده برضه ارهاب هو مش القتل والتعذيب بدون محاكمة ولا جريرة مش ارهاب برضه ولما تيجي تبحث عن أسباب ظهور الجماعات المسلحة والتكفيرية في مصر سببهم مش الاخوان سببهم عبد الناصر والقمع اللي بيتميز بيه الفكر الاشتراكي واللي يرجع للتاريخ يجد ان الاخوان اصطدموا مع هؤلاء في السجون واخرج وقتها المستشار الهضيبي عليه رحمة الله كتاب دعاة لا قضاة عشان يرد علي الجماعات التكفيرية والصراحة هي فتنة صعبة تخيلوا ناس بتتعذب اشد انواع التعذيب في السجون واتقتل قدامها احب الناس اليها وكانوا بيعذبوا علي يد رجال الثورة الذين تدور حولهم امور من انتمائهم للفكر الشيوعي الالحادي زي المهبب عليه وعلي عينه اللي اسمه حمزة البسيوني وشمس زفت بدران وصفوت الروبي فكان طبيعي يخرج التطرف والعنف كرد فعل طبيعي لهذا السلوك الغير انساني
طيب بلاش عبدالناصر
خلينا مع صدام بتاع البعث الاشتراكي
ومحدش يطلع يقول لي ده بطل قومي، ربنا يرحم موتي المسلمين كلهم بس ده كان جزار وقتال قتله وديكتاتور زيه زي السفاح حافظ الاسد اللي قاتل فوف الثلاثين الف في حماة وحدها ممن عارضوه وخد عندك من دا كتير
بلاش ده كله
القتل والتعذيب كان سمة الفكر الاشتراكي ي اوطاننا
أما الان الفكر الليبرالي ماشاء الله خيانة وعمالة وتطبيع مع اعداء الامة وبيع لقضايا الامة مقابل المال والحفاظ علي السلطة
وخد عندك مين اللي بايع القضية الفلسطنية من اوائل الثمانينات الي الان اليست منظمة التحرير الفلسطنية وعلمانيو فلسطين من فتح الي الجبهة الشعبية لتحرير فلسطين
ثانيا
العلم والعلوم
يتهم الكثير من المعطلين واصحاب الاهواء (العلمانين)الفكر الاسلامي السليم انه ضد التطور والتقدم وانه سيصيب البلاد بردة علمية وهذا قول باطل اريد به باطل لان اي قارئ بسيط للتاريخ يعلم ان التطور الانساني في المجال العلمي والنهضة العلمية الحديثة التي استفادت منها اوربا كانت بدايتها من عند الحضارة الاسلامية ونقل اليهم عن طريق الحروب الصليبية وعن طريق الاندلس
يعني الدين الاسلامي ليس ضد العلم والتقدم العلمي وستجدوا الكثيرين من العلماء المسلمين الذين اثروا الحضارة الانسانية وستجد الكثير من الاسلاميين علي مستوي علمي وثقافي عالي ومكانة يشهد لهم بها القاصي قبل الداني
ثالثا
المضحوك عليهم او بيمارستان العلمانين
كلما تحدثت مع العلمانين عن انتشار الفكر الاسلامي بين الناس وانتشار الاسلاميين وسط الناس فيرد عليك احدهم فيقول لك انك شخص متخلف وبتضحك علي الناس وبتستغل طيبة قلبهم وجهلهم
هههههههههه
والله العظيم دي شغلانة تجيب المرض
طيب بما اننا متخلفيين وظلاميين والناس اللي بيحبونا جهلة مش عارفين حاجة
أنا من مكاني هنا امام شاشة الكمبيوتر اطالب بالمحافظة علي الثروة الانسانية التي تسير وسطنا دون ان نشعر بها ألا وهي العلمانيون
واطالب بعمل بيمارستان خاص بهم علي غرار بيمارستان العباسية للعقلاء (بلاش بيمارستان دي طيب خليها منتجع صحي احسن)عشان الناس دي بس هي اللي فاهمة وسطنا وفاهمة اكتر مننا وبيفكروا قبل مااحنا نعرف يعني ايه تفكير فعشان كده احنا المفروض نحافظ عليهم من الجهلة والظلاميين اللي هيبقوا طبعا بره البيمارستان عشان نحميهم من الجهل والتخلف
وعشان ممكن يوحاشونا وهما بعاد عننا نبقي نزورهم كل يوم ماعدا يوم الجمعة
طيب وليه صحيح منحطهمش في اقفاص زجاج عشان محدش من المتخلفين يلمسهم ونخلي البيمارستان بتذاكر ونخلي الاطفال يقعدوا يتفرجوا عليهم وهما بيقرأوا الكتب الخاصة بهم عشان نتعلم منهم ونقسم الاقفاص يعني مثلا قفص نكتب عليه قفص الاشتراكيين وقفص تاني نكتب عليه قفص اليبراليين وقفص مش عارف ايه
والله الواحد بيقول الكلام ده من خنقته محدش يزعل من الكلام بس لما تلاقي ناس بتدعي الاسلام كذبا وزورا وولائها الاول والاخير لهواها الشخصي وماشيين بهواهم وبيخلطوا الاوراق وبيهاجموا الاسلام عن طريق مهاجمة الاسلاميين يعني مثلا في واحدة ماشية في المدونات عمالة تسأل اخواننا المدونين ايه رايكم في بن لادن والزرقاوي ودي بقي الصراحة أي الشخصية دي اتوقعلها قفص لوحدها في بيمارستان العلمانين أو لو معرفناش نصطدها ،آسف قصدي ندخلها المنتجع فاتوقع انها تنكش شعرها وتطلع تجري ورا العيال الصغيرة في الشارع وتقولهم قولوا رايكم في بن لادن وقولوا رايكم في الزرقاوي أو تقعد تحدف طوب علي اللي رايح واللي جاي في الشارع ده طبعا لو مصطدنهاش ،يووه قصدي لو مدخلنهاش المنتجع
والله العظيم الواحد اتخنق من البشر دي خلاص واضح انها هربت منهم خالص وكدبوا كدبة وصدقوا نفسهم قالوا انهم مثقفين ومستنرين ولو مكنتش بتقرأ نفس كتبهم اللي بيقرأوها تبقي ظلامي وجاهل ولا حول ولاقوة الا بالله
بس خير نعوضها عليهم في البيمارستان باذن الله
بيمارستان =مستشفي
والسلام
اليعقوبي

هناك 29 تعليقًا:

Ahmed Al-Sabbagh يقول...

ربنا يكرمك

مقال اكثر من رائع والله

متفق معاك

احمد

طال الليل يقول...

حبيبى عز
مختلف معاك المرة دى وكمان ياريت تسمحلى أعتب عليك

طبعا العلمانية نفسها مفهوم لا أقبله والعلمانيين فى بلادنا معزولين أصلا عن التأثير فى القلوب وإن كانوا يؤثرون فى مجرى الأحداث لاسباب لا تخفى عن أحد

لكن فكرة الإقصاء والإبعاد مفزعة بالنسبة لى وإن حدثت سيكون صداها سلبيا على المشروع الإسلامى الشامل وعلامة لا تستقيم وقوة النهج الإصلاحى للعمل الدعوى الإرشادى
أفضل دوما إستمرار الحوار والدأب على كشف المستور من خططهم وبالمحاورة وقبلها بترشيد الوعى سينتهى الخطر العلمانى

لم يكن النهج الإسلامى ضعيفا إلى الحد الذى يجعل من النفر القليل ممن يتدثرون وراء ستار العلمانية خطرا محدقا وزلزالا مخيفا وإلا سنكرر سيناريوهات النظام التى لطالما أضحكتنا عن مجموعات تتألف من أفراد تسعى لقلب النظام

حين تقوم دولة الإسلام ستخنس هذه الفئة وتولى هاربة إلى حيث يقيم منظروها فى عواصم الغرب
لا خوف منهم فهم أضعف ناصرا وأقل جندا

لا ضير من الخلاف أخى ما نبل الهدف وبقيت أواصر المحبة والأخوة فى الله

كمان عاوزين نوفر تمن الزجاج محتاجينه عشان الغلابة


تحياتى

الفاتح اليعقوبي يقول...

السلام عليكم
عمي الصباغ
ازيك ياحبيبي
والله واحشني جداا
ربنا يكرمك ياحبي والف شكر ليك ياجميل
والسلام

الفاتح اليعقوبي يقول...

استاذي محمد
ربنا يكرمك ياجميل ويجازيك خير علي نصيحتك واحمد الله اني لي اخوة في الله مثلك ينصحوني اذ احسوا اني اخطئت


ولكن يااستاذي انت فهمتني غلط لان فكرة الاقصاء هذه مرفوضة عندي ولكن البوست كان غرضه السخرية منهم ومن كلامهم قط وليس اقصاءهم ولم اعني فكرة الاقصاء ولا اعتقد في هذه الفكرة ارضاءا لهم ولكن هذا هو ديننا
ولو امسك الاخوان الحكم لن يقصوا واذا ارادوا مهاجمة ومعارضة النظام فليفعلوا ماشاءوا فذها حقهم كمصريين ولكن ان يتدخلوا في امور الدين ويفتوا فيها بجهل فهذ مرفوض تماما فليس الدين مطية لاحد حتي يتلاعب به بهواه كيفما شاء لا اخوان ولا علمانين فالاصل في امور الدين هو الدليل الشرعي وليس الهوي
واما هم فهم بالفعل في رأيي الشخصي فهم قلة ولكن للاسف صوتهم عالي ومسموع فهم كالطبل يسمع صوته من بعيد وبطنه من الخيرات خالي ولا خطر منهم فهم لايفكرون للاسف لانهم لايتحدون الاسلاميين ولكنهم يتحدوا فطرة هذه الشعوب والتي جبلت علي الدين والايمان بالله
واتمني ان تكون وجهة نظري وصلت يااستاذي العزيز

وان كان علي الزجاج فاعتقد انه مهم عشان الناس متعديهمش ويصيبهم مااصاب الناس
بهزر

والسلام

جمعاوى روش طحن يقول...

مش البوست ده مكانه فى عاصفة النار يابنى


ما تتعلموا النظام شوية

و بعدين طالما الكلمة اللى أنا مش عارف أقراها لغاية دلوقتى معناها مستشفى

ما تتكبها ستشفى من الأول وحياة ........

مش ناقصة فزلكة


كل ده علشان نجحت


إخص

EmY يقول...

عز باشا و اهلآ بالمعارك
بص يا سيدي في رأي انا الشخصي المتواضع
ان الارهاب لا دين له مافيش حاجه اسمها ارهاب اسلامي لاننا لو فكرنا هانلاقي ان الدين الاسلامي ابعد مايكون عن العنف و الارهاب
سواء القرآن او السنه النبويه الشريفه امرونا بالرحمه و الاحسان و الموده يبقي ازاي الاسلام هايعلم الارهاب الي هو اصلا ضده
بالعكس الاسلام اول من نادي بحقوق اللانسان و الطفل و المرأه حتي في الحروب كانت اوامر الرسول كلها رحمه الا يقتل شيخ ولا مرأه ولتا طفل ولا راهب ولا تقطع شجره
يعني في الحرب رحمه هايبقي من غيرها ارهابين

لكن للأسف في ناس كتير بتاخد الدين ستاره لافعالهم زي الحملات الصليبيه الي تخفت ورا الصليب جه الدور علي ماس تتخفي ورا الاسلام علشان تكسب تعاطف الناس

رحم الله عبد الناصر ماتحملوش مسؤلية كل الي حصل راعي ان كان ليه اعوان فاسدين كتير و الراجل ليه انجازات كتير لا تعد كفايه ان وقتها كان لينا كرامه يا عز

و الاعتقالات و التعذيب السادات قام بيها علي اكمل وجه و مبارك كمان شغاله في عصره

كل احترامي للرئيس عبد الناصر الله يرحمه

و بلاش تعميم مش كل علماني كافر او مجرم او وحش زي ما مش كل اسلامي بن لادن

تحياتي ليك و سلامي للجعفري

نونو يقول...

السلام عليكم
للاسف الشديد اهو خلط الحابل بالنابل
ورمي تهم بالباطل
عارف المشكلة انهم بيستغلوا جهل البعض وبيحاولوا زرع العلمانية في رؤوسهم بحجة ان الدين نقي ولازم نتعده عن زبالات السياسة وكل واحد حر
وكلام فارغ من اياه
وبستشهدوا ان شفتوا اما الدين دخل في السياسة بن لادن عمل ايه وعلان عمل ايه وكان دة اتعمل من تلقاء نفسه وما هواش رد فعل لهمجيتهم
تعالى بقى نشوف واحد صحفي كبير مسيحي مش فاكرة اسمه اليومين اللي فاتوا انشق عليهم لما المحكمة حكمت ان ممكن ىالطلاق يقع بالمحكمة بعيدا عن الكنيسة فسابهم وقال مش لاعب
طيب ما هو دة علممانية برضه
بيناقدوا نفسهم
وبعدين هتخرب على روسهم قبلنا
تحياتي للطرح الاكثر من رائع
بارك الله فيكم

الفاتح اليعقوبي يقول...

السلام عليكم
عمي جمعاوي
اولا
اخص عليك أنت
ثانيا
يامعلم مدوناتنا مدونات شمولية بتتكلم في اي موضوع
ثالثا
وبعدين علم شرعي ايه اللي انتم بتدرسوه المستشفي زمان ايام العرب كان اسمها بيمارستان
مش عارفها ياجمعاوي لاحول ولا قوة الا بالله مش املي فيك ياكبير
رابعا
أننا نأتي من دمنهور مش انت فيها تبقي هي كده
والسلام

الفاتح اليعقوبي يقول...

الاستاذة ايمي
يااهلا بالمعارك تعليقك جميل جداا يااستاذة وعقلاني
بس دعيني اوضح
الارهاب لادين له بالفعل
ولكن الذي نراه من علمانيو مصر هو محاولة الصاق تهمة الارهاب بالاسلام والاسلاميين في المقابل كان هناك اصحاب فكر علماني كثيرين متورطين في عمليات ابادة جماعية وليست عمليات منفردة لماذا يذكر هذا ولا يذكر ذاك
اقول لك بمنتهي البساطة يااستاذة عندما تحاورت مع احدي المدونات في يوم من الايام قالت لي اقرا عن العلمانية والكلام ده كله بالرغم اني كنت اقرا مقالات لصحاب فكر علماني قررت ان اقرا عن بدايات الفكر العلماني وعصر النهضة والحريات في اوربا في بداية تلك الترة فوجدت ان العلمانية هذه فكر خرج ليعطل الاديان عامة وليس الدين الاسلامي فقط وقد يقبل هذا مع النصرانية لان اغلب النصرانية روحانيات ولكن الاسلام ملئ بالاحكام التي تنظم كل مناحي الحياة من معاملات وسياسية واقتصاد فأما ان نتبع فكر ماركس السياسي او كر الثورة الفرنسية او نتبع ماامر به الله


أما عبد الناصر
فانا اختل معه ف امور ولكن بالفعل هو لم يكن خائن او عميل وكانت تحركه رووح وطنية ولكن رفقاء السوء هؤلاء هم اقرب الناس اليه واول الفكر القمعي والتجسسي علي الشعب كان ايام عبد الناصر والطليعة الاشتراكية بيقال فيها انها كان فيها حوالي 30000 فرد اغلبهم يعمل باسلوب التقارير
ولكن مثلا بالرغم مما فعله عبدالناصر بالاخوان خاصة من قتل وتعذيب وتلفيق فالمرشد استاذ محمد مهدي عاكف بيقول ان اسوء العصور اللي عاش فيها هو العصر ده في عهد الرئيس الحالي لان عبدالناصر خلق الوطنية وحب الوطن في الناس وهذا يشهد ولكن القمع والايذاء تكون دائما عواقبهم وخيمة واي منصف بحق يعلم هل الاخوان كانوا جناة ام مجني عليهم في عهد عبدالناصر


ثالثا
الناس اللي بتتخفي ورا الاسلام لتحقيق مصالحها وهذا كلام سمعته كثيرا عن الاخوان بالخصوص وهو كلام باطل اريد به باطل
يعني ملا يااستاذة ايمي انت نفسك تبقي شخصية ذات نفوذ وثروة تروحي للاخوان ولا تروحي الحزب الوطني
طبعا تروحي الحزب الوطني
لان اللي بيمشي مع الاخوان بيشوف بلاوي من اعتقالات ومصادرة اموال وبهدلة وممكن توصل لتفكك اسري وابتلاءات من هذه كثيرة فأي دنيا او تحقيق مصالح في هذا
طيب ليه مانقولش ان الناس دي ليها فكرها الخاص بها واللي مؤمنة بيه وان الناس دي بتضحي عشان فكرها اللي بستتوحيه من دينها ومن احكامه
يعني القرآن مثلا ثلثه عقيدة والثلث الاخر قصص والثلث الاخير احكام
اين يذهب بثلث القران في عصرنا؟؟؟؟؟؟
نلغيه عشان طلع مذهب اسمه العلمانية لايؤمن بتحكيم الدين ويعطل احكام كثيرة من الشريعة

رابعا
اعلم والله ان العلمانين ليسوا كلهم علي نفس الشاكلة وليسوا كلهم متطرفين كما اعلم ان ليس كل الاسلاميين اسوياء في فكرهم
ولكن يااستاذة دائم الفيصل بين اي اثنين مسلمين هو شرع الله
واعتقد ان مشكلة العلمانين انهم اول ماقرأوا قرأوا عن الحضارة الاوربية وفتنوا بها وتحولت عندهم الي مرجعية ولم يقرأوا اولا كلام ربهم وسنة نبيهم والتي يجب ان تكون المرجعية الاولي والاخيرة مع اجتهاد علماء الامة الثقات القادرين علي الاجتهاد ثم اقرا كيفما شئت ولكن اولا اترك القران والسنة ليكونوا مرجع لك وحياة سلفنا الصالح ثم احكم بعدها فما وافق كلام ربنا وسنة نبينا واخلاق هذا الدين اخذنا به وما خالف هدي ربنا وسنة نبينا واخلاقنا كمسلمين تركناه وراء ظهورنا
يقول تعالي :(وما كان لمؤمن ولا مؤمنة اذا قضي الله ورسوله امرا أن يكون لهم الخيرة من امرهم)0

وعامة خير ياستاذة
وكل في النهاية يفضي الي ماقدم

ومدونة يارب ثبات علي طريقك ترحب دائما بالمعارك وخاصة مع مدونة كله ماشي

والسلام

الفاتح اليعقوبي يقول...

الاستاذة عاشقة النقاب
جزاك الله خيرا يااستاذة علي التعليق
والله فعلا نحن مانريد لهم الا الخير ولكن ايضا لايصح ان نري ديننا يهاجم ويشكك فيه وتعطل احكامه وهو الحق والصواب ولا حق غيره ثم نواليهم علي حساب ديننا
وعامة لعله خير
والسلام

dr3ashakt alaksa يقول...

ماشاء الله عليك ياخ يعقوبى

انا بس عايز اضيف حاجه

ان العلمانين والمخدعوين بأفكارهم دون أن يدروا بصراحه والله العظيم

انا بحس انهم أشد عداء لكل ما هو اسلامى أكتر من اعداء الأسلام أنفسهم

هاداهم الله الى الخير والهدايه

وماشاء الله عليك أسلوب سخريه رهيب

ملحوظه
قاعدت افتكر بيمارستان يعنى آيه من يوم ما اخدتها فى تاريخ تانيه اعدادى

بس افتكرتها حاجه تانيه

المهم الحمد لله انها طلعت مستشفى

الذاكره خانت الواحد

خير ان شاء الله

طال الليل يقول...

أخى فى الله محمود

حبيبى أنا قرأت المقال ثانية وفهمت ما ترمى إليه ولعل تعليق الأستاذة إيمى يوضح لك أن المقال ربما أوضح لك أن تعليقى كان خوفا من سوء فهم كلامك وربما

أنا طبعا أتمنى أن يصل لحكم بلادنا شرفاء يحكمون بالشريعة أيا كانت جماعتهم التى إليها ينتمون
لكن سأطرح عليك موضوعا حواريا شائكا أرجو لو إتسع صدرك له

هل من ضمانات تجعل معارضة الحاكمين بالشريعة وليس الشريعة نفسها مسألة مأمونة
بعبارة أدق هل يمكن أن نعارض الحاكم فى ظل حكم الشريعة دونما أن نتعرض للوصم بالعلمانية أو المروق

أرجو أن نشترك جميعا فى التعريف بهذه الضمانات ونشرها لأن ذلك سيعمل فى وجهة نظرى عملا كبيرا من شأنه إزالة رواسب ومخاوف فى نفوس بعض الناس الذين تاثروا بإنطباعات سلبية ودعايات موجه ضد المشروع الإسلامى الشامل

حسن حنفى يقول...

بوست جميييييييييييييل جدا

ربنا يكرمك

ياااااااااارب

تقبل مروري

albaghdadi يقول...

بوست رائع
وجزاك الله خيرا

albaghdadi يقول...

وشرفنا بمرورك

دعوة الفردوس يقول...

في وجهة نظري
العلمانيون هم منافقي العصر

وبالعودة للتاريخ الأسلامي في فترة العهد المدني بالذات أتيقن من ظني هذا

جزيت خيرا

shaimaa samir يقول...

السلام عليكم ورحمة الله وبركاته

يشرفنى دعوتكم لحضور حفل توقيع ديوانى الاول
اطياف الصمت

وذلك فى الثانى من شهر اغسطس
يوم السبت القادم باذن الله
الساعة 7
بمكتبة طلعت حرب


يشرفنى حضوركم جدااااا


(اليعقوبى والجعفرى
يسعدنى تشريفكما جدااااااااا
والتفاصيل فى المدونة

دعواتكما

shab masry يقول...

عز تجارة :)
ادخل قدراً عليك...
كيف حالك ايها الضخم :)؟

انا قلت اعدى اسلم وما شاء الله.. من المدونات القليلة التي ربما تحمل صموداً..في وسط مدونات.. تحمل طابع اسلامي وتدخل عليها لترى اى شئ غير الطابع الاسلامي..!

ثبنتا الله واياك على الطريق

براء :)

الفاتح اليعقوبي يقول...

السلام عليكم
dr3ashakt alaksa
ربنا يكرم حضرتك يااستاذة
مشكلة العلمانية انها فكر قام ضد الاديان كلها وليس الاسلام وقد يقبل افراد الاديان الاخري بهذا الامر لان اديانهم محرفة أما الاسلام فهو نظام قائم بذاته ناسخ لما قبله وحاكما لما بعده
وربنا يكرم حضرتك يااستاذة
وعامة خير
والسلام

الفاتح اليعقوبي يقول...

استاذي الكبير جدااا محمد
ربنا يكرم حضرتك يااستاذة بالفعل سؤالك يااستاذي اكثر من رائع وماشاء الله عليه
وأنا اعلم يااستاذي مدي حرصك علي الخير لي وجزاك الله خيرا عن هذا
بس السؤال ده عايز بوست لوحده الواحد يفكر في الموضوع ويحيط به ثم نطرحه في بوست
وجزاك الله عني كل الخير
والسلام

الفاتح اليعقوبي يقول...

حسن حنفي
الف شكر ليك ياجميل
ومتقولش كده دي مدونتي اسف مدونتك يعني
والسلام

الفاتح اليعقوبي يقول...

البغدادي
ربنا يكرمك يااستاذي وباذن الله نتواصل بالخير وللخير
والسلام

الفاتح اليعقوبي يقول...

استاذة دعوة الفردوس
ربنا يكرم حضرتك علي الزيارة واوافقك في كلامي واقراي سورة النساء لتعلمي اكثر وليس معني هذا اننا ملائكة ولكننا اصحاب ذنوب وعصاة ولكننا لانجدال في دين الله ولا نتقول ولا نتجرأ علي اوامر الله
وليس معني اننا نظن انهم كذلك انهم بالفعل كذلك ولكنه ظن قلبي ولايجوز لنا ان نقول لاحدهم في وجهه هكذا
هدانا الله واياهم الي مايحب ويرضي
والسلام

الفاتح اليعقوبي يقول...

استاذة شيماء سمير
ربنا يوفق حضرتك في اول ديوان وباذن الله تصبحين من افضل الشاعرات في اوطاننا فنحن نحتاج الي شعراء وشاعرات اسلاميين ليوصلوا الالام تلك الامة الي الناس بسهولة
وباذن الله هاحاول انا والجعفري القدوم
وربنا يكرم حضرتك يااستاذة ويوفقك
وعامة لعله خير
والسلام

الفاتح اليعقوبي يقول...

عمي في الله براء بيه
ازي معاليك يافندم
وحشني والله ربنا يكرمك يارب
وأنا برضه زيك باستاء جدااا من المدونات دي ولكن الغالب الاعظم هم اصحاب الرؤية الاسلامية الواضحة واخواننا الاخرين قد نختلف في طرحهم ولكن هم اخواننا ولهم علينا النصيحة ولنا عليهم ايضا النصيحة
وعايز ابقي اشوفك عندي في المدونة كتير
والسلام

ابو اعصار يقول...

من احد الاسباب اللي ركزت هالمصطلحات الافلام
انت تعرف اي جريمه اذا ارتبها اي شخص غير مسلم تسمى باسمها جريمه لكن اذا حصلت من مسلم ركز الاعلام على دينه وانه فعل ذلك بسبب الارهاب الخ....لكن يبقى ان بعض ممن يسمون نفسهم علمانين عندهم دماغ لسه بتفكر وبداو يراجعوا مواقفهم



اشكرك بس كنت اتمنى انك توضح ان العلمانيين فيهم تيارات مختلفة

ahbabcom يقول...

جزاكم الله خيرا على الموضوع
لكن كان لي بعض النقاط
اولا انك لم تعلق على العلمانية من الدخل
ثانيا انك يتضح من كلامك انك تنقل بعض وجهات النظر دون مباشرة او قراءة كتب مؤسسي العلمانية
ثالثا من الاوقع عندما تكتب في مثل ذلك ان تبدا بنظرة من الداخل
بان تظهر المفارقات والتباين في كلامهم ثم تعرض وجهة نظرك ثم مجهة نظر مؤيديك
رابعا اني احبك في الله

_**( قلب الأسد )**_ يقول...

بوست جديد من نوعه 0
وبجد رائع وممتاذ
تقبل تحياتى
...........
ادعوكم لقراءة البوست الجديد فى مدونتى تحت عنوان
ســـــــــر البقــــــــــاء

حسن حنفى يقول...

مستنييين جديد حضرتك

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا