الأربعاء، 26 مارس، 2008

الثعلب والاسد والحمار

بسم الله والصلاة والسلام علي رسول الله صلي الله عليه وسلم


في المدونة القديمة زمان كنت نزلت قصة قراتها قبل كده وعاجبتني بس حابب اكسر بيها جو المدونة شوية وبرضه بحس بيها اوي اليومين دول اوي وانتم كمان هاتحسوا بيها


كان يامكان ياسعد يااكرام مايحلي الكلام الا بذكر النبي عليه الصلاة والسلام


كان فيه غابة والغابة فيها اسد وحمار وتعلب فالمهم الاسد في مرة مرض جدا ومبقاش عارف يصطاد خالص والتعلب اللي كان عايش علي اللي بيتبقي من الاسد طبعا هايجوع زيه وبس


الدكتور راح للاسد وقاله حلك ان تاكل اكلة حلوة يترد بيها صحتك من الاول وجديد فقال له الاسد ازاي قاله معرفش هو ده حلك وعلاجك واخرك معايا كده وسلام وساب الاسد يضرب اخماس في اسداس


فالاسد افتكر ان في حمار قاعد في اخر الغابة


فراح للتعلب وقال له بص ياتعلب انا عايز اكل اكلة حلوة عشان صحتي تترد لي تاني فقال له التعلب طيب وانا عمل ايه يا كبير قال له تروح تيجب الحمار اللي في اخر الغابة عشان اكله


فالمهم التعلب ام ضحك ضحكة واسعة شوية وقال طيب ازاي هيجي لحد عندك ،الاسد قال له بص ياتجيبه اكله والا اكلك انت ماشي


التعلب برعب يرد علي الاسد ويقول له حاضر حاضر هاجيبه لك


وذهب التعلب الي الحمار


الحمار(مرحبا بالتعلب):ازيك ياتعلب عامل ايه


التعلب :بخير والله ياحمار وانت عامل ايه؟
الحمار :الحمد لله
الثعلب :ايه ياحمار متعرفش اللي حصل للاسد وااللي صابه وحصله
الحمار :اه فعلا سمعت الكلام ده فعلا
الثعلب :ده هوبيقول انه عايز يتنازل عن العرش بتاع الغابةعشان صحته خلاص انت عارف تعبت خالص
الحمار :اه ربنا يشفيه
الثعلب :بس انا عندي ليك مفاجاة
الحمار (في تشوق ):ايه هي؟؟؟؟؟؟؟
الثعلب :لما الاسد استشارني في موضوع مين اللي يمسك بعده الحكم فقلت له الصراحة مفيش احسن من الحمار اللي يستاهل المكانة الرفيعة دي وهو فعلا بعتني ليك عشان يتفاهم معاك في الموضوع ده ويمسكك مكانه
الحمار (بسعادة بالغة):بجد ياتعلب ربنا يخليك ويخليه لينا طيب يلا بينا
الثعلب (وهو يخفي ضحكة ):يلا بينا
يمشوا الاثنين مع بعض واول مايدخلوا علي الاسد يهجم الاسد علي الحمار والحمار يفلفس منه ويهرب بسرعة بس الاسد بيكون قطعله ودنه
الثعلب (غاضبا بشدة ):حراااااااااااام عليك اللي انت عملته ده مكنتش عارف تستني لحد مايدخل جوا العرين بتاعك وتهجم عليه لازم اللي انت عملته ده
الاسد (في برود):خلاص مفيش مشكلة روح هاتوا تاني
الثعلب (ثائرا):انا مش هاجيبلك حاجة ولا هاجيبلك حد
الاسد (وهو يمسك الثعلب من رقبته):انت هاتجيبه ولا اكلك انت
الثعلب:لالالا خلاص هاجيبه انا
ويذهب الثعلب الي الحمار مرة اخري ويدخل عليه بقوة وهو رازعا الباب بقدمه وثائرا للغاية
الحمار (ثائرا هو ايضا):اطلع بره انت لاصاحبي ولا اعرفك انت كنت عايز تبعني للاسد بره بدل ماخلص عليك
الثعلب (وهو بيشخط):مشيت ليه ياغبي ايه اللي مشاك
الحمار:انت اعمي ده كان هايكلني ويخلص عليا ده حتي قطعلي ودني
الثعلب (متطلفا):ياغبي افهم الاسد لما انت دخلت عليه لقي ودنك كبيرة اوي ووجد انك مش هاتعرف تلبس التاح بتاع الغابة بودنك دي كلها فقال يقطعها لك عشان تلبس براحتك مش كده برضه
الحمار :اه تصدق مخدتش بالي انا خايف ليكون زعل مني لما جريت من ادامه كده
الثعلب :لا متخفش هو بعتني ليك قالي روح شوف الغبي ده راح فين وجري كده ليه
الحمار :تصدق عنده حق يلا بينا نروح له احسن يزعل مني تاني
ويروحوا للاسد بس المرة دي برضه الحمار بيهرب والاسد المرة دي بيقطع له ديله ونفس الحوار يتكرر الثعلب مع الاسد ويرجع الثعلب تاني للحمار عشان يجيب رجله ويدخل عليه واول مايدخل يقوم قفشه من رقبته
الثعلب (ثائرا):صحيح انت حمار وصدق اللي سماك حمار
الحمار (وهو يدفع الثعلب بعيدا ويحاول ان يضربه):انت عايز تبعني ليه ولا ايه حرام عليك ده كان هايموتني ويخلص عليا
الثعلب :ياحمار افهم الاسد لما شاف ديلك المعفن ده قال ازاي هاتقعد علي عرش الغابة بالديل الغريب ده فقال يقطعهولك عشان تقعد براحتك علي العرش وهو حتي بعتني ليك عشان افهمك الموقف صح احسن تكون فهمت غلط اصله فاهم انك حمار وممكن تفهم غلط
الحمار :بجد انت بتتكلم بجد ولا بتلعب بيا شكلك كده بتلعب بيا
الثعلب :يالهوي علي غباءك انت مش واخد بالك لغاية دلوقتي الراجل شاريك وانت بيعه بغباءك ده وبعتني ليك عشان اجيبك تاني ونروح له
الحمار (بسعاده ):بجد ياحمار طب يلا بينا علي الاسد
ويذهبوا جميعا الي الاسد وهذه المرة الاسد يهجم علي الحمار وياكله وياكل معه الثعلب ويفرح الجميع الا الحمار
المهم اللي نشر القصة دي قالك ايه
قال ان الاسد ده هو اسرائيل
والثعلب هو امريكا
وجائزة كبيرة اوي للي يعرف مين هو الحمار
والسلام
اليعقوبي

هناك 18 تعليقًا:

ابن حـجـر الـعـسـقـلانـى يقول...

بصراحة قصة جامدة جامدة

بس المشكلة إنى ماعرفتش مين الحمار ... يا
ترى مييين ؟؟
يا ترى مييين ؟؟
يا ترى مييين ؟؟
يا ترى مييين ؟؟
يا ترى مييين ؟؟

ابن حـجـر الـعـسـقـلانـى يقول...

أنا قرأت التدوينة اللى فاتت .. و حابب أبارك لكم على المدونة الجديدة و يا رب تكون فى ميزان حسناتكم

و بإذن الله متابع ليكم قدر استطاعتى

أنا إنسان يقول...

حضرتك كده بتظلم الجمار بينا
!!!!!!!!!!!!!
الحمار مابينامش على الشوك
لكن احنا بنام على كل حاجه
حتى بنام على كرامتنا
!!!!!!!!1

امام الجيل يقول...

بس الحمار ده مشهور للاسف جدا
وكلنا عارفينه
وكلنا شاركنا فى حموريته
:)

والمشكلة عارفين عاقبته
وساكتين
ونايمين
ومستسلمين

لا بجد حمار صحيح

فرنسا هانم يقول...

مين الحمار مين الحمار ؟
ميييييييييييييييييين ؟
طيب ممكن اول 27 حرف من اسمه ؟

EmY يقول...

ايه الجمال ده
فعلا قصه جميله اوي و تلخص الحال
بس مين الحمار هو علي العموم الحمير كتير

تحياتي

عاشقه الفردوس يقول...

:))))))))))))))))))))))))))))))
:))))))))))))))))))))))))))))))

:)))))))))))))))))))))))))))))))


والله الحمار صعب عليه

بس طلع حمار حمار مش تقليد يعني

aya يقول...

السلام عليكم ورحمة الله وبركاته
بسم اللى الرحمن الرحيم

ايه ده ايه ده
يعنى انا لو قلت مين الحمار هاخد جايزة؟؟
هييييييه
الحمار هو .....اممم

تصدق مش مفروض نظلم الحمار
التعلب هو اللى مكار

تحياتى ليكم وربنا يكرمكم ويوفقكم

السلام عليكم

طال الليل يقول...

حمار إيه بس

دة مفيش أحمر من كدة ولا أخضر

المهم إحنا برة الكلام دة كله
للللليييييييييييييييييييييييهههههههه
إحنا بقى بنخش عالوحش المفترس بنفسنا كدة ومعرضينها ومن غيرالتعلب ميتعب نفسه ويجى

ياباشا عليك وعلى قصصك اللى بتقلب علينا المواجع

إيه الحلاوة دى يابنى

أنا عرفت الحمار بس مش هقول عشان النهاردة الجمعة وعندى الجمعة مفيش سياسة خالص

الفاتح الجعفري يقول...

طيب واحنا عمل ايه دلوقتي يعني
الحمار اتاكل هو والثعلب وبعدين فكرك اسرائيل دي اسد ,يابني اسرائيل هي التعلب
وامريكا الحمار طبعا
ومفيش اسد
:)
ومع تحيات الجمبري ياصحبي

elmancy يقول...

السلام عليكم ورحمة الله وبركاته
هههههههههههههه
بجد قصة جميلة أوى ولخصت كل إللى إحنا فيه بس إسرئيل مش أسد ولا حاجة بالعكس ده خنزير وخنزير كبير كمان
ولا أمريكا تعلب ولا حاجة ده أمريكا هى الحمار الحصاوى فى الليلة دى أما بقى الحمار برضو هو مش حمار لا حاجة هو بس نيته سليمة وكان عايز يخدم بس مشكلته لإنه مش مؤمن لإن لا يلدغ المؤمن من جحر مرتين وده ياعينى إضرب على قفاه كتير وبرضو رايح بس قصة حلوة
تحياتى ليك
http://www.elmancy2000.blogspot.com/
ياريت تنورنى

coca يقول...

ياااه والله واشحني البلوج ده وبوستاته

طبعا مفيش حمار غير اللي عمره ما بيتعلم ابدا تبقي الحاجه ادامه هتنطق وه حماار يرجعلها تاني

يبقي قاده العرب حمير اذن

والسلام

بوست جامد
انا بحب القصص دي اوي الطفوله المشرده

تحياتي

النجم القادم يقول...

السلام عليكم حبيب قلبى الغالى فينك

ايه القصص الحلوة دى انا مسمعتها من ايام الابتدائى

بس بجد حلوة اوى الله يعزك بس الحمار هو ؟؟؟؟؟؟؟؟؟؟؟؟

هكذا علمتني الحياة في ظل العقيده يقول...

انا لله وانا اليه راجعون

appy يقول...

هو ليه انت بتقول على الحمار كده
هو طيب بس
كده خليته صعب عليا ينفع كده

عارف الحمار مين كل البلاد اللى سيبه الاسد يتحكم فى مصريها ويحركها

عبدالرحمن فارس يقول...

طب وليه الغلط في الحمير بس طب احنا كده بنشتم الحمار

.........

قصه رائعه


محبتي

the movie fitna يقول...

don"t miss the great movie
Please support this film on youtube

nonoymm يقول...

طب ليه الاسئلة الصعبة المحرجة دي
طب ما فيش اختيارات


حكاية تلخص الوضع الماساوي اللي وصلنا له
تحياتي لحضرتك يا اخي يعقوبي

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا