الفضيحة !!!!!!!! اسف اقصد الجعفري

بسم الله والصلاة والسلام علي رسول الله عليه من الله افضل الصلاة واتم التسليم

انه في احد الايام حالكة السواد وهو يوم6 من شهر ديسمبر سنة1986

ولد ذلك المدعو بعد ماحرم والداه 6سنوات من الانجاب فمن الله عليهم بذاك المدعو الجعفري

صاموا وصاموا وصاموا وفطروا علي جعفري

ولا حول ولا قوة الا بالله

كل سنة وانت طيب ياحبي وكل سنة وانت الي الله اقرب وكل سنة وانت بتزيد علما وفهما

يالا خير طبعا الجعفري معملش عيد ميلاد لان ابوه الحاج الجعفري الاب صوفي

ايوه صوفي

(مستنين الحكم فيه يااستاذ عصفور وياضكتور خالد وجمعاوي كمان)

فهو بيعمله مش عيد ميلاد بيعمله ختمة ختمة صوفية كل سنة هتوقف لما يتجوز

وده كان ندر علي والده

علاقتي بالجعفري

علي فكرة يااخوانا انا والجعفري نعرف بعض من حوالي 15او 16سنة جيران سنين بتعدي علينا تخيل 16سنة

فصاحبنا ده كان ليه فضايح وهو صغير لاتنحكي ولاتنقرا حاجات تودي في داهية

وعشان اعرفكم الطفولة المشردة لذاك المدعو

ابوه بيقوله يابني انا اعرف ان اي عيل في الدنيا اول كلمة يقولها بابا او ماما اما انت فقلت يابن (البوبي)طبعا بلغة دارجة منحلة

كنت وانا طفل عيل غلبان فعلا ومؤدب وهو كان ركبه ميت شيطان فكان كل مانلعب مع بعض يشتمني ويجري وكان سريع جدا وكان له اسلوب في الجري كان يشد الشورت بتاعه لحد صدره فوق ويحط الشبشب فوق ويجري ومكنتش بلحقه بس كنت بصطاده وهو نازل من الاسانسير وواقوم اضربه واطلع لمامته واقول لها ياطنط جعفري ضربني (طبعا مبلقهاش جعفري)هو ليه اسم دلع اغلب الناس بيقولوه له الي الان رغم انه اشتغل

فالمهم كان طفل ومطلوب في محاكمة العدل الدولية في لهاي وكان من اكثر من اوذي منه الواد الغلبان اخوه

في مرة كانت ولدته عندنا قاعدة مع والدتي فلقينا الواد اخوه داخل وقالب وشه وبيقول لمامته وهي عند جارتها ماما جعفري كل حته الفراخ بتاعتي لقيت والدته كانت هتلتطم وعمالة تقول يافضحني يافضحني هي قعدت تقولهم الكلمة دي لحد مانزلت

وطبعا جرائم كثيرة جدااااا بس الوقت اللي يكتب ندخل في المرحلة اللي بعد كده

ثانوي

في فترة تلتة اعدادي وثانوي كان الحال اتقلب انا بقيت قتال قتلة واصبحت شخصية تانية (فترة المراهقة)وعم الجعفري ربنا هداه وكنا مع بعض في الدروس في الثانوية العامة حوالي 3دروس

وكان مثلا لو الدرس الساعة 7ننزل نستنا الاستاذ الساعة6ونطلع بعد الدرس بساعة

واثناء الدرس تدبير لمكائد للترزيل علي الاساتذة وبنت جارتنا اللي كانت معانا في الدرس بس

لاعلم ولا يحزنون

فهو كان ربنا هداه وابتدي يصلي فكنت معتبره شيخ

وكنت بسال نفسي ايه الي خلي الشخصية دي تهدي كده

ولاني مش متعود علي الالتزام فكنت بساله طيب يابني انت متعرفش بنات طب هاتجوز ازاي او ايه مواصفات البنت اللي انت عايز تتجوزها قالي اوصاف عادية لاي واحدة ملتزمة (الكلام ده في ثانوي)فقلت له طب متاخد واحدة يعني مش ملتزمة اوي واهديها انت قالي اش دراني كام واحد هداها قابلي ؟؟؟؟؟؟؟؟؟؟؟؟؟؟؟

جامعة

ربنا هدانا احنا احنا الاثنين في فترة تانية جامعة واسال الله ان يمن علينا بالثبات والهداية وبقينا احنا الاتنين من الاخوان

بس هو هزارنا مع بعض كده هاولع فيك وهو يقولي انت غلبان ومتعرفش تعمل حاجة

رغم ان الفارق الجسدي بينا واضح ولصالحي ولله الفضل والمنة بس هو بيقاوح

ففي مرة بيقولي بص ياعز المعركة اللي بيني وبينك مش بالقوة دي بالعقل فقلت له ده اللي مطمني وهذا مايهدا سريرتي اذا حدثت بيننا مواجهات

بجد فعلا

علي فكرة انا والجعفري متفاهمين جدااااااا فكريا مبنختلفش كتير وتوارد الخواطر والافكار بينا كتير اوي يعني مثلا نبقي قاعدين في لقاء وتيجي فترة الخواطر فهو مثلا هيقول خاطرة فالاية اللي هو بيقولها هي نفس الاية اللي كنت هاوقول فيها خاطرتي وبتحصل كتير جدااااااااااا

ومن كام يوم كنت تعبان فبكلمه لقيته تعبان بنفس المرض

بجد والله

التوافق بينا عالي جدا رغم اختلاف الشخصيات لكن الفكر واحد

والله ياجعفري

اني احبك في الله

وانت بالفعل صاحب فضل بل انت احد اسباب تعريفي بالاخوان

وبجد

اني احبك في الله

كل عام وانت بخير وبصحة وعافية

والسنة الجاية تكون واخد العهد من ابوك

اليعقوبي

والسلام