الأحد، 19 أغسطس 2007

فيلم حياتي

بما ان هذه المدونة ملك لصاحبها فصاحبها هيكتب خاص بيه شوية بس الناس هتستفيد منه كتير
بحكي القصة دي عشان اغير الجوبتاع المدونة شوية لاني حاسس ان في ناس اتخنقت فهحكي قصتي من اول ثانوي لحد ماتعرفت علي اخواني وبقيت واحد منهم
واسيبكم مع القصة اللي تحمل لي ذكريات كثيرة جدا وعلي فكرة الكلام اللي حصلي ده يحمل رسائل كثيرة جدا لي وكاني كنت اساق سوقا الي هذا الطريق المهم اسيبكم مع القصة
سلام
القصة ترجع من اربع سنين لما كنت في الثانوية العامة وكنت في فترة ثانوي عايشها بالطول والعرض فترة ربنا مايكتبها علي حد المهم
جبت في تانية ثانوي88,5في المية وكملت علمي وفاكر وقتها كان نفسي اطلع صحفي عشان احارب وافضح الفساد فالحاجة والدتي ربنا يكرمها قالت بزعيق وقتها احنا بنصرف عليك ده كله عشان تتطلع صحفي انت هتدخل هندسة وباين كده انها نسيت تقول ان شاء الله
فاستهبلت في تالتة عناد مع امي وخلاص رغم اني كنت كويس دراسيا بس ربك لما يريد
وجبت في تالتة كله علي بعضه83،5في الميه نسيت حاجة ابويا طول سنة تالتة بيقول لي لما كان شايفني مستهبل يابني خش ذاكر نص درجة هتفرق معاك فانا الصراحة كنت باخد كلامه ده علي جانب التفويت المهم النبؤة بتاعة ابويا اتحققت
انا كنت جايب بالدرجات 242،5 تجارة القاهرة اللي في نطاقي الجغرافي واخدة كام ياتري حد فاكر انا اقولكم واخدة 343اي والله وعين شمس كانت واخدة 242المهم اتحدفت في عين شمس اللي بيني وبينها مسافة لايستهان بها في المقابل تجارة القاهرة بيني وبينها حوالي 10او15دقيقة بالكتير
بس في حاجة غريبة تحصل معايا انا وجدتي الله يرحمها وامي
حكاية الرؤي بيجيلنا وقت نشوف رؤي واضحة جدا يعني مثلا
قبل مايجي نتيجة التنسيق حلمت اني داخل عين شمس ومش بس كده لاوفي الحلم كان الكلية مكسرة وقالوا لنا تعالوا بعد اسبوع وفي نفس الرؤيا دخلت الكلية وانا راكب عربية مع بنت من الكلية
وفعلا بعدها التنسيق جالي تجارة عين شمس والكلية كانوا بيجددوها والدراسة ابتدت بعد اسبوع فعلا بس حكاية البنت دي تاويلها مكنش كده النساء في الرؤي في الغالب تبقي دنيا وليس دين وفعلا هما سنتين بتوع عين شمس كانوا دنيا
ندخل في المهم
دخلت الكلية واتعرفت علي شلة كنا تلاتة ولاد وتلاتة بنات وابتديت من ساعتها الضحك علي نفسي واقنعت نفسي ان البنات دول زي اخواتي ،والفيلم اللي بيحكيه كل واحد تكلمه علي حكاية البنات دي
بقولك ياعم دي زي اختي، دي لو عريانة انا غطيها، انا مش ممكن ابصلها ابدا ،انت عبيط
المهم
بس كان في شئ بيجذبني اني ابعد عن الاختلاط والفساد اللي حواليا يعني في مرة كنت قاعد في المدرج وقطاع في المدرج انا قاعد مع اصحابي اقول نكت وبشر اتلمت حوالينا وعمالة تضحك ،واجاركم الله اخوكم لما كانت بتفتح معايا في حكاية النكت دي كانت مبتقفلش وكانت النكت دي شغلتي
فالدكتور دخل وكانت المحاضرة بالليل فسرحت اوي وبصييت للسما(من شباك المدرج) فافتكرت ستي الله يرحمها وافتكرت الموت مرة واحدة فاكتئبت وبعد المحاضرة ماشين احنا والبنات عشان نوصلهم فانا ماشي ساكت ومبوذ فواحدة فيهم بتسئلني انت مالك في حاجة فقلت لا فالحت اقولها في ايه
فقلتها كلمة غريبة وهي ردت عليا برد اغرب
انت تخيلي لو احنا موتنا دلوقت وقابلنا ربنا هيعمل معانا ايه
فردت بتلقائية غريبة وقالت لي وفيها ايه احنا مبنعملش حاجة غلط (يعني معندهاش اي مشكلة انها تقابل ربنا في اي لحظة)يقين جامد ربنا يثبتنا رغم انها كانت مع ولاد وبتهزر معاهم رغم اللبس اللي مش اسلامي(ربنا يهديني ويهديها)0
الكلمة نزلت عليا زي القلم وفوقتني طب ده سيدنا ابوبكر الصديق مقالش كده
ولا النبي عليه الصلاة والسلام قال كده
ولا اي حد صالح قال كده
فالمهم قعدت اكلمهم في الدين شوية لاني مكنتش جاهل ولله الحمد كان عندي مخزون كويس واتفقنا علي حاجة اننا نيجي تاني يوم صايمين وبس
تعدي الايام ويحصل قصة حب بين الولدين صحابي مع بنتين والبنت الثالثة كانت مكتوب كتابها فانا رغم دماغي المولعة مكنتش مؤمن بحاجة اسمها حب في الجامعة بين ولد وبنت انا كنت اعرف حاجة ان اللي يحب واحدة يروح لابوها ويطلبها لاميحبش من الاساس وطبعا المرء علي دين خليله فقعدوا يزنوا عليا اني لازم احبي لي واحدة ويحاولوا يقنعوني بالكلام ده فالمهم قلت مزعلهمش قلت حب لك واحدة ياواد وتخلي عن مبادئك شوية فنشنت
علي واحدة بس من الواضح ان تاثير الدين كان لازال فيا فقلت قبل ماروح اكلمها استخير ربنا الاول عشان نمشي في السليم
فعملت صلاة الاستخارة وشوفت خير الله ماجعله خير اني في فرحي مع البنت دي والاغاني شغالة والكل مهيص
فقمت من النوم منشكح انشكاحة منشكحهاش حد وقلت باضت لك في القفص ياابو عز الموضوع شكله هيمشي تمام ،انت مش عملت استخارة وجت موافقة خلاص بقي عيش
بس المهم ايه اللي حصل؟؟؟؟؟؟؟؟؟؟
بعدها علي طول بيوم ولا حاجة قبل ماروح اكلم البنت دي بتفرج علي الدش فلقيت الشيخ سيد حمدي مصادفة انا اسف لقيته قدرا بيقول في برنامج تفسير الاحلام بتاعه ده لة انك شوفت في الرؤيا معازف وكلام من ده يبقي الموضوع ده باطل علي طول
فانا اخذت الكلام من هنا وسمعت الكلام من هنا
وفي الوقت ده يحصلي حاجة غريبة
سيبت البنات زميلاتي البنات اللي في الجامعة بسبب موقف حصل معايا المرة الجاية احكيلكم عليه ان شاء المولي عز وجل
والسلام
اخوكم اليعقوبي

هناك 12 تعليقًا:

عصفور المدينة يقول...

رائع جدا ياليت كل الشباب يقرؤوا هذا الكلام

عصفور المدينة يقول...

وكله كوم وحكاية الاستخارة دي لوحدها نكتة
أضحكتني بارك الله فيك

محمد مارو يقول...

بئه يا راجل انت زعلان انت روحت عين شمس و اسمها برضه عندكم و مش بعيده امال اللى بيروح من عزبه و يمشى لقريه ع شان يركب مواصله او ممكن يمشى ع رجليه ده يبئه ايه انا بقول نعمل له تمثال
احمد ربنا انك فى مكان فيه مواصلات
ثانيا
انت بتقول انك بتفتح فى النكت مش بتقفل و مش قلت و لا نكته واحده ده ايمه كلام يا راجل
ع العموم انا مستنى اعرف باقى الحكايه

جمعاوى يقول...

هاهاهاهاهاهاهاه

متابع بشغف يا عز

ده إنت طلعت حدوتة

الفاتح اليعقوبي يقول...

السلام عليكم استاذي عصفور المدينة
تعرف يااستاذي الذكريات دي انا بحكيها ليه عشان فعلا انا كنت من الجانب الاخر من العالم حيث عدم الالتزام باي شئ بس وبفضل الله وحده اخرجني من هذا علي انا بجلس مع نفسي كتير افتكر الكلام ده وحالي دلوقت
ياااااااااااااااه بقول لنفسي انا ايه ومين اللي جابني مع الاخوان مش اعتراض لا بس انا كنت بعيد اوي وفي لحظات بقيت المفروض اني واحد بيحمل فكر اسلامي
والله يفعل مايريد خير

واتمني اني اكون ادخلت السرور علي قلبكم لان القصة دي مليانة حاجات فعلا تضحك

الفاتح اليعقوبي يقول...

عمي جمعاوي منور ياكبير ربنا يكرمك يارب
والسلام

عمر عاشق القرآن يقول...

ربنا يثبتك على الحق دايما

الفاتح اليعقوبي يقول...

مارو
طبعا ياعم زعلان اني رحت عين شمس مسافة بعيدة ومكنتش اعرف حد هناك
وبعدين احسن تقوم قبل معاد المحاضرة بساعة
ولا بربع ساعة انهي افضل انك صحابك كلهم في القاهرة ولا في عين شمس مكنتش اعرف فيها حد
اما بالنسبة للنكت الحمد لله ربنا تاب عليا من العادة الزفت لان اغلب هذه النكت كانت ميصحش اقولها نكت خارجة

بيقولك عثمان ماشي مع عثمان زيه
فبيقوله ايه اللي في الارض ده يا عثمان فقاله دي هريسه فقاله لا ده هري يقوله لا دي هريسه التاني يرد يقوله لا ده هري
فقاله دوقه كده فداقه
فقاله تصدق ياعثمان ده طلع فعلا هري
فرد عليه قاله الحمد لله مادوسناش فيه
وبس خلاص

Sally يقول...

ربنا يثبتك علي طريقة

بس عجباني اوي قولت استخير دي

صحيح
الخير في وفي امتي الي يوم القيامة

مستنيه التكمله عشان نعلق ع القصة
تحياتي

الفاتح اليعقوبي يقول...

بالله المستعان
جزاك الله خيرا علي المرور وفعلا الخير في امة رسول الله(صلي الله عليه وسلم)الي يوم القيامة
وان شاء هكمل بقية القصة

عصفور المدينة يقول...

جزاك الله خيرا وأدخلت السرور على قلبي
ولي حكايات وحكايات شبيهة ولكن لا أستطيع أن أحكي لأن حكاياتي شائكة جدا
ولكن أنت قمت بالواجب

khobayb يقول...

هاقولك حاجة واحدة بس
انت رائع
ومدونتك رائعة

شكلي هاحبك ولا ايه ؟ :D

ربنا يرزقني وإياك الثبات

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا