الثلاثاء، 21 أغسطس 2007

فيلم حياتي 2

وقفنا البوست اللي فات عند نقطة اننا حصلي موقف وبسببه سيبت البنات


قبل كده عايز احكي حاجة


كان بيحصل معايا اوقات مثلا اسمع خطبة جمعة فتاثر اوي واتجهم كده ولما حد يكلمني مردش متاثر بقي وكانت الحالة الايمانية دي بتنتهي معايا بعد 3او4ايام بكتيرها وبالاخص لما بدخل الجامعة والمفروض عين شمس دي تدخلها برجلك الشمال وتستعيذ بالله من الخبث والخبائث (جامعة غريبة)المهم


فكنت امام زملائي وزميلاتي ان انا شخص متذبذب يعني شوية بكلمهم في الدين وشوية بتكلم في نكت وشوية بهزر هزار ميصحش ،،فاكر امرين


1في مرة كنا بنلعب لعبة صراحة مع الشلة بذكورها واناثها فواحدة جه الدور عليها وكانت بتسالني فبتقولي ايه


انت ليه مذبذب كده يعني انت شوية كده وشوية كده


فرديت وقتها والكلام ده من اربع سنين وفاكر الموقف والمكان:قلتها انا في الاخر هبقي ملتزم او هكون اللي انا عايزه هو بس صراع مع نفسي


2امي كانت برده مسكاني نفخ يعني شوية اصلي وشوية لا فبتقول لي نفس الكلام وكنت في نفسي برد نفس الرد



انت رحت فين ياعم النجم ارجع تاني احنا كنا فين عند الموقف اه


اسيبكم مع الموقف


الوقت حوالي الساعة تسعة بالليل ورجع من الكلية وركبت المترو


المترو شبه فاضي يعني انا وكام واحد بس واقفين


بنتين وولدين يدخلوا المترو ويبتدوا يهزروا ويضحكوا بصوت عالي (البنتين لبسين محترم والولدين شكلهم برضه محترمين)


انا واقف بعيد عنهم شوية صغيرين وبجانبي واحد فاكر شكله شعره محمر شوية وعامل دوجلاس فلما سمعهم بيهزروا قال كلمه يعني انا فاكرها لغاية دلوقتي


(وبنضحك علي نفسنا وبنقول انهم زي اخواتنا)


الكلمة علقت ولزقت


قعدت افكر


هل البنات زميلاتي في الجامعة دول زي اخواتي فعلا زي مابدعي؟؟؟؟؟؟؟؟


انا اختي مرضاش انها تقعد مع ولد


اختي مرضاش ان ولد يهزر معاها


اختي مرضاش ان ولد يوصلهاللبيت



واخذت القرار


ورحت تاني يوم فبيكلموني برض بتناحة شوية فقلت لواحد من صحابي قول لهم اني بطلت اكلم بنات كده وش علي طول ولله الحمد وفعلا قلهم كده وبعدها بفترة



رجعت للاسف اكلمهم تاني بعد فترة كبيرة بسبب ان صحابي اللي في الجامعة فعلا ميعنوش علي الطاعة فصمدت لفترة ثم رجعت لما انا فيه



وتطور الامر والسنة تخلص واكتشف اني عدت السنة وسقطت وديه الصدمة اللي فوقتني


وكنت شايل الترم الاول مادة واحدة فكنت شبه فاضي


فحصلت حوارات قصة من قصتين الحب اتفشكلوا بسبب ان الولد امه واخواته ملتزمين جدا منتقبات والبنت اللي كان بيحبها فري وهزار هنا وهنا فهو كان بيكلمها وبيقفل معاها فنفضت فمين كان رسول المحبة والسلام اللي كل واحد بيحكي معاه .................


فاكتشفت حاجة مهمة جدا فعلا يااخوانا في ناس دخلة الجامعة عشان تحب بس وتتحب وفيها ايه البنت تكلم بدل الواد عشرة وفيها ايه لما تهزر مش هو برضه زي اخوها
المهم


بعدت عن جو الجامعة في الترم الاول كتير وبدات اتعرف علي ناس ملتزمة وكانوا من التبليغ والدعوة


فكان فيهم اخ علي طول يكلمني ويسال علي وياخدني ونكلم الناس وحلقات فالدنيا كانت مولعة وحركة للدين وعرفت يعني ايه يبقي ليك قضية


ومن الاسئلة التي كانت بتلح في راسي ايه يخلي واحد زي الاخ سابق الذكر يكلم الشباب كده مش هو شب زيهم وفي جامعة بل انه كمان ماشاء الله معاه عربية بدل مايروح يستمتع بيها وبفلوسه بيوجع دماغه مع ناس ممكن لما بتشوفه بتهرب منه ويجري عليهم عشان يكلمهم



فقلت دي اكيد قضية في دماغه وهو مؤمن بها



وفي الفترة دي بدات التزم بجد فعلا بدات اخفف من ذهاب الجامعة وكده


وتحصل انتكاسة في الترم التاني كنت شايل 3مواد وارجع الجامعة تاني حيث الجو الفاسد والحوارات وده يحكيلك ودي تحكيلك
الي ان جائت رسالة من الله 0000رؤيا تانية
بس المرة دي مش انا اللي شفتها واحدة من البنات دول في مرة كنت بكلمها في التليفون بسال عليها
فلقيتها منهارة وبتعيط جامد وحزينة
فتخضيت لان كان والدها تعبان فقلت اتي امر الله
فلقيتها بتقولي انها شافت حلم مخيف جدا وكنت انا فيه
مش هسرد الحلم لانه طويل
بس هي طلبت مني ان اشوف حد يفسره
فكان بيجي خطيب مسجد بيخطب في المسجد اللي جنبنا وكان شاب محترم جدا فحكيتله علي الحلم فقالي ان في الحلم ده اني هبقي كويس وهي البنت دي هتفضل فترة وبعد كده هتلتزم وقال لي ان من الواضح لنها مش ملتزمة وكده وقول لها انها لازم تلتزم
يعني تلخيص الحلم ان في امواج هائجة في كل مكان وانا طلعت جبل واحتميت بيه والبنت دي علقت في الامواج فانقذتها انا وواحد تاني في الحلم ده من الموج وطلعنا كلنا فوق الجبل
فبعد كده كلمتها عن تفسير الرؤيا دي وقلتلها انك لازم تلتزمي لان حياتك دي مترضيش ربنا وفعلا اتاثرت وقلتلها اقبلك بكره في الجامعة ان شاء الله
تاني يوم رحت الجامعة لقيتها بتلعب بنج بونج مع ناس صحابنا والدنيا لول علي الاخر
نرجع تاني لطريق الالتزام
بدات تظهر ليا عيوب لجماعة التبليغ والدعوة وبدا الحظ كلام لهم لم اتفق معهم بس للحق كلهم مش كده في منهم ناس كويسة جدا
وان شاء الله المرة الجاية اكمل كلامي واكمل الحكاية
والسلام
اخوكم اليعقوبي


هناك 26 تعليقًا:

bedo يقول...

السلام عليكم ورحمة الله وبركاته
بداية أخي الكريم
ثبتك الله وأعانك وزي ما هوه واضح
إن الشلة أو الصحبة ليها أثر كبير وبرضة باكلمك عن تجربة

فأعتقد إنك تقريبا عرفت الداء ودواءه
وأحلى حاجة عجبتني فيك صراحتك مع نفسك
أما لاموضوع اللي بصراحة شايف إنه ما ينفعش إننا نشغل نفسنا بيه هوه عيوب الأخرين
فلندعوا الله لهم
ولننطلق إلى ما هو أهم الرسالة التي تحدثت عنها
أولى أن تأخذ كل إهتمامك
النقطة الثانية إن كتابة الكلام ده أو قوله إن لم يكن هناك سبب له أعتقد أنه من الممكن أن يضر أكثر مما ينفع

وجزاكم الله خيرا

asmaa ibnatalislam يقول...

السلام عليكم
اولا جزاك الله خيرا علي التذكير بالنيه
ثانيا القصه جميله جدا وشيقه والحمد لله الذي هداك ورجعك ليه وده دليل علي انه بيحبك وان انت فعلا فطرتك كانت سليمه
ثالثا الافضل اننا منستفضش في ذكر عيوب الاخرين وندعيلهم ان ربنا يبصرهم بالحق
رابعا ربنا يثبتك ويثبتنا جميعا

عصفور المدينة يقول...

بص ياحاج أنا كان لي تعليق وانت كنت حاطط عنوان بس فاكر
ترجع التعليق بالذوق عشان أنا زعلي وحش
:(
تاني هام تيجي يمة السلفيين حاخطفك
:)
شكرا لهذه السلسلة الشيقة ولكن حقيقة جانبك الصواب في ذكر مخالفات منهج التبليغ وليس هذا مقامها
قلت لك إن هذه القصة تصلح قصة دعوية أنت أخرجتها عن إطارها بهذا الأسلوب
لا أختلف معك في بعض المحتويات ولكن سياقها غلط
وبعدين نظرا للمقدمة اعلاه اللي هي بتاعة زعلي وحش واخطفك وكدة
حارجع تاني إن مالقيتش الأجزاء المشار إليها مني ومن بنت الإسلام اتعدلت حانفذ
تهديدي
واعمل حملة اسميها حاربوا المتطرفين اليعقوبي وأعوانه
اعترف بقى مين أعوانك
:)
وفيه حل تاني اني اقطع عليك الكهرباء والفيلم شغال

الفاتح اليعقوبي يقول...

السلام عليكم
استاذ بيدو
ثبتنا الله جميعا يااخي وغفر لي ولك
اما مسئلة عالكلام اللي كنت كاتبه (انا مسحته علي فكرة)
فانا كان قصدي اني بحكي تجربة شخصية واعتقد ان في ناس احنا بنخدع فيهم والكلام اللي كتبته ده فالغرض منه التنويه لاتجاه موجود علي الساحة في ناس كتير ماشية وراه
انا شخصيا لااعترف الا بالاخوان والتيار السلفي بس ولولا الخلاف بينهم لكان لدعوة الله شاءن اخر في بلدنا هذا
وبعيد لاخويا كلامي انا بحكي تجربة شخصية وانا مسحتها خوفا من اني بالفعل اثير خلاف او اي حاجة
وجزاك الله خيرا
وعايزنك تنور لنا المدونة تاني ياجميل
والسلام

الفاتح اليعقوبي يقول...

استاذة اسماء
جزاك الله خيرا علي المرور والتعليق
فانا كان قصدي اني بحكي تجربة شخصية واعتقد ان في ناس احنا بنخدع فيهم والكلام اللي كتبته ده فالغرض منه التنويه لاتجاه موجود علي الساحة في ناس كتير ماشية وراه
انا شخصيا لااعترف الا بالاخوان والتيار السلفي بس ولولا الخلاف بينهم لكان لدعوة الله شاءن اخر في بلدنا هذا
وبعيد لحضرتك كلامي انا بحكي تجربة شخصية وانا مسحتها خوفا من اني بالفعل اثير خلاف او اي حاجة
وجزاك الله خيرا

الفاتح اليعقوبي يقول...

هههههههههههه
ليه كده يااستاذنا
انا والله حصل غلطة مني كتبت العنوان ودست انتر فنزل الكلام وجيت اصلحه النور قطع ولما رجع لقيتك معلق اعمل ايه طيب


تخطفني ياااااااااه
حضرتك لو شفتني هتلاقي اني صعب اتخطف يعني
السلفيين دول حبايبي جدا وبحبهم في الله اوي وان كنت بختلف معاهم في بعض الاوقات وبعد التبليغ مشيت معاهم شوية وسبتهم لظروف حصلت ومش هذكرها عشان مبقاش شخص مثير للفتن
حكاية التبليغ دي انا بحكيها لانها حاجة اثرت فيا جدا ونقد العلماء حاجة والواقع حاجة تانية
وانا محدتش انا بحكي فعلا كلام حصل لي وواقع عايشته الدنيا متسلسلة بالنسبة لي وده بس اللي حصل انا من الشخصيات التلقائية شوية يعني ممكن اقول كلام ولو دايق حد ارجع فيه
فسمحوني يااخوانا
وربنا يثبتنا علي طريقه


وبمناسبة الاعوان في احد اخواني هيشارك معايا في المدونة قريب
واسمه الجعفري
يعني اليعقوبي والجعفري
الفاتحون ليمتد
والسلام

احمد الجيزاوى يقول...

التجربه حلوة
بس هقولك حاجه زمتزعلش منى
انا مستفتش منه حجه
بس عجبنى اوى صرحتك مع نفسك
اخوك
احمد الجيزاوى

الفاتح اليعقوبي يقول...

ياخبر ابيض استاذ احمد الجيزاوي عدي علي المدونة خاصتي يادي النور ويادي الهنا
استاذي بس انا استفدت من التجربة دي في منهج حياتي
1الناس صحابي دول لم اكن افضل من فيهم بل اعتقد علي العكس واعتقد اللي فرقني عنهم بس اني مكدبتش علي نفسي واقنعتها بالغلط فكنت بعمل الغلط للاسف وانا عارف انه غلط بس كان نفسي ابطله فبطلته ولله الحمد
2انت عايز تكون حاجة هتكون
انا كان نفسي ابقي ملتزم ولله الحمد نوعا ما بقتش زي الاول
3اللي عايز ربنا ربنا بياخد بايده بس انا شوفت الكلام ده بعيني ورسائل كتير جائت لي من الله عز وجل ثبتت قلبي
4في امور بتحصلنا واحنا متوقعين انها مصيبة لنا ولكن والله هو الخير
يعني حكاية سقوطي يااااااه انا اسقط واشيل سنة لاول مرة في حياتي انا عمري ماشيلت ماده بل علي العكس كنت نوعا ما متفوق فاشيل سنة وطبعا كانت صدمة
ولكن اعتقد والله ان سقوطي كان هو الخير
لاني بعدت عن جو الجامعة شوية وابتديت اتعرف علي ناس لم اعرفهم وهم وسط الملتزمين


علي العموم خير يااستاذي ولعله خير
والسلام

جمعاوى يقول...

تسجيل حضور يا عموووووونا

متابع بشغف

غير معرف يقول...

جميل جدا .. فيلم بجد يعني :D

منتظرينك

Sally يقول...

هي الصحبة
الصحبه ممكن ترفع
من شائن الانسان
وممكن تضيعة
ممكن تثبتة
وممكن تغرقه

صدق رسول الله
المر علي دين خليله
في انتظار التكملة

رؤية

الفاتح اليعقوبي يقول...

عمي وعم عيالي مستقبلا ان شاء الله جمعاوي باشا شكرا علي المرور يامعلم

الفاتح اليعقوبي يقول...

استاذه منة الله
جزاك الله خيرا علي المرور
والسلام

الفاتح اليعقوبي يقول...

استاذة بالله المستعان
(صلي الله عليه وسلم)
فعلا الصحبة هي بيت الداء وان شاء الله هتكلم عن حكاية الصحبة دي في اخر الموضوع وتاثيرها سواء كانت من ملتزمين او غير ملتزميند
والسلام

Coca يقول...

تسجيل حضور برضو
كنت عايزه اقولك لحضرتك حاجه لاني حسيت ان حضرتك في البلوج عندنا بنهاجمك يجوز ايمي معترضه علي الاخوان بشكل هجومي شويه رغم اعتراضي علي دا ولكن انا عن نفسي مش كدا انا لازلت احاول معرفه تاريخ الاخوان التفصيلي واجدهم مقصرين في توصيل دعوتهم للناس
واعتراضي فقط علي استغلال الدين من اجل الحكم فقط
ثانيا في حاجات في الدين بيختلف عليها العلماء قد اخد انا بفتوي عالم ما وانت تاخد بفتوه غيره
الرسول عليه الصلاه والسام قالنا برضو استفت قلبك ولو افتوك صدق رسول الله


اسفه لخروجي عن التعليق علي البوست لكني متبعاه
تحياتي

Sally يقول...

وانا منتظره

Unknown يقول...

حلو اوي البوست وعرضت فكرتك باسلوب جميل
بس انا شايفه ان في ولاد بجد محترميين اوي و عارفين حدود الزماله و حق زميلته عليه من الاحترام
يارييت كل شاب يراعي ربنا في معاملته مع اي بنت و يحس ان هي اخته و الي ماريضاش انه يحصل لاخته بلاش يعمله هو

الفاتح اليعقوبي يقول...

السلام عليكم الاخت كوكو
انا سعيد جدا بمرور حضرتك اما بالنسبة لموضوع النقاش اللي كان دار فده امر عادي جدا والواحد مر بكلام يمكن اعنف من ده
بس القصة ان النقد لازم يكون صحيح او عادل مينفعش اني اعوم الكلام في النقد
يعني مثلا واحد يبقول علي الاخوان انهم بيكفروا الناس كلام كويس بس مين هما الناس دول وياريت نسمي منعومش الكلام وليس القاء الاتهامات

علي فكرة الاخوان مش مقصرين في تبليغ دعوتهم لانها اساسا دعوة الي الله وليست دعوة الي الاخوان
فالاخوان ليسوا مجموعة من المسلمين يريدوا اقامة شرع الله في الارض وتحكيم شرع كما اراد سبحانه وتعالي

اما بالنسبة لمسئلة استغلال الدين للوصول للحكم فالكلام اشاعه العلمانين من اجل هز ثقة الناس في ابناء الحركة الاسلامية
يعني قالوا ان هم عايزين يوصلوا للحكم عن طريق الدين وانهم متشددين وانهم بيخدوا تمويل من بره وكلام ليس له اي اساس من الصحة
يعني بالعقل وبالمنطق كده وبراحة:0
اللي عايز الحكم والسلطة يعمل ايه يروح للاحزاب الحاكمة زي الحزب الوطني ايه اللي يمشيه مع الاخوان وهو عارف انه ممكن يعتقل او يتسحل او تتصادر امواله غير انه بيحتسب كل ده لله
احنا كاخوان عارفين اننا قد نموت ولا نري تمكين دين الله ولكننا نعتذر الي الله بعملنا ونضع لبنة في الطريق
وهابقي انزل بوست عن الحكاية دي ان شاء الله واوضح وجهة نظري كاملة
والسلام

الفاتح اليعقوبي يقول...

الاخت بالله المستعان
ان شاء الله هنزل البوست وشكرا للمتابعة
والسلام

الفاتح اليعقوبي يقول...

الاخت ايمي
جزاك الله خيرا علي المرور
والله حكاية صحبة البنت للولد دي في راي الشخصي لاتصح وده راي غالب علماء الامة
حضرتك الشيطان في بعض الاوقات بيجرنا الي فخه من دون ان نشعر
مثلا في بنات وولاد متزوجين عرفي في الجامعات المصرية
هل دول ليس عندهم اخلاق لالا او اهلهم ليسوا مربينهم كويس في منهم ولاد علية القوم كما يقال
بس الشيطان رضي في الاول بالبسيط وصبر معاك علي الاخر الي ان يجرك الي الكبيرة
فعندما تتاءج نار الشهوة يضيع العقل



الشباب قد يوهم نفسه بمسئلة الاختلاط ان دي زي اختي وانا مش ممكن ابصلها بصة غلط ابدا
طب ازاي لو هو شخص طبيعي وواحدة امامه لازم يبصلها بصة غلط لان دي بنت

والله نهانا عن الاختلاط وقال في سورة النساء(ولا متخذات اخدان)0
والخدن هو الصاحب او الرفيق
وامرنا بغض البصر للرجال والنساء
فازاي واحد هيجلس امام واحدة من غير ماينظر لها
الموضوع محتاج بحث في هذا الامر في الشرع من حيث راي الشرع في هذا الموضوع
وفي النهاية بعد البحث لانملك الا سمعنا واطعنا
(ماكان لمؤمن ولا مؤمنة اذا قضي الله ورسوله امرا ان يكون لهم الخيرة من امرهم)
والسلام

ahmed mefrh يقول...

منتظر بشده اخى للجزء الثانى
لان فيها عبره لمن اعتبر
ربنا يبارك فيك اخى و يحفظك و يحفظنا معاك اللهم امين
تقبل تحياتى
ابو مفراح

Unknown يقول...

نا بس عايزه اوضح رأي انا متفقه معاك ان صحبة البنت للولد مش صح انا مش بدعو للاجتلاط التام بس بردو انا ضد الانعزال التام انا كنت اقصد من كلامي ان المفروض نربي ولادنا علي احترام الغير و مبدأحب لاخيك ما تحب لنفسك يعني قبل مل تلوم علي ولد عاكس اختك لوم نفسك و امنعها من الحاجات دي
و انا شايفه ان الجواز العرفي ده نوع لوضع شكل شرعي لعلاقه غير مشروعه و البنت و الولد الي يعملو كده في رأي مش محترمين
محترموش نفسهم و لا دينهم و لا اهلهم

فوضى منظمة يقول...

مبروك على المدونة .. ولو انها جت متأخرة شويه .. واحنا في انتظار الجزء القادم

الفاتح اليعقوبي يقول...

الاخ ابو مفراح
جزاك الله خيرا علي المرور يااخي واللهم امين
والسلام

الفاتح اليعقوبي يقول...

الاخت ايمي
انا موافق حضرتك ي كلامك تماما وليس لدي تعليق وجزاك الله خيرا علي المتابعة
والسلام

الفاتح اليعقوبي يقول...

فوضي منظمة
الله يبارك فيك
والسلام

ساندوا اخوانكم في القوقاز

ممدونات مهمة للغاية

المدونات دي لازم تعدوا عليها وساندوا اصحابها جزاهم الله خيرا

مدونة ارض الحرب جزا الله صاحبها خيرا

كلنا مقاومة

مدونة اولادنا امانة (كيف نربي الاجيال القادمة)

نشقي ليعز ديننا وتسعد امتنا

نشقي ليعز ديننا وتسعد امتنا

جماعة قاداتها شهداء منصورة باذن الله

جماعة قاداتها شهداء منصورة باذن الله

About Me

صورتي
اليعقوبي احد الفاتحين القادمين باذن الله واتمني انا ذلك كل مااسال الله عليه ان يثبتني علي دينه وعلي طريقه والااضل عنه وان يرضي عني

لغتي الجميلة هويتي واصلي وديني

لغتي الجميلة هويتي واصلي وديني

اللهم ارحم اخي علاء رحمة واسعة

اللهم ارحم  اخي علاء رحمة واسعة

اللهم ارحم اخانا رحمة واسعة واجمعنا به في مستقر رحمتك

اللهم ارحم اخانا رحمة واسعة واجمعنا به في مستقر رحمتك
نسالكم الدعاء لاخانا