من أجله هو

(بنينا كباري من أجلك أنت ومدارس من أجلك أنت ومصانع من أجلك أنت ومستشفيات وبرضه من أجلك أنت)

الصراحة أنا أنشكحت انشكاحة مش عارف أقول لكم عاملة أزاي بعد الاعلان ده

حسيت بعد الاعلان ده كأني برفرف فوق السحاب وحسيت قد إيه بابا تعب عشاني قوي وقد إيه أنجازته دي بترمي ليا في النهاية وشعرت بحالة حب شديدة لوالدي لانه عمل ده كله عشاني

وأنتم المشكلة متعرفوش أد إيه بابا بيحبني ده حتي في مرة قلت له له يابابا العربية اللي بتوصلني المدرسة بتوصلني متأخرة فقال لي خلاص ياحبيبي نبني لك كوبري من مدينة نصر لحد الدقي عشان متتأخرش علي المدرسة تاني وقال لي ياحبيبي وده عشانك أنت

أنتم مستغربين مستغربين ليه ده حتي أنا في مرة رحت لبابا وكان معايا واحد صاحبي اسمه عز فقلت له يابابا عز صاحبي كنت ماشي أنا وهو في الاسكندرية مع بعض فشاف يابابي مصنع جميل أوي عند الدخيلة فقال لي المصنع ده جميل أوي فقلت له ميغلاش عليك ياعز ده أساسا بتاع بابا لان البلد بتاعة بابا فقال بجد فقلت له يلا بينا علي بابي وهو هايكتب المصنع باسمك دلوقتي ،فقلت لبابي تقدر تكتبوا باسمه يابابي فقال ياحبيبي طبعا ده كفاية انه صاحبك ومن يوميها والمصنع بقي بتاع عز

شوفتم بابي بيحبني أد إيه

وفي مرة كنت خدت شوية صحاب ليا في البيت عشان بنذاكر مع بعض فدخل علينا بابي وقلنا شدوا حيلكم ياحبابيي لو نجحتوا وخلصتوا جامعة ليكم عليا أشكلكم وزارة حلواني عشانكم بس عشان أنتم صحاب حبيبي فقلت له بجد يابابي قال لي بجد ياحبيبي ده كفاية أنهم صحابك وقلت له يابابا طب وأنا ،قال لي أنت هاتخد الكرسي ياحبيبي فقلت له بجد يابابا قال لي بجد ياعيون بابا يلا بوسة كبيرة أوي لبابا قلت له بوسة بس يابابا ده بوسة وحضن لاحلي بابا في الدنيا

وبوست بابا وحضنته لانه وعدني بالكرسي

ومش قادر أوصف لكم قد إيه صحابي كانوا فرحانين بوعد بابا ليهم لدرجة أنهم كانوا عمالين يقولوا الحمد لله علي نعمة أننا صحاب حبيب بابا الحمد لله علي نعمة أننا صحاب حبيب بابا

وكنت قاعد في يوم بتفرج علي التليفزيون فلقيت ناس وجعت دماغي أوي عمالين يقولوا بلاش ظلم وبلاش فساد وبلاش سرقة ونهب في البلد وعمالين يقولوا عايزين حريتنا في بلدنا فوقتها أنا خفت منهم أوي وخفت لياخدوا مني الكرسي وعيطت جامد فبابا قال لي مالك ياعيوني فقلت له أنا خايف يابابا أحسن الناس دي تاخد الكرسي بتاعي اللي أنت هاتسيبوا ليا والعياط زاد وزنهرت فبابا قال لي ياسلام ياحبيبي ده أنا احبسهملك ولادال...وأسجنهم عشان خاطر حبيب بابا ،وفعلا بعدها بابا بقي يحبس أي حد بيقول الكلام اللي بيتعبني ده

ياحبيبي يابابا

وفي الاخر زي ماأنتم شفتوا بابا عملي إعلان في التليفزيون وعمال يقول لي من أجلك أنت من أجلك أنت والناس مش فاهمة الاعلان قصده إيه لكن أنا الوحيد اللي فاهم قصده إيه وفرحت أوي بالاعلان لان كل حاجة هاتبقي ليا في الاخر أنا شوفت بابا بيضحك من ورا الشاشة لما أنا ضحكت ياتري شوفتوه أنتوا كمان.......

مع تحياتي

حبيب بابا

والسلام

WELCOME TO EGYPT MR.HOSNEY

رأينا جميعا المعركة الانتخابية للفوز برئاسة اليونيسكو والتي كان يشارك فيها المرشح المصري وزير الثقافة فاروق بن حسني غفر الله لنا وله ،وتابعنا تلك المعركة بشغف شديد للغاية لاننا كنا نتوقع أن يرضي الغرب عن السيد حسني وينوله مراده بالفوز بذلك المنصب ولكن علي غير المتوقع تماما رأينا الغرب يتأمر علي السيد حسني ويضحكو عليه ويقلشوه من الانتخابات بعد أخذ الصابونة وبلغة الافارقة بيسموها صابوني بفتح الصاد وكسر النون .
ولكن كان واجب التعليق بعد هذه الحدث :-
1-لم يشفع للسيد حسني عند الغرب انه رجل عربي الجنسية غربي العقل والقبلة والتوجه فرغم كل ما له من مواقف تظهر مدي علمانيته وجدنا أمريكا تقف ضده بشدة والمندوب الامريكي يشحذ ضده البلاد للنيل منه
فكثيرا ماخرج علينا السيد حسني بأراء تري فيها كل الجهل بدينه ألا وهو الدين الاسلامي طبعا (عشان محدش يطلع يقولك أنتم بتكفروا الراجل )ومن ينسي أنه صاحب المقولة الخالدة عندما تم مهاجمته وقتما تهكم علي الحجاب والمحجبات فأخذ يبرر موقفه بتلك القولة الخالدة:(الناس زعلانة ليه أساسا الحجاب مش من فروض الاسلام الاربعة)
والغريب أنه كان يذكرهم في دفاعه عن نفسه في باريس أنه ليس ضد حرية الرأي وأنه سمح بنشر روايات في أصلها التهكم علي الدين كرواية وليمة أعشاب البحر أو أنه أعطي السيد القمني جائزة الدولة التفسيقية عفوا التقديرية وعامة لعله خير
2 –وضح جليا للعيان أن المندوبين اللي أحنا ربطنا معاهم ضحكوا علينا وأعطونا واحد بمبة كبير أوي وطبعا ده يعكس الدور والاداء الدبلوماسي الهزيل لمصر وللاسف منينا به في هذا العصر بدليل اننا لم نري نصرا دبلومسيا مصريا في الفترة المنقضية وبالاخص في العشر سنوات الاخيرة ويبدو أننا ننسي سريعا ولكن إن كنت ناسي أفكرك بالصفر الكبير بتاع المونديال وغيره كتير وكتير ومش عايزين ننسي المعتقلني المصريين في السعودية ولا في دول الخليج ولا كرامة المصريين المهانة علي مستوي دول العالم .
3-يبدو أننا لانتعلم أبدا أن الغرب للغرب وليس لنا عندهم شئ سواء تعاطف أو تضامن مع بعض حقوقنا وما يحدث معنا من تعاطف يتم بشكل فردي من بعض الشخصيات هناك وليس بشكل سياسي أو رسمي فلا يوجد مايسمي بتعاطف أو حياد سياسي من الغرب تجاه العرب والمسلمين عموما فالغرب لاينسي أنه الرجل الابيض و ما غيرهم فهم طبقات أدني من البشرولاينسي الغرب أنه كان محتلا لبلادنا ناهبا لها ولخيرها ،لذا يجب عدم التعويل عليهم كثيرا ولا قليلا والكل رأي ذلك من موقف فرنسا وإيطاليا في الانتخابات كما ذكرت صحيفة لوفيجارو الفرنسية أن مندوبي فرنسا وإيطاليا قد خانا المرشح المصري بن حسني،والغريب واللي يموت من الضحك أننا رأينا في الصحف قبلها خطاب شكر من مصر للأيطاليا علي وقوفها بجوار المرشح المصري !!!!!!!!!!!
4-في حديث للسيد بن حسني في جريدة المصري العلماني (بفتح العين كما يذكر مراد وهبة) أو بيسموها المصري اليوم قال السيد المحترم (أن من اعطوه أصواتهم في الانتخابات أعطوه إياها لان ضد الاخوان المسلمين وفكرهم في مصر )ههههههههههههههههههه
طيب والمناديب الذين لم يعطوك أصواتهم برضه عشان الاخوان حرضوهم عليك عن طريق اللوبي الصهيوني
والحمد لله أنك ومن مثلك ضد الاخوان ومشكلتك الحقيقية ياسيد حسني ليست مع الاخوان بل مع الاسلام في ذاته
وعامة بركة ياجامع أنك سقطت ده أنت لما سقطت عملولك استقبال ماشاء الله ورجعت تخبط في الاخوان طب لو نجحت مكنش حد أساسا عرف يكلمك والحمد لله أن الضربة جاء لك من حبابيك مش من حد تاني
5-أري أن الغرب بدأ يفقد ذكائه لان فاروق حسني لو كسب مستحيل كان هايكون زي المرشحة البلغارية هو في الاصل مغترب عقلا وجوهر ومظهرا وباطنا وأني لهم بمثل هذا دول كانوا هايقولوا له شمال كان هايبقي شمال يمين كان هايبقي يمين ومواقفه أكر من أن تحصي لانه أساسا من قبل مايمسك مدير عام منظمة اليونيسكو وهو كده تستشعر وهو يتكلم أنه مصاب بالدياثة الفكرية فلا أصبح من الغربين ولا هو أصبح عربي مسلم كما ينبغي أن يكون فيفخر بحضارة بلاده ويحمل فكرها وهويتها الفكرية والثقافية


6-وفي النهاية أتوجه بالتهنئة للاخ بن حسني علي الاداء المشرف وأحلي تحية من المدونة ومن اليعقوبي ومن الجعفري وكل حبابيبنا في مصر وفرنسا وكل أنحاء العالم وتحية خاصة من نوادي فرنسا بتاعة الفن والفنانين عارفينها ولا والتحية موجهة بشكل خاص للاداء المشرف وأحلي من الشرف مفيش وسمعونا سلام اليونيسكو

وأختم يا أخواني بخير ماأختم بكلام ربنا جل وعلا ثم بكلام حبيبنا ومصطفنا ومعلمنا صلي الله عليه وسلم
يقول تعالي :(ولن ترضي عنك اليهود ولا النصاري حتي تتبع ملتهم قل إن هدي الله هو الهدي ولئن أتبعت أهوائهم من بعد ماجاءك من العلم ما لك من الله من ولي ولا نصير) وفعلا لم يكن هناك لا ولي يوالي ولا نصير يدافع وينصر
ويقول صلي الله عليه وسلم ( من أرضي الله في سخط الناس رضي الله عنه وأرضي عنه الناس ومن أسخط الله في رضي الناس سخط الله عليه وأسخط عليه الناس )
صدق الله وصدق رسوله :(صلي الله عليه وسلم )

وفي بعد كل الكلام ده نقول للسيد بن حسني WELCOME TO EGYPT MR.HOSNEY
والسلام
اليعقوبي

الاختلاط بين الافراط والتفريط

السلام عليكم


أولا اللهم بلغنا رمضان باقي علي رمضان 28يوما فلنستعد لهذا الحدث فاللهم بلغنا رمضان وتقبله منا باذنك يارب العالمين


ثانيا جزا الله خير كل من شارك برأيه في الموضوع السابق


ثالثا


موضوع مثل الاختلاط وخاصة في الجامعات هو موضوع جل خطير ومادفعني للحديث في هذا الامر أن أحد أخواني في الجامعة كان يحدثني في أمكانية مشاركة بعض البنات أو الاخوات في بعض الاعمال العامة التي يعملها أخواننا في داخل أسوار الجامعة يعني مثلا نفترض أن أخوانا كعادتهم يدشنوا حملة في كل سنة يكون الغرض منها هو توصيل فكرة أو هدف أو معني إيجابي يستفيد منه الطلبة


فلو عمل أخواني مثلا رحلة إلي دار أيتام أو॥أو....يعني رحلة الغرض منها غرض خيري بالمقام الاول


هل يصح لاخواني أن يصحبوا في هذه الرحلة أولاد وبنات مع بعضهم البعض


معرض مثلا في الكلية ما مدي التعاون الذي يمكن أن يتم أم أنه من الافضل ألا يكون هناك تعاون أطلاقا


قبل أن أدلو بدلوي في هذا الموضوع


يجب أولا التذكير بأننا جماعة إسلامية تستمد أعمالها من الشرع والشرع يصون العرض والدين وخلاصنا ونجاتنا في هذه الدنيا يكمن في حفاظنا علي ثوابتنا ، وقد أفرد كثير من علمائنا الكثير في الحديث عن موضوع الاختلاط وأساسا الاختلاط لفظ غير موجود في الشرع ولكنه لفظ مستحدث ظهر طبقا لمستجدات العصر ويمكن الرجوع لفتاوي علمائنا في الحديث عن هذا الموضوع


ولكني سأتناول واقع رأيته وعايشته بعيني


في بداية اندماجي في العمل مع أخواني كان لاحد أخواني الافاضل نصيحة في الله في موضوع الاختلاط ألا وهي
أنه عرض الاراء في موضوع الاختلاط ولكنه قال لي قول أحسبه فاصل :(قال لي الموضوع أننا في الجامعة الجو فيه من الفساد الكثير والكثير فالافضل الالتزام بأشد الاراء حفاظا علي الدين )


وعامة كلما زاد التفريط في الناس زاد الفقه تشددا وذلك حفاظا علي الدين من الضياع ومن ان يتم اهداره بين الناس





موضوع الاعمال المشتركة بين الاخوة والاخوات هذا في رأي يكون في أضيق الحدود ويكون فقط في حالة الضرورة ، لان الاخ أو الاخت بشر لهم عواطف ومشاعر وقد يفتنون وقد يحدث تجاوز شرعي في التعامل وهذا رأيته بأم عيني في الكلية فسدا لذرائع الشيطان أري ألا يتم هذا التعامل إلا في أضيق الحدود ولكن قد يحدث بعض الاوقات أن يحدث التعامل في حالة الضرورة فتجد الاخ متنشن بشدة والاخت متنشنة ويتعاملوا بتكلف زائد


فالكلام يكون بقدر الموضوع ويكون الاخ طبيعي في كلامه والاخت طبيعية في كلامها


يعني مرة أخ وجد الامن بعترض أخت من دخول الجامعة ويبدو أنها كان معها مطبوعات أو شئ خاص بالاخوات وقدر الله أن هذا الاخ كان داخل في نفس الوقت فوقف معها وأدخلها الجامعة وباعد عنها الامن فما كان من أخوانه إلا انهم عاتبوه بشدة في موقف غريب للغاية !!!!


وبالفعل قد يقعنا القدر في التعامل مع بعض البنات في المدرج أو في الكلية قد تأتي بنت وتسأل عن شئ فيجيب الاخ بمنتهي البساطة ولكن عندما تحدثه أخت تجده قد ركبه ميت عفريت والعكس صحيح ، يعين مثلا الاخت دي أو أو الاخ مش بيتعاملوا مثلا مع خضري ولا خضرية (بتاع خضار)وعادي والفصال يشتغل والكلام بيبقي طبيعي ومفيش فيه تكلف .


،، كلا ياأخواني التعامل يكون علي قدر الامر ويكون تعامل طبيعي وبلا تكلف وعلي قدر الحاجة

هذا بالنسبة للتعامل مع الاخوات في الجامعة

..........................................
أما فكرة التعامل مع البنات أنفسهن بغرض توصيل الدعوة إلي فصيل ضخم بالفعل وأنا كنت أري في بعض المدرجات التي عملت بها أن البنات عندهن رغبة كبيرة في العمل لله وهن بالفعل أكثر تأثرا وتفاعلا مع الاعمال وأكثر انصاتا

يعني أذكر مرة أننا كنا في مسيرة المحاكمات العسكرية ودخلنا داخل الجامعة وكنا نكلم مجموعة من الشباب وكان فيهم بعض البنات فوجدت بنت(وكانت غير محجبة) بعدما انتهيت أنا والاخ الذي معي وجدتها تقول لنا أنتم كلامكم صح وجميل وأنا نفسي أبقي زيكم ومعاكم ونفسي أتحجب وأبقي كويسة بس للاسف محدش علمني الكلام اللي بتقولوه !!!
هذه أري توصيلها للاخوات عن طريق الاخ الذي تعامل معها وعن طريق الطرق المتبعة في أخواننا يعني الاخ يروح لمسئوله ومسئله يشوف الدنيا فيها إيه والسلسلة الادارية تأخذ وضعها حتي الوصول للاخوات مش يروح الاخ ياخد البنت يوديها للاخوات .

ولكن فكرة إشراك بنات لسن بأخوات في الاعمال العامة (الاخوات لهن أسلوب معين في المشاركة مع الاخوة فيشاركن بشكل منفصل بعيد عن التواصل مع الاخوة سواء كن في معرض أو مسيرة) فكرة أري سلبيتها ستكون أكثر من إيجابيتها.

يعني مثلا نفترض لو أن هناك رحلة مثلا لدار أيتام وخرج في الاتوبيس المخصص للرحلة ولاد وبنات بجانب الاخوة من يضمن أنه لن يتم تجاوز في الحدود الشرعية ولو حدثت ماذا سيكون رد فعل الاخوة ، سيرد أحدهم ويقول سيكون النصح

وماذا لو لم يقبل الولاد والبنات بهذا النصح ؟؟؟؟؟

وعامة

أري ترك البنات للاخوات في التعامل معهن والحمد لله أخواتنا شغالين في الجامعة علي أفضل وجه

ولكن قد يقوم بعض الاخوة بعمل عام في مدرج ما وقد نري أن بعض البنات يردن المشاركة أعمال المدرج

حتي أنه حصل موقف طريف

أخ في كلية الاداب جاءت له بنت وقالت له أنا اريد العمل معكم في المدرج أنا سمعت دروس كتير لعمرو خالد ولشيوخ كتير وعايزةأشتغل معاكم فالاخ جزاه الله خيرا قال لها في اخواتنا ممكن تشتغلي معاهم قالت له أنا عايزة أشتغل معاكم أنتم مش مع الاخوات فالاخ اتكسف ومعرفش يرد أزاي فالذي أنقذه كانت أخت وجدت الاخ وشه محمر فقامت سحبة البنت من جنبه والاخ ده خلع بسرعة بعيد عنها لان البنت بالبلدي مثبتاه

نرجع تاني لكلامنا وقفنا لو ان هناك بنات تريد الاشتراك في العمل الدعوي ، يري أن يوصلن بالاخوات ويقطع الصلة بهن وبين الاخوة ويتم توصيلهن بالطريقة التي شرحتها ولكن قد نواجه بعض الاوقات بعض التجلطات الادارية وهحكي لكم حكاية عن موضوع التجلطات ده

حدث موقف معي أنا وأخ في مدرج وكان دمنا هايتحرق وقتها كنا في سنة تانية وجاءت بعض البنات والاولاد بعد استفتاء أجريناه في المدرج يريدون و يريدن الاشتراك معنا في أعمال المدرج فالاولاد تكفلنا بهم وتوصلنا معهم والاخ اللي كان معي كان متكفل بتوصيل البنات عن طريق مسؤله يقول للاخوات عندنا بنات عايزين يلتزموا ويعملوا لدين الله ومنفعش الموضوع ده

فقام الاخ بعت أسماء البنات دول لاخت معنا في المدرج وقال لها تواصلي معهن وكان الكلام علي القد للغاية وهذا الاخ أخ فاضل يتكلم بمنتهي الاحترام

والله نشفوا دمه عشان يوصل تلات بنات وهو مش عايز يتواصل مع البنات دول والله كن إيجابيت أكثر من الاخت اللي في المدرج ويعملن من أنفسهن طبعا بعيدا عنا

لدرجة في مرة عملنا ملازم في المدرج وكنا بنبيعها للطلبة فكان ممكن تجد بنت تطلب منك ملزمة فتقوم نغزاك في جنبك ولا تناديك كأنها بتاندي صاحبها فالاخ اللي كان معي قام رايح للاخت دي وقال لها يااستاذة بيحصل كذا وكذا فأنا هاحط لكي الملازم علي البنش وهاقول للطلبة الولاد وحضرتك تبيعي للبنات لانه لايصح الذي يحدث معنا وكان لن يتم أي كلام بيننا وبينها فقط نضع لها الملازم علي جنب وتروح هي تاخدهم والفلوس تعطيها لنا في النهاية مش في أيدينا طبعا ولكن تضعها جنب الملازم المتبقية معها وهي لم تعترض

فجينا تاني يوم والاخ بينوه علي الطبة اللي هايحصل أن الولاد تشتري مننا وأن في أخت هاتبيع للبنات وقعد يقول الاخت تتفضل تناخد الملازم ووضع لها الملازم بعيد علي البنش

وان الاخت تعبر اللي خلفونا أبدا فقلنا أكيد مش موجودة ولكنها للاسف كانت موجودة في المدرج بتتفرج علينا فما كان من بعض البنات سالفات الذكر أن قمن بموضوع البيع

وعامة لعله خير
الخلاصة
الاختلاط في الجامعات أمر جل خطير وذلك بسبب أن الشباب في الجامعة أعمهم ليسوا في الاصل محصنين وليس لديهم الخبرة الكافية في التعامل مع الجنس الاخر والتجربة أثبتت أن الاختلاط أدي إلي مشاكل كبيرة في الجامعات من زواج عرفي إلي الزنا والعياذ بالله إلي الدخول في علاقات عاطفية غير مدروسة وغير سوية أدت إلي تدمير كثير من الشباب عاطفيا نتجية الدخول في تلك العلاقات والتي أغلبها علاقات فاشلة قامت علي إطلاق العواطف دون فهم حقيقي لمعني كلمة حب أو مسئولية ولان الحياة الجامعية أصبحت للاسف حياة الفساد الخلقي فيها شئ لايطاق ولكل هذا فدرئا للفتن وغلقا لابواب الشيطان الافضل تجنب الاختلاط إلا في حالات الضرورة القصوي والتي يحتمها الواقع الذي نعيشه
أما فكرة التواصل من الاخوة مع الجنس الاخر سواء كن أخوات أم بنات عادية لايكون إلا في حالات الضرورة القصوي كما هو الحال أيضا بالنسبة لكل الطلبة ولندع البنات للاخوات لكي يدعوهن ونتفرغ نحن للشباب
وبعيدا عن ذلك كله نحن في الاصل مطالبون بتقديم بديل سليم لكي شئ مخالف للشرع في مجتمعنا ومطالبون بتقديم تجارب ناجحة لهذا البديل
إذن فلنقدم تجربة العمل المنفصل بشكل ناجح وهي بالفعل ناجحة والدليل علي ذلك أن أفضل تنظيم داخل الجامعة لايتم الاختلاط فيه ألا وهو التنظيم الخاص بنا وهو مستمر منذ فترة طويلة فلما العبث بأمور من شأنها الدخول بنا في مخالفات شرعية
وأسال الله لنا الهداية والرشاد
كان معكم من الاسكندرية
اليعقوبي

والسلام

أخوة وأخوات

كيف أحوالكم أوحشتموني كثيرا وأشتقت لكم كثيرا ومعذرة لعدم التعليق أو الرد علي التعليقات في الفترة الماضية ولكنها كما تعلمون الظروف التي أعيشها فادعو الله لي بالثبات وبالخير وعندي لكم موضوع أريد أن أناقشه معكم لعلي أستفيد بوجهة نظركم فيه

كنت مع أحد أخواني من الكلية وهو لايزال طالبا بالكلية وتحدثنا سويا حول موضوع الاختلاط في الجامعة وهل يمكن للاخوة في الجامعة القيام بأعمال يشاركهم فيها بعض الاخوات أو البنات بهدف توصيل الفكر الاسلامي والدعوة إلي فصيل كبير في الجامعة ألا وهن البنات ؟؟؟؟؟؟؟؟؟؟؟؟؟

مارأيكم في هذا الموضوع أتمني أن يطرح الموضوع للنقاش في التعليقات وكل يدلي بدلوه وأتمني أيضا أن يشرك الكل في هذا الموضوع وفي البوست القادم بأذن الله سأطرح وجهة نظري في هذا الموضوع ولكن دعوني أسمع وجهات نظركم بخصوص هذا الامر لعلها تضيف أو تغير في وجهة نظري

والسلام

اليعقوبي

إنا لله وإنا إليه راجعون

أول أمس وبينما أنا في البيت إذ بأخ من اخواني بالجامعة يحدثني علي الهاتف ويقول لي تعال إلي الجيزة الان فتحججت بمهمات وكلت لي في البيت وبعد إلحاح قررت النزول ووجدته بعدها بدقائق يحدثني ويقول لي البقاء لله في سامح سراج وصدقوني إلي الآن لاأكاد أدري أهذا صحيح أم لا

سامح (رحمه الله )كان في الفرقة الثانية ويفترض أنه رحمه الله كان سيذهب إلي الفرقة الثالثة

كان رحمه الله من حفظة كتاب الله وكان محفظا لكتاب الله وأحسبه من العاملين به فعندما كان هو في السنة الاولي كان يفترض أن أكون استاذه ولكن والله أراه أستاذ لي ولمئة من أمثالي

فكان رحمه الله منشغل بأمر دعوته ومهموم بها وأحسبه من المخلصين

وعندما ذهبنا إلي الكلية وجدت أخ لي يحدثني عن رؤيا رأها سامح قبل وفاته حلم بالرسول صلي الله عليه وسلم وحدثه الرسول صلي الله عليه وسلم في الرؤيا عن هيكل الكلية ومن سيتولي أمر المكان الفلاني ومن سيتولي أمر المكان الفلاني وأخبره الرسول صلي الله عليه وسلم في الرؤيا أنه ستحدث مشكلة في هيكل الكلية وكان محتارا رحمه الله ماهذه المشكلة

وأي مشكلة وأي مصيبة ابتليت بها الكلية بعد وفاته رحمه الله

وكان ذاهب مع أخوانه في رحلة وقبل ذهابه حلم بالرسول صلي الله عليه وسلم وقال له الرسول صلي الله عليه وسلم (إنك ملاقينا) وأخبر أحد أخواننا بهذه الرؤيا والذي بدوره حكاها علي قبره

وقبل وفاته رحمه الله قام وصلي قيام اللليل بل هو من إيقظ اخوانه وصلوا جميعا الصبح جماعة ثم قرأ ورده ثم قالوا أذكار الصباح ثم نزلوا إلي الماء في حوالي السابعة لكي يبعدوا عن فتن الشاطئ وتراهات الناس فيه فغرق رحمه الله ونحتسبه عند الله من الشهداء بأذن الله

عن أبي هريرة ـ رضي الله عنه ـ قال : قال رسول الله صلى الله عليه و سلم : ما تعدون الشهيد فيكم ؟ قالوا : يا رسول الله من قتل في سبيل الله فهو شهيد ، قال : إن شهداء أمتي إذاً لقليل ! قالوا : فمن هم يا رسول الله ؟ قال : من قتل في سبيل الله فهو شهيد ، و من مات في سبيل الله فهو شهيد ، و من مات في الطاعون فهو شهيد ، و من مات في البطن فهو شهيد ، و الغريق شهيد ـ و في رواية ـ وصاحب الهدم شهيد )

من حديث أبي هريرة ـ رضي الله عنه ـ أن النبي صلى الله عليه و سلم قال : الشهداء خمس : المطعون ، و المبطون ، و الغريق ، و صاحب الهدم ، و الشهيد في سبيل الله )متفق عليه

وأحسبه والله ممن يستحقونها

فقد أخبرنا الرسول صلي الله عليه وسلم :(أن خيرنا من تعلم القرآن وعلمه)وهو رحمه الله كان حافظا وتاليا ومحفظا لكتاب الله

ووالله مقدار حزني عليه لايفوقه إلا حزني علي نفسي فمثل هذا والله يحزن علي فراقه فقط ولايخشي عليه باذن الله فالقرآن سيكون له مؤنسا والصلاة ستكون له مؤنسا وصومه سيكون له مؤنسا ودعوته إلي الله وجهاده للظالمين في كليته سيكون له شفيعا كل ذلك باذن الله وحده وهو كان محبا لربه ومحبا لرسوله صلي الله عليه وسلم

ولكن يجب أن نلتفت إلي أنفسنا وإلي أحوالنا مع الله

من منا صلي اللفجر اليوم من قام الليل من كانت الدعوة إلي الله شغله الشاغل ومن طلب العلم ومن جهر بقولة الحق ولو كانت في وجه ظالم ولو كانت ستودي بحتفه فما أجمل الحتوف في تلك المواقف من وصل رحمه من ومن ومن ومن.......................فالقائمة طويلة وأكبر من تحصي

يقول تعالي :(ومامنع الناس أن يؤمنوا إذ جاءهم الهدي ويستغفروا ربهم إلا أن تأتيهم سنة الاولين او يأتيهم العذاب قبلا ) وسنة الاولين هي الهلاك والموت

مامنعنا عن الالتزام بدين الله والجهاد في سبيله ومامنعنا عن كل مايرضي الله لما ننتظر دائماان تحدث مصيبة حتي نتعلم ونتحرك مع انفسنا ولكن عامة طالما أن الله لازال ممهلنا ولم يقبض أرواحنا فالله المستعان فلتشدوا الرحال من الان غلي دار ليس فيها وصب ولا نصب ولا تعب فيها نلقي الاحبة ونهنا معهم فاللهم أحشرنا فيها وقنا شرور دنيانا وباعد عنا الشيطان وشركه وحزبه وقنا الفتن ماظهر منها وما بطن

ولاتنسوا أخاكم سامح رحمه الله من الدعاء ولاتنسوني من دعائكم

والسلام

اليعقوبي

أحداث صنعت تاريخ وتاج ونداء إنساني

في استجابة سريعة لتعليق أمنا الفاضلة بستان الحب والتي قالت لي في االتعليق أن أتحدث عن أجزاء من كتاب أحداث صنعت تاريخ وأسردها لكم لذا قررت أن اتحدث اليوم عن حدث جلل وعظيم تم في مثل هذا اليوم
حدث في مثل هذا اليوم منذ ثلاثة وعشرون عاما وتحديدا في يوم الاحد الساعة الحداية عشر ليلا يوم 15/6/1986 و لاأقول أن السماء كانت ملبدة بالغيوم في ذلك اليوم كما يهيئ للبعض ن يقول ولكن أقول انه يوم من الايام الفاصلة في تاريخ الحضارة الحديثة
في مثل هذا اليوم ولد الفاتح اليعقوبي وخرج إلي شمس الدنيا واقفا علي قدميه أسدا كاسرا
هههههههههههههههههههه
بهزر طبعا ولكن اليوم فعلا هو يوم مولدي وقد أتممت اليوم ثلاثة وعشرون عاما وشعور غريب ينتابني في هذه السنة خصيصا ألا وهو شعور مرور الزمن بي سريعا وتتوالي الذكريات علي رأسي تترا واتذكر أمور د مضي عليها أكثر من 18عاما وترسخ في نفسي فعلا ان العمر يجري سريعا مسرعا فشكلي اليوم ليس كشكلي من بالامس وحالي الان ليس كحالي بالامس واهتمامتي وأهدافي كل شئ تغير
أنظر في ألبوم الصور القديمة ثم أنظر في المرأة فاقول هل هذا هو ذاك ،فأنا الان انهيت الكلية ودخلت الجيش وبقي أن انهي جيشي باذن الله واخرج الي الدنيا العملية
وأخاف أن استفيق من هذا اللهث وأنا علي فراش الموت وقد العمر بي سريعا
ولكن عامة كل سنة وانا طيب وربنا يخليني للامة
وطبعا نسيت أن اذكركم أن هذا اليوم هو كان يوم سعد علي ناس ويوم هباب علي ناس تانية شكلت لهم مثل العقدة في الحياة وهم من أمثال المارق المأسوف عليه مبكرا الجعفري وأمثاله
وشعاري دائما معه لايفل الحديد إلا الصفيح
ههههههههههههههههههه
مع تحياتي
عم الشباب والرياضة
ندخل في اللي بعد كده
..........................................................................
التاج
تاج ده وصلني من عم الشباب والرياضة(2)لاني طبعا أنا عم الشباب والرياضة رقم(1) وكان لازم أرد عليه عشان نخلص نفسنا لاأطيل عليكم
والآن مع التاج
من أنت ؟
حقا لاأعرف من أنا
ولكن الذي أعرفه اني شاب مسلم محب لدينه ووطنه
يتمني الشهادة في سبيل الله

وما الذى تفعله هنا ؟
أنا هنا ادون عسي الله يأجرني علي فعلي هذا فأنصح لاخواني وأدفع عن دين الله من يحاول النيل من ثوابته وأتواصل مع أخواني من كل التيارات ومن كل الاماكن
إسرائيل تقصف كل جنوب ممكن بحثا عنك ، أى شمال ستقصد؟
يارب أكون ممن تبحث عنهم إسرائيل لانهم عندما يبحثوا عني فبالتأكيد اني قد كدرت صفوهم وعامة وأنت داخل علي القدس علي شمالك وانت رايح علي الشيشان ستجدني هناك بأذن الله
أنت مكلف بحذف حرف من حروف اللغة العربية .. أيها ستختار ولماذا؟
إيه السؤال اللي ملوش لازمة ده يعني عايزيني أقول أيه
أنا مش هاجاوب أحسن عشان مزعلش حد مني

لو قدر لك أن تدخل السجن فما هي القضية التي تتمنى ان تدخل بها إليه؟
لان أعافي فأشكر خير من أبتلي فاصبر
ولكن عامة القضية التي اتمني الدخول بسببها السجن هي فتح دماغ الجعفري والتمثيل بجثته بعد فتح دماغه
وانا عارف انه هايدخل يغني ويهلل علي التعليقات بس سيبكم أنتم لايفل الحديد إلا الصفيح
بجد
لو قدر الله لي ذلك اتمني ان يكون في سبيل الله وبسبب نصرتي لدين الله


بالمناسبة.. منذ متى اكتشفت نفسك؟
عندما انتبهت أن هناك أشياء في حياتي أكبر من العبث واللهو الزائد عن الحد عندما من علي الله في أن ضمن كتائب الدعاة إلي الله فهنا فقط بدأت أغير توجهي ووجهتي فرأيت الحياة بشكل مختلف واجمل
يكفي ان يكون لك أخوة يحبوك في الله ليس لشئ ولكن رغبة في أن نصل سويا إلي رضا الله في النهاية
اكتشفت نفسي عندما بدأت أحس أن أمتنا تكالبت عليها كلاب الارض وصرخت بعلو صوتها من يدفعهم عني فما يكون لنا بعدها إلا تلبية النداء وإخراج كل مانملك من طاقات واموال وأفكار لنصرة شرع الله
ولكن صدقا أنا أحاول اكتشاف نفسي حق الاكتشاف حتي أخرج منها كل مايرضي ربها وينصر دينه
على مفترق طريق لافتتان، اليمنى تقول ( إلى حلمك ) واليسرى تقول : ( إلى مالم يحلم به البشر ) ، أي الطرق ستسلك ؟
هو الاول إيه هو حلم البشر عشن لو كان حاجة هاتسعد كل البشر كلهم نمشي فيها وأن كنت أري أن البشر الاسوياء يريدوا السلام الاستقرار الحب التواصل وكثير من المشاعر الجميلة وهي لاتجتمع إلا في الاسلام وحلمي الاكبر والذي قد لاأراه يتحقق هو أن يعم الاسلام الارض كلها دينا وخلقا وحكما
لذا سأسلك الطريق إلي حلمي لانه سيوصل في النهاية إلي حلم البشر وحلمي مجرد بداية الطريق
نحن لا نعيش حياتنا بل نتعلم فيها كيف نعيش ما تعليقك؟
مبحبش الفزلكة والفلسفة في الاسئلة
يعني إيه نحن لا نعيش حياتنا بل نتعلم فيها كيف نعيش
نحن نعيش حياتنا ونحن فيها نتعلم أمور كثيرة فيما يسمي بمدرسة الحياة
وبالله عليكم بلاش الفلسفة التي لامعني لها عشان الفلسفة دي بتتعب الدماغ وبتوهم صحابها أنهم مفكرين


بجملة واحدة فقط أكتب تعريفاً لكل كلمة من الكلمات التالية
الوطن
شعور غريب ينتابك وأنت فيه ،شعور بالحنين والشوق إليه لوابتعدت عنه وتتمني لو تأحذه في احضانك ولكن أراه لايمد ذراعيه إلي كما امدها إليه
يقول الشاعر:
وطني لو شغلت بالخلد عنه ...نازعتني إليه في الخلد نفسي
الام
حبها لك وحبك لها فطرة
الليل
اللليل بيمثلي حاجات كتيرة ولكنه بيمثل لي الان في تلك الايام (الخدمة)

الحب
شعور غريب يجتاح جوانبك فيخرج منك مالم تتخيل ان تفعل
أمريكا
خلاصة الاستعمار والظلم طوال التاريخ ،فهي خليط مابين الاحتلال الفرنسي والانجليزي والنازي
ولو دامت لغيرها ماكنتش وصلت لها
المرأة
مخلوق أكرهه عندما يكون تافه وبلا هدف وأقدره عندما يفهم مراد خلقه وهو مخلوق اجمل مافيه الحياء ويكون في أفضل حالاته عندما يعيش كامراة لا كمخلوق أخر

الصمت
شئ جميل وصون لعرض لسانك ولكنه يصبح مملا عندما يزيد عن حده
الانترنت
زي الكبريت والسكينة بس أجمل مافيه أنك بتشوف العالم في عشرين بوصة أو 17بوصة لو شاشتك صغيرة
اختر منصبا واتخذ قرار
رئيس الجمهورية ووقتها أعطي استقلال القضاء والازهر وخلي فقترة الرئاسة فترتين متتاليتين لازيادة عليهم وكل فترة 6سنوات حتي تعطي الفرصة كاملة للجميع
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟

لان الطبيعي ان الراجل هو اللي يجري ورا المراة مش العكس ومن اللي قال أنهم كانوا مغيبين ماهما خربوها علي دماغ اللي بيحبوهم وأشتغلوهم اشتغالة سودة يعني عبلة خلت عنتر يروح بلاد العرق عشان النوق الحمر والاهبل التاني اللي اسمه قيس انتحر أهو ده لوحده خروف كبير ضحكت عليه واحدة خلاص منفعش تتجوزها وأبوها رفض فكك منها في غيرها مليون انما تشرب السم والكلام اللي مبيأكلش عيش ده هبل
وبعدين مفيش ست تستاهل أن راجل ينتحر عشانها
أن تكون مطلوبا لارتكابك جريمة ، خير لك من ألا تكون مطلوباً مطلقاً " ، هل تتفق مع هذه العبارة ؟ علل
معاك يامعلم بس أنت حدد الميعاد ونروح ننط علي البنك ونأشفره ونبقي مطلوبين بجد وجداني
أنا عايز أعرف مين اللي عامل التاج ده
براحة علينا ياعم أرسين لو بين
-
إلى أين تمضي كلمات الحب .. بعد أن نقولها؟
أن كانت ترضي الله فستجد الله يأجرك عليها وإن كانت لغير الله فابحث عن حدثته بها ليأجرك عليها يوم لاملك ولا واحد ولا قهار إلا الله
هل تجد علاقة بشكل أو بآخر بين المرأة وقطاع الطرق ؟
مش عارف والله اسيب السؤال ده للناس اللي بتعلق
هذا فراق بيني وبينك .. متى ولمن تقولها؟
أقولها لكل من يحاول أن يأخرني عن علاقتي بالله اما متي فهذا يرجع لوقت الحدث والموقف نفسه
-
كيف هو غداً ؟
وغداً يفرح المؤمنون بنصر الله
لمن امرر هذا التاج ؟
الضاكتور خالد
محمد غاوي حرية
عمار البلتاجي
للدكتور توكل بعد مايخلص سلسلته إن عادوا فعد
ولأي حد عاوز التاج
........................................................................................
رايحين فين لسه البوست مخلصش
(نداء إلي ذوي القلوب الرحيمة من النساء)
بالله عليكم بالله عليكم بالله عليكم
أرحمونا من المناظر اللي بنشوفها الواحد خلاص قلبه وجعه مش عارفين نبص فين لو بصينا شمال ولا يمين نجد مناظر مش هاقول لاتسر عدو ولا حبيب ولكن هي مناظر لاتسر الله عز وجل
ياأخواتنا الحياء شعبة من شعب الايمان أبتلينا بعدم الحياء وأصبح حالنا يرثي له خلقيا
وكله كوم والعبايات السوداء دي كوم تاني اللي انتشرت في البلد بشكل كبير واللي لبسينها فاكرين نفسهم أنهم مستورين وهي في الحقيقة تشف ماتحتها
وبرضه انتشر موضوع النقاب الضيق والحجاب والنقاب الاصل فيهم أن لايشفوا ماتحتهم
واللي زاد وغطي أن الشاب عشان يتجوز دلوقتي بالميت محتاج عشرين ألف جنيه ده لو معاه شقة عشان العروسة واللي خلفوها ينبسطوا

حرام عليكم الشباب طفحوا خلاص
ولاحول ولا قوة إلا بالله
ربنا يرحمنا في الزمن ده

والسلام
اليعقوبي

تغيير جو

تحديث

الجعفري في تحد صارخ لعمه في الله بيقول لي لايفل الحديد إلا الحديد وربنا بيسلط أبدان علي ابدان

هو ده الجعفري الغلبان اللي قاعد أبو أخضر شوفوا كاشش أزاي

وفعلا لايفل الحديد إلا الصفيح

.............................................................................

السلام عليكم

في خطوة جادة لتغيير جو المدونة ولكسر الاتجاه العام السائر فيها قررت أني اكتب تدوينة نفك بها الجو ده شوية وهي مجموعة من الذكريات اللي مررت بها في حياتي طبعا قبل الالتزام وتمثل لي ذكريات جميلة ومواقف لم ينجيني منها إلا الله

طيب بلاش كلام كتير ندخل في المواقف

..........................................

الموقف الاول

(هوديكم القسم وأحبسكم)

كنت باخد مجموعة متميزة مع استاذ الفصل بتاع الرياضة وكان بيحبني جداا

أولا :عشان المجموعة المتميزة

وثانيا :لاني كنت شاطر جداا ولله الحمد في الرياضة

وكنت وقتها في أخر سنة في الاعدادية وكان الاستاذ ده عنده عيل كنا مستتقلين دمه وكان أصغر منا بسنتن و كان بيستخف دمه علي حس أبوه ففي مرة في الفسحة وكنا أربعة من نفس الفصل وكنا محمود ومسلم ومينا ويحي ولقينا الواد في وشنا علي سلم المدرسة

فالمهم سلمنا عليه وبدأنا نهزر معاه بس بغباوة وخلي أبوك يدينا اعمال السنة ياد وأقوله يخف علينا والواد بيضحك فقمت مكيله في وشه وبقوله بطل ضحك فالواد عيط وقم شاتم فقمنا مكيلين ليه أحنا الاربعة وضربناه جامد بس برضه قلبناها بهزار في الاخر وقلنا مش هانسيب الواد غير لما نصالحه وهو عشان يخلص مننا قال لنا أنه خلاص بقي كويس وسامحنا وبطل عياط ياحبيبي والكلام ده وخد المنديل أمسح وشك

فالمهم الواد خلع ورحنا علي الفصل ولقينا بعد كده الاستاذ ده طلع لنا الفصل بعد الفسحة وكانت حصة مش حصته ونادي علي أنا والتلاتة التانين وقلنا أيه اللي انتم عملتوه مع إيهاب ده قلنا كنا بنهزر معاه يااستاذ فقال لنا بتهزروا معاه الواد اتعور في وشه وجسمه ورم وحكي لنا حكاية طويلة عن الالام اللي بيعانيها ابنه الان

وقام قايل

يلا بينا علي المدير ،فاستاذن من استاذ الحصة وخدنا علي المدير

فالمدير بعتنا للناظر عشان كان في ايده شغل والناظر ثارت ثائرته وكان عايز يضربنا وبالفعل أحنا استعدينا للضرب أهم عصايتين ويعدوا

فلقينا الاستاذ بيقوله لا يااستاذ سامي متضربش حد فيهم أنا هاخد ايهاب وأعمله كشف طبي وأخرج اعملهم محضر واحبسهم وبعد كده وجه الكلام لينا أنا هاوديكم القسم وأحبسكم

فزملائي قعدوا يتحايلوا عليه خلاص يااستاذ أخر مرة والله ،وهو برضه مصمم وشوية يجروا علي الواد عشان يصالحوه وبرضه هو اللي معلق علي لسانه أنا هوديكم القسم وأحبسكم

وكل ده وأنا واقف لغاية دلوقتي شبه مرتبك مش مدي أي رد فعل

وبالفعل الاستاذ خرج علي أساس انه هايعمل اجراءات الحبس وحبسونا في غرفة الناظر لحين ظهور أي شئ أخر

وبعدها لقيت اتنين من اللي معايا

الاول يحي وعمل مجنون وقتها وعمل نفسه كأنه بيعيط واتجنن وعمال يرمي نفسه علي الارض ويعيط ولما أبصله الاقيه يضحك في الخباثة والتاني مينا القبها منوحة وقعد الارض وقعد زي اللي غرقت أرضه وعمال يقول يا مُرك يامينا وياحزنك يامينا وعياط جامد من الاتنين مينا ويحي بقي وصدقوا بجد أنه هايعمل كده

فأنا شوفت المنظر ده وهاتك ياضحك في غرفة الناظر أنا ومسلم (بضم الميم وفتح اللام) والناظر يقول لي يابني أنت مش خايف ده راح يعمل محضر أقول له مش هايعمل حاجة أنا عارف كله كلام وخلاص وكان في نفس المكتب الناظرة التانية بتاعت المدرسة بدأت تضحك لضحكي ويحي ده سخن أكتر في الجنان وقعد يغير في ملامح وشه كأنه بيعيط ولما أبصله ويشوفني جتلي هيسترية ضحك يقوم ضاحك فالابلة تقولي بتضحكوا دا أنتم هاتتحبسوا كمان شوية فيقلب يحي وشه تاني ويعيط ومينا فرش نفسه في الارض وقعد يولول والاستاذ دخل علينا بعدها شافني شكلي كان ميت من الضحك وقلت خلاص يااستاذ حمدي واتحيلت عليه شوية لحد لما سامحنا ووافق بس اننا ناكل عصايتين تلاتة نكالا بما فعلنا

وطبعا الثبات اللي كان عندي ده كان بسبب بعض الامور

أولها أن أبويا كان نائب رئيس مجلس الاباء وقتها ومدير المدرسة والناظر صحابه والمدرس ده نفسه صحبه فمكنش هايقدر يعملي حاجة

تاني حاجة أنا حسيت أنه بيعمل علينا فيلم لاني حافظ الاستاذ ده كويس

تالت شئ وهو المهم أنه كان نوعا ما بيحب الفلوس وأنا كنت باخد معاه مجموعة متميزة فلما يحبسني مين اللي هايقبضه أخر الشهر

....................................................

الموقف التاني

(جواب فصل نهائي من التعليم)

في تانية ثانوي كنت بتكلم في الحصة أنا واربعة زملائي فلقيت الاستاذ قام موقفني وقام رزعني عصايتين وكان اليوم برد جدااااا وكانت ايدي ناشفة فالعصايتين سمعوا في نافوخي وقام ضرب معايا برضه صاحبي اللي قلت لكم عليه في الموقف الاول اللي هو (مسلم ) والباقين قعدوا يضحكوا علينا في الخباثة فقمت قلت للاستاذ زي ماضربتني أنا ومسلم أضرب التلاتة التانين فقال لي أقعد مكانك ولو اتكلمت تاني هاضربك تاني

فقعدت فصحابي استفزوني تاني

فعدت عليه نفش الكلام زي ماضربتني أنا ومسلم أضربهم هما كمان

فما كان منه إلا أنه نزل علي جسمي بالعصايا فقمت واخد العصايا منه وراميها وزحت الدكة اللي بنكتب عليه (الديسك عندنا قطعتين دكة بنكتب عليها ومقعد بنقعد عليه ) وقمت مكلبش فيه وزنقته في الحيطة وكنت لسه هانوله في وشه لقيت الفصل كله عمال يغني يلا ياعز أديله ياعز يلا ياعز أديله ياعز فلقيت الاستاذ بيقولي أنت عايز تضربني أتفضل اطلع بره فقلت له طالع وسيبهالك وقمت واخد الشنطة وماشي من المدرسة كلها

وكان تاني يوم عندنا أجازة أربع أيام نيجي السبت أول الاسبوع الجاي بس قبل ما أمشي لقيت الاستاذ بيقولي أنا هاوريك فقلت له أعمل اللي انت عايزه

وطبعا الدنيا غمقت وخفت ليرفدني من المدرسة فكنت باخد درس كيمياء مع أستاذ من مديري المدرسة فحكيت له اللي حصل فقال لي بص لما ترجع أبقي أقوله أستاذ مأمون بيقولك خلاص يااستاذ حسين الموضوع انتهي

فقلت له لا أنا مقدرش أقوله كده يعني أبقي عمل فيه ده كله وبعدين اقوله استاذ مأمون بيقولك خلاص ده كان يتجن عليا

قوله أنت كده فقال لي للاسف أنا في دورة دلوقتي ومش هاجي المدرسة دلوقتي خالص

فما كان من الاستاذ مأمون مدرس الكيمياء إلا أنه اعطاني ورقة مفادها أن الاستاذ حسين يعدي الموضوع

ورجعت المدرسة وأول مارجعت أعطيت الاستاذ حسين الورقة اللي أعطاها لي الاستاذ مأمون فنرفزته أكتر مني ولقيته بيقولي يعني أنت تعديت علي استاذك وكمان جيبلي واسطة بتقولي فوت ياحسين

أنا هاوريك

وعندنا في المدرسة كل دور له مدير لان المدرسة كانت كبيرة أوي وعدت الحصة الاولي

وبين الحصة والاولي والتانية لقيت مدير المدرسة كلها بعتلي فقلت بس جالك الموت ياتارك الصلاة

ودخلت مكتب المدير فوجدت أستاذ حسين اللي أنا عملت معاه المشكلة فسبق هو بالكلام وقال لمدير المدرسة هو ده الطالب اللي تعدي عليا في الفصل فدافعت عن نفسي وحكيت لمدير المدرسة اللي حصل وأنه ضربني بالعصايا علي جسمي

فلقيت مدير المدرسة بيقولي قرب لي يا محمود فقربت ولقيته بيكتب جواب فصل

فقال لي تعرف ده إيه قلت له لا

قال ده جواب فصل نهائي من التعليم يعني متجيش المدرسة تاني خالص أنت تعليمك هايقف لحد كده وتجيب أبوك عشان يستلم ورقك من الادارة فقلت له حاضر

فقال لي يلا بقي بسرعة هات شنطتك من الفصل ويلا علي البيت ومتنساش تجيب أبوك بكرة

فقلت له حاضر وأنا مش دماغي حاجة خالص

فرجعت البيت وكان يوم سبت وهو يوم أجازة عند شغل والدتي فرجعت البيت حوالي الساعة عشرة فهي لقتني في وشها فقالت لي أنت إيه اللي جابك بدري كده وكانت بتقشر كوسة عشان الغداء فقلت لها أدوني فصل نهائي من التعليم فقامت رقعة بالصوت وقمت شدا السكينة ورفعتها عليا فجريت علي برة الشقة وطبعا هي مجريتش ورايا فقالت لي تعالي

وقعدت فهمت مني اللي حصل وقالت لي روح لاستاذ العربي اللي بتاخد معاه درس بتاعك وبالفعل كلمته ورجعت المدرسة وصالحني علي أستاذ العربي بتاع الفصل والحمد لله الفصل من التعليم وقف ومكملش

......................................................

الواحد لما بيفتكر الذكريات الاليمة بتاعة الدراسة والواحد كان وحش أزاي بيبص لحاله دلوقتي فبقول الحمد لله أنه هداني لاقرب من هذا رشدا

لاأقول أني شيخ المشايخ الان ولكني أخطئ أحيانا وأصيب أحيانا ولكن الفرق بين الامس واليوم هو أني الان إذا أخطأت الان علمت أني مخطئ فأحاول أن أرجع

وبالامس لم أكن أبالي كثيرا ولا قليلا بما يحدث

وشعور اخر ينتابني عند تذكر هذه الذكريات أن العمر يمر سريعا جداااا بل أسرع مما نتخيل أو نتصور فهذه الذكريات كأنها كانت البارحة وليس كأنها مر عليها أكثر من سبع سنوات أو أكثر

علي الرغم من هذه الذكريات التي كلما أتذكرها أظل أضحك إ إني لااتمني الرجوع لتلك الايام فكثيرا مايحمل لنا الماضي ذكريات شبه جميلة أو سعيدة ولكن بحاضرنا وشخصياتنا الان نرفضها ونشجبها إذا فعلها غيرنا الان

وأعتذر علي التأخر في الرد للظروف التي تعلموها فقط أدعو الله لي

والسلام

اليعقوبي